Gibaod ba sa Diyos ang Pagpuasa?

GIBAOD sa Kasugoan sa Diyos nga gihatag kang Moises ang pagpuasa sa usa lamang ka okasyon​—sa tinuig nga Adlaw sa Pagtabon sa Sala. Nagsugo ang Kasugoan nga sa maong adlaw ang mga Israelinhon ‘magasakit sa ilang mga kalag,’ nga gisabot nga nagkahulogan nga sila nagpuasa. (Levitico 16:29-​31; 23:27; Salmo 35:13) Bisan pa niana, kini nga pagpuasa dili kay usa ka pormalismo lamang. Ang pagsaulog sa Adlaw sa Pagtabon sa Sala nagpalihok sa mga tawo sa Israel sa paghunahuna ug maayo sa ilang pagkamakasasala ug ang panginahanglan sa pagtubos. Sila nagpuasa usab sa maong adlaw aron ipakita ang kasubo sa ilang mga sala ug ang paghinulsol atubangan sa Diyos.

Bisag mao lamang kini ang obligadong pagpuasa ubos sa Kasugoan ni Moises, ang mga Israelinhon naghimo sa mga pagpuasa sa ubang mga okasyon. (Exodo 34:28; 1 Samuel 7:6; 2 Cronicas 20:3; Esdras 8:21; Ester 4:3, 16) Lakip niini mao ang kinabubut-ong mga pagpuasa ingong usa ka paagi sa pagpasundayag sa paghinulsol. Giawhag ni Jehova ang nakasalang katawhan sa Juda: “Bumalik kamo kanako uban ang bug-os ninyong kasingkasing, ug uban ang pagpuasa ug uban ang paghilak ug uban ang pagbalata.” Dili kini usa ka taphaw nga pagpasundayag, kay ang Diyos nagpadayon sa pag-ingon: “Gisia ninyo ang inyong mga kasingkasing, ug dili ang inyong mga sapot.”​—Joel 2:12-​15.

Sa ulahi, daghan ang nagpuasa ingong taphaw nga pormalismo. Gikasilagan ni Jehova kining dili kinasingkasing nga pagpuasa ug busa nangutana sa salingkapaw nga mga Israelinhon: “Mao ba kini ang pagpuasa nga akong gipili, ingong usa ka adlaw alang sa yutan-ong tawo sa pagsakit sa iyang kalag? Ingon ba niini nga iduko niya ang iyang ulo maingon sa usa ka uway, ug nga siya magabuklad sa sapot nga sako ug mga abo ingong iyang higdaan? Mao ba kini ang gitawag ninyo nga pagpuasa ug usa ka adlaw nga dalawaton ni Jehova?” (Isaias 58:5) Inay kay himoong mapagawalong pasundayag ang ilang pagpuasa, kining sukihang katawhan gihangyo sa pagpatunghag mga buhat nga takos sa paghinulsol.

Ang pipila ka pagpuasa nga gibuhat sa mga Hudiyo wala dawata sa Diyos sukad pa sa sinugdan. Pananglitan, sa usa ka higayon ang katawhan sa Juda may upat ka tinuig nga mga pagpuasa aron handomon ang malaglagong mga hitabo maylabot sa paglikos ug pagkalaglag sa Jerusalem sa ikapitong siglo W.K.P. (2 Hari 25:1-4, 8, 9, 22-​26; Zacarias 8:19) Human gipagawas ang mga Hudiyo gikan sa pagkabihag sa Babilonya, si Jehova miingon pinaagi ni manalagnang Zacarias: “Sa dihang kamo nagpuasa . . . , ug kini sulod sa kapitoan ka tuig, nagpuasa ba gayod kamo kanako, bisan pa kanako?” Wala uyoni sa Diyos kini nga mga pagpuasa tungod kay ang mga Hudiyo nagpuasa ug nagbalata tungod sa mga paghukom nga naggikan kang Jehova mismo. Sila nagpuasa tungod sa kalaglagan nga naagoman nila, dili tungod sa ilang kaugalingong kasaypanan nga mitultol ngadto niana. Human sila gipasig-uli ngadto sa ilang yutang natawhan, panahon kadto alang kanila sa pagkalipay imbes sa pagbakho sa nangagi.​—Zacarias 7:5.

Ang Pagpuasa Alang ba sa mga Kristohanon?

Bisag wala sugoa ni Jesu-Kristo ang iyang mga tinun-an sa pagpuasa, siya ug ang iyang mga sumusunod nagpuasa sa Adlaw sa Pagtabon sa Sala tungod kay sila ubos sa Kasugoan ni Moises. Dugang pa, ang uban sa iyang mga tinun-an kinabubut-ong nagpuasa sa ubang mga okasyon, sanglit si Jesus wala magtudlo kanila nga likayan ang pagbatasan niana sa bug-os. (Buhat 13:2, 3; 14:23) Bisan pa, dili gayod nila ‘pakulismaoton ang ilang mga nawong aron tan-awong nagapuasa sa mga tawo.’ (Mateo 6:16) Ang maong panggawas nga pagpasundayag sa pagkadiyosnon tingalig makapukaw ug mga paniplat sa pagdayeg ug mga yango sa pag-uyon sa ubang mga tawo. Bisan pa niana, ang Diyos dili mahimuot sa maong mapasiatabong pagpasundayag.​—Mateo 6:17, 18.

Si Jesus naghisgot usab bahin sa iyang mga sumusunod nga nagpuasa sa panahon sa iyang kamatayon. Siya sa ingon wala magpasiugda ug usa ka rituwal nga pagpuasa. Hinunoa, gipaila niya ang usa ka reaksiyon sa dulot nga kasub-anan nga ilang maagoman. Sa dihang siya banhawon, siya mahiuban na usab kanila, ug wala na unyay hinungdan pa alang kanila sa pagpuasa.​—Lucas 5:34, 35.

Ang Moisesnong Kasugoan natapos sa dihang ‘si Kristo gitanyag makausa alang sa tanang panahon aron sa pagpas-an sa mga sala sa daghan.’ (Hebreohanon 9:24-28) Ug duyog sa pagkatapos sa Kasugoan, ang sugo sa pagpuasa sa Adlaw sa Pagtabon sa Sala natapos. Busa, nawagtang ang bugtong pinugsanay nga pagpuasa nga gihisgotan sa Bibliya.

Komosta ang Bahin sa Kuwaresma?

Nan, unsay pasukaranan sa batasan sa Kakristiyanohan sa pagpuasa panahon sa Kuwaresma? Ang mga iglesya nga Katoliko ug Protestante nagtuo sa Kuwaresma, bisag ang paagi sa pagsaulog niini nagkalahi gikan sa usa ka iglesya ngadto sa lain. Ang uban mokaon kas-a lang sa usa ka adlaw sulod sa tibuok 40-ka-adlaw nga yugto sa dili pa ang Pasko sa Pagkabanhaw. Ang uban bug-os nga nagpuasa lamang sa panahon sa Miyerkoles sa Badlis ug sa Biyernes Santo. Alang sa uban, kinahanglanon sa Kuwaresma ang dili pagkaon ug karne, isda, mga itlog, ug mga produkto sa gatas.

Ang Kuwaresma gipasukad konohay sa 40-ka-adlaw nga pagpuasa ni Jesus human sa iyang bawtismo. Naghimo ba siya niadto ug rituwal nga kinahanglang sundon tuigtuig? Wala gayod. Kini dayag sa kamatuoran nga ang Bibliya wala magrekord ug bisan unsa sa maong batasan taliwala sa unang mga Kristohanon. Ang Kuwaresma unang gisaulog sa ikaupat nga siglo tapos ni Kristo. Sama sa ubang mga pagtulon-an sa Kakristiyanohan, kini gisagop gikan sa paganong mga tinubdan.

Kon ang Kuwaresma maoy pagsundog sa pagpuasa ni Jesus sa kamingawan human sa iyang bawtismo, nganong kini saulogon sulod sa mga semana nga motultol ngadto sa Pasko sa Pagkabanhaw​—nga gikaingong ang panahon sa iyang pagkabanhaw? Si Jesus wala magpuasa sa panahon sa mga adlaw una pa sa iyang kamatayon. Ang asoy sa Ebanghelyo nagpakita nga siya ug ang iyang mga tinun-an miduaw sa mga balay ug mikaon ug mga pagkaon sa Betania pipila ka adlaw na lamang sa wala pa siya mamatay. Ug siya mikaon sa pagkaon sa Paskuwa sa gabii una pa sa iyang kamatayon.​—Mateo 26:6, 7; Lucas 22:15; Juan 12:2.

Adunay makat-onan gikan sa pagpuasa ni Jesus human sa iyang bawtismo. Siya nagsugod sa usa ka hinungdanong ministeryo. Ang pagbayaw sa pagkasoberano ni Jehova ug ang paglaom sa tibuok tawhanong rasa ang nalangkit. Mao kini ang panahon sa lalom nga pagpamalandong ug sa mainampoon nga pagdangop kang Jehova alang sa tabang ug paggiya. Sulod niining panahona nga tukmang nagpuasa si Jesus. Kini nagpaila nga ang pagpuasa mahimong mapuslanon kon buhaton sa hustong motibo ug haom sa okasyon.​—Itandi ang Colosas 2:20-23.

Sa Dihang ang Pagpuasa Mahimong Mapuslanon

Atong tagdon ang pipila ka mga okasyon karon sa dihang ang magsisimba sa Diyos tingalig magpuasa. Ang tawong nakasala tingali mobati nga dili ganahang mokaon sulod sa usa ka yugto sa panahon. Dili kini pagpadayeg sa uban o pagkasuko sa nadawat nga disiplina. Ug, siyempre, ang pagpuasa mismo dili gayod makatul-id sa mga butang uban sa Diyos. Apan, ang tawong tinuod nga mahinulsolon mobatig hilabihan nga kasubo kay nakapasakit kang Jehova ug lagmit sa mga higala ug sa pamilya. Ang tumang kaguol ug mainitong pag-ampo alang sa kapasayloan mahimong makawala sa gana sa pagkaon.

Si Haring David sa Israel may susamang kasinatian. Sa dihang giatubang sa palaaboton nga mamatyan sa iyang anak kang Batseba, iyang gibug-os ang tanan niyang mga paningkamot sa pag-ampo kang Jehova aron madawat ang kaluoy labot sa bata. Samtang siya bug-os nga nadala sa iyang mga pag-ampo, siya nagpuasa. Sa ingon niini, ang pagkaon tingalig daw dili-angay ubos sa pipila ka malisod nga mga kahimtang karong adlawa.​—2 Samuel 12:15-​17.

Adunay mga panahon usab sa dihang ang diyosnong tawo buot nga mamalandong sa pipila ka lalom espirituwal nga butang. Ang pagpanukiduki sa Bibliya ug sa Kristohanong mga publikasyon tingalig kinahanglanon. Usa ka yugto sa panahon ang tingali gikinahanglan sa pagpamalandong. Sa panahon sa maong maidlot nga sesyon sa pagtuon, basin pilion sa usa ka indibiduwal nga dili magpalinga sa pagkaon ug mga kalan-on.​—Itandi ang Jeremias 36:8-10.

Adunay Kasulatanhong mga pananglitan sa mga alagad sa Diyos nga nagpuasa sa dihang kinahanglang himoon ang seryosong mga desisyon. Sa mga adlaw ni Nehemias usa ka panumpa ang kinahanglang himoon ngadto kang Jehova, ug ang mga Hudiyo matinunglo kon ilang lapason kini. Gipasaad sila sa pagbulag sa ilang langyawng mga asawa ug magpabiling bulag gikan sa nakapalibot nga mga nasod. Sa dili pa manumpa ug sa panahon sa pagbutyag sa ilang pagkasad-an, ang tibuok nga kongregasyon nagpuasa. (Nehemias 9:1, 38; 10:29, 30) Busa, sa dihang nag-atubang sa mabug-at nga mga desisyon, ang usa ka Kristohanon mahimong magpuasa sa usa ka mubong yugto sa panahon.

Ang paghimog-desisyon sa mga lawas sa mga ansiyano sa unang Kristohanong kongregasyon usahay duyogan ug pagpuasa. Karong adlawa, ang mga ansiyano sa kongregasyon nga nag-atubang ug malisod nga mga desisyon, tingali maylabot sa hudisyal nga kaso, tingalig dili mokaon samtang ginatagad ang maong butang.

Ang pagpili nga magpuasa sa pipila ka kahimtang maoy usa ka indibiduwal nga desisyon. Ang usa ka tawo dili angayng mohukom sa uban niining butanga. Dili nato buot nga “matarong tan-awon sa mga tawo”; ni himoon nato ang pagkaon nga hinungdanon kaayo nga kini makababag sa atong pag-atiman sa seryosong mga obligasyon. (Mateo 23:28; Lucas 12:22, 23) Ug ang Bibliya nagpakita nga ang Diyos wala magbaod nga kita magpuasa o nagadili kanato gikan sa pagpuasa.

[Hulagway sa panid 7]

Nahibalo ka ba kon nganong nagpuasa si Jesus sulod sa 40 ka adlaw human sa iyang bawtismo?