“Nangatumba, Apan Wala Malaglag”
SUMALA SA GIASOY NI ULF HELGESSON
Niadtong Hulyo 1983, ang mga doktor nga nag-apong kanako misinggit: “Nagmata na siya!” Usa ka 12 sentimetros-gitas-on nga tumor ang gikuha gikan sa akong taludtod sa usa ka makuti 15-oras nga operasyon. Bug-os akong naparalisar.
PIPILA ka adlaw sa ulahi, gibalhin ako ngadto sa usa ka ospital nga duolan sa 60 kilometros gikan sa akong lungsod sa Hälsingborg, sa habagatang Sweden. Didto miapil ako sa usa ka programa sa pagpahiuli. Ang pisioterapista miingon nga kadto maoy hago kaayo, bisan pa niana gusto na akong magsugod. Gusto gayod nakong makalakaw pag-usab. Pinaagi sa makugihong pagsunod sa usa ka lima-ka-oras-kada-adlaw nga programa sa ehersisyo, kusog ang akong pag-uswag.
Usa ka bulan sa ulahi sa dihang ang magtatan-aw sa sirkito nag-alagad sa among kongregasyon, siya ug ang ubang Kristohanong mga ansiano mihimo sa dugay nga biyahe aron himoon ang miting sa mga ansiano didto sa akong kuwarto sa ospital. Nagmaya gayod ang akong kasingkasing niining pamatuod sa inigsoong gugma! Ang mga nars sa lawak nagdalit sa tibuok grupo ug tsa ug mga sanwits human sa miting.
Sa sinugdan ang mga doktor natingala sa akong pag-uswag. Human sa tulo ka bulan nakalingkod na ako sa akong silyang may ligid ug nakatindog gani sulod sa pipila ka gutlo. Nalipay ako ug bug-os nga determinado nga makalakaw pag-usab. Ang akong pamilya ug kaubang mga Kristohanon naghatag kanako ug daghang pagdasig panahon sa ilang mga pagduaw. Nakapauli pa gani ako sulod sa mugbong mga yugto.
Usa ka Tinuod nga Kababagan
Hinunoa, human niadto wala na akoy dugang pag-uswag. Sa wala madugay ang pisioterapista naghatag kanako sa masakit nga mensahe: “Dili ka na moarang-arang pa kay niini!” Ang tumong niadtong tungora mao ang pagpalig-on kanako aron makalihoklihok nga kinaugalingon diha sa silyang may ligid. Nahibulong ako kon unsa kahay mahitabo kanako. Sa unsang paagi makadumala ang akong asawa? Nahiagom siya mismo sa usa ka dakong operasyon ug nagkinahanglan sa akong tabang. Magkinahanglan kaha ako ug permanenteng pag-atiman sa institusyon?
Naguol ako pag-ayo. Ang akong kusog, kaisog, ug gahom inanay nga nahanaw. Miaginod ang mga adlaw, ug ako nagpabiling dili makalihok. Dili lang kay naparalisar ako sa pisikal kondili wala akoy pagbati sa emosyonal ug espirituwal. Ako ‘natumba.’ Kanunay nakong gilantaw ang akong kaugalingon nga lig-on sa espirituwal. Ako may lig-on pagkagamot nga pagtuo sa Gingharian sa Diyos. (Daniel 2:44; Mateo 6:10) Nakombinser ako sa mga saad sa Bibliya nga ang tanang sakit ug mga kaluyahon mamaayo sa matarong bag-ong kalibotan sa Diyos ug nga ang tanang katawhan mahibalik sa hingpit nga kinabuhi didto. (Isaias 25:8; 33:24; 2 Pedro 3:13) Niadtong tungora mibati akong naparalisar dili lang sa pisikal kondili sa espirituwal usab. Mibati akong ‘nalaglag.’—2 Corinto 4:9.
Sa dili pa ako mopadayon, paasoya ko ninyo ug diyutay mahitungod sa akong kagikan.
Usa ka Malipayong Pamilya
Natawo ako niadtong 1934, ug ang akong panglawas kanunayng maayo. Sa sayong katuigan sa 1950, nahibalag nako si Ingrid, ug kami naminyo niadtong 1958 ug namuyo sa lungsod sa Östersund, sa sentro sa Sweden. Usa ka lisoanang punto sa among kinabuhi ang nahitabo niadtong 1963 sa dihang misugod kami sa pagtuon sa Bibliya uban sa mga Saksi ni Jehova. Niadtong tungora may tulo kami ka mga anak—si Ewa, Björn, ug Lena. Sa wala madugay ang among tibuok pamilya nagtuon ug nag-uswag pag-ayo diha sa kahibalo sa mga kamatuoran sa Bibliya.
Wala madugay human kami mosugod pagtuon, mibalhin kami sa Hälsingborg. Didto, ang akong asawa ug ako nagpahinungod sa among mga kaugalingon kang Jehova ug nabawtismohan niadtong 1964. Ang among kalipay miuswag sa dihang ang among kamagulangang anak babaye, si Ewa, nabawtismohan niadtong 1968. Pito ka tuig sa ulahi, niadtong 1975, si Björn ug Lena nabawtismohan usab, ug sa misunod nga tuig natudlo ako ingong ansiano sa Kristohanong kongregasyon.
Ang akong sekular nga trabaho nakapaarang kanako sa pagtagana pag-ayo sa materyal nga mga panginahanglan sa akong pamilya. Ug ang among kalipay miuswag sa dihang si Björn ug Lena misulod sa bug-os-panahong ministeryo. Sa wala madugay si Björn gidapit nga moalagad sa sangang buhatan sa mga Saksi ni Jehova sa Arboga. Ang kinabuhi, ingnon ta, mapahiyomon kanamo. Unya, sayo sa 1980, misugod ako pagbati sa pisikal nga mga epekto sa tumor nga ngadtongadto gikuha niadtong dakong operasyon sa 1983.
Pagbuntog sa Espirituwal nga Paralisis
Sa dihang giingnan ako nga dili na ako makalakaw pag-usab, daw nawad-an ug paglaom ang akong kinabuhi. Sa unsang paagi nabatonan nako pag-usab ang espirituwal nga kusog? Kadto mas sayon kay sa akong gihunahuna. Gikuha lamang nako ang akong Bibliya ug misugod sa pagbasa. Sa sige nakog basa, dugang espirituwal nga kalig-on ang akong nadawat. Labaw sa tanan akong napabilhan ang Wali ni Jesus sa Bukid. Gibalikbalik nako kana pagbasa ug gipalandong kana.
Ang akong malipayong panglantaw sa kinabuhi napasig-uli. Pinaagi sa pagbasa ug pagpamalandong, nagsugod ako sa pagkakita ug mga kahigayonan inay mga babag. Nabatonan nako pag-usab ang tinguha nga ipaambit ang mga kamatuoran sa Bibliya sa uban, ug akong gitagbaw kining maong tinguha pinaagi sa pagsangyaw ngadto sa kawani sa ospital ug uban nga akong nahibalag. Ang akong pamilya bug-os nga nagpaluyo kanako ug nakadawat ug pagbansay kon sa unsang paagi atimanon ako. Sa kataposan nakagawas ako sa ospital.
Sa kataposan nakapauli na ako sa balay. Pagkamakapalipayng adlaw kadto alang kanamong tanan! Ang akong pamilya mihikay ug usa ka eskedyul nga naglakip sa pag-atiman kanako. Ang akong anak lalaki, si Björn, mihukom sa pagbiya sa buluhaton didto sa sangang buhatan sa mga Saksi ni Jehova, ug mipauli siya aron motabang sa pag-atiman kanako. Makapahupay pag-ayo nga mahimong tumong sa hilabihang gugma ug kabalaka gikan sa akong pamilya.
Pagsagubang sa Laing Suliran
Hinunoa, sa paglabay sa panahon, ang akong panglawas nadaot, ug nalisdan ako sa paglihok. Sa kataposan, bisan pa sa maunongong mga paningkamot sa akong pamilya, dili na sila makaarang sa pag-atiman kanako sa balay. Busa ako naghunahuna nga labing maayo kanako nga mosulod sa usa ka balay sa mga tagdonon. Sa makausa pa, nagkahulogan kinig mga kausaban ug usa ka bag-ong rutina. Apan wala nako kini tugoti nga mahimong usa ka espirituwal nga kababagan.
Wala gayod ako mohunong sa pagbasa ug sa pagdukiduki sa Bibliya. Padayon nakong gihunahuna kon unsay akong mahimo, dili ang dili nako mahimo. Namalandong ako sa espirituwal nga mga panalangin nga nabatonan sa tanang Saksi ni Jehova. Nagpabilin akong suod kang Jehova diha sa pag-ampo ug naggamit sa tanang kahigayonan sa pagsangyaw sa uban.
Karon ginagugol nako ang akong mga gabii ug bahin sa akong mga adlaw diha sa balay sa mga tagdonon. Ang mga hapon ug sayong kagabhion akong gugolon sa balay o kaha sa among Kristohanong mga tigom. Usa ka munisipal nga serbisyo ang naghikay sa akong regular nga transportasyon paingon ug gikan sa mga tigom ug paingon ug gikan sa akong balay. Ang akong maunongong pamilya, ang mga igsoon sa kongregasyon, ug ang kawani sa balay sa mga tagdonon nag-atiman nako sa kahibulongang paagi.
Pagbuhat sa Akong Maarangan
Wala nako isipa ang akong kaugalingon nga usa ka baldado, ug wala ako tagda nga ingon niana sa akong pamilya, ni sa akong Kristohanong mga igsoon. Ako mahigugmaong giatiman, nga nakapaarang kanako sa pagpadayon sa pag-alagad nga epektibo ingong usa ka ansiano. Nagdumala ako sa Pagtuon sa Libro sa Kongregasyon matag semana, maingon man sa senemanang pagtuon sa kongregasyon sa Ang Bantayanang Torre diha sa Kingdom Hall. Malisdan ako sa pagpakli sa mga panid sa Bibliya, busa may giasayn sa pagtabang kanako nga himoon kana diha sa mga tigom. Nagdumala ako ug mga tigom ug naghatag ug mga pakigpulong gikan sa akong silyang may ligid.
Busa makahimo gihapon ako ug daghang butang nga akong gikalipayan sa paghimo kanhi, nga naglakip sa mga pagduaw isip magbalantay. (1 Pedro 5:2) Buhaton nako kini sa dihang ang mga igsoong lalaki ug babaye moduol kanako alang sa tabang o tambag. Gamiton usab nako ang telepono, nga mouna sa pagtawag sa uban. Misangpot kini sa pagdasigay sa usag usa. (Roma 1:11, 12) Usa ka higala ang bag-o pang miingon: “Sa dihang ako mibating masulob-on, gitawgan mo ako sa paglipay kanako.” Apan ako usab nadasig, nga nasayod nga si Jehova nagpanalangin sa akong mga paningkamot.
Una pa ug human sa mga tigom, aduna akoy maayong pakighugoyhugoy sa kabataan sa kongregasyon. Sanglit naglingkod ako sa akong silyang may ligid, magkasultianay kami sa usag usa diha sa samang lebel sa panan-aw. Akong gipabilhan ang ilang pagkasinsero ug pagkaprangka. Usa ka batang lalaki kas-a miingon kanako: “Ikaw maoy usa ka guwapo kaayong baldado!”
Pinaagi sa pagtunong sa pagtagad diha sa kon unsay akong mahimo inay sa pagkabalaka sa dili nako mahimo, nagkalipay ako sa pag-alagad kang Jehova. Daghan ako ug nakat-onan gikan sa nahitabo kanako. Ako nakaamgo nga kita ginabansay ug ginapalig-on pinaagi sa mga pagsulay nga atong naagoman.—1 Pedro 5:10.
Akong namatikdan nga daghang himsog nga mga tawo ang napakyas sa pagsabot nga angay nga kanunay kitang magmaseryoso sa atong pagsimba sa atong langitnong Amahan. Kon dili, ang atong eskedyul sa pagtuon, mga tigom, ug pagsangyaw sa kanataran mahimong usa ka rutina lamang. Akong giisip kining maong mga tagana nga mahinungdanon sa kaluwasan latas sa kataposan niining kalibotana ngadto sa gisaad sa Diyos nga yutan-ong Paraiso.—Salmo 37:9-11, 29; 1 Juan 2:17.
Kanunay natong huptan ang paglaom sa kinabuhi diha sa umaabot nga bag-ong kalibotan sa Diyos nga buhi diha sa atong mga kasingkasing. (1 Tesalonica 5:8) Nakakat-on usab ako sa dili paghunong sa pakigbugno batok sa bisan unsang kiling sa pagkaluya. Nakakat-on ako sa paglantaw kang Jehova ingong akong Amahan ug sa iyang organisasyon ingong akong Inahan. Nakaamgo ako nga kon himoon nato ang pagpaningkamot, si Jehova makagamit kang bisan kinsa kanato nga mahimong epektibong alagad niya.
Bisan tuod nga usahay mobati ako nga ako, ingnon ta, ‘natumba,’ ako “wala malaglag.” Wala gayod ako biyai ni Jehova ug sa iyang organisasyon, ni sa akong pamilya ug sa akong Kristohanong mga igsoon. Tungod sa akong pagkuha sa Bibliya ug pagsugod sa pagbasa niana, nabatonan nako pag-usab ang espirituwal nga kalig-on. Mapasalamaton ako kang Jehova nga Diyos, kinsa nagahatag ug “gahom nga labaw sa kasarangan” sa dihang nagasalig kita kaniya.—2 Corinto 4:7.
Uban ang bug-os nga kompiyansa ug kompletong pagsalig kang Jehova, ako mahinamong naglantaw ngadto sa umaabot. Ako masaligon nga sa dili madugay si Jehova nga Diyos magatuman sa iyang saad mahitungod sa usa ka napasig-uling paraiso dinhi sa yuta duyog sa tanang kahibulongang mga panalangin nga pagadad-on niana.—Pinadayag 21:3, 4.