Mga Pangutana Gikan sa mga Magbabasa

Ang mga taho sa pipila ka tuig nagpakita nga ang gidaghanon sa mga nakigbahin sa mga emblema sa Memoryal miuswag ug diyutay. Nagpasabot ba kini nga daghang bag-ohan ang gidihogan sa balaang espiritu?

Adunay maayong katarongan sa pagtuo nga ang gidaghanon nga 144,000 sa dinihogang mga Kristohanon nakompleto na sa mga dekadang milabay.

Sa Buhat 2:1-4, mabasa nato ang bahin sa mga nauna nianang limitadong grupo: “Karon samtang ang adlaw sa kasaulogan sa Pentecostes nagapadayon silang tanan nagtingob diha sa samang dapit, ug sa kalit may nahitabong kabanha gikan sa langit sama gayod nianang nagahuros makusog nga hangin, ug kini mipuno sa tibuok nga balay diin sila nanglingkod. Ug ang mga dila nga maorag kalayo napakita ngadto kanila ug naapod-apod, ug usa ang mipahiluna diha sa matag usa kanila, ug silang tanan napuno sa balaang espiritu ug misugod sa pagsulti uban sa lainlaing mga dila, ingon sa gitugot sa espiritu nga ilang ipamulong.”

Human niana, si Jehova nagpili sa uban, ug siya nagdihog kanila pinaagi sa iyang balaang espiritu. Libolibo ang nadugang sa una pa kaayong katuigan sa Kristiyanidad. Sa pagsaulog sa Memoryal sa atong panahon, sagad ipasiugda sa mamumulong ang mga pulong ni apostol Pablo sa Roma 8:15-17, nga naghisgot nga ang dinihogan “nakadawat ug espiritu sa pagsagop ingong mga anak.” Si Pablo midugang nga ang balaang espiritu nga ilang nadawat ‘nagapanaksi uban sa ilang espiritu, nga sila mga anak sa Diyos, kaubang mga manununod ni Kristo.’ Kadtong kinsa sa pagkatinuod nakabaton niini nga espiritu sa pagdihog nahibalo niini nga tino. Dili lamang kini usa ka tinguha o banaag sa emosyonal ug di-realistikanhong panglantaw sa ilang kaugalingon.

Nasabtan nato nga kining langitnong pagtawag nagpadayon latas sa kasiglohan, bisan tuod sa panahon nga gitawag ug Mangiob nga Panahon, dihay mga higayon sa dihang ang gidaghanon sa mga dinihogan diyutay ra kaayo.a Sa pagkatukod pag-usab sa matuod nga Kristiyanidad sa hapit nang matapos ang kataposang siglo, daghan pa ang gitawag ug gipili. Apan daw sa tungatunga sa katuigang 1930, ang bug-os nga gidaghanon sa 144,000 sa paninugdan natapos. Busa nagsugod pagtungha ang usa ka grupo sa maunongong mga Kristohanon nga may yutan-ong paglaom. Gitawag kini ni Jesus nga “ubang mga karnero,” kinsa mahiusa sa pagsimba uban sa dinihogan ingong usa nga giuyonang panon.​—Juan 10:14-16.

Ang mga kamatuoran sa paglabay sa mga dekada nagpabanaag sa nakompleto nga pagpanawag sa dinihogan ug sa panalangin ni Jehova sa nagtubong “dakong panon,” nga naglaom nga maluwas “sa dakong kasakitan.” (Pinadayag 7:9, 14) Pananglitan, sa pagsaulog sa Memoryal niadtong 1935, nga gitambongan sa 63,146, kadtong nakigbahin sa mga emblema sa pagpamatuod sa ilang pangangkon nga dinihogan may gidaghanong 52,465. Trayenta ka tuig sa ulahi, o sa 1965, ang mitambong maoy 1,933,089, samtang ang nakigbahin maoy 11,550. Sa pagpadayon sa 30 ka tuig hangtod karon, sa 1995 ang nanambong misulbong ngadto sa 13,147,201, apan 8,645 lamang ang nakigbahin sa tinapay ug bino. (1 Corinto 11:23-​26) Tin-aw, samtang nanglabay ang mga dekada, ang gidaghanon niadtong nangangkon nga mga nahibilin mius-os ug dako​—mga 52,400 sa 1935; 11,500 sa 1965; 8,600 sa 1995. Ugaling, kadtong adunay yutan-ong paglaom gipanalanginan, ug ang ilang gidaghanon kusog nga nag-uswag.

Ang labing bag-ong napatik nga taho maoy sa tuig 1995, ug kini nagpakitag 28 ka dugang nakigbahin kay sa miaging tuig bisan pag ang proporsiyon sa mga nakigbahin nianang sa nanambong mius-os gayod. Sa pagkatinuod, ang kamatuoran nga may pipila nga mipili sa pagpakigbahin sa mga emblema dili angayng kabalak-an. Sa paglabay sa katuigan ang pipila, bisan ang bag-ong mga nabawtismohan, kalit lang nga misugod sa pagpakigbahin. Sa daghang kaso, sa paglabay sa pipila ka panahon gidawat nila nga kini maoy sayop. Nasabtan sa pipila nga sila nakigbahin ingong emosyonal nga pagsanong sa tingali pisikal o mental nga kapit-os. Apan ilang nasabtan nga sila wala gayod tawga alang sa langitnong kinabuhi. Nangayo sila sa maluluy-ong pagsabot sa Diyos. Ug sila nagpadayon sa pag-alagad kaniya ingong maayo, maunongong mga Kristohanon, nga may paglaom nga walay kataposang kinabuhi sa yuta.

Dili kinahanglan nga adunay bisan kinsa kanato nga mabalaka kon ang usa ka tawo mosugod sa pagpakigbahin sa mga emblema o mohunong sa pagbuhat niana. Dili gayod alang kanato ang paghukom kon kaha ang usa dinihogan gayod sa balaang espiritu ug gitawag alang sa langitnong kinabuhi o dili. Hinumdomi ang malig-ong pasalig ni Jesus: “Ako ang maayong pastol, ug ako nakaila sa akong mga karnero.” Sama ka tino, si Jehova nasayod niadtong kinsa iyang gipili ingong espirituwal nga mga anak. Makataronganon gayod ang pagtuo nga ang gidaghanon sa mga dinihogan magpadayon sa pag-us-os samtang ang pagkatigulang ug ang wala damhang mga panghitabo magtapos sa ilang yutan-ong mga kinabuhi. Bisan pa niana, ingon nga kining matuod nga mga dinihogan magpamatuod nga matinumanon hangtod sa kamatayon, nga nagapanglantaw sa pagkadawat ug purongpurong sa kinabuhi, ang ubang mga karnero, nga naglaba sa ilang mga besti pinaagi sa dugo sa Kordero, makapanglantaw nga makalabang-buhi sa nagsingabot nga dakong kasakitan.​—2 Timoteo 4:6-8; Pinadayag 2:10.

[Footnote]