Ang Tanan Kinahanglang Manubag sa Diyos

“Ang matag usa kanato manubag alang sa iyang kaugalingon ngadto sa Diyos.”​—ROMA 14:12.

1. Unsang mga limitasyon ang gihatag diha sa kagawasan ni Adan ug Eva?

GILALANG ni Jehova nga Diyos ang atong unang mga ginikanan, si Adan ug Eva, ingong linalang nga may kagawasan sa pagpili. Bisan pag sila ubos lamang ug diyutay sa mga manulonda, sila maoy intelihenteng mga linalang nga may katakos sa paghimog maalamong mga desisyon. (Salmo 8:4, 5) Bisan pa niana, ang maong hinatag-sa-Diyos nga kagawasan dili lisensiya sa paghukom sa kaugalingon kon unsa ang husto ug sayop. Sila manubag sa ilang Maglalalang, ug kini nga pagkamay-tulubagon nakaabot hangtod sa tanan nilang mga anak.

2. Si Jehova maningil ug unsa sa dili madugay, ug ngano?

² Karon nga nagkahiduol na kita sa kinatayuktokan niining daotang sistema sa mga butang, maningil si Jehova sa yuta. (Itandi ang Roma 9:28.) Sa dili madugay, ang mga tawong dili-diyosnon kinahanglang manubag kang Jehova nga Diyos tungod sa pagdaot sa mga kahinguhaan sa yuta, sa paglaglag sa tawhanong kinabuhi, ug ilabina sa paglutos sa iyang mga alagad.​—Pinadayag 6:10; 11:18.

3. Unsang mga pangutana ang atong hisgotan?

³ Nagaatubang niining makasubong palaaboton, maayo nga atong palandongon ang matarong nga mga pakiglabot ni Jehova sa iyang mga linalang sa nangaging panahon. Sa unsang paagi ang Kasulatan makatabang kanato, sa atong bahin, sa paghimo ug maayong rekord sa atong Maglalalang? Unsang mga panig-ingnan ang makatabang, ug hain niini ang dili-angay natong pagasundogon?

Mga Manulonda Manubag

4. Sa unsang paagi nahibalo kita nga may-tulubagon sa Diyos ang mga manulonda sa ilang mga lihok?

⁴ Ang mga linalang ni Jehova nga mga manulonda sa kalangitan manubag usab kaniya sama kanato. Sa wala pa ang Lunop sa mga adlaw ni Noe, ang pipila ka manulonda masinupakong nagmateryalisar aron sa pagpakigsekso sa kababayen-an. Ingong mga linalang nga may kagawasan sa pagpili, kining espiritung mga linalang makahimo niining desisyona, apan gipanilngan sila sa Diyos. Sa dihang mibalik ang masinupakong mga manulonda sa gingharian sa espiritu, sila wala tugoti ni Jehova nga mabatonan nila ug balik ang ilang orihinal nga pagkabutang. Ang tinun-ang si Judas nagtug-an kanato nga sila “gikatagana uban ang dayon nga mga gapos diha sa naglugitom nga kangitngit alang sa paghukom sa dakong adlaw.”​—Judas 6.

5. Unsang pagkapukan ang naagoman ni Satanas ug sa iyang mga demonyo, ug sa unsang paagi panilngan sila sa ilang pag-alsa?

⁵ Ang magmamando niining dili-masinugtanong mga manulonda, o mga demonyo, mao si Satanas nga Yawa. (Mateo 12:24-26) Kining tuman ka daotang manulonda mirebelde sa iyang Maglalalang ug gihagit ang pagkamatarong sa pagkasoberano ni Jehova. Gidaldal ni Satanas ang atong unang mga ginikanan ngadto sa sala, ug kini misangpot sa ilang kamatayon sa kataposan. (Genesis 3:1-7, 17-19) Bisan pag gitugotan ni Jehova si Satanas sa pagsulod sa mga hawanan sa langit sa usa ka yugto human niadto, ang basahon sa Bibliya nga Pinadayag nagtagna nga sa tinudlong panahon sa Diyos, kining daotang usa igatambog sa hawanan sa yuta. Ang ebidensiya nagpakita nga kini nahitabo human gilayon nga nadawat ni Jesu-Kristo ang Gingharianong gahom sa 1914. Sa ulahi, ang Yawa ug ang iyang mga demonyo moadto sa walay kataposang kalaglagan. Uban sa isyu sa pagkasoberano nga mahusay na sa kataposan, ang isyu sa pag-alsa sa maong panahon makataronganong mahusay na unya.​—Job 1:6-12; 21-7; Pinadayag 12:7-9; 20:10.

Manubag ang Anak sa Diyos

6. Unsay paglantaw ni Jesus sa iyang kaugalingong pagkamay-tulubagon sa iyang Amahan?

⁶ Pagkamaayong panig-ingnan ang gihatag sa Anak sa Diyos, si Jesu-Kristo! Ingong usa ka tawong hingpit nga katumbas ni Adan, si Jesus nalipay sa pagtuman sa kabubut-on sa Diyos. Siya malipayon usab nga may-tulubagon sa pagsunod sa kasugoan ni Jehova. Mahitungod kaniya, ang salmista tukmang mitagna: “Nalipay ako sa pagtuman sa imong kabubut-on, Oh akong Diyos, ug ang imong kasugoan anaa sa sulod kanako.”​—Salmo 40:8; Hebreohanon 10:6-9.

7. Sa nag-ampo sa gabii sa iyang kamatayon, nganong si Jesus nakabungat sa mga pulong nga natala sa Juan 17:4, 5?

⁷ Gawas pa sa madumtanong pagbatok nga naagoman ni Jesus, iyang gituman ang kabubut-on sa Diyos ug nagpabiling maunongon hangtod sa kamatayon diha sa kahoy nga sakitanan. Sa ingon iyang gibayran ang bili sa lukat sa pagtubos sa katawhan gikan sa makamatayng mga sangpotanan sa sala ni Adan. (Mateo 20:28) Busa, sa gabii sa iyang kamatayon, si Jesus masaligong nag-ampo: “Nahimaya ko ikaw dinhi sa yuta, nga nakatapos sa buluhaton nga imong gihatag kanako aron buhaton. Busa karon ikaw, Amahan, himayaa ako uban kanimo sa himaya nga akong gibatonan uban kanimo sa wala pa ang kalibotan.” (Juan 17:4, 5) Si Jesus nakapahayag niadtong mga pulonga sa iyang langitnong Amahan tungod kay malamposon niyang nasagubang ang pagsulay sa pagkamay-tulubagon ug dalawaton sa Diyos.

8. (a) Sa unsang paagi gipakita ni Pablo nga kita may tulubagon mismo kang Jehova nga Diyos? (b) Unsay makatabang kanato nga mahimong dalawaton sa Diyos?

⁸ Dili sama sa tawong hingpit nga si Jesu-Kristo, kita dili-hingpit. Bisan pa niana, kita manubag sa Diyos. Si apostol Pablo miingon: “Nganong ikaw nagahukom sa imong igsoon? O nganong imong ginapakaubos usab ang imong igsoon? Kay kitang tanan magabarog atubangan sa lingkoranan-sa-paghukom sa Diyos; kay nahisulat: ‘“Ingon nga ako buhi,” nagaingon si Jehova, “kanako ang tanang tuhod magaluhod, ug ang tanang dila magahimog dayag nga pag-ila ngadto sa Diyos.”’ Busa, ang matag usa kanato manubag alang sa iyang kaugalingon ngadto sa Diyos.” (Roma 14:10-12) Aron kita makabaton ug maayong rekord ug mahimong dalawaton ni Jehova, siya mahigugmaong naghatag kanato ug tanlag ug iyang dinasig nga Pulong, ang Bibliya, sa paggiya kanato kon unsay atong isulti ug buhaton. (Roma 2:14, 15; 2 Timoteo 3:16, 17) Ang bug-os nga pagpahimulos sa espirituwal nga mga tagana ni Jehova ug pagsunod sa atong binansay-sa-Bibliya nga tanlag magtabang kanato nga mahimong dalawaton sa Diyos. (Mateo 24:45-47) Ang balaang espiritu ni Jehova, o aktibong puwersa, maoy usa ka dugang nga tuboran sa kalig-on ug paggiya. Kon kita molihok nga nahiuyon sa pag-agak ug pagtultol sa espiritu sa atong binansay-sa-Bibliya nga tanlag, atong ginapakita nga wala nato ‘isalikway ang Diyos,’ nga kaniya kita manubag gayod sa tanan natong mga lihok.​—1 Tesalonica 4:3-8; 1 Pedro 3:16, 21.

Manubag Ingong mga Nasod

9. Kinsa ang mga Edomhanon, ug unsay nahitabo kanila tungod sa ilang pagtratar sa Israel?

⁹ Panilngan ni Jehova ang mga nasod. (Jeremias 25:12-14; Sofonias 3:6, 7) Tagda ang karaang gingharian sa Edom, nga nahimutang sa habagatan sa Patayng Dagat ug sa amihanan sa Gulpo sa Aqaba. Ang mga Edomhanon maoy mga tawo nga kaliwat ni Sem, nga suod nga paryente sa mga Israelinhon. Bisan tuod nga ang kagikan sa mga Edomhanon mao ang apo ni Abraham nga si Esau, ang mga Israelinhon gidid-an sa pag-agi sa Edom diha sa “dalan sa hari” samtang nagpaingon sa Yutang Saad. (Numeros 20:14-21) Sa milabay ang daghang siglo ang kaligutgot ni Edom nahimong grabe nga pagdumot sa Israel. Sa kataposan, gipanilngan ang mga Edomhanon sa ilang pagsulsol sa mga Babilonyanhon sa paglaglag sa Jerusalem sa 607 W.K.P. (Salmo 137:7) Sa ikaunom nga siglo W.K.P., gipukan sa kasundalohang Babilonyanhon ilalom ni Haring Nabonidus ang Edom, ug kini nahimong awaaw, ingon sa gimbut-an ni Jehova.​—Jeremias 49:20; Abdias 9-11.

10. Sa unsang paagi gitratar sa mga Moabihanon ang mga Israelinhon, ug sa unsang paagi gipanilngan sa Diyos ang Moab?

¹⁰ Sama usab niini ang naagoman sa Moab. Nahimutang ang gingharian sa Moab sa amihanan sa Edom ug sidlakan sa Patayng Dagat. Sa wala pa makasulod ang mga Israelinhon sa Yutang Saad, dili maabiabihon ang mga Moabihanon kanila, dayag nga naghatag kanila ug tinapay ug tubig aron lamang makabatog pinansiyal nga balos. (Deuteronomio 23:3, 4) Gisuholan ni Haring Balak sa Moab si manalagnang Balaam sa pagtunglo sa Israel, ug gigamit ang kababayen-ang Moabihanon sa pagdani sa kalalakin-an sa Israel sa imoralidad ug idolatriya. (Numeros 22:2-8; 25:1-9) Apan, wala ipalabay ni Jehova ang pagdumot sa Moab sa Israel. Ingon sa gitagna, nakaagom ang Moab ug pagkagun-ob sa mga kamot sa mga Babilonyanhon. (Jeremias 9:25, 26; Sofonias 2:8-11) Oo, gipanilngan sa Diyos ang Moab.

11. Nahisama sa unsang mga siyudad ang Moab ug Ammon, ug unsay gipakita sa mga tagna sa Bibliya mahitungod sa presenteng daotang sistema sa mga butang?

¹¹ Dili lamang ang Moab kondili ang Ammon usab gipanilngan sa Diyos. Si Jehova nagtagna: “Ang Moab mahisama sa Sodoma, ug ang mga anak sa Ammon mahisama sa Gomora, usa ka dapit sa mga kadyapa, ug usa ka gahong sa asin, ug usa ka biniyaan, bisan sa walay kataposan.” (Sofonias 2:9) Ang mga yuta sa Moab ug Ammon nagun-ob, sama sa paglaglag sa Diyos sa mga siyudad sa Sodoma ug Gomora. Sumala sa Geological Society sa London, ang mga tigdukiduki nangangkon nga nakadiskobre sa mga lugar sa nalumpag nga Sodoma ug Gomora sa baybayon sa sidlakan sa Patayng Dagat. Ang bisan unsang kasaligang ebidensiya nga diskobrehonon pa niining bahina magpaluyo lamang sa mga tagna sa Bibliya nga nagpakita nga ang presenteng daotang sistema sa mga butang pagapanilngon usab ni Jehova nga Diyos.​—2 Pedro 3:6-12.

12. Bisag manubag ang Israel sa Diyos tungod sa iyang mga sala, unsay gitagna bahin sa nanghibiling Hudiyo?

¹² Bisag ang Israel gikahimut-an pag-ayo ni Jehova, kini kinahanglang manubag sa Diyos sa iyang kasal-anan. Sa dihang miabot si Jesu-Kristo sa nasod sa Israel, gisalikway siya sa kadaghanan. Diyutayng nanghibilin lamang ang nagpasundayag ug pagtuo ug nahimong iyang mga sumusunod. Gipadapat ni Pablo ang pipila ka mga tagna ngadto niining mga nanghibiling Hudiyo sa dihang siya misulat: “Si Isaias mituaw mahitungod sa Israel: ‘Bisan pag ang gidaghanon sa mga anak sa Israel mahimong ingon sa balas sa dagat, ang mga mahibilin mao ang maluwas. Kay si Jehova maghimog pagpakighusay diha sa yuta, nga magahuman niini ug magapamubo niini.’ Usab, maingon gayod sa giingon kanhi ni Isaias: ‘Kon wala pa si Jehova sa mga panon magbilin ug usa ka binhi nganhi kanato, kita nahimong sama gayod sa Sodoma, ug kita nahimong sama gayod unta sa Gomora.’” (Roma 9:27-29; Isaias 1:9; 10:22, 23) Gikutlo sa apostol ang panig-ingnan sa 7,000 sa panahon ni Elias nga wala moyukbo kang Baal, ug unya siya miingon: “Busa, niining paagiha, karong panahona usab usa ka nanghibilin ang nahitungha sumala sa pagpili gumikan sa dili-takos nga kalulot.” (Roma 11:5) Gilangkoban kana nga nanghibilin sa mga indibiduwal nga personal nga manubag sa Diyos.

Mga Panig-ingnan sa Personal nga Pagkamay-tulubagon

13. Unsay nahitabo kang Cain sa dihang gipanilngan siya sa Diyos sa pagpatay sa iyang igsoong si Abel?

¹³ Ang Bibliya naghisgot ug daghang kaso sa personal nga pagkamay-tulubagon kang Jehova nga Diyos. Tagda, ingong pananglitan, ang kamagulangang anak ni Adan, si Cain. Siya ug ang iyang igsoong si Abel nagtanyag ug mga halad kang Jehova. Ang halad ni Abel gikahimut-an ni Jehova nga Diyos, apan ang kang Cain wala. Sa dihang iyang gipanilngan siya sa pagpatay sa iyang igsoon, si Cain sa pagkatig-a ug kasingkasing miingon sa Diyos: “Magbalantay ba ako sa akong igsoon?” Alang sa iyang sala, giabog si Cain ngadto sa “yuta sa Paglaaglaag sa silangan sa Eden.” Wala siya magpakita ug tim-os nga paghinulsol sa iyang krimen, nagbasol lamang sa iyang angay nga silot.​—Genesis 4:3-16.

14. Sa unsang paagi ang personal nga pagkamay-tulubagon ngadto sa Diyos giilustrar diha sa kaso sa hataas nga saserdoteng si Eli ug sa iyang mga anak?

¹⁴ Ang personal nga pagkamay-tulubagon sa usa ngadto sa Diyos gipasundayag usab sa kaso sa hataas nga saserdote sa Israel nga si Eli. Ang iyang mga anak, nga si Hopni ug Pinehas, nag-alagad ingong nagdumalang mga saserdote apan “sad-an sa inhustisya diha sa katawhan, ug sa pagkawalay pagtahod sa Diyos, ug wala mohunong sa tanang matang sa pagkadaotan,” nag-ingon ang magsusulat sa kasaysayan nga si Josephus. Kining “walay kapuslanang mga tawo” wala moila kang Jehova, nakigbahin sa makapasipala sa Diyos nga panggawi, ug sad-an sa grabeng imoralidad. (1 Samuel 1:3; 2:12-17, 22-25) Ingong ilang amahan ug hataas nga saserdote sa Israel, obligasyon ni Eli ang pagdisiplina kanila, apan iyang gibadlong lamang sila ug gamay. Si Eli ‘nagpasidungog sa iyang mga anak labaw pa kay kang Jehova.’ (1 Samuel 2:29) Ang kastigo miabot sa balay ni Eli. Ang duha ka anak namatay sa mao ra nga adlaw dungan sa ilang amahan, ug ang ilang kaliwat sa pagkasaserdote giputol sa bug-os. Busa ang utang nabayran.​—1 Samuel 3:13, 14; 4:11, 17, 18.

15. Nganong ang anak ni Haring Saul nga si Jonathan gigantihan?

¹⁵ Usa ka lahi kaayo nga pananglitan ang gihatag sa anak ni Haring Saul nga si Jonathan. Wala magdugay human nga gipatay ni David si Goliat, ang “kalag mismo ni Jonathan nalanggikit pag-ayo sa kalag ni David,” ug sila naghimo ug pakigtugon sa pagkamanaghigala. (1 Samuel 18:1, 3) Tingali, nasabtan ni Jonathan nga ang espiritu sa Diyos mibiya na kang Saul, apan ang iyang kaugalingong kasibot alang sa matuod nga pagsimba nagpabiling malig-on. (1 Samuel 16:14) Ang pagpabili ni Jonathan sa hinatag-sa-Diyos nga awtoridad ni David wala gayod matarog. Nahibalo si Jonathan sa iyang tulubagon sa Diyos, ug gigantihan siya ni Jehova tungod sa iyang dalayegong dalan pinaagi sa pagtino nga ang iyang banay magpadayon sa daghang kaliwatan.​—1 Cronicas 8:33-40.

Tulubagon sa Kristohanong Kongregasyon

16. Kinsa si Tito, ug nganong ikaingon nga siya may maayong rekord sa Diyos?

¹⁶ Ang Kristohanon Gregong Kasulatan dalayegong naghisgot labot sa daghang lalaki ug babaye nga maayo ug rekord. Pananglitan, anaa ang Gregong Kristohanon nga ginganlag Tito. Gisugyot nga siya nahimong Kristohanon sa panahon sa unang misyonaryong panaw ni Pablo sa Cipro. Sanglit ang mga Hudiyo ug ang mga kinabig gikan sa Cipro mahimong didto sa Jerusalem sa panahon sa Pentekostes 33 K.P., ang Kristiyanidad tingali nakaabot sa isla wala magdugay human niadto. (Buhat 11:19) Bisan pa niana, si Tito napamatud-ang usa sa matinumanong kaubang mga magbubuhat ni Pablo. Iyang giubanan si Pablo ug Bernabe sa panaw ngadto sa Jerusalem sa mga 49 K.P., sa dihang gihusay ang hinungdanong isyu bahin sa sirkunsisyon. Ang kamatuoran nga dili-sirkunsado si Tito nakadugang ug kalig-on sa argumento ni Pablo nga ang mga kinabig sa Kristiyanidad dili angay mailalom sa Moisesnong Kasugoan. (Galacia 2:1-3) Ang maayong ministeryo ni Tito gipamatud-an sa Kasulatan, ug si Pablo nagsulat pa gani kaniya ug sulat nga dinasig sa Diyos. (2 Corinto 7:6; Tito 1:1-4) Dayag hangtod mismo sa kataposan sa iyang yutan-ong dalan, si Tito nagpadayon sa paghimog maayong rekord sa Diyos.

17. Unsang rekord ang nahimo ni Timoteo, ug sa unsang paagi kining maong panig-ingnan makaapektar kanato?

¹⁷ Si Timoteo maoy laing masibotong indibiduwal nga may maayong rekord kang Jehova nga Diyos. Bisag si Timoteo may suliran sa panglawas, siya nagpasundayag ug ‘pagtuo nga walay bisan unsang pagkasalingkapaw’ ug ‘nagpaulipon uban kang Pablo sa pagpauswag sa maayong balita.’ Busa ang apostol nakaingon sa kaubang mga Kristohanon sa Filipos: “Ako walay lain nga may sama [kang Timoteo] ug tinamdan kinsa tiunay nga moatiman sa mga butang maylabot kaninyo.” (2 Timoteo 1:5; Filipos 2:20, 22; 1 Timoteo 5:23) Atubangan sa tawhanong mga kahuyangan ug ubang mga pagsulay, kita usab makabaton ug pagtuo nga walay bisan unsang pagkasalingkapaw ug kita mismo makahimo ug maayong rekord sa Diyos.

18. Kinsa si Lydia, ug unsang espiritu ang iyang gipasundayag?

¹⁸ Si Lydia maoy usa ka babayeng diyosnon kinsa dayag nga may maayong rekord sa Diyos. Siya ug ang iyang banay maoy usa sa unang mga indibiduwal sa Uropa nga nakadawat sa Kristiyanidad tungod sa kalihokan ni Pablo sa Filipos sa mga 50 K.P. Usa ka lumad sa Tiatira, si Lydia malagmit maoy usa ka kinabig nga Hudiyo, apan tingali diyutay lang ang mga Hudiyo sa Filipos ug wala pay sinagoga. Siya ug ang ubang debotadong mga babaye nagtigom sa daplin sa suba sa dihang nakigsulti si Pablo kanila. Tungod niini, si Lydia nahimong Kristohanon ug gikombinsir si Pablo ug ang iyang mga kauban sa pag-estar uban kaniya. (Buhat 16:12-15) Ang pagkamaabiabihon nga gipakita ni Lydia nagpabiling dakong ilhanan sa matuod nga mga Kristohanon.

19. Unsang maayong mga buhat ang nakahatag ug maayong rekord kang Dorcas ngadto sa Diyos?

¹⁹ Si Dorcas maoy laing babaye nga may maayong rekord kang Jehova nga Diyos. Sa dihang siya namatay, si Pedro miadto sa Jope agig pagsugot sa usa ka hangyo sa mga tinun-an nga nagpuyo didto. Ang duha ka lalaki nga misugat kang Pedro ‘nagdala kaniya ngadto sa lawak sa itaas; ug ang tanang mga babayeng balo miatubang kaniya nga nagdanguyngoy ug nagpakitag daghang pang-ilalom nga mga besti ug panggawas nga mga besti nga gihimo ni Dorcas samtang uban pa siya kanila.’ Si Dorcas gibanhaw. Apan siya pagahinumdoman ba lamang sa iyang mahinatagong espiritu? Dili. Siya maoy usa ka “tinun-an” ug tino nga nakigbahin mismo sa buluhatong paghimog tinun-an. Ang Kristohanong mga babaye karon sama nga “dagaya sa maayong mga buhat ug sa mga gasa sa kaluoy.” Sila malipay usab nga aktibong makabahin sa pagsangyaw sa maayong balita sa Gingharian ug sa paghimog mga tinun-an.​—Buhat 9:36-42; Mateo 24:14; 28:19, 20.

20. Unsang mga pangutana ang atong isukna sa atong kaugalingon?

²⁰ Ang Bibliya tin-awng nagpakita nga ang mga nasod ug mga indibiduwal kinahanglang manubag sa Soberanong Ginoong Jehova. (Sofonias 1:7) Busa, kon kita nagpahinungod sa Diyos, pangutan-on nato ang atong kaugalingon, ‘Sa unsang paagi gilantaw ko ang akong hinatag-sa-Diyos nga mga pribilehiyo ug mga responsabilidad? Unsang matanga sa rekord ang akong ginahatag sa akong kaugalingon kang Jehova nga Diyos ug kang Jesu-Kristo?’

Unsay Imong mga Tubag?

◻ Sa unsang paagi mapamatud-an nimo nga ang mga manulonda ug ang Anak sa Diyos manubag kang Jehova?

◻ Unsang mga pananglitan sa Bibliya ang nagpakita nga manubag sa Diyos ang mga nasod?

◻ Unsay giingon sa Bibliya bahin sa personal nga pagkamay-tulubagon sa Diyos?

◻ Kinsa ang pipila ka indibiduwal sa rekord sa Bibliya nga may maayong rekord kang Jehova nga Diyos?

[Hulagway sa panid 10]

Si Jesu-Kristo may maayong rekord sa iyang langitnong Amahan

[Hulagway sa panid 15]

Sama kang Dorcas, ang Kristohanong kababayen-an karon adunay maayong rekord kang Jehova nga Diyos

[Picture Credit Line sa panid 13]

Ang Kamatayon ni Abel/The Doré Bible Illustrations/Dover Publications, Inc.