Pagsagubang sa Hagit sa Pagkamaunongon

‘Isul-ob ang bag-ong pagkatawo nga gilalang sumala sa kabubut-on sa Diyos diha sa matuod nga pagkamatarong ug pagkamaunongon.’​—EFESO 4:24.

1. Nganong utangan kita kang Jehova nga Diyos ug pagkamaunongon?

ANG pagsagubang sa hagit sa pagkamaunongon adunay daghang bahin. Labing hinungdanon mao ang pagsagubang sa hagit sa pagkamaunongon kang Jehova nga Diyos. Sa pagkatinuod, tungod sa kon kinsa si Jehova ug kon unsa ang iyang nahimo alang kanato, ug tungod sa atong pagpahinungod kaniya, kita utangan kaniya ug pagkamaunongon. Sa unsang paagi ikapasundayag nato ang pagkamaunongon kang Jehova nga Diyos? Ang pangunang paagi mao ang pagkahimong maunongon sa matarong nga mga prinsipyo ni Jehova.

2, 3. Unsay kalangkitan sa pagkamaunongon ug pagkamatarong?

2 Aron masagubang kanang hagita, kinahanglang patalinghogan nato ang mga pulong nga makita sa 1 Pedro 1:15, 16: “Kauyon sa Balaang Usa nga mitawag kaninyo, magmabalaan usab kamo sa tanan ninyong mga panggawi, tungod kay kini nahisulat: ‘Kinahanglan kamong magmabalaan, tungod kay ako balaan.’” Ang pagkamaunongon kang Jehova nga Diyos mopalihok kanato sa pagsunod kaniya sa tanang panahon, nga ipahiuyon ang atong mga hunahuna, mga pulong, ug mga lihok sa iyang balaang kabubut-on. Nagkahulogan kini sa paghupot ug maayong konsensiya, ingon sa gisugo kanato diha sa 1 Timoteo 1:3-5: “Ang tuyo niini nga mando [dili magtudlog lahi nga doktrina o mamati sa bakak nga mga sugilanon] mao ang gugma gikan sa hinlong kasingkasing ug gikan sa maayong tanlag ug gikan sa pagtuo nga walay pagkasalingkapaw.” Tinuod, walay usa kanato ang hingpit, apan angay natong himoon ang atong labing maayo, dili ba?

³ Ang pagkamaunongon kang Jehova magpugong kanato batok sa hinakog nga pagkompromiso sa matarong nga mga prinsipyo. Sa pagkamatuod, ang pagkamaunongon magpugong kanato batok sa pagkahimong salingkapaw. Ang pagkamaunongon maoy anaa sa hunahuna sa salmista sa dihang siya miawit: “Tudloi ako, Oh Jehova, sa imong dalan. Ako magalakaw sa imong kamatuoran. Hiusaha ang akong kasingkasing sa pagkahadlok sa imong ngalan.” (Salmo 86:11) Ang pagkamaunongon nagkinahanglan nianang hustong pagkahubit ingong “pagkamasinugtanon sa dili-ikapatuman.”

4, 5. Ang pagkamaunongon mopahimo kanatong mabinantayon, kay basin makahimo kita ug unsa?

⁴ Ang pagkamaunongon kang Jehova nga Diyos magpugong usab kanato batok sa pagbuhat ug bisan unsa nga mohatag ug kaulawan sa iyang ngalan ug Gingharian. Pananglitan, duha ka Kristohanon nag-away nga gumikan niana sila sa dili-angay midangop sa hukmanan sa kalibotan. Ang huwes nangutana, ‘Mga Saksi ni Jehova ba kamong duha?’ Dayag nga siya wala makasabot kon unsay ilang gihimo diha sa korte. Pagkadakong kaulawan kadto! Ang pagkamaunongon kang Jehova nga Diyos angay untang motukmod niadtong mga igsoona sa pagpatalinghog sa tambag ni apostol Pablo: “Nan, sa pagkatinuod, kini nagakahulogan ug bug-os nga kaparotan alang kaninyo nga kamo nagkinihaay sa usag usa. Nganong dili hinuon ninyo tugotan ang inyong kaugalingon nga buhatag sayop? Nganong dili hinuon ninyo tugotan ang inyong kaugalingon nga matikasan?” (1 Corinto 6:7) Dayag, ang dalan sa pagkamaunongon kang Jehova nga Diyos mao ang pag-antos sa personal nga kapildihan imbes hatagag kaulawan si Jehova ug ang iyang organisasyon.

⁵ Ang pagkamaunongon kang Jehova nga Diyos usab nagkinahanglan nga dili magpadaog sa kahadlok sa tawo. “Ang pagkahadlok sa mga tawo nagadala ug usa ka lit-ag, apan siya nga nagasalig kang Jehova pagapanalipdan.” (Proverbio 29:25) Busa, kita dili mokompromiso kon magaatubang ug paglutos, apan atong sundon ang panig-ingnan nga gipakita sa mga Saksi ni Jehova sa kanhi Unyon Sobyet, sa Malawi, sa Etiopia, ug sa daghan pang ubang kayutaan.

6. Ang pagkamaunongon magpugong kanato nga dili makighugoyhugoy uban ni kinsa?

⁶ Kon kita maunongon kang Jehova nga Diyos, maglikay kita sa pagpakighigala sa tanan niyang mga kaaway. Maoy hinungdan nga ang disipulong si Santiago misulat: “Mga mananapaw, wala ba kamo mahibalo nga ang pakighigala sa kalibotan maoy pakigdumot sa Diyos? Busa, ang bisan kinsa nga buot mahimong higala sa kalibotan nagahimo sa iyang kaugalingon nga usa ka kaaway sa Diyos.” (Santiago 4:4) Kita buot makabaton sa pagkamaunongon nga gipakita ni Haring David sa dihang siya miingon: “Wala ba nako dumti kadtong nagadumot pag-ayo kanimo, Oh Jehova, ug wala ba nako kasilagi kadtong nang-alsa batok kanimo? Gidumtan ko sila uban sa hingpit nga pagdumot. Sila nahimong akong tinuod nga mga kaaway.” (Salmo 139:21, 22) Kita dili buot makighugoyhugoy kang bisan kinsa nga mituyo sa pagpakasala, kay kita walay bisan unsa nga pakig-usahan kanila. Dili ba ang pagkamaunongon sa Diyos magpugong kanato batok sa pagpakig-uban sa ingon niini nga mga kaaway ni Jehova, sa personal man o pinaagi sa telebisyon?

Sa Pagdepensa Kang Jehova

7. Ang pagkamaunongon motabang kanato sa paghimo ug unsa labot kang Jehova, ug sa unsang paagi gihimo kini ni Elihu?

⁷ Ang pagkamaunongon mopalihok kanato sa pagdepensa kang Jehova nga Diyos. Pagkamaayong panig-ingnan ang atong nabatonan diha kang Elihu! Ang Job 32:2, 3 nagtug-an kanato: “Ang kasuko ni Elihu . . . miinit. Batok kang Job misilaob ang iyang kasuko tungod sa pagtawag sa iyang kaugalingong kalag nga matarong kay sa Diyos. Dugang pa, batok sa iyang tulo ka kauban misilaob ang iyang kasuko tungod kay wala sila makakitag tubag apan ilang gitawag ang Diyos nga daotan.” Sa Job kapitulo 32 ngadto sa 37, gidepensahan ni Elihu si Jehova. Pananglitan, siya miingon: “Pailobi una ako makadiyot, ug ipakita ko kanimo nga adunay dugang mga butang nga akong ikasulti mahitungod sa Diyos. . . . Ngadto sa akong Magbubuhat ipahinungod ko ang pagkamatarong. . . . Dili niya ipahilayo ang iyang mga mata gikan kang bisan kinsang matarong.”​—Job 36:2-7.

8. Nganong kinahanglang depensahan nato si Jehova?

⁸ Nganong kinahanglang depensahan si Jehova? Karong adlawa, ang atong Diyos nga Jehova gipanamastamasan sa daghan kaayong paagi. Giangkon pa nga siya wala maglungtad, nga siya maoy usa ka bahin sa Trinidad, nga ginasakit niya ang mga tawo hangtod sa hangtod diha sa nagkalayong impiyerno, nga siya wala kaayo maningkamot sa pagkabig sa kalibotan, nga siya walay pagtagad sa katawhan, ug uban pa. Atong ipasundayag ang atong pagkamaunongon kaniya pinaagi sa pagdepensa kaniya ug sa pagpamatuod nga si Jehova naglungtad gayod; nga siya maoy usa ka maalamon, matarong, labing-makagagahom, ug mahigugmaong Diyos; nga siya adunay panahon sa tanang butang; ug nga sa pag-abot sa iyang tinudlong panahon, iyang pagataposon ang tanang daotan ug himoon ang tibuok yuta nga usa ka paraiso. (Ecclesiastes 3:1) Kini nagkinahanglan nga atong pahimuslan ang tanang higayon sa pagpamatuod sa ngalan ug Gingharian ni Jehova.

Pagkamaunongon sa Organisasyon ni Jehova

9. Bahin sa unsang mga butang gipasundayag sa uban ang ilang pagkadili-maunongon?

⁹ Karon atong hisgotan ang bahin sa pagkahimong maunongon sa makitang organisasyon ni Jehova. Siyempre, kita utangan ug pagkamaunongon niana, lakip sa “kasaligan ug mabuot nga ulipon,” nga pinaagi niini ginapakaon sa espirituwal ang Kristohanong kongregasyon. (Mateo 24:45-47) Ingnon ta nga adunay mogula sa mga publikasyon sa Watch Tower nga wala kita makasabot o mouyon nianang higayona. Unsay atong himoon? Masuko ug mobiya sa organisasyon? Mao kanay gihimo sa uban sa dihang Ang Bantayanang Torre, sa daghang tuig nga miagi, nagpadapat sa bag-ong pakigtugon diha sa Milenyo. Ang uban nasuko sa gipamulong niadto sa Ang Bantayanang Torre bahin sa isyu sa neyutralidad. Kon kadtong nangapandol niining mga butanga nagmaunongon pa sa organisasyon ug sa ilang mga igsoon, naghulat unta sila nga ipatin-aw ni Jehova kining mga butanga, nga iyang gihimo sa iyang tinudlong panahon. Busa, ang pagkamaunongon naglakip sa mapailobong paghulat hangtod ang dugang pagsabot mapatik sa kasaligan ug mabuot nga ulipon.

10. Ang pagkamaunongon magpugong kanato sa pagkahimong maukit-ukiton bahin sa unsa?

¹⁰ Ang pagkamaunongon sa makitang organisasyon ni Jehova nagkahulogan usab sa pagpalayo gikan sa mga apostata. Ang maunongong mga Kristohanon dili magmaukit-ukiton bahin sa kon unsay isulti niining mga tawhana. Tinuod, kadtong gigamit ni Jehova nga Diyos sa pagdumala sa iyang buluhaton sa yuta dili hingpit. Apan unsay gisugo sa Pulong sa Diyos nga atong buhaton? Biyaan ba ang organisasyon sa Diyos? Dili. Ang inigsoong gugma angay mopalihok kanato nga magmaunongon niana, ug kita kinahanglang magpadayon sa ‘paghigugma sa usag usa nga mainiton gayod gikan sa kasingkasing.’​—1 Pedro 1:22.

Pagkamaunongon sa Maunongong mga Ansiano

11. Ang pagkamaunongon motabang kanato sa pagbantay batok sa unsang negatibong mga hunahuna?

¹¹ Kon adunay gisulti o gihimo diha sa kongregasyon nga naglisod kita sa pagsabot, ang pagkamaunongon magpugong kanato batok sa paghukom sa mga motibo ug motabang kanato sa paglantaw nga tingali kana maoy kaugalingong opinyon. Dili ba mas maayong palandongon ang maayong mga hiyas sa tinudlong mga ansiano ug sa ubang isigkamagtutuo imbes palandongon ang ilang mga kahuyangan? Oo, kita buot nga magbantay batok sa tanang maong negatibong hunahuna, kay kini nalangkit sa pagkahimong dili-maunongon! Ang pagkamaunongon motabang usab kanato sa pagsunod sa sugo ni Pablo sa ‘dili pagsultig daotan mahitungod kang bisan kinsa.’​—Tito 3:1, 2.

12, 13. Unsang partikular nga mga hagit ang kinahanglang atubangon sa mga ansiano?

¹² Ang pagkamaunongon naghatag ug partikular nga mga hagit sa mga ansiano. Ang usa niining mga hagita mao ang bahin sa dili pagbutyag sa kompidensiyal nga mga butang. Usa ka sakop sa kongregasyon tingali adunay itug-an sa usa ka ansiano. Ang pagkamaunongon ngadto sa usa magpugong sa ansiano sa paglapas sa prinsipyo sa pagtago sa kompidensiyal nga butang. Iyang sundon ang tambag sa Proverbio 25:9: “Ayaw pag-ibutyag ang tinagoan ngadto sa ubang tawo.” Kana nagkahulogan sa dili pagbutyag sa butang bisan sa iyang kaugalingong asawa!

¹³ Ang mga ansiano usab adunay uban pang mga pagsulay sa pagkamaunongon nga pagasagubangon. Sila ba mahimong mga mapahimut-anon ug mga tawo, o sila ba maisogon ug malumong motabang niadtong kinsa nagkinahanglag pagtul-id, bisan pag sila mga kadugo o suod nga mga higala? Ang pagkamaunongon sa organisasyon ni Jehova magpahimo kanatong mga ansiano sa pagpaningkamot sa pag-abag kang bisan kinsang nagkinahanglag espirituwal nga tabang. (Galacia 6:1, 2) Bisan pag kita magmaluloton, ang pagkamaunongon maghimo kanatong prangka sa atong isigkaansiano, ingon gayod sa pagkaprangka ni apostol Pablo kang apostol Pedro. (Galacia 2:11-14) Sa laing bahin, ang mga magtatan-aw buot nga mag-amping, kay ang dili-maalamong lihok o pagpakitag pagpalabi o sa ubang paagi sa pag-abuso sa ilang awtoridad, ilang gilisodlisod kadtong ilang gidumalahan sa pagpabiling maunongon sa organisasyon sa Diyos.​—Filipos 4:5.

14, 15. Unsang mga hinungdan ang hayan magsulay sa pagkamaunongon sa mga sakop sa kongregasyon?

¹⁴ Adunay ubang mga bahin labot sa pagsagubang sa hagit sa pagkamaunongon sa kongregasyon ug sa mga ansiano niini. Kon may daw gubot nga mga kahimtang sa kongregasyon, mohatag kini kanatog higayon sa pagpasundayag sa pagkamaunongon kang Jehova ug niadtong naghawas kaniya. (Tan-awa Ang Bantayanang Torre, Hunyo 15, 1987, mga panid 15-17.) Kon may gipalagpot, ang pagkamaunongon nagkinahanglan nga atong paluyohan ang mga ansiano, nga dili mosulay sa pagsaway kon may igo bang mga katarongan sa aksiyon nga gihimo.

¹⁵ Ang pagkamaunongon sa kongregasyon nagkinahanglan usab nga atong suportahan ang tanang lima ka senemanang mga tigom kutob sa mahimo sa atong mga kahimtang ug mga katakos. Ang pagkamaunongon nagkinahanglan nga kita dili lamang motambong niini nga regular kondili mangandam usab alang niini ug maghimog makapalig-ong mga komento kon itugot sa higayon.​—Hebreohanon 10:24, 25.

Pagkamaunongon sa Kaminyoon

16, 17. Unsang mga hagit sa pagkamaunongon ang kinahanglang atubangon sa minyong mga Kristohanon?

¹⁶ Ngadto kang kinsa pa kita utangan sa pagkamaunongon? Kon kita minyo, tungod sa atong mga panaad sa kaminyoon, kinahanglang atong sagubangon ang hagit sa pagpabiling maunongon sa atong kapikas sa kaminyoon. Ang pagpabiling maunongon sa atong kapikas magpugong kanato nga masayop sa pagkahimong mas matinagdanon sa ubang mga babaye o mga lalaki kay sa atong kaugalingong asawa o bana. Ang pagkamaunongon sa atong kapikas nagkinahanglan usab nga dili nato isulti sa uban ang mga kahuyangan o mga kakulangan sa atong kapikas. Dali kaayo ang pagreklamo ngadto sa uban kay sa pagpaningkamot sa paghimo sa mga linya sa komunikasyon nga bukas uban sa atong kapikas, nga angay natong himoon nga nahiuyon sa Bulawanong Lagda. (Mateo 7:12) Sa pagkatinuod, ang pagkahimong minyo adunay tinuod nga hagit sa atong Kristohanong pagkamaunongon.

¹⁷ Aron makasagubang niini nga hagit sa pagkamaunongon, dili lamang maglikay kita nga makahimog grabeng kasal-anan kondili kinahanglang bantayan usab nato ang ato mismong mga hunahuna ug mga pagbati. (Salmo 19:14) Pananglitan, kon ang atong malimbongong mga kasingkasing maibogon kaayog kalingawan ug kalipayan, tungod sa kahakog sayon kaayo nga ang atong pagdayeg mahimong pangibog. Nag-awhag ug pagkamaunongon diha sa kaminyoon, gitambagan ni Haring Solomon ang mga bana nga sa mahulagwayon ‘moinom gikan sa ilang kaugalingong sudlanan.’ (Proverbio 5:15) Ug si Jesus miingon: “Ang matag usa nga padayong nagatan-aw sa usa ka babaye aron magbaton ug maulagong kaibog kaniya nakahimo na ug pagpanapaw uban kaniya diha sa iyang kasingkasing.” (Mateo 5:28) Ang mga bana nga motan-aw ug pornograpikong materyal peligrong madani sa pagpanapaw, busa magluib sa ilang mga asawa ug mahimong dili maunongon kanila. Sa samang paagi, ang asawa nga gusto kaayong motan-aw ug mga drama sa telebisyon bahin sa mga sugilanon sa pagpanapaw matental sa pagkahimong dili maunongon sa iyang bana. Apan, pinaagi sa pagpabiling tinuod nga maunongon sa atong kapikas, atong mapalig-on ang bugkos sa kaminyoon, ug atong matabangan ang usag usa sa atong mga paningkamot sa pagpahimuot kang Jehova nga Diyos.

Mga Tabang sa Pagpabiling Maunongon

18. Ang pagpabili sa unsa ang makatabang kanato sa pagkahimong maunongon?

¹⁸ Unsay makatabang kanato aron makasagubang sa hagit sa pagkamaunongon niining upat ka bahin: pagkamaunongon kang Jehova, sa iyang organisasyon, sa kongregasyon, ug sa atong kapikas sa kaminyoon? Ang usa ka tabang mao ang pag-apresyar nga ang pagsagubang sa hagit sa pagkamaunongon nalangkit pag-ayo sa bindikasyon sa pagkasoberano ni Jehova. Oo, pinaagi sa pagpabiling maunongon atong ginapasundayag nga atong gilantaw si Jehova ingong Soberano sa Uniberso. Sa ingon kita usab makabaton ug pagtahod-sa-kaugalingon ug sa paglaom sa kinabuhing walay kataposan diha sa bag-ong kalibotan ni Jehova. Atong matabangan ang atong kaugalingon nga makapabiling maunongon pinaagi sa pagpalandong sa maayong mga panig-ingnan sa pagkamaunongon, gikan kang Jehova hangtod ngadto sa mga tawong gihisgotan sa Bibliya ug diha sa atong mga publikasyon sa Watch Tower, lakip na sa mga asoy diha sa Yearbook.

19. Unsang papel ang gidula sa pagtuo diha sa atong pagkahimong maunongon?

¹⁹ Ang malig-ong pagtuo kang Jehova nga Diyos ug ang kahadlok nga dili-makapahimuot kaniya motabang kanato sa pagsagubang sa hagit sa pagkamaunongon. Atong mapalig-on ang atong pagtuo ug kahadlok kang Jehova pinaagi sa kuging pagtuon sa Pulong sa Diyos ug pinaagi sa pagpakigbahin sa Kristohanong ministeryo. Kini motabang kanato sa paglihok subay sa tambag ni Pablo nga narekord sa Efeso 4:23, 24: “Magmabag-o kamo diha sa puwersa nga nagapalihok sa inyong kaisipan, ug magasul-ob sa bag-ong pagkatawo nga gilalang sumala sa kabubut-on sa Diyos diha sa matuod nga pagkamatarong ug pagkamaunongon.”

20. Labaw sa tanan, unsang hiyas ang motabang kanato nga magpabiling maunongon kang Jehova ug sa tanan pang uban nga kita utangan ug pagkamaunongon?

²⁰ Ang pagpabili sa mga hiyas ni Jehova motabang kanato nga mahimong maunongon. Labaw sa tanan, ang dili-mahakogong gugma sa atong langitnong Amahan ug pagkamapasalamaton sa tanan nga iyang nahimo alang kanato, nga higugmaon siya uban sa atong bug-os nga kasingkasing ug kalag ug hunahuna ug kusog motabang kanato nga mahimong maunongon kaniya. Dugang pa, ang pagbaton sa gugma nga giingon ni Jesus nga magpaila sa iyang mga sumusunod motabang kanato nga mahimong maunongon ngadto sa tanang mga Kristohanon diha sa kongregasyon ug sa atong pamilya. Sa laing pagkasulti, kini sa aktuwal maoy bahin sa pagkahimong hakog ug dili-hakog. Ang pagkadili-maunongon nagkahulogag pagkahakog. Ang pagkamaunongon nagkahulogag pagkadili-hakog.​—Marcos 12:30, 31; Juan 13:34, 35.

21. Sa unsang paagi ikasumaryo ang bahin sa pagsagubang sa hagit sa pagkamaunongon?

²¹ Sa pagsumaryo: Ang pagkamaunongon mao ang labing maayong hiyas nga gipasundayag ni Jehova nga Diyos, ni Jesu-Kristo, ug sa tanang matuod nga mga alagad ni Jehova. Aron makabaton ug maayong relasyon uban kang Jehova nga Diyos, kinahanglang atong sagubangon ang hagit sa pagkamaunongon kaniya pinaagi sa pagkinabuhi sa iyang matarong nga mga kinahanglanon, pinaagi sa dili pagpakiglabot sa iyang mga kaaway, ug pinaagi sa pagdepensa kang Jehova sa pagsangyaw sa pormal ug dili-pormal nga paagi. Kinahanglang atong sagubangon usab ang hagit sa pagkahimong maunongon sa makitang organisasyon ni Jehova. Kinahanglang maunongon kita sa atong mga kongregasyon ug maunongon sa atong mga kapikas sa kaminyoon. Pinaagi sa malamposong pagsagubang sa hagit sa pagkamaunongon, magapakigbahin kita sa pagbindikar sa pagkasoberano ni Jehova, ug magadapig kaniya sa isyu. Sa ingon maangkon nato ang iyang pabor ug makadawat sa ganti nga kinabuhing walay kataposan. Ang giingon ni apostol Pablo bahin sa diyosnong debosyon mahimong ikaingon usab bahin sa atong pagsagubang sa hagit sa pagkamaunongon. Kini mapuslanon alang sa kinabuhi karon ug nianang sa umaabot.​—Salmo 18:25; 1 Timoteo 4:8.

Unsay Imong Tubag?

◻ Sa unsang mga paagi nga atong masagubang ang hagit sa pagkamaunongon sa Diyos?

◻ Unsay gikinahanglan kanato sa pagpabiling maunongon sa organisasyon ni Jehova?

◻ Sa unsang paagi makasagubang ang mga ansiano sa hagit sa pagkamaunongon?

◻ Unsang hagit nga nalangkit sa pagkamaunongon ang kinahanglang atubangon sa minyong mga Kristohanon?

◻ Unsang mga hiyas ang motabang kanato sa pagsagubang sa hagit sa pagkamaunongon?

[Hulagway sa panid 17]

Ang pagkamaunongon sa mga sakop sa kongregasyon magpugong sa mga ansiano sa pagbutyag sa kompidensiyal nga mga butang

[Hulagway sa panid 18]

Ang pagkamaunongon sa usa nga kapikas makalig-on sa bugkos sa kaminyoon