Mga Saksi ni Jehova sa Tibuok Kalibotan—Brazil
ANG Brazil maoy usa ka higanteng yuta sa daghang bahin. Sa gidak-on ug sa populasyon, kini mao ang ikalima sa labing dakong nasod sa kalibotan. Giokupar niini ang halos katunga nga luna sa yuta sa Amerika del Sur ug mas daghag populasyon kay sa tanang ubang mga nasod niana nga kontinente kon tiponon. Ang Brazil usab adunay labing dakong tropikal nga lasang sa kalibotan. Diha nianang lasanga nag-agay ang labing dakong suba sa yuta—ang Amazon.
Ang Brazil higante usab sa laing diwa. Ang gidaghanon sa mga magmamantala niini sa maayong balita sa Gingharian sa Diyos hapit nang moabot sa 400,000, ug sa miaging tuig kapin sa 1,000,000 ang mitambong sa Memoryal sa kamatayon ni Kristo. Kining yutaa sa ingon ilabinang nangibabaw kon bahin na sa buluhaton sa pagsangyaw sa Gingharian. Giilustrar kining puntoha sa di pa dugayng mga eksperyensiya.
Nag-alagad sa Dapit nga Dako ang Panginahanglan
Si Antonio ug ang iyang asawa mihimog malisod nga desisyon sa pagbiya sa ilang mga paryente ug sa may kasegurohan, dakog-suweldo nga trabaho sa São Paulo aron sa pag-alagad sa dapit nga dako ang panginahanglag mga magwawali sa Gingharian sa estado sa Minas Gerais. Lakip sa ilang teritoryo mao ang kolonya sa mga trabahante sa intosan sa tubo. Sa ilang unang adlaw sa pagsangyaw didto, sila nakasugod ug siyam ka pagtuon sa Bibliya. Sulod sa 18 ka bulan, sila nagdumalag kapin sa 40 ka pagtuon!
Sa sinugdan, ang mga tigom gihimo diha mismo sa intosan. Apan, ang bag-ong mga magmamantala gustong makakita ug tinuod nga Kingdom Hall. Busa, usa ka bus ang giabangan aron sa pagdala sa 75 ka tawo ngadto sa labing duol nga kongregasyon. Unya miabot ang kombensiyon; 45 sa bag-ong mga estudyante sa Bibliya ang mitambong ug giinterbiyo. Napulog-lima kanila ang gibawtismohan niadtong okasyona. Siyempre, mitubod ang mga luha sa kalipay!
Ang mao gihapong kompaniya sa bus ang gigamit sa susamang mga biyahe, ug ang mga opisyal mihatag ug diskuwento sa pletehan. Agig apresasyon, gipresentar ni Antonio sa tag-iya sa kompaniya sa bus ang usa ka giya sa pagtuon sa Bibliya. Siya misugot sa pagsugod sa pagtuon sa Bibliya niana mismong gabhiona ug gibawtismohan sa paglabay sa pipila ka bulan sa kugi nga pagtuon. Sa sinugdan, ang iyang asawa misupak sa pagtuon, apan sa ulahi, mikalma ang iyang tinamdan. Karon ang asawa bawtismado na usab nga Saksi ni Jehova.
Niadtong Pebrero 1992 usa ka kongregasyon nga may 22 ka aktibong mga magmamantala ang natukod. Sa pagka-1994 kining gidaghanona mitubo ngadto sa 42, nga may 4 ka regular payunir, o bug-os panahong mga magsasangyaw sa maayong balita. Tungod niini, si Antonio mihinapos: “Ako ug ang akong asawa nakakita nga kon atong ‘sulayan si Jehova,’ ingon sa gipamulong sa Malakias 3:10, siya ‘magabubo kanato ug panalangin hangtod nga wala na unyay panginahanglan.’”
Pagtanyag ug Basahon sa Bibliya
Tingali ang laing katarongan kon nganong nagmauswagon kaayo ang buluhatong pagsangyaw sa Brazil mao nga ang mga Saksi nagtanyag ug basahon sa Bibliya sa tanang higayon. Pananglitan, usa ka kongregasyon misulat sa sangang buhatan sa Watch Tower Society nga naghangyo ug 250 ka kopya sa librong Mga Pangutanang Gisukna sa mga Batan-on—Mga Tubag nga Mosaler. Nganong daghan kaayo ang gipidido?
Ang sulat nagsaysay: ‘Ang usa sa mga eskuylahan sa lungsod nakahukom sa paggamit niining libroha ingong materyal sa pagtudlo sa usa sa mga klase. Ang desisyon sa mga awtoridad sa eskuylahan maoy tungod sa impormal nga pagsangyaw nga gihimo sa mga ginikanan sa mga estudyanteng mga Saksi ni Jehova ug sa usa sa mga superbisor sa eskuylahan. Hinaot nga magpadayon si Jehova sa pagpanalangin sa iyang mga alagad samtang nagahatag sila ug maayong pagtudlo uban niining libroha.’ Oo, ug hinaot nga magpadayon si Jehova sa pagpanalangin sa maayong kauswagan sa buluhaton sa pagsangyaw sa Gingharian diha sa higanteng yuta sa Brazil.
[Kahon sa panid 8]
LARAWAN SA NASOD
1994 Tuig sa Pag-alagad
KINATAS-ANG GIDAGHANONG NAGSANGYAW: 385,099
PROPORSIYON: 1 ka Saksi sa 404
TUMATAMBONG SA MEMORYAL: 1,018,210
ABERIDS NGA PAYUNIR NGA MGA MAGMAMANTALA: 38,348
ABERIDS NGA PAGTUON SA BIBLIYA: 461,343
GIDAGHANON SA NABAWTISMOHAN: 24,634
GIDAGHANON SA MGA KONGREGASYON: 5,928
SANGANG BUHATAN: CESÁRIO LANGE
[Hulagway sa panid 9]
Sakyanan nga may trompa sa São Paulo sa mga 1940
[Hulagway sa panid 9]
Nagsangyaw sa Botanical Garden sa Rio de Janeiro
[Hulagway sa panid 9]
Sangang buhatan sa Cesário Lange