Ang mga Pista sa Pagpangani Makapahimuot ba sa Diyos?

ANG dugaong mga prutas, lamiang mga utanon, ug mga bangan sa bus-ok nga lugas sa mais nga habog nga gikamada naghatag ug madanihong talan-awon. Sa ting-ani ang maong mga pasundayag nag-adorno sa mga altar ug mga pulpito sa mga simbahan sa tibuok Inglaterra. Sa Uropa, sama sa ubang dapit, ang daghang pista nagtimaan sa pagsugod ug pagkatapos sa panahon sa pagpangani.

Kadtong kansang panginabuhi nagdepende sa yuta maoy ilabinang mapasalamaton sa mga abot sa yuta. Sa pagkatinuod, giawhag sa Diyos ang karaang nasod sa Israel sa pagsaulog sa tulo ka tinuig nga pista nga suod nga nalangkit sa pagpangani. Sa sayong tingpamulak, panahon sa Pista sa mga Tinapay nga Walay Lebadura, gitanyag sa mga Israelinhon ngadto sa Diyos ang usa ka bangan sa unang mga bunga sa ani nga sebada. Sa Pista sa mga Semana (o, Pentekostes) sa hinapos ang tingpamulak, gitanyag nila ang mga tinapay nga gama gikan sa unang mga bunga sa ani nga trigo. Sa tinghunlak gihimo ang Pista sa Pagpanigom, nga nagtimaan sa kataposan sa agrikultural nga tuig sa Israel. (Exodo 23:​14-​17) Kining maong mga pista maoy “balaang mga kombensiyon” ug mga panahon sa pagmaya.​—Levitico 23:​2; Deuteronomio 16:16.

Nan, komosta ang bahin sa modernong-adlawng mga selebrasyon sa pagpangani? Kini ba makapahimuot sa Diyos?

Paganong mga Kalangkitan

Natugaw sa sekular nga kinaiyahan sa tradisyonal nga bangkete sa ting-ani ug sa paghuboghubog nga nalangkit sa maong selebrasyon, usa ka Anglikanong klerigo sa Cornwall, Inglaterra, mihukom niadtong 1843 nga saulogon pag-usab ang kostumbre sa pagpananggi sa Edad Medya. Mikuha siya sa unang pipila ka lugas nga giani ug gikan niana mihimog ostiyas alang sa pagpangalawat diha sa iyang simbahan. Sa pagbuhat niana, iyang gipadayon ang pista sa Lammas​—usa ka “Kristohanong” selebrasyon nga giingon sa pipila nga naggikan sa karaang pagsimba sa diyos sa Celtic nga si Lugh.a Busa, ang modernong Anglikanong pista sa pagpangani adunay paganong sinugdanan.

Komosta ang ubang mga selebrasyon nga mahitabo pagkatapos sa panahon sa pagpangani? Sumala sa Encyclopædia Britannica, daghan sa mga kostumbre nga nagtimaan niining maong mga pista masubay ang sinugdanan niini ngadto sa “animistang pagtuo sa espiritu sa mais [lugas] o inahang mais.” Sa pipila ka mga rehiyon ang mga mag-uuma nagtuo nga ang espiritu nagpuyo diha sa kataposang bangan sa mais nga pagaanihon. Aron maabog ang espiritu, ilang bunalan ang kataposang bangan sa mais hangtod mangatangtang ang tanang puso. Sa laing dapit sila naghimog “monyekang mais” gikan sa linala nga mga dahon sa mais aron magdalag “suwerte” hangtod sa tingpugas sa sunod nga tuig. Unya gidaro nila ang mga puso sa mais balik sa yuta sa paglaom nga kini magpanalangin sa bag-ong tanom.

Ang pipila ka mga kasugiran naglangkit sa ting-ani uban sa pagsimba sa Babilonyanhong diyos nga si Tammuz, ang konsorte sa diyosa sa pertilidad nga si Ishtar. Ang pagsanggi sa gulang nga puso sa mais katumbas sa ahat nga kamatayon ni Tammuz. Ang ubang mga kasugiran naglangkit gani sa ting-ani uban sa paghalad sa tawo​—usa ka buhat nga gikayugtan ni Jehova nga Diyos.​—Levitico 20:​2; Jeremias 7:​30, 31.

Unsay Panglantaw sa Diyos?

Ang pagpakiglabot sa Diyos sa karaang Israel tin-awng nagbutyag nga si Jehova, ang Maglalalang ug Tuboran sa kinabuhi, nagkinahanglan ug eksklusibong debosyon sa iyang mga magsisimba. (Salmo 36:​9; Nahum 1:2) Sa adlaw sa manalagnang si Ezequiel, ang batasan sa pagbakho alang sa diyos nga si Tammuz maoy usa ka ‘dakong butang nga dulumtanan’ sa mga mata ni Jehova. Kini, apil sa ubang bakak nga relihiyosong mga seremonyas, ang nagpahinabo sa Diyos sa dili pagpamati sa mga pag-ampo niadtong bakak nga mga magsisimba.​—Ezequiel 8:​6, 13, 14, 18.

Itandi kini kon unsay gitudlo ni Jehova nga Diyos sa Israel nga saulogon maylabot sa pagpangani. Sa Pista sa Pagpanigom, ang mga Israelinhon naghimo ug solemneng panagkatigom nga nianang higayona ang mga batan-on ug mga tigulang, dato ug kabos, nagpuyo sa temporaryong mga puy-anan nga giadornohan sa labong nga dahon sa maanindot nga mga kahoy. Kadto maoy panahon sa dakong pagmaya alang kanila, apan panahon usab kadto sa pagpalandong sa kaluwasan nga gipahinabo sa Diyos sa ilang mga katigulangan sa panahon sa pagbiya sa Ehipto.​—Levitico 23:​40-​43.

Sa panahon sa Israelinhong mga pista, ang mga halad gitanyag kang Jehova, ang bugtong matuod nga Diyos. (Deuteronomio 8:​10-​20) Labot sa bag-o pang gihisgotan nga animistang mga pagtulon-an, walay gihisgotan ang Bibliya nga abot, sama sa mga bangan sa trigo, nga may kalag.b Ug tin-awng gipakita sa Kasulatan nga ang mga idolo nagpabiling walay kinabuhi, dili makasulti, makakita, makadungog, makapanimaho, makabati, o makatanyag ug bisan unsang tabang ngadto sa ilang mga magsisimba.​—Salmo 115:​5-8; Roma 1:​23-​25.

Ang mga Kristohanon karong adlawa wala mailalom sa pakigtugon sa Kasugoan nga gihimo sa Diyos uban sa karaang nasod sa Israel. Sa pagkatinuod, ang Diyos ‘nagkuha niini sa agianan pinaagig paglansang niini sa sakitanang estaka ni Jesus.’ (Colosas 2:​13, 14) Ang modernong-adlaw nga mga alagad ni Jehova nagkinabuhi ‘sa balaod ni Kristo’ ug misanong nga mapabilhon sa tanang ginatagana sa Diyos.​—Galacia 6:2.

Si apostol Pablo tin-awng miingon nga ang Hudiyohanong mga pista maoy “anino sa mga butang nga moabot,” nga midugang, “apan ang katinuoran iya sa Kristo.” (Colosas 2:​16, 17) Busa, ang matuod nga mga Kristohanon modawat sa Kasulatanhong pangatarongan: “Ang mga butang nga ginahalad sa mga nasod ilang ginahalad ngadto sa mga demonyo, ug dili ngadto sa Diyos . . . Dili kamo mahimong magainom sa kopa ni Jehova ug sa kopa sa mga demonyo.” (1 Corinto 10:​20, 21) Dugang pa, ang mga Kristohanon mamati sa sugo nga “hunong na sa paghikap sa dili-hinlong butang.” Ang mga pista ba sa pagpangani diha sa inyong kasilinganan may pagano o bakak relihiyosong mga kahulogan? Kon mao, ang tinuod nga mga Kristohanon mahimong makalikay nga dili makapahimuot kang Jehova pinaagi sa pagdumili sa bisan unsang pagkalangkit sa nahugawang pagsimba.​—2 Corinto 6:17.

Sa dihang ang mapabilhong bata makadawat ug regalo gikan sa iyang amahan, kinsay iyang pasalamatan? Usa ka bug-os nga estranghero o iyang amahan? Pinaagi sa kinasingkasing nga pag-ampo ang mga magsisimba sa Diyos nagapasalamat sa adlaw-adlaw kang Jehova, ang ilang langitnong Amahan, tungod sa iyang madagayaong pagkamanggihatagon.​—2 Corinto 6:​18; 1 Tesalonica 5:17, 18.

[Mga footnote]