Kinsa ang Tinuod nga mga Mensahero sa Pakigdait?
NIADTONG Mayo 31, 1996, ang mga tinubdan sa balita nagpahayag sa daw usa ka mensahe sa pakigdait. Sa nag-unang adlaw, usa ka opisyal nga pahayag ang giluwat nga nagpamatuod nga si Benjamin Netanyahu, kinsa hapit na nga mahimong primer ministro sa Israel, maoy “komitido kaayo sa pagpadayon sa mga kasabotan alang sa pakigdait, pakigdait nga may kasegurohan, tali sa estado sa Israel ug sa tanang silingan niini, lakip ang mga Palestino.”
Ang maayong pagkamantala nga eleksiyon ni Netanyahu nagpahibulong sa daghan kon mahimo bang katinuoran ang pakigdait sa Tungang Sidlakan. Kon mao, mahimo bang mosundog ang ubang mga nasod, nga kalimtan ang ilang mga kasungian?
Sa pagkatinuod, mas daling manaad ug pakigdait kay sa pagkab-ot niana. Kay nahibalo niana, daghan ang maduhaduhaon. Sama sa giingon sa usa ka magsusulat nga si Hemi Shalev labot niini, “katunga sa katawhan sa Israel karon mibating haduol na ang kapasig-ulian, ug ang laing katunga nagtuo nga kini nalit-agan sa makahahadlok nga kahimtang nga walay kaikyasan.” Sa pagsumaryo, siya miingon: “Ang pipila nalipay; ang uban nagbalata.”
Busa ingon niini ang pagtinguha sa tawo ug pakigdait. Ang kadaogan sa usa ka lider ug iyang mga tigpaluyo nagpasabot ug kapildihan sa kaatbang nga grupo. Ang pagkadili-tagbaw motultol sa pagkalugda, ug ang pagkalugda motultol sa pagrebelde. Sa Tungang Sidlakan man, sa Latin Amerika, sa Sidlakang Uropa, o bisan asa—ang mga paningkamot sa tawo sa pakigdait maoy kawang kaayo.
Ang Tinuod nga Pakigdait Haduol Na!
Sa panahong ang pakigdait sa Tungang Sidlakan nahimong pangunang ulohan sa balita, ang laing mensahe sa pakigdait nadungog. Dili kini maayong pagkamantala nga pahayag sa politika; ni usa kini ka kasabotan sa pakigdait tali sa mga nasod. Hinunoa, kini nga mensahe nagmantala sa usa ka pakigdait nga ipaabot lamang pinaagi sa Gingharian sa Diyos. Diin nadungog kini nga mensahe? Sa kapin ug 1,900 ka “Mga Mensahero sa Diyosnong Pakigdait” Distritong mga Kombensiyon nga gihimo sa mga Saksi ni Jehova sa tibuok kalibotan sa panahon sa 1996/97.
Gipatin-aw niini nga mga kombensiyon nga walay tawhanong kagamhanan ang makapatungha sa tinuod nga pakigdait ug kasegurohan. Ngano? Tungod kay kini magkinahanglan sa pagtapos sa mga butang nga naghikaw kanato sa pakigdait adlaw-adlaw. Ang tinuod nga pakigdait magkahulogan nga mobangon sa matag buntag nga walay hulga sa gubat o kapintasan. Kini magpasabot nga walay krimen, walay mga trangka sa atong mga pultahan, walay kahadlok sa paglakaw sa kadalanan, walay nagkabungkag nga mga pamilya. Unsang kagamhanan sa yuta ang makabuhat nianang tanan? Sa pagkatinuod, unsang kagamhanan sa yuta ang bisan mangahas sa pagsaad niana?
Apan, ang Gingharian sa Diyos makabuhat niini ug magpatungha niining mga butanga. Ang Bibliya nagsaad: “Tan-awa! Ang tolda sa Diyos anaa uban sa katawhan, ug siya mopuyo uban kanila, ug sila mahimong iyang mga katawhan. Ug ang Diyos mismo mouban kanila. Ug iyang pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.” (Pinadayag 21:3, 4) Pagkadakong kahupayan ang ipatungha niana ngadto sa nag-antos nga katawhan!
Ang saad ni Jehova nga Diyos dili makawang. Ang Bibliya nagpasalig kanato: “Ang Diyos dili usa ka tawo nga siya magbakak, ni anak sa tawo nga siya magbasol. Siya mismo ang nagsulti niana ug dili ba siya magabuhat niana, ug siya ang namulong ug dili ba niya kana pagatumanon?” (Numeros 23:19) Oo, ang gisaad sa Diyos mamatuman—alang sa kabulahanan sa tanang mobarog dapig kaniya.
Ang mga Mensahero sa Diyos sa Pakigdait
Ang mga Saksi ni Jehova ilado sa ilang masibotong pagsangyaw bahin sa Gingharian sa Diyos. Matag tuig, silang tanan nakagugol ug kapin sa usa ka bilyong oras sa pagpaambit sa makapalipayng mensahe sa Bibliya ngadto sa uban. Kini maoy katumanan sa mga pulong ni Jesus: “Kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.” (Mateo 24:14) Ang mensahe nga gidala sa mga Saksi sa pagkatinuod maoy “maayong balita,” kay kini nagmantala sa langitnong Gingharian sa Diyos ingong ang bugtong paglaom sa katawhan. Ug pagkamalig-ong paglaom kini alang sa umaabot!
Bisan karon ang Gingharian sa Diyos nagpatungha diha sa mga sakop niini sa usa ka tinuod nga bugkos sa pakigdait ug inigsoong gugma. Si Jesus nag-ingon: “Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.” (Juan 13:35) Ang mga Saksi ni Jehova naningkamot sa pagkinabuhi nga uyon niining pangunang kinahanglanon sa matuod nga Kristiyanidad. Tungod niini, naugmad nila ang kahibulongang panag-igsoonay nga nagpahiusa sa mga Hudiyo ug mga Arabo, sa mga taga-Croatia ug mga taga-Serbia, sa mga Hutu ug mga Tutsi. Kini nga pakigdait nga mahanduraw lamang sa kinabag-an sa katawhan nabatonan na karon sa minilyong Saksi ni Jehova sa tibuok kalibotan.
Ang pagdasig nga magpadayon sa pagkinabuhi sumala sa mga prinsipyo sa Bibliya ug magpadayon sa pagsangyaw sa maayong balita sa Gingharian sa Diyos gipasiugda diha sa programa sa “Mga Mensahero sa Diyosnong Pakigdait” nga Distritong Kombensiyon. Gidapit ka namo nga basahon ang nagsunod nga taho sa makaiikag tulo-ka-adlawng kombensiyon nga gipahimuslan sa milyonmilyon.