Mga Pangutana Gikan sa mga Magbabasa

Ang Efeso 3:14, 15 nag-ingon nga ngadto sa Diyos ang ‘tanang kabanayan sa langit ug sa yuta utangan sa ngalan niini.’ Aduna bay mga pamilya sa langit, ug ang matag tawhanong pamilya ba sa usa ka paagi nagkuha sa ngalan niini gikan kang Jehova?

Walay mga pamilya sa langit nga sama sa pagkaadunay banay sa yuta, nga may usa ka amahan, usa ka inahan, ug mga anak​—nga ang tanan adunay relasyon sa usag usa sa unodnong paagi. (Lucas 24:39; 1 Corinto 15:50) Tin-awng gipakita ni Jesus nga ang mga manulonda dili magminyo, ug walay gipaila nga sila sa bisan unsa nga paagi nagapatunghag anak.​—Mateo 22:30.

Ugaling, ang Bibliya naghisgot sa mahulagwayong paagi bahin kang Jehova nga Diyos ingong minyo sa iyang langitnong organisasyon; siya minyo sa espirituwal nga diwa. (Isaias 54:5) Kana nga langitnong organisasyon nagpatunghag anak, sama sa mga manulonda. (Job 1:6; 2:1; 38:4-7) Nan, niini nga diwa nga naglungtad ang usa ka kahibulongang espirituwal nga pamilya sa langit.

Dugang pa, usa ka bag-ong mahulagwayong pamilya ang nagakaugmad sa langit, nga gilangkoban ni Jesu-Kristo ug sa iyang pangasaw-onong kongregasyon sa 144,000. (2 Corinto 11:2) Ang kadaghanan niining mga dinihogan nangamatay na, nga adunay palaabotong langitnong kinabuhi. Ang uban buhi pa sa yuta. Ang tanan maikagong nagpaabot sa langitnong “kaminyoon sa Kordero.” Gilangkit sa Bibliya kana nga kaminyoon sa panahon sa nagkaduol nga dakong kasakitan​—ang kalaglagan sa Babilonyang Bantogan, ug dayon ang pagpapha sa nahibilin sa sistema ni Satanas.​—Pinadayag 18:2-5; 19:2, 7, 11-21; Mateo 24:21.

Mahitungod sa mga pamilya sa yuta, walay gipaila si apostol Pablo sa Efeso 3:15 nga ang tanang indibiduwal nga grupo sa pamilya nagkuha sa ngalan niini direkta gikan kang Jehova. Hinunoa, dayag nga anaa sa hunahuna ni Pablo ang mga linya sa sunodsunod nga pamilya nga nagtipig sa ngalan. Ang Josue 7:16-19 naghatag ug pananglitan. Didto si Jehova sa pagbutyag sa sala ni Achan. Una, ang sala nasentro o diha lamang sa tribo ni Juda. Unya napagamay kini ngadto sa pamilya sa mga Zerahanon. Sa kataposan, nabutyag ang panimalay ni Achan. Si Achan uban sa iyang asawa ug mga anak giisip, o gihisgotan, ingong bahin sa panimalay (o, pamilya) ni Zabdi, ang apohang lalaki ni Achan. Ang maong pamilya, sa ingon, mao ang nagsunod nga grupo nga nagtipig sa ngalan sa ilang katigulangang si Zera.

Taliwala sa mga Hebreohanon, ang maong mga linya sa pamilya hinungdanon kaayo, nga daghan ang gitala diha sa Bibliya. Gipaluyohan sa Diyos ang pagkatipig niini pinaagi sa paghimog mga tagana, kon gikinahanglan, alang sa mga kaliwat sa pagpasa sa ngalan sa pamilya pinaagi sa Levirate nga kaminyoon, o pagpakigminyo sa bayaw.​—Genesis 38:8, 9; Deuteronomio 25:5, 6.

Ingong laing pananglitan sa maong mas dako o nagsunodsunod nga mga pamilya, tagda si Jesus ingong anak ni David. Dayag nga siya dili direkta nga kaliwat ni Haring David, nga wala matawo hangtod sa daghang siglo human sa kamatayon ni David. Bisan pa, ang timaan sa Mesiyas mao nga siya maoy sakop sa pamilya ni David, ingon sa nahibaloan sa kadaghanang mga Hudiyo. (Mateo 22:42) Si Jesus nahilinya ni David pinaagi sa iyang inahan ug sa iyang amaama.​—Mateo 1:1; Lucas 2:4.

Apan sa unsang paagi ang maong mga pamilya nakakuha sa ilang ngalan gikan kang Jehova? Ang kamatuoran mao nga dihay pipila ka okasyon​—sama sa kahimtang ni Abraham ug Isaac​—diin ginganlan ni Jehova sa literal ang ulo sa pamilya. (Genesis 17:5, 19) Kadto maoy mga eksepsiyon. Sa dakong bahin, walay gihatag nga ngalan si Jehova sa matag indibiduwal nga pamilya nga igapasa niini ngadto sa mga anak.

Apan, si Jehova ang nagpasugod sa tawhanong pamilya sa dihang gisugo niya si Adan ug Eva nga “sumanay ug dumaghan ug pun-on ang yuta.” (Genesis 1:28) Ug gitugotan ni Jehova ang dili-hingpit nga si Adan ug Eva sa pagpanganak, sa ingon nagtukod sa pundasyon alang sa tawhanong mga pamilya. (Genesis 5:3) Busa labaw pa sa usa ka diwa, ang Diyos mahimong matawag nga Magmumugna sa mga ngalan sa pamilya.

Daghang kultura karon ang dili na mobati sa panginahanglan sa pagpabiling buhi sa mga ngalan sa pamilya sa mga kaliwatan. Bisan pa niana, sa tanang kayutaan ang mga Kristohanon nagpasalamat kang Jehova sa kahikayan sa pamilya ug nagpasidungog kaniya pinaagi sa pagpaningkamot sa paghimo sa ilang tagsatagsa ka pamilya nga malamposon.