Pagpalagpot—Usa ka Mahigugmaong Tagana?

“BALAAN, balaan, balaan si Jehova nga Diyos, ang Labing-Gamhanan.” (Pinadayag 4:8) Uyon niana nga kahubitan, si Jehova mao ang Tuboran sa balaang mga sukdanan. Kini gilatid diha “sa balaang mga sinulat,” ug ang mga Kristohanon obligado sa pagsunod niini nga mga giya. Sa pagkatinuod, kinahanglang ilang likayan ang bisan unsang butang nga mahugaw sa mga mata ni Jehova.​—2 Timoteo 3:15; Isaias 52:11.

Ang Bibliya tin-awng nagsugo: “Kauyon sa Balaang Usa nga mitawag kaninyo, magmabalaan usab kamo sa tanan ninyong mga panggawi, tungod kay kini nahisulat: ‘Kinahanglan kamong magmabalaan, tungod kay ako balaan.’” (1 Pedro 1:15, 16) Sukad natukod ang Kristohanong kongregasyon sa milabayng 19 ka siglo, ang matuod nga mga Kristohanon nagpakigbisog na sa pagpanalipod niini gikan sa espirituwal ug moral nga kahugawan.​—Judas 3.

Kon Nganong ang Panalipod Kinahanglanon

Ang tanang mga alagad sa Diyos nagaatubang sa hagit sa pagpabiling mahinlo sa moral ug sa espirituwal. Tungod niini, tulo ka gamhanang mga kaaway ang kinahanglang pakigbisogan​—si Satanas, iyang kalibotan, ug ang atong makasasala unodnong mga hilig. (Roma 5:12; 2 Corinto 2:11; 1 Juan 5:19) Tentalon ka sa kalibotan ni Satanas nga mahimong imoral, hayloon ka sa pagsagop sa mga paagi niini, ug tanyagan ka ug materyal nga bahandi, dungog, posisyon, pagkainila, ug gahom. Apan kadtong hugot nga mangagpas sa matuod nga pagsimba mosukol sa ginatanyag ni Satanas ug magpabiling ‘walay buling sa kalibotan.’ Ngano? Tungod kay buot nilang magpabiling ubos sa mapanalipdanon ug mahigugmaong pag-atiman sa mahinlong organisasyon ni Jehova.​—Santiago 1:27; 1 Juan 2:15-17.

Si Jehova nagtagana ug tabang alang sa tanang membro sa Kristohanong kongregasyon nga mabiktima sa mga tentasyon ni Satanas tungod sa tawhanong kahuyangan. Ang kuwalipikado sa espirituwal nga mga ansiano gitudlo sa pagpanalipod sa kongregasyon ug mahigugmaong nagatabang sa mga nakasala sa paghinulsol sa ilang sala ug sa paghimog gikinahanglang mga kausaban aron mapasig-uli. Ang si bisan kinsa nga Kristohanon nga malangkit sa buhat nga daotan angayng mapailobong tabangan aron maghinulsol ug magbag-o sa iyang mga dalan.​—Galacia 6:1, 2; Santiago 5:13-16.

Kon sa Unsang Paagi Mahigugmaon ang Pagpalagpot

Ang bawtismadong mga alagad ni Jehova nga motuyo sa pagsubay sa daotang dalan ug modumili sa pagbag-o kinahanglang lantawon ingong dili mahinulsolon ug busa dili takos sa Kristohanong panag-ubanay. (Itandi ang 1 Juan 2:19.) Ang maong mga indibiduwal dili tugotan nga magpabilin diha sa mahinlo Kristohanong kongregasyon ug sa ingon maghugaw niana. Sila kinahanglang palagpoton.

Ang pagkaangayan sa pagpalagpot niadtong kinsa nagahimog daotang mga buhat ikailustrar sa mosunod nga situwasyon: Tungod sa pagdaghan sa mga pag-atake ug mapintas nga krimen batok sa mga estudyante, ang pipila ka mga tunghaan misagop sa usa ka polisa nga “nagpangayog tibuok-kinabuhi nga pagpalagpot sa mga estudyante nga mogamit o manghulga sa paggamit ug mga hinagiban,” nagtaho ang The Globe and Mail, usa ka mantalaan sa Toronto, Canada. Ang pagpalagpot gibuhat sa pagpanalipod sa mga estudyante nga buot makabenepisyo sa edukasyonal nga programa nga dili mailalom sa mapintas nga mga buhat.

Nganong mahigugmaon ang pagpalagpot sa usa ka dili mahinulsolong mamumuhat ug daotan gikan sa kongregasyon? Ang pagbuhat niana maoy usa ka ekspresyon sa gugma ni Jehova ug sa iyang mga dalan. (Salmo 97:10) Kining aksiyona nagpakita ug gugma alang niadtong nagpadayon diha sa matarong nga dalan tungod kay nagkuha kini diha sa ilang taliwala sa usa nga nagpakitag dili maayong impluwensiya kanila. Kini magpanalipod usab sa kahinlo sa kongregasyon. (1 Corinto 5:1-13) Kon tugotang magpabilin ang grabeng imoralidad o espirituwal nga kahugawan diha sa kongregasyon, kini mahimong mahugawan ug mahimong dili takos sa pagtanyag ug sagradong pag-alagad kang Jehova, kinsa balaan. Dugang pa, ang pagpalagpot sa mamumuhat ug daotan basig makatabang kaniya sa pagkakita sa pagkaseryoso sa iyang balikong dalan, maghinulsol, ug maghimog gikinahanglang mga kausaban ug sa ingon pagadawaton ug balik sa kongregasyon.

Ang Epekto Diha sa Uban

Kon ang usa ka membro sa kongregasyon makahimog seryosong sala, sama sa pagpanapaw, wala niya lipaya ang kasingkasing ni Jehova. (Proverbio 27:11) Ang bisan kinsang Kristohanon nga nagpadaog sa seksuwal nga imoralidad dayag nga wala maghunahuna sama sa gihunahuna ni Jose sa dihang misulay ang asawa ni Potiphar sa pagdani kang Jose aron makigsekso kaniya. Ang tubag ni Jose mao: “Unsaon ko paghimo kining dakong pagkadaotan ug makasala batok sa Diyos?” (Genesis 39:6-12) Gitahod ni Jose ang balaang mga sukdanan ni Jehova ug mikalagiw sa situwasyon. Sa laing bahin, ang usa ka mananapaw daw walay igong gugma alang sa Diyos aron dumilian ang pagtagbaw sa iyang unodnong pangibog.​—Galacia 5:19-21.

Ang bawtismadong tawo nga maglapas sa kasugoan sa Diyos wala magpadayag ug kabalaka bahin sa kadaot ug kasakit nga iyang ipahinabo diha sa iyang magtutuong mga paryente. Ang epekto sa emosyon dili maantos sa pipila. Human nakadiskobre nga imoral ang iyang anak nga lalaki, usa ka Kristohanong babaye nagmahay: “Kon aduna man, diyutay ra kaayong mga igsoong lalaki ug babaye ang daw nakasabot kon unsa ka dako sa among kasakit ug kagun-oban. . . . Nadugmok ang among kasingkasing.” Ang maayong ngalan sa tibuok pamilya tingalig pagaduhaduhaan. Ang depresyon ug ang pagbati nga sad-an hayan mosakit sa matinumanong mga membro. Ang daotang dalan sa mamumuhat ug daotan sa ingon naghatag kasubo sa pamilya.

Mahigugmaong Tabang Alang sa mga Membro sa Pamilya

Ang matinumanon Kristohanong mga membro sa pamilya sa gipalagpot nga mga indibiduwal kinahanglang mahinumdom nga ang pagpalagpot maoy mahigugmaon ug mapanalipdanon. Ang matag posibleng paningkamot gihimo sa pagtabang sa mamumuhat ug daotan. Apan kon siya magpadayon nga dili magmasinugtanon sa Diyos ug sa kagahig-ulo dili maghinulsol, ang kongregasyon kinahanglang mapanalipdan ug walay kapilian gawas sa paglihok sumala sa pagtultol sa Pulong sa Diyos: “Kuhaa ang tawo nga tuman-kadaotan gikan sa inyong taliwala.” (1 Corinto 5:13) Sama sa giingon sa usa ka Saksi, “ang pagpalagpot maoy labot sa pagkamaunongon kang Jehova.”

Sa dihang ipalagpot ang usa ka membro sa pamilya, ang Kristohanong mga paryente makasinatig kasakit. Busa ang tinudlong mga ansiano maningkamot gayod kutob sa ilang mahimo nga makapalig-on sa espirituwal ngadto kanila. (1 Tesalonica 5:14) Ang mga ansiano makaampo alang kanila ug uban kanila. Sagad mahimo nga duawon kining matinumanong mga Kristohanon aron hisgotan ang makapadasig nga mga hunahuna sa Kasulatan. Angay gamiton sa mga magbalantay sa panon ang tanang higayon sa pagpalig-on niining mga minahal sa espirituwal nga paagi sa dili pa ug human sa Kristohanong mga tigom. Dugang nga pagdasig mahimong ihatag pinaagi sa pag-uban kanila diha sa pag-alagad sa kanataran. (Roma 1:11, 12) Ang espirituwal nga mga magbalantay kinahanglang magpakita niining matinumanong mga alagad ni Jehova ug gugma ug pagtagad nga takos kanila.​—1 Tesalonica 2:7, 8.

Ang makasasalang dalan sa usa ka tawo dili katarongan sa dili pagtagad kang bisan kinsa diha sa iyang pamilya nga nagpabiling matinumanon kang Jehova. Gisalikway sa Diyos ang daotang Haring Saul sa Israel, apan wala itugot ni David nga kini makababag sa iyang kaugalingong pagmahal sa anak ni Saul nga si Jonathan. Sa pagkatinuod, ang bugkos tali ni David ug Jonathan nalig-on pag-ayo. (1 Samuel 15:22, 23; 18:1-3; 20:41) Busa ang tanan diha sa kongregasyon angayng magmapaluyohon ug mahigugmaon ngadto sa mga Kristohanon kansang mga paryente nakasala batok kang Jehova.

Pagkadili-mahigugmaon kon dili tagdon o dili magmaluloy-on ngadto niining mga matinumanon! Ang maunongong mga membro sa pamilya adunay linaing panginahanglan alang sa pagdasig. Basin sila mobating nag-inusara ug nakakaplag sa ilang situwasyon nga malisod kaayo. Tingali ikaw makapaambit ug espirituwal nga mutya o makapalig-ong kasinatian kanila pinaagig telepono. Kon ang gipalagpot nga tawo ang motubag sa telepono, yanong hangyoa nga makigsulti ka sa Kristohanong paryente. Makadapit ka tingalig matinumanong mga membro nianang panimalaya sa usa ka salosalo o pangaon sa imong balay. Kon masugatan mo sila samtang namalit, mahimong gamiton mo kining okasyona alang sa pipila ka makapalig-ong pag-ubanay. Hinumdomi, ang maunongong mga Kristohanon nga may gipalagpot nga mga paryente bahin gihapon sa mahinlong organisasyon ni Jehova. Sila makiling nga magpalain o maluya dayon. Busa, magmaalerto sa pagpakita kanilag kalulot ug gugma. Padayon sa pagbuhat ug maayo ‘ngadto sa tanan kanilang labot kanimo sa pagtuo.’​—Galacia 6:10.

Pabilhi ang Tagana ni Jehova

Pagkamapasalamaton nato nga si Jehova nga Diyos nagpakitag malumong kabalaka alang sa matag usa diha sa tibuok-yutang pamilya sa iyang mga magsisimba. Pinaagi sa iyang organisasyon mahigugmaon niyang gitagana ang kahikayan sa pagtabang kanato sa paglakaw atubangan niya sa matarong nga dalan. Bisan kon ang usa ka membro sa pamilya motuyo sa pagbatasan sa sala ug kinahanglang ipalagpot gikan sa kongregasyon, adunay paagi sa pagbalik kon siya tinuod nga mahinulsolon. Kini giilustrar sa mosunod nga pananglitan:

Ang mga ansiano naningkamot sa pagtabang sa usa ka tawo nga atong nganlan ug Anna, apan siya miliso sa pagtabako, paghuboghubog, ug sa gidiling mga droga. Siya dili mahinulsolon ug wala magpabilin diha sa kongregasyon. Apan, wala magdugay, si Anna gimingaw sa mahigugmaong panag-ubanay sa mahinlong kongregasyon ni Jehova ug miampo kaniya alang sa tabang. Siya miadmiter nga wala niya bug-os pabilhi kon unsa ka dako sa pagtagad sa mga ansiano ngadto sa mga tawong nahisalaag. Si Anna misugod sa pagtambong pag-usab sa mga tigom, ug kini mitultol sa paghinulsol. Human niadto, siya gidawat pag-usab sa mahigugmaon ug mapanalipdanong kongregasyon. Sa makausa pa, giampingan ni Anna ang taas nga sukdanan ni Jehova sa moralidad. Siya mapasalamaton sa gugmang gipakita sa mga ansiano ug usab mikomento: “Dili nimo mahanduraw kon unsa ka dakong tabang ang Kristohanong mga publikasyon kanako. Si Jehova tinuod gayod nga nagaatiman sa atong mga panginahanglan.”

Oo, gitagana sa Diyos ang paagi nga makabalik kadtong kinsa gipalagpot gikan sa kongregasyon apan sa ulahi maghinulsol. Atong nakita nga bisan ang pagpalagpot mismo maoy usa ka mahigugmaong tagana. Apan pagkalabing maayo nga likayan kining makapasubong kasinatian pinaagi sa pagpabilin kanunay diha sa matarong nga mga dalan sa atong balaang Diyos! Hinaot nga magmapasalamaton kita kanunay sa pribilehiyo sa pagdayeg kang Jehova ingong bahin sa iyang mahinlo, mahigugmaon, ug mapanalipdanong organisasyon.

[Hulagway sa panid 26]

Nagpakita ka ba ug gugma ngadto sa matinumanong mga paryente niadtong gipalagpot sa kongregasyon?