Nahinumdom Ka Ba?

Nakaplagan ba nimo ang ulahing mga gula sa Ang Bantayanang Torre nga dunay praktikal nga bili kanimo? Nan nganong dili sulayan ang imong memorya pinaagi sa mosunod nga mga pangutana?

◻ Sama sa unsa unya ang Armagedon? (Pinadayag 16:​14, 16)

Dili kini usa ka bug-os nga kalaglagan pinaagig nukleyar nga kasangkapan o usa ka katalagman nga gipahinabo sa mga tawo. Dili, kini maoy gubat sa Diyos sa pagtapos sa tanang gubat sa tawo, sa paglaglag niadtong nagpasiugda sa maong mga gubat, ug sa pagpatunghag tinuod nga pakigdait alang niadtong nahigugma sa pakigdait. Dili kini maglangan. (Habacuc 2:3)​—4/15, panid 17.

◻ Unsang matang sa kasal ang magpasidungog kang Jehova?

Ang kasal diin ang espirituwal nga mga bahin mangibabaw kay sa kalibotanong mga paagi sa pagkatinuod magpasidungog kang Jehova. Ang mga Kristohanon malipay sa okasyon kon ilang likayan ang makauulaw nga kalibotanong mga kostumbre, mga patuotuo, ug mga hinobra; kon dili nila tugotan kini nga mobabag sa regular teokratikanhong mga kalihokan; ug kon sila magpasundayag sa kaligdong inay sa mapagawalong pagpasundayag.​—4/15, panid 26.

◻ Unsay magpaila sa usa ka tawo sa integridad?

Ang usa ka tawo sa integridad kasaligan, dili lamang sa iyang isigkatawo apan, ilabina, sa Diyos. Ang kaputli sa kasingkasing sa maong tawo makita diha sa iyang mga binuhatan. Nahigawas siya sa pagkasalingkapaw. Dili siya malipoton o dunot. (2 Corinto 4:2)​—5/1, panid 6.

◻ Nganong misulti si Jeremias: “Maayo alang sa usa ka tawo nga magapas-an siya sa luwan panahon sa iyang pagkabatan-on”? (Lamentaciones 3:27)

Ang pagkakat-on sa pag-atubang sa mga pagsulay samtang batan-on makatabang sa pag-andam sa usa nga masagubang ang mga hagit sa pagkahamtong. (2 Timoteo 3:12) Ang mga kaayohan sa pagkamatinumanon labaw pa kaayo kay sa bisan unsang temporaryong kahupayan nga ikahatag sa pagkompromiso.​—5/1, panid 32.

◻ Unsay gilandongan sa pagpakita ni Moises ug Elias sa panan-awon sa pagkausab sa dagway?

Sa konteksto sa pagkausab sa dagway, si Moises ug Elias maoy haom nga mga simbolo sa dinihogang mga igsoon ni Jesus. Nga sila, maingon man si Jesus, ‘mipakita uban ang himaya’ nagsimbolo nga ang matinumanong dinihogang mga Kristohanon “duyog nga himayaon” uban kang Jesus sa langitnong Ginghariang kahikayan. (Lucas 9:​30, 31; Roma 8:17; 2 Tesalonica 1:10)​—5/15, panid 12, 14.

◻ Unsa ang “sagrado nga tinago” sa Diyos? (1 Corinto 2:7)

Ang “sagrado nga tinago” sa Diyos nasentro diha kang Jesu-Kristo. (Efeso 1:​9, 10) Apan, dili lamang kini ang pagkaila kang Jesus ingong ang gisaad nga Mesiyas. Kini naglangkit sa usa ka langitnong kagamhanan, ang Mesiyanikong Gingharian sa Diyos, ug nagalakip sa papel nga pagadulaon ni Jesus diha sa katuyoan sa Diyos.​—6/1, panid 13.

◻ Unsa ang angayng panglantaw sa usa ka Kristohanon sa pagkatigulang o sakit?

Inay nga isipon ang maong mga pagsulay ingong paglimite sa iyang pag-alagad kang Jehova, angay niyang isipon kini ingong usa ka higayon nga mapauswag ang iyang pagsalig kaniya. Angay usab niyang hinumdoman nga ang bili sa usa ka Kristohanon pagasukdon dili lamang sa gidak-on sa iyang buluhaton apan usab sa iyang pagtuo ug giladmon sa gugma. (Marcos 12:​41-44)​—6/1, panid 26.

◻ Sa unsang paagi ang paggamit ni Jehova sa mga tawo inay sa mga manulonda aron isulat ang Bibliya nagpakita sa iyang dakong kaalam?

Kon ang tawhanong elemento hingpit nga nakulang, mahimong malisdan kita sa pagsabot sa mensahe sa Bibliya. Dugang pa, ang Bibliya dunay kainit, pagkadaiya, ug pangdani nga ginahatag niini sa tawhanong elemento.​—6/15, panid 8.

◻ Unsa ang sekreto sa kalipay sa pamilya?

Ang sekreto anaa sa mga panid sa Pulong sa Diyos, ang Bibliya, ug sa pagpadapat sa mga prinsipyo niini, sama sa pagpugong sa kaugalingon, pag-ila sa pagkaulo, maayong komunikasyon, ug gugma.​—6/15, mga panid 23, 24.

◻ Sa unsang paagi ang pagpang-ayo nga gihimo ni Jesus dakog kalahian gikan sa kasagarang ginahimo niadtong nag-angkon nga dunay mga gahom sa pagpang-ayo karon?

Walay hilabihang pasundayag sa pagbati gikan sa mga panon ug walay dramatikong pagsalimuang sa bahin ni Jesus. Dugang pa, si Jesus wala gayod mapakyas sa pag-ayo sa masakiton sa pasangil nga ang ilang halad diyutay ra o sila nakulangan sa pagtuo.​—7/1, panid 5.

◻ Sa unsang paagi si Jehova nagtabang sa iyang katawhan nga magbaton ug dapit diha sa iyang balaang katuyoan may kalabotan sa iyang ngalan ug Gingharian?

Una, gitugyanan ni Jehova ang iyang katawhan sa kamatuoran. Ikaduha, gihatagan niya sila sa iyang balaang espiritu. Ug ikatulo, anaa ang atong tibuok-kalibotang panagsoon ug ang kahikayan ni Jehova sa organisasyon alang sa pagsimba.​—7/1, mga panid 19, 20.

◻ Unsa ang kaligdong?

Ang kaligdong maoy pagkaekselente sa moral, pagkamaayo, matarong nga buhat ug panghunahuna. Dili kini di-aktibo nga hiyas apan usa ka aktibo, positibong hiyas. Ang kaligdong nagkahulogan ug labaw pa kay sa paglikay sa sala; kini nagkahulogan sa pagtinguha sa kon unsay maayo. (1 Timoteo 6:11)​—7/15, panid 14.

◻ Unsa ang labing bililhong panulondon nga ikabilin sa mga ginikanan ngadto sa ilang mga anak?

Ang labing bililhong panulondon mao ang ilang kaugalingong sumbanan sa pagpakita ug gugma sa uban. Sa talagsaaong paagi, ang mga anak kinahanglang makakita ug makadungog sa ilang mga ginikanan nga mopahayag ug mopakita sa tim-os nga gugma sa Diyos sa tanan nilang gibuhat.​—7/15, panid 21.

◻ Unsa ang pipila ka hinungdanong gikinahanglan alang sa epektibong pagtuon sa pamilya?

Ang pagtuon sa pamilya kinahanglang regular. Kinahanglan kang ‘magpalit sa panahon’ alang sa pagtuon. (Efeso 5:​15-17) Himoa ang mga panahon sa pagtuon nga masadya para sa mga bata pinaagi sa paghimo sa Bibliya nga buhi. Aron ang mga bata malipay niini, angay silang mobating nalambigit niini.​—8/1, mga panid 26, 28.