Mga Pangutana Gikan sa mga Magbabasa

Ikaingon ba nato nga ang mga alagad sa Diyos karong adlawa nga may yutan-ong paglaom may parehong espiritu sa Diyos sama sa dinihogan-sa-espiritu nga mga Kristohanon?

Dili bag-o kining pangutanaha. Kining samang butang gihisgotan sa “Mga Pangutana Gikan sa mga Magbabasa” diha sa The Watchtower sa Abril 15, 1952. Daghan ang nangahimong mga Saksi sukad niadto, busa atong tagdon pag-usab ang pangutana ug sa paghisgot atong repasohon ang giingon sa mas unang materyal.

Sa pagkatinuod, ang tubag maoy, oo, ang matinumanong mga igsoong lalaki ug babaye sa ubang karnero nga matang parehong makaambit uban sa mga dinihogan sa pagdawat sa balaang espiritu sa Diyos.​—Juan 10:16.

Siyempre, kini wala magpasabot nga ang espiritu nagalihok sa samang paagi diha sa tanang indibiduwal. Hinumdomi ang matinumanong mga alagad sa una-Kristohanong mga panahon, nga tinong nakadawat sa espiritu sa Diyos. Pinaagi sa gahom gikan sa espiritu, ang pipila kanila nakapatay sa mabangis nga mga mananap, nakaayo sa sakit, nakabanhaw pa ug mga patay. Ug gikinahanglan nila ang espiritu sa pagsulat sa dinasig nga mga basahon sa Bibliya. (Maghuhukom 13:24, 25; 14:5, 6; 1 Hari 17:17-24; 2 Hari 4:17-37; 5:1-14) Ang The Watchtower miingon: “Bisag dili sa dinihogang matang, sila napuno sa balaang espiritu.”

Sa laing bahin, tagda ang mga lalaki ug mga babaye sa unang siglo kinsa dinihogan sa balaang espiritu, nga nahimong espirituwal nga mga anak sa Diyos nga may langitnong paglaom. Ang tanan dinihogan, apan kana wala magpasabot nga ang espiritu human niadto naglihok sa samang paagi diha sa tanan kanila. Tin-aw kana gikan sa 1 Corinto kapitulo 12. Didto gihisgotan ni apostol Pablo ang mga gasa sa espiritu. Atong mabasa sa mga bersikulo 8, 9, ug 11: “Adunay gihatag ngadto sa usa nga pamulong sa kaalam, ngadto sa lain pamulong sa kahibalo sumala sa mao ra nga espiritu, ngadto sa lain pagtuo pinaagi sa mao ra nga espiritu, ngadto sa lain mga gasa sa pagpang-ayo pinaagi nianang maong usa ka espiritu. . . . Apan ang tanan niini nga mga pagpalihok ginahimo sa usa ug mao ra nga espiritu, nga nagahimog pagpang-apod-apod ngadto sa matag usa nga iya-iya sumala sa pagabut-on niini.”

Hinuon, dili tanang mga dinihogan balik niadto may milagrosong mga gasa sa espiritu. Sa 1 Corinto kapitulo 14, si Pablo naghisgot sa usa ka tigom sa kongregasyon nga niana ang usa may gasa sa mga sinultihan, apan walay usa ang anaa nga may gasa sa paghubad. Bisan pa, sa pipila ka mas unang okasyon, ang matag usa kanila nakaagig pagdihog sa espiritu. Makataronganon bang isulti nga ang igsoong may gasa sa mga sinultihan may labaw nga espiritu kay sa uban nga atua didto? Dili. Kadtong ubang mga dinihogan dili ubos ug pribilehiyo, ingon nga daw sila dili makasabot sa Bibliya sama nianang usa o dili makasagubang sa mga pagsulay. Ang espiritu naglihok sa linaing paagi diha sa igsoong makasultig mga pinulongan. Sa gihapon, kinahanglan nga siya ug sila magpabiling suod kang Jehova ug “padayong magpakapuno sa espiritu,” sama sa gisulat ni Pablo.​—Efeso 5:18.

Bahin niadtong nahibilin karong adlawa, tinong sila nakadawat sa espiritu sa Diyos. Sa usa ka higayon kini naglihok diha kanila sa linaing paagi​—sa panahong sila gidihogan ug gisagop ingong espirituwal nga mga anak. Human niadto sila “padayong magpakapuno sa espiritu,” nga nakabaton sa tabang niini sa dihang sila maningkamot sa pagsabot sa Bibliya nga mas tin-aw pa, sa pagpanguna diha sa buluhatong pagsangyaw, o sa pag-atubang sa mga pagsulay​—sa personal man o sa organisasyonal.

Ang mga membro sa “ubang karnero,” bisag wala makasinati nga gidihogan, sa ubang mga bahin nakadawat sa balaang espiritu. Ang The Watchtower sa Abril 15, 1952, miingon:

“Ang ‘ubang karnero’ karong adlawa nagabuhat sa samang pagsangyaw nga buluhaton ingon sa nahibilin, ubos sa samang masulayong mga kahimtang, ug nagpadayag ug samang pagkamatinumanon ug integridad. Nagakaon sila sa samang espirituwal nga talad, nagakaon sa samang pagkaon, nagapadapat sa samang mga kamatuoran. Ingong bahin sa yutan-ong matang, nga may yutan-ong mga paglaom ug maidlot nga kaikag sa yutan-ong mga butang, sila tingali labawng interesado sa mga kasulatan nga naghisgot sa mga kahimtang sa yuta sa bag-ong kalibotan; samtang ang mga dinihogang nanghibilin, nga may langitnong mga paglaom ug malig-ong personal nga kaikag sa mga butang sa espiritu, tingalig labawng masiboton sa pagtuon niadtong mga butanga diha sa Pulong sa Diyos. . . . Bisan pa ang kamatuoran nagpabilin nga ang samang mga kamatuoran ug ang samang pagsabot mabatonan niining duha ka matang, ug kon diin lamang kutob magtuon ang mga indibiduwal ang magtino nga masabtan nila ang mga butang sa langit ug sa yuta. Ang espiritu sa Ginoo mabatonan sa parehong sukod niining duha ka matang, ug ang kahibalo ug pagsabot parehong ginatanyag sa duha, nga may parehong kahigayonan sa pagpadapat niana.”