Kon Nganong ang Matuod nga Pagsimba Makadawat sa Panalangin sa Diyos

“Dayega ninyo si Jah! Ang kaluwasan ug ang himaya ug ang gahom iya sa atong Diyos, tungod kay ang iyang mga paghukom matuod ug matarong.”​—PINADAYAG 19:1, 2.

1. Sa unsang paagi modangat sa iyang kalaglagan ang Dakong Babilonya?

“ANG Dakong Babilonya” napukan sa panan-aw sa Diyos ug karon nag-atubang sa kalaglagan. Ang propesiya sa Bibliya nagpaila nga kining tibuok-kalibotang relihiyosong bigaon sa dili madugay makaagom sa silot sa mga kamot sa iyang politikanhong mga hinigugma; ang iyang kalaglagan kalit ug tulin. Ang pinadayag ni Jesus ngadto kang Juan naundan niining matagnaong mga pulong: “Usa ka kusgang anghel mialsa ug usa ka bato nga samag usa ka dakong galingang-bato ug nagtambog niini ngadto sa dagat, nga nag-ingon: ‘Sa ingon, sa usa ka kusog nga paglabog ang dakong siyudad nga Babilonya igatambog, ug siya dili na gayod makaplagan pag-usab.’”​—Pinadayag 18:2, 21.

2. Sa unsang paagi mosanong ang mga alagad ni Jehova sa kalaglagan sa Babilonya?

² Ang kalaglagan sa Dakong Babilonya hilakan sa pila ka elemento sa kalibotan ni Satanas apan tino nga dili sa mga alagad sa Diyos, langitnon man o yutan-on. Ang ilang malipayong singgit ngadto sa Diyos mahimong: “Dayega ninyo si Jah! Ang kaluwasan ug ang himaya ug ang gahom iya sa atong Diyos, tungod kay ang iyang mga paghukom matuod ug matarong. Kay iya nang gikapahamtangan ug paghukom ang dakong bigaon kinsa nagdunot sa yuta pinaagi sa iyang pagpakighilawas, ug siya nakapanimalos na sa dugo sa iyang mga ulipon diha sa iyang kamot.”​—Pinadayag 18:9, 10; 19:1, 2.

Unsang Bunga ang Kinahanglang Ipatungha sa Matuod nga Relihiyon?

3. Unsang mga pangutana ang nagkinahanglag tubag?

³ Sanglit ang yuta pagahinloan sa bakak nga relihiyon, unsang matanga sa pagsimba ang magpabilin? Unsaon nato pagtino karon kon haing relihiyosong grupo ang makalabang sa pagkalaglag sa empiryo sa bakak nga relihiyon sa kalibotan ni Satanas? Unsang matarong nga bunga ang kinahanglang ipatungha niining grupoha? Adunay labing menos napulo ka ilhanan sa pag-ila sa matuod nga pagsimba ni Jehova.​—Malakias 3:18; Mateo 13:43.

4. Unsa ang unang kinahanglanon alang sa matuod nga pagsimba, ug sa unsang paagi si Jesus naghatag ug panig-ingnan niining bahina?

⁴ Una sa tanan, ang tinuod nga mga Kristohanon kinahanglang magtuboy sa pagkasoberano nga tungod niini namatay si Jesus​—ang pagkasoberano sa iyang Amahan. Wala itugyan ni Jesus ang iyang kinabuhi alang sa bisan unsang politikanhon, tribonhon, etniko, o sosyal nga kawsa. Iyang giuna ang Gingharian sa iyang Amahan labaw sa tanang Hudiyonhong politikanhon o rebolusyonaryong mga tinguha. Iyang gitubag ang tanyag ni Satanas alang sa kalibotanong gahom pinaagi sa mga pulong: “Pahilayo, Satanas! Kay kini nahisulat, ‘Si Jehova nga imong Diyos ang imong pagasimbahon, ug kaniya lamang ikaw magahatag ug sagradong pag-alagad.’” Nasayod siya gikan sa Hebreohanong Kasulatan nga si Jehova mao ang tinuod nga Soberano sa tibuok yuta. Unsang relihiyosong grupo ang dayag kaayong nagpaluyo sa pagmando ni Jehova inay kay niining politikanhong mga sistema sa kalibotan?​—Mateo 4:10; Salmo 83:18.

5. (a) Sa unsang paagi pagalantawon sa matuod nga mga magsisimba ang ngalan sa Diyos? (b) Unsay nagpakita nga ang mga Saksi ni Jehova nagpasidungog nianang ngalana?

⁵ Ang ikaduhang kinahanglanon mao nga ang matuod nga pagsimba kinahanglang magpadako ug magbalaan sa ngalan sa Diyos. Gipadayag sa Labing Gamhanan ang iyang ngalan, Jehova (nga gihubad nga Yahweh sa pila ka bersiyon sa Bibliya), ngadto sa iyang katawhang Israel, ug gigamit kini sa linibo ka beses diha sa Hebreohanong Kasulatan. Bisan sa wala pa kana, si Adan, Eva, ug ang uban nahibalo sa ngalan, bisag wala nila kana kanunay tahora. (Genesis 4:1; 9:26; 22:14; Exodo 6:2) Samtang ang mga tighubad sa Kakristiyanohan ug sa mga Hudiyo sa kasagaran nagkuha sa balaang ngalan gikan sa ilang mga Bibliya, ang mga Saksi ni Jehova naghatag nianang ngalana sa takos nga posisyon ug pagtahod niini diha sa New World Translation of the Holy Scriptures. Ilang gipasidunggan kanang ngalana, sama sa gihimo sa unang mga Kristohanon. Si Santiago nagpamatuod: “Giasoy sa bug-os ni Simeon kon giunsa sa Diyos sa unang higayon pagliso sa iyang pagtagad ngadto sa kanasoran aron sa pagkuha gikan kanila ug usa ka katawhan alang sa iyang ngalan. Ug niini nahiuyon ang mga pulong sa mga Propeta, . . . ‘aron nga kadtong mga mahibilin sa mga tawo matinuorong mangita kang Jehova, kauban sa katawhan sa kanasoran, ang katawhan nga ginatawag sa akong ngalan, nagaingon si Jehova, nga maoy nagabuhat niining mga butanga.’”​—Buhat 15:14-17; Amos 9:11, 12.

6. (a) Unsa ang ikatulong kinahanglanon alang sa matuod nga pagsimba? (b) Giunsa pagpasiugda ni Jesus ug ni Daniel ang pagmando sa Gingharian? (Lucas 17:20, 21)

⁶ Ang ikatulong kinahanglanon alang sa matuod nga pagsimba mao nga kinahanglang bayawon niini ang Gingharian sa Diyos ingon nga mao lamang ang lehitimong sulbad sa mga suliran sa katawhan sa pagmando. Si Jesus tin-aw nga nagtudlo sa iyang mga sumusunod sa pag-ampo alang nianang Ginghariana nga moabot, alang sa pagmando sa Diyos nga maoy mobanos sa pagdumala sa yuta. Si Daniel gidasig sa pagtagna mahitungod sa kataposang mga adlaw: “Ang Diyos sa langit magatukod ug usa ka gingharian nga dili gayod malumpag. . . . Kini magadugmok ug magatapos niining tanang [kalibotanon, politikanhong] gingharian, ug kini mismo magpabilin sa mga panahon nga walay tino.” Kinsa ang nagpakita pinaagi sa ilang paagi sa paglihok niining ika-20ng siglo nga sila naghatag ug wala-mabahin nga pagpaluyo nianang Ginghariana​—ang mga relihiyon sa Dakong Babilonya o ang mga Saksi ni Jehova?​—Daniel 2:44; Mateo 6:10; 24:14.

7. Unsay panglantaw sa matuod nga mga magsisimba sa Bibliya?

⁷ Ang ikaupat nga kinahanglanon alang sa pag-uyon sa Diyos mao nga ang matuod nga mga alagad sa Diyos kinahanglang magtuboy sa Bibliya ingong ang dinasig nga Pulong sa Diyos. Busa dili sila mahimong mga biktima niadtong nagasaway sa kasulatan, nga nagsulay sa paglantaw sa Bibliya nga usa lamang ka yanong sinulat sa tawo uban sa tanang kakulangan nga gipakita niini. Ang mga Saksi ni Jehova nagtuo nga ang Bibliya maoy dinasig nga Pulong sa Diyos, ingon sa gisulat ni Pablo kang Timoteo: “Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagtul-id sa mga butang, sa pagdisiplina diha sa pagkamatarong, aron nga ang tawo sa Diyos mahimong bug-os makasarang, kompleto nga masinangkapan alang sa tanang maayong buhat.”a Busa, gihimo sa mga Saksi ni Jehova ang Bibliya ingong ilang giya, ilang basahon alang sa adlaw-adlaw nga pagkinabuhi, ug ilang tuboran sa paglaom alang sa umaabot.​—2 Timoteo 3:16, 17.

Ang Relihiyon sa Gugma, Dili sa Pagdumot

8. Unsa ang ikalima nga kinahanglanon alang sa matuod nga pagsimba?

⁸ Giunsa pag-ila ni Jesus ang iyang tinuod nga mga sumusunod? Ang iyang tubag moagak kanato ngadto sa hinungdanong ikalimang ilhanan sa matuod nga pagsimba. Si Jesus nag-ingon: “Ako magahatag kaninyo ug usa ka bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa. Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.” (Juan 13:34, 35) Giunsa pagpakita ni Jesus ang iyang gugma? Pinaagi sa paghatag sa iyang kinabuhi ingong halad lukat. (Mateo 20:28; Juan 3:16) Nganong ang tinuod nga gugma usa ka hinungdanong hiyas alang sa tinuod nga mga Kristohanon? Si Juan nagpatin-aw: “Mga hinigugma, magpadayon kita sa paghigugmaay sa usag usa, tungod kay ang gugma gikan sa Diyos . . . Siya nga wala magahigugma wala makaila sa Diyos, tungod kay ang Diyos gugma.”​—1 Juan 4:7, 8.

9. Kinsa ang nakapakita ug tinuod nga gugma, ug sa unsang paagi?

⁹ Kinsa sa atong kapanahonan ang nagpakita niining matanga sa gugma, bisan atubangan sa rasanhon, nasodnon, o etnikong panagdumot? Kinsa ang nakapasar sa kinalabwang pasulit, bisan hangtod sa kamatayon, aron nga ang ilang gugma kinahanglang maoy mangibabaw? Makaingon ba kita nga ang Katolikong mga pari ug mga madre kinsa miadmiter nga nakigbahin sa pila ka tulubagon alang sa pagpuo sa rasa nga nahitabo sa Rwanda niadtong 1994? Ang Ortodokso ba sa Serbia o ang mga Katoliko sa Croatia nga nakigbahin sa “etnikong pagpuo” ug ubang dili-Kristohanong mga buhat nianang giyera sibil sa Balkan? O ang Katoliko ba o Protestanteng klero nga nagpasamot sa pagpihig ug pagdumot sa Amihanang Irlandia latas sa miaging pipila ka dekada? Sa walay duhaduha ang mga Saksi ni Jehova dili gayod maakusar nga nakigbahin sa bisan hain niining mga gubata. Sila nag-antos sa mga bilanggoan ug sa mga kampo konsentrasyon, bisan hangtod sa kamatayon, inay kay luiban ang ilang Kristohanong gugma.​—Juan 15:17.

10. Nganong ang matuod nga mga Kristohanon magpabiling neyutral?

¹⁰ Ang ikaunom nga kinahanglanon alang sa pagsimba nga dalawaton sa Diyos mao ang neyutralidad may kalabotan sa politikanhong mga kalihokan niining kalibotana. Nganong ang mga Kristohanon magpabiling neyutral sa mga politika? Si Pablo, Santiago, ug Juan naghatag kanato ug lig-ong katarongan alang niana nga baroganan. Si apostol Pablo misulat nga si Satanas mao “ang diyos niining sistemaha sa mga butang,” nga nagbuta sa mga hunahuna sa mga dili magtutuo pinaagi sa tanang posible nga paagi, lakip sa makapabahinbahin nga mga politika. Ang tinun-an nga si Santiago nag-ingon nga “ang pakighigala sa kalibotan maoy pakigdumot sa Diyos,” ug si apostol Juan nag-ingon nga “ang tibuok kalibotan nahimutang diha sa gahom sa usa nga tuman-kadaotan.” Busa, ang tinuod nga Kristohanon dili mokompromiso sa iyang pagkamahinalaron sa Diyos pinaagi sa pagpakigbahin sa politika ug gahom sa dunot nga kalibotan ni Satanas.​—2 Corinto 4:4; Santiago 4:4; 1 Juan 5:19.

11. (a) Sa unsang paagi gilantaw sa mga Kristohanon ang gubat? (b) Unsay Kasulatanhong pasikaran alang niining maong baroganan? (2 Corinto 10:3-5)

¹¹ May kalabotan sa nahaunang duha ka kinahanglanon, ang ikapito nahimong dayag, sa ato pa, nga ang matuod nga Kristohanong mga magsisimba kinahanglang dili makigbahin sa mga gubat. Sanglit ang matuod nga relihiyon maoy usa ka tibuok-kalibotang panag-igsoonay nga pinasikad sa gugma, nan walay makapabahin o makapukan nianang “tibuok kapunongan sa . . . mga igsoon dinhi sa kalibotan.” Si Jesus nagtudlo sa gugma, dili sa pagdumot; sa pakigdait, dili sa gubat. (1 Pedro 5:9; Mateo 26:51, 52) Ang mao gihapon nga “tuman-kadaotang usa,” si Satanas, nga nagsulsol kang Cain sa pagbuno kang Abel nagpadayon sa pagpugas ug pagdumot taliwala sa katawhan ug sa pagpukaw ug mga panag-away ug pag-ula ug dugo pinasikad sa politikanhon, relihiyoso, ug etnikong mga pagkabahinbahin. Ang matuod nga mga Kristohanon ‘dili na makakat-on ug gubat,’ bisag unsa pay mahitabo. Sa mahulagwayong paagi, ila nang ‘gihimo ang ilang mga espada ingong mga lipya sa daro ug ang ilang mga bangkaw ingong mga galab.’ Sila nakapatungha ug malinawong bunga sa espiritu sa Diyos.​—1 Juan 3:10-12; Isaias 2:2-4; Galacia 5:22, 23.

Gipanalanginan sa Diyos ang Kaputli sa Panggawi ug mga Pagtulon-an

12. (a) Unsa ang ikawalong kinahanglanon, apan unsang relihiyosong mga pagkabahinbahin ang imong mahisgotan? (b) Giunsa pagpasiugda ni Pablo kining ikawalong kinahanglanon?

¹² Ang Kristohanong panaghiusa mao ang ikawalong kinahanglanon sa matuod nga pagsimba. Hinunoa, ang makapabahinbahin nga mga relihiyon sa Kakristiyanohan wala makatabang niining katuyoana. Daghang gitawag nga pangunang mga denominasyon ang nasip-ak ngadto sa lainlaing mga sekta, ug miresultag kalibog. Tagda, pananglitan, ang Baptist nga relihiyon sa Tinipong Bansa, nga nasip-ak tali sa Northern Baptist (American Baptist Churches in the U.S.A.) ug Southern Baptist (Southern Baptist Convention), ingon man sa dinosenang ubang grupo sa mga Baptist nga misangpot gumikan sa panagbulag. (World Christian Encyclopedia, panid 714) Daghang dibisyon ang nanungha gumikan sa lahi nga mga doktrina o sa pagdumala sa simbahan (pananglitan, Presbyterian, Episcopalian, Congregational). Ang mga dibisyon sa Kakristiyanohan gitugbangan niadtong mga relihiyon sa gawas sa Kakristiyanohan​—Budhismo man, Islam, o Hinduismo. Unsay gitambag ni apostol Pablo sa unang mga Kristohanon? “Karon ako maawhagong magtambag kaninyo, mga igsoon, pinaagi sa ngalan sa atong Ginoong Jesu-Kristo nga kamong tanan magapamulong diha sa panag-uyon, ug nga angayng walay panagkabahin taliwala kaninyo, apan nga kamo unta sibong magkahiusa diha sa samang kaisipan ug diha sa samang dalan sa panghunahuna.”​—1 Corinto 1:10; 2 Corinto 13:11.

13, 14. (a) Unsa ang kahulogan sa ‘pagkahimong balaan’? (b) Sa unsang paagi mahuptang hinlo ang matuod nga pagsimba?

¹³ Unsa ang ikasiyam nga kinahanglanon alang sa relihiyon nga inuyonan sa Diyos? Usa ka prinsipyo sa Bibliya ang gipahayag sa Levitico 11:45: “Pamatud-i ang inyong kaugalingon nga balaan, kay ako balaan.” Gisubli ni apostol Pedro kini nga kinahanglanon sa dihang siya misulat: “Kauyon sa Balaang Usa nga mitawag kaninyo, magmabalaan usab kamo sa tanan ninyong mga panggawi.”​—1 Pedro 1:15.

¹⁴ Unsay ipasabot niini nga panginahanglan nga mahimong balaan? Nga ang mga magsisimba ni Jehova kinahanglang hinlo sa espirituwal ug moral. (2 Pedro 3:14) Walay dapit alang sa dili-mahinulsolon, tinuyo nga mga makasasala, kinsa pinaagi sa ilang panggawi nagatamay sa halad lukat ni Kristo. (Hebreohanon 6:4-6) Gibaod ni Jehova nga ang Kristohanong kongregasyon huptang hinlo ug balaan. Sa unsang paagi kana matuman? Sa usa ka bahin pinaagi sa hudisyal nga paagi sa pagpalagpot niadtong naghatag ug kahugawan sa kongregasyon.​—1 Corinto 5:9-13.

15, 16. Unsang mga kausaban ang gihimo sa daghang Kristohanon sa ilang mga kinabuhi?

¹⁵ Sa wala pa masayod sa Kristohanong kamatuoran, daghan ang nagkinabuhing mahilayon, mapatuyangon, nasentro-sa-kaugalingon nga mga kinabuhi. Apan ang pulong mahitungod kang Kristo nakapausab kanila, ug sila nakabaton ug kapasayloan sa ilang mga sala. Gipahayag kini ni Pablo sa kusganong paagi sa dihang siya nagsulat: “Unsa! Wala ba kamo mahibalo nga ang mga tawong dili-matarong dili makapanunod sa gingharian sa Diyos? Ayaw pagpahisalaag. Walay mga makihilawason, ni mga tigsimbag idolo, ni mga mananapaw, ni mga lalaking nahuptan alang sa dili-kinaiyanhong mga katuyoan, ni mga lalaking nakigdulog sa mga lalaki, ni mga kawatan, ni mga tawong dalo, ni mga palahubog, ni mga tigsultig pasipala, ni mga mangingilkil nga makapanunod sa gingharian sa Diyos. Ug gani ingon niana ang pipila kaninyo kaniadto. Apan kamo hinlo nang nahugasan.”​—1 Corinto 6:9-11.

¹⁶ Dayag nga giuyonan ni Jehova kadtong naghinulsol tungod sa ilang dili-kasulatanhong panggawi, nagbag-o, ug nahimong matuod nga mga sumusunod ni Kristo ug sa iyang mga pagtulon-an. Gihigugma gayod nila ang ilang mga silingan sama sa ilang mga kaugalingon ug gipakita kini sa daghang paagi, sama sa paglahutay sa ministeryo nga nagatanyag ug mensahe sa kinabuhi ngadto sa tanan nga maminaw.​—2 Timoteo 4:5.

“Ang Kamatuoran Magpagawas Kaninyo”

17. Unsa ang ikanapulo nga kinahanglanon alang sa matuod nga pagsimba? Paghatag ug mga pananglitan.

¹⁷ Adunay ikanapulo nga kinahanglanon si Jehova alang niadtong mosimba kaniya sa espiritu ug kamatuoran​—putli nga pagtulon-an. (Juan 4:23, 24) Si Jesus nag-ingon sa iyang mga sumusunod: “Inyong mahibaloan ang kamatuoran, ug ang kamatuoran magpagawas kaninyo.” (Juan 8:32) Ang kamatuoran sa Bibliya nagpagawas kanato gikan sa mga doktrina nga nagpasipala sa Diyos, sama sa imortal nga kalag, kalayonhong impiyerno, ug purgatoryo. (Ecclesiastes 9:5, 6, 10; Ezekiel 18:4, 20) Nagpahigawas kini kanato gikan sa Babilonyanhong misteryo sa Kakristiyanohan nga “Santisima Trinidad.” (Deuteronomio 4:35; 6:4; 1 Corinto 15:27, 28) Ang pagsugot sa kamatuoran sa Bibliya nagpatunghag mahigugmaon, mabalak-on, maluloton, maluluy-ong mga tawo. Ang matuod nga Kristiyanidad wala gayod magmatuto ug mapanimaslon, panatikong mga inkwisitor, sama kang Tomás de Torquemada, o madumtanon nga mga tigpasiugdag gubat, sama sa mga papa nga nagpaluyo sa mga Krusada. Apan, ang Dakong Babilonya nakapatungha niining matanga sa bunga sa tibuok kasaysayan, gikan sa labing menos sa panahon ni Nimrod hangtod karon.​—Genesis 10:8, 9.

Usa ka Lahi nga Ngalan

18. (a) Kinsa ang nakaabot sa napulo ka kinahanglanon alang sa matuod nga pagsimba ug sa unsang paagi? (b) Unsay angay natong buhaton sa tinagsatagsa aron makapanunod sa panalangin nga naghulat kanato?

¹⁸ Kinsa karon ang tinuod nga nagtuman niining napulo ka kinahanglanon sa matuod nga pagsimba? Kinsa ang ilado ug giila sa uban tungod sa ilang rekord sa integridad ug pagkamalinawon? Sa tibuok kalibotan ang mga Saksi ni Jehova maoy ilado tungod sa pagkahimong “dili bahin sa kalibotan.” (Juan 15:19; 17:14, 16; 18:36) Ang katawhan ni Jehova ginapasidunggan sa pagdala sa iyang ngalan ug sa pagkahimong iyang mga Saksi, maingon nga si Jesu-Kristo maoy usa ka matinumanong saksi sa iyang Amahan. Gidala nato kanang balaang ngalan, nga nasayod sa atong tulubagon sa pagkinabuhi uyon sa gihawasan niini. Ug, ingong iyang mga Saksi, pagkamahimayaong paglaom ang naghulat kanato! Kana mao ang pagkahimong bahin sa usa ka masinugtanon, nahiusang tawhanong pamilya, nga nagsimba sa Soberano sa Uniberso diha sa napasig-uling paraiso dinhi sa yuta. Aron makadawat sa maong panalangin, magpadayon kita sa pagpaila sa atong kaugalingon uban sa matuod nga pagsimba ug sa pagdala sa ngalang mga Saksi ni Jehova nga magarbohon “tungod kay ang iyang mga paghukom maoy matuod ug matarong”!​—Pinadayag 19:2; Isaias 43:10-12; Ezekiel 3:11.

[Footnote]

Unsaon Nimo Pagtubag?

◻ Giunsa paglantaw sa mga alagad ni Jehova ang kalaglagan sa Dakong Babilonya?

◻ Unsay pangunang mga kinahanglanon sa matuod nga pagsimba?

◻ Sa unsang paagi ang kamatuoran magpahigawas kanimo?

◻ Unsang linaing dungog ang nabatonan nato ingong mga Saksi ni Jehova?

[Hulagway sa panid 17

Ang mga Saksi ni Jehova nagawali ug nagatudlo sa maayong balita sa Gingharian sa Diyos

[Hulagway sa panid 18]

Ang matuod nga mga Kristohanon kanunayng nagpabiling neyutral kon bahin sa kalibotanong mga politika ug mga gubat

[Credit Line]

Ayroplano: Kortesiya sa Ministry of Defense, London