Mga Tigtagna sa mga Hitabo—Sa Unsang Paagi Sila Giisip sa Diyos?
ANG mga tigtagna sa mga hitabo maoy mga tawo nga nag-angkong adunay katakos sa pagtagna kon unsay mahitabo sa umaabot, nga lakip kanila ginganlan sa Bibliya ang salamangkerong mga saserdote, espiritistikanhong mga tigpanagna, mga astrologo, ug uban pa. Ang Hebreohanong pulong nga yid·de‘o·niʹ, nga gihubad ug “propesyonal nga tigtagna sa mga hitabo,” naggikan sa ya·dha‘ʹ (pagkahibalo) ug nagpasabot ug kahibalo nga natago sa ordinaryong tawo. Kini kanunayng makita nga kauban sa ʼohv, nga nagkahulogang “espiritista.” (Deuteronomio 18:11) Ang pipila ka tawo adunay mga gahom sa okulto gumikan sa ilang pakigkontak sa mga demonyo, ang daotang mga manulonda nga kaaway sa Diyos ilalom kang Satanas nga Yawa, nga mao ang magmamando sa mga demonyo. (Lucas 11:14-20) Sa karaang kapanahonan ang lainlaing mga paagi gigamit niining maong mga tigtagna aron makabaton sa ilang mga mensahe sa panagna: pagpaniid sa mga bituon (Isaias 47:13), pagsusi sa atay ug ubang mga ginhawaan sa gihalad nga mga mananap (Ezekiel 21:21), paghubad sa mga tilimad-on (2 Hari 21:6), pagkonsulta sa gitawag nga espiritu sa mga patay, ug uban pa.—Deuteronomio 18:11.
Ang kinabuhi sa mga Ehiptohanon, sama sa kinabuhi sa mga Babilonyanhon, gimandoan sa dakong bahin sa ilang mga manalagna. (Isaias 19:3) Sa laing bahin, ang matuod nga mga alagad sa Diyos dili gayod moliso sa maong mga tawo alang sa impormasyon. Sa dihang ang Kasugoan gihatag sa Israel wala madugay human sila mapagawas gikan sa pagkaulipon sa Ehipto, sila estriktong gidid-an sa pagkonsulta sa “propesyonal nga mga tigtagna sa mga hitabo.” (Levitico 19:31) Ang pagbaton ug “imoral nga pakiglabot” uban kanila moresulta sa pagkaputol (diha sa kamatayon) gikan sa taliwala sa katawhan sa Diyos. Ug bahin sa usa nga nagahimo sa maong buhat, ang kasugoan mipadayon sa pag-ingon: “Mahitungod sa usa ka lalaki o babaye nga espiritista o tigtagna, kinahanglan gayod silang patyon.” (Levitico 20:6, 27) Duolan sa 40 ka tuig sa ulahi, sa dihang andam na aron mosulod sa Yutang Saad ug sa pagpapahawa sa mga molupyo niini, ang Israel gipahinumdoman: “Kinahanglang dili kamo magtuon sa pagbuhat ingon sa dulumtanang mga butang niadtong mga nasora. Kinahanglang walay makaplagan diha kaninyo . . . nga bisan kinsa nga mokonsulta sa espiritista o sa usa ka propesyonal nga tigtagna sa mga hitabo o si bisan kinsa nga mangutana sa mga patay.”—Deuteronomio 18:9-11.
Kapin sa 350 ka tuig sa ulahi, ang unang hari sa Israel, si Saul, nagpapatay sa tanang tigtagna sa mga hitabo sa yuta, apan una siya mamatay siya nahilayo na pag-ayo gikan ni Jehova nga siya personal nga nangita sa “usa ka babayeng espiritista sa En-dor” aron pagtagna sa iyang umaabot. Sa sinugdan nahadlok siya sa pagtagna, apan sa pagpamugos ni Saul nga iyang “patunghaon si Samuel,” iyang gipatungha ang usa ka panan-awon. Gibatbat niya ang dagway niini nga ‘usa ka tigulang nga tawo nga nagsul-ob ug walay bukton nga kupo.’ Si Saul nakombinsir nga kadto mao ang propetang si Samuel. (1 Samuel 28:3, 7-19) Apan dili gayod kadto mao si Samuel, tungod kay siya patay na, ug ang mga patay “walay nahibaloan nga bisan unsa.” (Ecclesiastes 9:5) Si Samuel, sa buhi pa, tinong dili makiglabot sa usa ka espiritista, ug si Jehova nga Diyos ug ang iyang balaang mga manulonda dili gayod motabang nianang maong espiritista.
Duolan sa 400 ka tuig human sa paghari ni Saul, si Haring Manases sa Juda “naghimo ug daghang kadaotan sa panan-aw ni Jehova, sa pagpasuko kaniya,” lakip na ang pagkonsulta sa propesyonal nga mga tigtagna sa mga hitabo, nga midaghan ilalom sa iyang pagmando. (2 Hari 21:6; 2 Cronicas 33:6) Kining tanan kinahanglang paphaon gikan sa yuta sa apo ni Manases, ang matarong nga Haring Josias.—2 Hari 23:24.
Ang bugtong paghisgot diha sa Kristohanong Gregong Kasulatan bahin sa demonyohanong pagtagna sa umaabot mao ang hitabo diin si apostol Pablo, didto sa siyudad sa Filipos, nagpahigawas sa “usa ka sulogoong babaye nga may espiritu, usa ka demonyo sa pagpanagna.” Siya naghatag sa iyang mga agalon ug dakong kinitaan “pinaagig paggamit sa pamaagi sa pagpanag-an.” Nga nagpasundayag sa kamatuoran nga ang maong buhat tinuod nga demonyohanon ug supak gayod sa Diyos, ang mga agalon sa babaye diin gipagula ang demonyo nagpahinabog daghang suliran kang Pablo sa Filipos, nga nagtaral kang Pablo ug sa iyang kauban nga si Silas atubangan sa mga mahistrado, nga misugo nga bunalan sila ug unya ibalhog sila ngadto sa bilanggoan.—Buhat 16:12, 16-24.