Kaluwasan—Kon Unsay Tinuod nga Kahulogan Niini

‘IKAW ba naluwas?’ Kasagaran, kadtong misukna niining pangutanaha mibati nga sila naluwas tungod kay ilang ‘gidawat si Jesus ingong ilang personal nga Manluluwas.’ Apan ang uban mibati nga adunay lainlaing mga dalan ngadto sa kaluwasan ug nga basta ‘si Jesus anaa sa imong kasingkasing,’ dili igsapayan kon unsa ang imong gituohan o bisan unsang iglesya ang imong gipasakopan.

Ang Bibliya nag-ingon nga kabubut-on sa Diyos nga “tanang matang sa mga tawo maluwas.” (1 Timoteo 2:​3, 4) Ang kaluwasan sa ingon mabatonan sa tanan nga modawat niana. Apan unsa ba gayod ang kahulogan sa pagkanaluwas? Kana ba sa pagkatinuod usa ka butang nga yanong mahitabo kanimo bisag diyutay lang o walay paningkamot sa imong bahin?

Ang pulong “kaluwasan” nagkahulogang “pagkalingkawas gikan sa kapeligrohan o kalaglagan.” Ang tinuod nga kaluwasan sa ingon naglangkit ug labaw pa kay sa malinawong kahimtang sa hunahuna. Kana nagkahulogan nga maluwas gikan sa kalaglagan niining presenteng daotang sistema sa mga butang ug sa kataposan gikan sa kamatayon mismo! Apan kinsa ba gayod ang luwason sa Diyos? Sa pagtubag, susihon nato kon unsay gitudlo ni Jesu-Kristo bahin niining ulohana. Ang mga sangpotanan sa atong pagsusi makapatingala tingali kanimo.

Kaluwasan​—Makaplagan sa Tanang Relihiyon?

Sa usa ka okasyon, si Jesus nakigsulti sa usa ka babayeng Samarianhon. Bisan tuod dili siya Hudiyo, siya husto gayong nagtuo nga ang Mesiyas moabot “kinsa gitawag nga Kristo.” (Juan 4:25) Ang mao bang pagtuo igo na aron siya maluwas? Dili, kay si Jesus maisogong nagsulti sa babaye: “Kamo nagasimba sa wala ninyo mailhi.” Si Jesus nasayod nga aron kining babayhana makabaton ug kaluwasan, kinahanglang ipasibo niya ang iyang paagi sa pagsimba. Busa si Jesus mipatin-aw: “Bisan pa, ang takna nagasingabot, ug mao na karon, sa dihang ang matuod nga mga magsisimba mosimba sa Amahan pinaagi sa espiritu ug kamatuoran, kay, sa pagkatinuod, ang Amahan nagapangita sa mga ingon kanila nga mosimba kaniya.”​—Juan 4:​22, 23.

Ang laing okasyon nga si Jesus nagpadayag sa iyang panglantaw sa kaluwasan naglangkit sa mga Pariseo, usa ka prominenteng relihiyosong sekta sa Judaismo. Ang mga Pariseo nagtukod ug sistema sa pagsimba ug nagtuo nga kana giuyonan sa Diyos. Apan pamati sa mga pulong ni Jesus ngadto sa mga Pariseo: “Kamong mga salingkapaw! Si Isaias haom nga nagtagna bahin kaninyo: ‘Kining mga tawhana nagapasidungog kanako pinaagi sa ilang mga ngabil, apan ang ilang mga kasingkasing halayo kanako. Kawang ang ilang pagsimba kanako; ang ilang mga pagtulon-an maoy mga sugo nga gitudlo sa mga tawo.’”​—Mateo 15:​7-9, New International Version.

Komosta ang daghang relihiyosong mga grupo karong adlawa nga nangangkong nagtuo kang Kristo? Mouyon ba si Jesus nianang tanan ingong dalawatong mga paagi sa pagbaton ug kaluwasan? Dili kinahanglang tag-anon nato kining bahina, kay si Jesus tin-awng nag-ingon: “Dili ang matag usa nga magaingon kanako, ‘Ginoo, Ginoo,’ makasulod sa gingharian sa mga langit, kondili ang usa nga nagabuhat sa kabubut-on sa akong Amahan nga anaa sa mga langit. Daghan ang moingon kanako nianang adlawa, ‘Ginoo, Ginoo, wala ba kami managpropesiya sa imong ngalan, ug nanghingilin ug mga demonyo sa imong ngalan, ug mihimog daghan gamhanang mga buhat sa imong ngalan?’ Apan unya akong ipahayag ngadto kanila: Wala ko gayod kamo hiilhi! Pahilayo gikan kanako, kamong mga mamumuhat sa kalapasan.”​—Mateo 7:​21-23.

Tukmang Kahibalo Kang Jesus Hinungdanon sa Kaluwasan

Kining mga pulonga ni Jesus adunay makapahinuklog nga mga kahulogan. Kini nagpakita nga daghang debotadong mga tawo napakyas sa ‘pagbuhat sa kabubut-on sa Amahan.’ Nan, sa unsang paagi ang usa makabaton ug tinuod nga kaluwasan? Ang 1 Timoteo 2:​3, 4 nagtubag: “[Ang] kabubut-on [sa Diyos] mao nga ang tanang matang sa mga tawo maluwas ug makadangat sa tukmang kahibalo sa kamatuoran.”​—Itandi ang Colosas 1:​9, 10.

Ang maong kahibalo hinungdanon sa pagbaton ug kaluwasan. Sa dihang ang usa ka Romanong tigbilanggo nangutana kang apostol Pablo ug sa iyang kauban, si Silas, “Unsay kinahanglan kong buhaton aron maluwas?” sila mitubag: “Tumuo sa Ginoong Jesus ug ikaw maluwas, ikaw ug ang imong panimalay.” (Buhat 16:​30, 31) Kana ba nagpasabot nga ang kinahanglang buhaton lamang sa tigbilanggo ug sa iyang panimalay mao ang pagbaton ug usa ka pagbati diha sa ilang mga kasingkasing? Dili, sa usa ka katarongan, sila dili tinuoray nga ‘nagtuo sa Ginoong Jesus’ gawas kon sila may diyutayng pagsabot kon kinsa si Jesus, unsay iyang gihimo, ug unsay iyang gitudlo.

Pananglitan, si Jesus nagtudlo sa pagkatukod sa langitnong kagamhanan​—ang “gingharian sa Diyos.” (Lucas 4:43) Siya nagpahiluna usab ug mga prinsipyo bahin sa Kristohanong moralidad ug panggawi. (Mateo, mga kapitulo 5-7) Iyang gilatid ang baroganan sa iyang mga tinun-an maylabot sa politikanhong mga kalihokan. (Juan 15:19) Iyang gitukod ang tibuok-yutang programa sa pagpanudlo ug nagsugo sa iyang mga sumusunod sa pagpakig-ambit niana. (Mateo 24:​14; Buhat 1:8) Oo, ang ‘pagtuo kang Jesus’ nagkahulogan ug pagsabot sa daghang butang! Nan, dili ikahibulong nga si Pablo ug Silas ‘misulti sa pulong ni Jehova ngadto sa tigbilanggo uban kanilang tanan nga anaa sa iyang balay’ una mabawtismohi kining bag-ong mga magtutuo.​—Buhat 16:​32, 33.

Tukmang Kahibalo sa Diyos Hinungdanon Usab

Ang kinahanglanong bahin sa tinuod nga pagtuo kang Jesus naglakip sa pagsimba sa Diyos nga gisimba mismo ni Jesus. Si Jesus miampo: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.”​—Juan 17:3.

Panahon sa iyang yutan-ong ministeryo, ang Anak sa Diyos kanunayng nagtumong sa pagtagad ngadto sa iyang Amahan ug dili sa iyang kaugalingon. Wala gayod siya mangangkon nga mao ang Diyos nga Labing Gamhanan. (Juan 12:​49, 50) Sa daghang okasyon gitin-aw ni Jesus ang iyang kahimtang diha sa kahikayan sa Diyos pinaagi sa pag-ingon nga siya ubos sa iyang Amahan. (Lucas 22:​41, 42; Juan 5:19) Aw, si Jesus mipahayag: “Ang Amahan labaw pa kanako.” (Juan 14:28) Ang imo bang iglesya nagtudlo kanimo sa matuod nga relasyon tali sa Diyos ug ni Kristo? O ikaw ba gipatuo nga si Jesus mismo mao ang Labing Gamhanang Diyos? Ang imong kaluwasan nagdepende sa pagbaton ug tukmang pagsabot.

Sa Pag-ampo sa Ginoo, si Jesus nag-awhag sa iyang mga tinun-an sa pag-ampo: “Balaanon unta ang imong ngalan.” (Mateo 6:9) Ang kadaghanang hubad sa Bibliya nagtago sa ngalan sa Diyos, nga naghubad nianang “Ginoo.” Apan sa karaang mga kopya sa “Daang Tugon,” ang ngalan sa Diyos makita kapin sa unom ka libo ka beses! Busa ang Salmo 83:​18 mabasa: “Aron ang katawhan mahibalo nga ikaw, kansang ngalan mao si Jehova, ikaw lamang ang Labing Hataas sa tibuok yuta.” Gitudloan ka ba sa paggamit sa ngalan sa Diyos, nga Jehova? Kon wala, ang imong kaluwasan nameligro, kay “ang tanang nagatawag sa ngalan ni Jehova maluwas”!​—Buhat 2:21; itandi ang Joel 2:32.

Pinaagi sa Espiritu ug Kamatuoran

Si Jesu-Kristo nagtumong usab sa pagtagad ngadto sa Pulong sa Diyos, ang Bibliya. Sa dihang nagsaysay sa panglantaw sa Diyos sa pipila ka butang, siya subsob nga moingon: “Kini nahisulat.” (Mateo 4:​4, 7, 10; 11:​10; 21:13) Sa gabii una siya mamatay, si Jesus nag-ampo mahitungod sa iyang mga tinun-an: “Balaana sila pinaagi sa kamatuoran; ang imong pulong maoy kamatuoran.”​—Juan 17:17.

Ang pagkasabot sa mga pagtulon-an sa Pulong sa Diyos, ang Bibliya, sa ingon maoy laing kinahanglanon aron maluwas. (2 Timoteo 3:16) Ang Bibliya lamang ang nagtubag sa mga pangutana sama sa: Unsa ang kahulogan sa kinabuhi? Nganong gitugotan sa Diyos nga magpadayon ug dugay ang pagkadaotan? Unsay mahitabo sa usa ka tawo inigkamatay niya? Nagasakit ba gayod ang Diyos sa mga tawo diha sa kalayonhong impiyerno? Unsa ang katuyoan sa Diyos alang sa yuta?a Ang usa dili makasimba sa Diyos sa tukmang paagi kon walay hustong pagsabot nianang mga isyuha, kay si Jesus nag-ingon: “Ang matuod nga mga magsisimba mosimba sa Amahan pinaagi sa espiritu ug kamatuoran.”​—Juan 4:23.

Pagtuo Magpalihok

Ang kaluwasan naglangkit ug labaw pa kay sa pagbaton lamang ug impormasyon. Sa usa ka masanongong kasingkasing, ang tukmang kahibalo sa Diyos magpatunghag pagtuo. (Roma 10:​10, 17; Hebreohanon 11:6) Ang maong pagtuo magpalihok sa usa. Pananglitan, ang Bibliya nagtambag: “Busa, paghinulsol kamo, ug talikod aron mapapas ang inyong mga sala, aron ang mga panahon sa pagpalagsik moabot gikan sa persona ni Jehova.”​—Buhat 3:19.

Oo, ang kaluwasan naglakip usab sa pagpahiuyon sa kaugalingon sa mga sukdanan sa Diyos sa panggawi ug moralidad. Ilalom sa makapausab nga impluwensiya sa Pulong sa Diyos, ang tibuok-kinabuhing mga batasan sa pagpamakak ug panglimbong mapulihan sa pagkamatinud-anon ug pagkamatinuoron. (Tito 2:10) Ang imoral nga mga binuhatan, sama sa homoseksuwalidad, panapaw, ug pakighilawas, gibiyaan ug gipulihan sa putling moral nga panggawi. (1 Corinto 6:​9-11) Kini dili temporaryong paglikay nga gipasikad sa pagbati kondili usa ka permanenteng kausaban nga misangpot gumikan sa mainampingong pagtuon ug pagpadapat sa Pulong sa Diyos.​—Efeso 4:​22-24.

Ngadtongadto, ang gugma ug apresasyon sa Diyos magpalihok sa matinud-anog-kasingkasing nga tawo sa paghimog bug-os nga pagpahinungod sa Diyos ug sa pagpasimbolo niana pinaagi sa pagpabawtismo sa tubig. (Mateo 28:​19, 20; Roma 12:1) Ang bawtismadong mga Kristohanon naluwas sa mga mata sa Diyos. (1 Pedro 3:21) Panahon sa nagsingabot nga kalaglagan niining daotang kalibotan, ang Diyos magluwas kanila sa bug-os pinaagi sa pagpreserbar kanila latas sa maong kasakitan.​—Pinadayag 7:​9, 14.

Kon Unsay Kahulogan sa Kaluwasan Alang Kanimo

Tin-aw gikan niining mubong panaghisgot nga ang pagbaton ug kaluwasan naglangkit ug labaw pa kay sa ‘pagbaton kang Ginoong Jesus diha sa imong kasingkasing.’ Kana nagkahulogan ug pagbaton ug tukmang kahibalo kang Jehova nga Diyos ug kang Jesu-Kristo ug paghimog gikinahanglang mga kausaban sa kinabuhi sa usa. Ang pagbuhat niini morag malisod, apan ang mga Saksi ni Jehova andam nga motabang kanimo niining bahina. Pinaagi sa usa ka libreng pagtuon sa Bibliya sa balay, sila makatabang kanimo sa pagsugod sa paglakaw sa dalan padulong sa tinuod nga kaluwasan.b

Tungod sa kaduol na sa nagsingabot nga adlaw sa paghukom sa Diyos, ang pagbuhat niana mas dinalian kay sukad masukad! Karon na ang panahon sa pagpatalinghog sa mga pulong sa propeta: “Sa dili pa modangat kaninyo ang adlaw sa kasuko ni Jehova, pangitaa si Jehova, kamong tanang maaghop sa yuta, kinsa naghimo sa Iyang kaugalingong hudisyal nga desisyon. Pangitaa ang pagkamatarong, pangitaa ang kaaghop. Basin pagatagoan kamo sa adlaw sa kasuko ni Jehova.”​—Sofonias 2:​2, 3.

[Mga footnote]

[Hulagway sa panid 6]

ANG KALUWASAN MOSANGPOT GUMIKAN SA ...

◻ Pagbaton ug tukmang kahibalo sa Diyos ug kang Jesus.​—Juan 17:3.

◻ Pagbaton ug pagtuo.​—Roma 10:​17; Hebreohanon 11:6.

◻ Paghinulsol ug pagtalikod.​—Buhat 3:​19; Efeso 4:​22-24.

◻ Pagpahinungod ug bawtismo.​—Mateo 16:​24; 28:​19, 20.

◻ Pagpadayon sa paghimog publikong pagpahayag.​—Mateo 24:​14; Roma 10:10.

[Hulagway sa panid 7]

Ang pagtuon sa Bibliya, pagpadapat sa kon unsay nakat-onan, pagpahinungod, ug bawtismo maoy mga lakang nga motultol sa kaluwasan