Ang Edukasyonal nga Sentro sa Watchtower Nagpadala ug mga Misyonaryo

ANG Watchtower Bible School of Gilead nagklase sa nagkadaiyang mga dapit. Tali sa 1943 ug 1960, sa mga pasilidad sa South Lansing, New York, T.B.A., 35 ka klase, nga gilangkoban sa mga estudyante gikan sa 95 ka kanasoran, ang nakadawat ug linaing pagbansay. Unya ang tunghaan gibalhin ngadto sa tibuok-kalibotang hedkuwarter sa Brooklyn, New York, diin naglihok kini sulod sa duolan sa 28 ka tuig. Gikan sa 1988 hangtod sa sayong bahin sa 1995, ang Tunghaang Gilead nagklase sa Wallkill, New York.

Sulod niining mga tuiga ang tunghaan nagpauswag sa natad sa kalihokan niini. Ubos sa direksiyon niini ang napulo-ka-semana nga kurso sa instruksiyon gitagana sa tulo ka klase sa Mexico; lima sa maong mga klase nagtigom sa Alemanya; duha sa India. Sukad sa 1987 ang usa ka sanga nga tunghaan nga nailhang Tunghaan sa Ministeryal nga Pagbansay nagklase sa 34 ka nasod, nga nagtagana ug walo-ka-semana nga kurso sa pagbansay alang sa batan-ong mga lalaki nga mokuwalipikar. Ang instruksiyon nga gihatag sa ika-99 nga klase sa Gilead, sa bag-ong gitukod nga Edukasyonal nga Sentro sa Watchtower sa Patterson, New York, hinunoa, maoy 20-ka-semana nga kurso, usa nga naglakip sa bug-os nga pagtuon sa entirong Bibliya, panaghisgot sa modernong-adlawng kasaysayan ug organisasyon sa mga Saksi ni Jehova, maingon man sa daghang tambag bahin sa langyawng misyonaryong buluhaton.

Sa Septiyembre 2, ang maong ika-99 nga klase migraduwar. Ang tulo-ka-oras nga programa sa graduwasyon gihimo sa bag-ong awditoryum sa Edukasyonal nga Sentro sa Watchtower. Naokupar ang tanang lingkoranan. Ang dugang mamiminaw sa mga pasilidad sa Bethel sa Patterson, Wallkill, ug Brooklyn gikutay sa elektronikong paagi. Kadto maoy makapaukyab nga adlaw dili lang alang sa mograduwar nga klase duyog sa ilang mga paryente ug suod nga mga higala apan usab sa ginatos nga nakig-ambit ingong mga boluntaryo sa pagtukod sa maanindot bag-ong mga pasilidad sa tunghaan.

Sa iyang pang-abling komento, si Carey Barber sa Nagamandong Lawas nagtunong sa pagtagad sa kamahinungdanon sa nahitabo. Siya miingon: “Kini mao ang sentro sa kinadak-ang balaang edukasyon nga kalihokan nga gipapadayon sukad masukad dinhi niining yutaa.” Siya misaysay nga kita nagakaduol sa kinatayuktokan sa gubat tali sa binhi sa babaye ug sa binhi sa bitin. (Genesis 3:15) Ang makalabang-buhi lamang sa makalilisang nga panagharongay panahon sa umaabot nga dakong kasakitan, iyang gipakita, mao kadtong adunay tukmang kahibalo sa Pulong sa Diyos ug nagmasinugtanon niini.

“Ang atong bag-ong edukasyonal nga programa,” siya miingon, “gidesinyo sa pagpadangat sa tanang katawhan ni Jehova bisan diin ngadto sa maayong kahimtang sa pagkahamtong nga gibatbat sa Proverbio 1:1-4​—nga mao ang pagkahibalo sa kaalam ug disiplina, ang pagkamakaila sa pagsabot, pagdawat sa disiplina nga nagahatag ug pagsabot, pagkamatarong, katakos sa paghukom, pagkatul-id, ug katakos sa panghunahuna.” Pagkadakong panalipod nga makabaton nianang espirituwal nga mga tagana!

Tambag Alang sa Migraduwar nga Klase

Kadtong pasiunang mga komento gisundan sa serye sa lima ka mugbong mga diskurso nga gitumong sa migraduwar nga klase. Si Harold Jackson, kanhi usa ka instruktor sa Gilead ug karon membro sa kawani sa hedkuwarter sa Brooklyn, nag-awhag sa klase, “Hupti Pag-ayo ang Inyong Diyosnong Pagkatagbaw.” Si Lloyd Barry, usa ka dugay nang misyonaryo ug karon membro sa Nagamandong Lawas, namulong bahin sa “Pag-alagad Kang Jehova Uban ang Pagkamapaubsanon.” Siya misaysay nga kining maong kalidad mahinungdanon sa mga graduwado sa ilang pagpasibo sa bag-ong mga kahimtang maingon man sa ilang mga relasyon sa kaubang mga misyonaryo, uban sa mga kongregasyon diin sila mag-alagad, ug uban sa lokal nga katawhan.

Si Karl Adams, nga bag-ong membro sa grupo sa mga magtutudlo sa Gilead, nangatarongan uban sa klase bahin sa pangutanang “Ang Pagtuo Motultol Kanimo sa Pagbuhat sa Unsa?” Siya nagdasig kanila nga dili mahisama niadtong mga Israelinhon kinsa nangreklamo bahin sa mga kahimtang sa kamingawan ug nangandoy nga mobalik sa Ehipto apan, hinunoa, mahisama kang Abraham, kinsa naglaom sa Gingharian sa Diyos inay mobalik sa Ur sa mga Caldeanhon ingong sulbad sa mga suliran. (Exodo 16:2, 3; Hebreohanon 11:10, 15, 16) Si Ulysses Glass, ang tigrehistro sa tunghaan, migamit sa pananglitan ni Asap ingon sa nasulat sa Salmo 73 sa pagtambag sa migraduwar nga klase, “Ipha ang Inyong mga Panalangin.” Ug si Albert Schroeder, membro sa Nagatudlong Komite sa Nagamandong Lawas, namulong sa tema nga “Si Jehova Nagatagana.” Ingong pamatuod sa maong tagana, iyang gipunting mismo ang Tunghaang Gilead ug ang bahin niini sa pagpalampos sa dakong buluhaton sa pagsangyaw ug paghimog mga tinun-an.

Sa ulahi ang mamiminaw namati uban ang dulot nga kaikag sa dihang si Milton Henschel, ang presidente sa Watch Tower Society, namulong mahitungod sa “Mga Membro nga Iya sa Usag Usa.” Iyang gibasa ug gikomentohan pag-ayo ang Roma kapitulo 12. Lakip sa ubang mga butang, siya miingon: “Kinahanglang atong hunahunaon nga kita adunay suod kaayo nga relasyon sa atong kaubang mga alagad sa kongregasyon.” Siya midugang: “Maayo alang kanato nga kanunayng maghunahuna sa usag usa ingong kabtangan ni Jehova, ug inay mahimong hinawayon, inay mangitag sayop, magmatinabangon kita kanunay. Ginatabangan nato ang atong kaugalingon sa dihang atong huptan ang espirituwal nga panaghiusa sa Kristohanong kongregasyon.” Iyang gipakita kon sa unsang paagi ang maong pagkamatinabangon ikapakita diha sa pagluto ug pagkaon diha sa mga puy-anan sa mga misyonaryo, nga magpakitag konsiderasyon sa kamatuoran nga ang tanan mahimong dili makakaon sa samang pagkaon. Gidasig usab niya ang pagkamatinabangon inay ang pagpanaway sa dihang nakig-ambit sa pagsangyaw sa kanataran uban sa kaubang mga Kristohanon nga kabos. Kon kita tinuod nga matinabangon, makapalig-on, ug makapadasig sa usag usa, gipunting ni Brader Henschel, “si Jehova mahigugma kanato tungod niini.” Pagkamaayong tambag alang sa mga misyonaryo nga mag-alagad sa mga nasod nga lahi kaayo gikan niadtong ilang gibiyaan!

Pagsinati Pag-ayo sa Klase

Ang 48 ka estudyante sa ika-99 nga klase maoy, sa aberids, 32 anyos ang edad ug nakagugol na ug kapin sa 11 ka tuig sa bug-os-panahong ministeryo.

Ang mga interbiyo nga bahin sa programa sa graduwasyon naghatag sa mamiminaw ug kahigayonan nga labi pang masinati ang pipila kanila. Si Nikki Liebl, nga taga-Tinipong Bansa, ug si Simon Bolton, nga taga-Inglaterra, nag-asoy ug mga kahimtang nga nagsulay sa ilang pagtuo nga si Jehova magtagana sa ilang pisikal nga mga panginahanglan. Nasinati nila ang pag-atiman ni Jehova samtang kanunay nilang giuna ang bug-os-panahong pag-alagad.

Si Isabelle Kazan, kansang lumad nga pinulongan maoy Pranses, miingon nga siya nakakat-on ug Arabik aron makasangyaw ngadto sa nagsultig-Arabikong mga tawo sa iyang gipuy-ang nasod. Sa dihang siya nagsugod niadtong 1987, ang bugtong gamayng grupo sa Paris nalangkoban lamang sa upat ka nagsultig-Arabikong mga igsoon, dugang pa sa iyang kaugalingon ug sa laing igsoong babaye nga nagtuon sa pinulongan. (Dili kadto sayon. Sila migugol ug walo ka oras sa pag-andam sa ilang leksiyon sa Bantayanang Torre matag semana aron makakomento.) Takos ba ang paningkamot? Aw, karong adlawa adunay nagsultig-Arabikong mga Saksi nga giorganisar ngadto sa lima ka sirkito sa tibuok Pransiya. Ang laing estudyante, si Miko Puro, misugilon kon sa unsang paagi ang Pranses nga iyang nakat-onan sa tunghaan nakapaarang kaniya sa pagsangyaw ngadto sa Aprikanong mga lalin sa iyang lumad nga Pinlandia, ug magmapuslanon usab kini sa iyang misyonaryong asaynment sa Benin. Si Bonny Bowes nag-asoy sa iyang pakigbisog sa pagsulti nga larino sa Pranses aron siya epektibong makaalagad sa Quebec, Canada. Ug si Bjarki Rasmussen, nga taga-Denmark, miasoy ug mga kasinatian nga nabatonan niya ug sa iyang asawa panahon sa mga tuig sa pag-alagad sa Faeroe Islands. Oo, kining bag-ong mga misyonaryo maoy eskperyensiyadong bug-os-panahong mga ministro.

Ang mga graduwado giasayn sa 19 ka nasod​—sa Aprika, Sentral Amerika ug Amerika del Sur, Sidlakang Uropa, ug sa Oriente. Ang mga graduwado sa mas unang mga klase nag-alagad na sa kapin sa 200 ka nasod. Daghan sa mga graduwado puliki gihapon sa ilang mga asaynment. Kining bag-ong mga misyonaryo karon moduyog na kanila sa dugang pagpakaylap sa pagsangyaw sa Gingharian hangtod sa kinatumyan sa yuta.​—Buhat 1:8.

[Hulagway sa panid 25]

Mga esena sa lawak-klasehanan sa Edukasyonal nga Sentro sa Watchtower

[Hulagway sa panid 26]

Ika-99 nga Klase nga Migraduwar sa Watchtower Bible School of Gilead

Sa lista sa ubos, ang mga laray ginumerohan gikan sa atubang ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Heffey, S.; Riley, E.; Mortensen, D.; Honable, A.; Bolton, J.; Poole, J.; Siimes, G.; Sousa, L. (2) Pashnitski, B.; Shepherd, D.; Pashnitski, W.; Järvinen, J.; Paulsen, K.; Rasmussen, E.; Schewe, C.; Olsson, L. (3) Paulsen, E.; Samsel, T.; Bowes, B.; Harris, E.; Kazan, I.; Liebl, N.; Sousa, P.; Puro, J. (4) Lager, K.; Lager, V.; Golden, K.; Bolton, S.; Johnson, M.; Johnson, S.; Liebl, A.; Rasmussen, B. (5) Harris, D.; Samsel, W.; Schewe, O.; Heffey, R.; Kazan, L.; Riley, T.; Järvinen, O.; Puro, M. (6) Mortensen, D.; Golden, R.; Honable, L.; Shepherd, M.; Bowes, R.; Siimes, T.; Poole, E.; Olsson, J.

[Hulagway sa panid 27]

Anaa gihapon sa ilang mga asaynment: (wala) si Charles Leathco uban sa iyang asawa, si Fern, sa Brazil, mga graduwado sa una ug ikaunom nga mga klase sa Gilead; (ubos) si Martha Hess, sa Hapon, graduwado sa ikapitong klase sa Gilead