Mga Magmamantala sa Gingharian Nagtaho
“Ang Pulong sa Diyos Padayong Nagtubo”
ANG Kristohanong kongregasyon miuswag gikan sa mga 120 ka membro ngadto sa kapin sa 3,000 wala madugay human kana matukod. (Buhat 1:15; 2:41) Ang Bibliya nagsaysay nga “ang pulong sa Diyos padayong nagtubo, ug ang gidaghanon sa mga tinun-an padayong nagkadaghan pag-ayo sa Jerusalem.” (Buhat 6:7) Tapos sa pipila lamang ka tuig, ang bag-ong napormang kongregasyon nahimong interkontinental nga organisasyon nga may mga Kristohanon sa Aprika, Asia, ug Uropa.
Ang Kristohanong kongregasyon karong adlawa susamang nakasinati ug kusog nga pag-uswag. Pananglitan, sa Mexico, ang gidaghanon sa mga magmamantala sa Gingharian miuswag sulod lamang sa lima ka tuig ug kapin sa 130,000 ngadto sa 443,640! Sa 1995, 1 sa 59 ka tawo sa Mexico ang mitambong sa Memoryal sa kamatayon ni Kristo ingon sa gisaulog sa mga Saksi ni Jehova. Bisan pa niana, ang espirituwal nga pag-ani nianang nasora wala pa makompleto, ingon sa giilustrar sa mosunod nga kasinatian.—Mateo 9:37, 38.
Sa usa ka lungsod sa estado sa Chiapas, walay midawat ug pagtuon sa Bibliya sa balay uban sa mga Saksi ni Jehova, bisan human nila isangyaw ang maayong balita sulod sa 20 ka tuig nianang dapita. Tin-aw nga daghan sa mga lungsoranon gihulga sa usa ka tawo nga ilado sa pagkapintas. Sila nahadlok sa iyang reaksiyon kon mahibaloan niya nga sila nagtuon sa Bibliya uban sa mga Saksi.
Duha ka maisogong mga Saksi nga mibalhin sa maong dapit mihukom sa pagsulbad sa suliran pinaagi sa pagdiretso sa tawo nga gikahadlokan. Sa pag-abot nila sa iyang balay, ang iyang asawa maoy mibukas sa pultahan ug namati pag-ayo sa ilang mensahe. Siya ilabinang interesado sa giingon sa Bibliya bahin sa pagpuyo sa usa ka paraisong yuta. Apan iyang gidawat nga lisodlisoron siya sa iyang bana kon siya magtuon sa Bibliya. Ang mga Saksi misaysay nga gawas kon mainampingong susihon niya ang giingon sa Bibliya, dili gayod siya makakat-on kon sa unsang paagi alagaron ang Diyos ug makapahimulos ug kinabuhi sa yuta sa walay kataposan. Midawat siya ug pagtuon sa Bibliya.
Ingon sa gidahom, ang iyang bana wala mahimuot sa iyang desisyon. Gidid-an niya siya sa paggamit sa awto sa pagtambong sa Kristohanong mga tigom, bisan tuod nga siya gitugotan sa paggamit niana sa ubang mga katuyoan. Bisan pa sa iyang pagsupak, siya regular nga mobaktas paingon sa kinadul-ang Kingdom Hall sa mga Saksi ni Jehova, nga napulo ka kilometros ang gilay-on. Sa wala madugay ang uban diha sa lungsod nakamatikod sa iyang kaisog ug determinasyon. Ang mga tawo misugod sa pagpamati sa dihang ang mga Saksi moduaw sa ilang kabalayan. Ang uban misugod gani sa pag-uban sa babaye ngadto sa mga tigom. Sa wala madugay, ang mga Saksi nagdumala ug mga 20 ka panagtuon sa Bibliya nianang lungsora!
Usa ka higala niining babayhana mihukom usab sa pagtuon sa Bibliya bisan pa sa pagsupak sa iyang bana. Katingad-an, siya gidasig sa pagbuhat niana sa bana sa unang babaye nga nagtuon. Human siya makigsulti sa iyang bana, mihunong ang pagsupak. Busa nahitabo nga human sa 20 ka tuig ang binhi sa kamatuoran sa Bibliya sa kataposan migitib, nga may kapin sa 15 ka tawo nga nagtuon sa Bibliya ug nagtambongan sa Kristohanong mga tigom, lakip niining duha ka babaye, nga nagamantala karon sa maayong balita.