Akong Nakita “ang Usa nga Gamay” nga Nahimong “Usa ka Kusganong Nasod”
SUMALA SA GIASOY NI WILLIAM DINGMAN
Ang tuig maoy 1936; ang dapit, Salem, Oregon, T.B.A. Mitambong ako sa usa ka tigom sa mga Saksi ni Jehova. Ang pangutana gisukna: “Hain ang dakong panon?” (Pinadayag 7:9, King James Version) Ako lamang ang bag-ohan, busa silang tanan mitudlo kanako ug miingon, “Naa ra siya!”
SA TUNGATUNGA sa katuigang 1930, diyutay lamang taliwala sa mga Saksi ni Jehova ang may paglaom diha sa Bibliya nga mabuhi sa walay kataposan sa Paraiso sa yuta. (Salmo 37:29; Lucas 23:43) Ang mga kahimtang sukad niadto mabulokong nabag-o. Apan tugoting isugilon ko ang mga hitabo nga mitultol sa akong pagtambong sa maong tigom sa Salem, Oregon.
Tigsuskriber ang akong amahan sa The Golden Age, ang unang ngalan sa magasing Pagmata! Sa tin-edyer pa ako, ganahan akong mobasa niana, ug ako mituo nga naundan kini sa bililhong kamatuoran sa Bibliya. Busa usa ka adlaw mipadala akog kupon nga gipakita diha sa likod sa usa ka Golden Age. Nagtanyag kini sa magbabasa ug 20 ka pulyeto, usa ka libro, ug sa ngalan sa labing duol nga kongregasyon sa mga Saksi ni Jehova. Sa pagkadawat sa literatura, nagbalay-balay ako ug nagpahiluna sa tanang mga pulyeto maingon man sa libro.
Walay usang nagtuon sa Bibliya uban kanako kaniadto. Sa pagkatinuod, wala pa ako sukad makapakigsultig usa sa mga Saksi ni Jehova. Apan karon, nga nabatonan ko ang adres sa labing duol nga Kingdom Hall, mibiyahe akog 40 kilometros ngadto sa Salem, Oregon, aron sa pagtambong sa usa ka tigom. Didto, sa dihang 18 anyos pa ako, nga ako gitudlo ingong “ang dakong panon.”
Bisan tuod wala pa gayod akoy pagpangandam sa ministeryo, misugod na ako sa pagsangyaw duyog sa Kongregasyon sa Salem. Gidasig ako nga ilakip ang tulo ka pangunang punto sa akong pagsangyaw. Una, nga si Jehova mao ang Diyos; ikaduha, nga si Jesu-Kristo mao ang iyang tinudlong Hari; ug ikatulo, nga ang Gingharian mao ang bugtong paglaom sa kalibotan. Akong gisulayan ang pagpaambit sa maong mensahe sa matag pultahan.
Human makig-uban sa mga Saksi ni Jehova sa Salem sulod sa duha ka tuig, gibawtismohan ako niadtong Abril 3, 1938. Ang mga higala sa Salem nahimuot sa paglantaw nga daghan kanamo sa “dakong panon” ang nabawtismohan. Sa Pebrero 1939, ako nahimong payunir, o bug-os panahong ministro. Sa Disyembre nianang tuiga, akong gidawat ang pagdapit nga mobalhin ngadto sa Arizona, diin dihay mas dakong panginahanglan sa mga magmamantala sa Gingharian.
Pagpayunir sa Arizona
Bag-o ang buluhaton sa mga Saksi ni Jehova sa Arizona, ug dihay dakong sayop nga pagsabot bahin kanamo, busa sa dihang ang Tinipong Bansa misalga sa Gubat sa Kalibotan II, nakasinati kamig grabeng paglutos. Pananglitan, samtang ako nag-alagad sa Stafford, Arizona, sa 1942, dihay panagsabot sa pagsamok batok kanamo pinaagig usa ka grupo sa mga Mormon. Kami sa akong mga kaubanang payunir nagpuyo duol sa balay sa usa ka obispo sa Mormon nga mitahod kanamo ug miingon: “Kon ang mga misyonaryo sa Mormon sama pa ka aktibo sa mga Saksi, nan ang Iglesya sa Mormon molambo.” Busa sa simbahan siya mipahayag ug miingon: “Akong nadunggan nga dunay panagsabot nga guboton ang mga batan-ong Saksi. Buweno, nagpuyo ako duol niining mga batan-ona, ug kon sila guboton, duna unyay shotgun nga ipunting latas sa koral. Kana nga shotgun pabuthon—apan dili batok sa mga Saksi. Ipunting kana batok sa mga manggugubot. Busa kon gusto mong manggubot, nasayod na kamog unsay dahomon.” Ang magubtanong panon wala gayod mopatim-aw.
Sa akong tulo ka tuig sa Arizona, kami gidakop ug gibilanggo sa daghang higayon. Makausa ako gibilanggo sulod sa 30 ka adlaw. Aron masuklan ang pangharas sa polisya sa among ministeryo, among giporma ang among gitawag nga flying squad. Ang tinugyanang Saksi miingon kanamo: “Molihok kita sumala sa kahulogan sa atong ngalan. Magsugod kita sa alas singko o ala sayis sa buntag, magbilin ug tract o pulyeto sa matag pultahan, ug dayon kita mohawa pagdali.” Ang among “flying squad” mikobreg dakodakong bahin sa estado as Arizona. Apan, kini sa kataposan gihunong sanglit ang maong matang sa pagsangyaw wala magtugot kanamo sa pagtaganag tabang niadtong mga interesado.
Tunghaang Gilead ug Espesyal nga Pag-alagad
Sa Disyembre 1942, nalakip ako sa daghang payunir sa Arizona nga nakadawat ug sulat sa pagdapit ngadto sa bag-ong tunghaang misyonaryo nga ginatukod sa mga Saksi ni Jehova. Ang tunghaan unang gitawag nga Watchtower Bible College of Gilead. Sa ulahi ang ngalan giusab nga Watchtower Bible School of Gilead. Ang tunghaan nahimutang sa duolag 4,800 kilometros duol sa siyudad sa Ithaca sa amihanang bahin sa New York.
Human sa mubong duaw sa Oregon, sa Enero 1943, daghan kanamong mga payunir mibiya sa kainit sa Desyerto sa Arizona sakay sa bus nga Greyhound. Daghang adlaw sa ulahi midangat kami sa among destinasyon ug naabtan ang niyebe sa tingtugnaw sa amihanang bahin sa New York. Gisugdan ang tunghaan sa Pebrero 1, 1943, dihang ang presidente niini, si Nathan H. Knorr, misulti diha sa iyang pangbukas nga pakigpulong ngadto sa usa ka gatos ka estudyante: “DILI katuyoan niining maong kolehiyo ang pagsangkap kaninyo nga mahimong ordinadong mga ministro. Mga ministro na kamo ug aktibo na diha sa ministeryo sa daghang katuigan. . . . Ang kurso sa pagtuon sa kolehiyo maoy alang sa linaing katuyoan sa pag-andam kaninyo nga mahimong mas takos nga mga ministro sa mga teritoryong inyong adtoan.”
Sanglit gamay ra akog grado, sa sinugdan ako gilisdan sa Gilead. Apan ang mga instruktor masinaboton kanako, ug nalingaw ako pag-ayo sa akong pagtuon. Ang among klase migraduwar human ang lima ka bulan sa bug-os nga pagbansay. Human niana, ang pipila kanamo gipadala sa hedkuwarter sa kalibotan sa mga Saksi ni Jehova sa Brooklyn, New York, diin nakadawat kamig dugang pagbansay sa pag-andam kanamo sa pag-alagad diha sa nagapanawng buluhaton ingong mga magtatan-aw sa sirkito. Ang akong unang asaynment mao ang Amihanan ug Habagatang Carolina.
Niadtong panahona, ang magtatan-aw sa sirkito halos kanunayng nagabiyahe. Mopuyo kamig usa ka adlaw sa gamayng kongregasyon o duha ka adlaw kon kini dako. Gagmay ang kadaghanang kongregasyon kaniadto. Busa human makagahin ug tibuok adlaw, ug kasagarang puliki pa hangtod sa hapit na ang tungang gabii sa pagduaw ug pagtubag sa mga pangutana, momata na ako sa mga alas singko sa pagkaugma aron mobalhin sa sunod nga kongregasyon. Nag-alagad ako sa buluhaton sa sirkito sa duolag usa ka tuig, ug human niana ako nagpayunir makadiyot didto sa Tennessee ug New York.
Ngadto sa Cuba ug Padulong sa Puerto Rico
Sa Mayo 1945, kuyog sa uban pa, gipadala ako sa akong unang langyaw nga misyonaryong asaynment, ang Cuba! Sa gabiing kami miabot sa Havana, ang kabisera sa Cuba, kami nanagtag ug magasin. Nagpabilin kami sa Havana hangtod nga nakakaplag kamig puy-anan sa Santa Clara. Ang among binulang alawans maoy $25 lamang ang matag usa alang sa tanang panginahanglan, lakip ang pagkaon ug abang. Nagpanday kami ug mga katre ug lingkoranan gikan sa mabatonang materyales ug naggamit sa mga kahon sa mansanas para sa among mga kabinet.
Sa pagkasunod tuig naasayn ako sa buluhaton sa sirkito. Kaniadto usa lamang ka sirkito ang tibuok Cuba. Sanglit ang magtatan-aw sa sirkito nga akong gipulihan tag-as ug bitiis ug gustong magbaktas, ang mga igsoon sa literal kinahanglang modagan aron makaapas kaniya. Dayag nga maoy ilang hunahunang ako mao usab, busa giplano nilang daan ang tanan sa akong duaw. Wala sila manggawas sa ministeryo sa samang adlaw apan naggrupo-grupo ug nagpulihanay sa pagkuyog kanako. Sa unang adlaw ang usa ka grupo nagdala kanako ngadto sa layong teritoryo; pagkasunod adlaw ang laing grupo nagdala kanako sa laing layo nga teritoryo, ug mao usab ang lain. Gikapoy ako pagkatapos sa duaw, apan gikalipay ko kadto. Makapahimuot ang akong mga handomanan sa maong kongregasyon.
Pagka-1950 miabot na kamig kapin sa 7,000 ka magmamantala sa Gingharian sa Cuba, halos samang gidaghanon sa nabatonan sa Mexico. Sa Hulyo nianang tuiga, mitambong ako sa Theocracy’s Increase nga internasyonal nga kombensiyon sa Yankee Stadium sa New York City. Human niana, nakadawat akog bag-ong misyonaryong asaynment, ngadto sa Puerto Rico. Lakip sa bag-ong mga misyonaryo gikan sa ika-12ng klase sa Gilead mao si Estelle ug Thelma Weakley, nga mikuyog sa akong panaw padulong sa Puerto Rico.
Walo ka tuig sa ulahi kami ni Estelle naminyo diha sa usa ka yanong seremonya sa Bayamón, Puerto Rico, nga gihimo sa plataporma panahon sa intermisyon sa among sirkitong asembliya. Una pa ug pagkatapos sa among kaminyoon, ako nag-alagad diha sa buluhaton sa sirkito. Sa among kapin sa napulo ka tuig sa Puerto Rico, kami ni Estelle nakasaksi sa dagkong mga pag-uswag—gikan sa duolag 500 ka magmamantala ngadto sa kapin sa 2,000. Daghan kamig natabangan hangtod sa punto sa pagpahinungod ug bawtismo, ug nakaambit kami sa pagtukod ug daghang bag-ong kongregasyon.
Sa Disyembre 1960, si Milton Henschel gikan sa hedkuwarter sa kalibotan sa mga Saksi ni Jehova sa Brooklyn, New York, miduaw sa Puerto Rico ug namulong ngadto sa mga misyonaryo. Misukna siya kon duna bay makahimo pag-adto sa laing asaynment. Lakip niadtong miboluntaryo mao si Estelle ug ako.
Among Pinuy-anan sa Dominican Republic
Ang among bag-ong asaynment mao ang Dominican Republic, ug among gisitar ang Hunyo 1, 1961, ingong petsa sa among pagbalhin. Sa Mayo 30 ang Dominikanhong diktador, si Rafael Trujillo, gibuno, ug gikanselar ang mga biyahe padulong sa nasod. Ang mga biyahe, hinunoa, sa wala madugay gisugdan, ug nakagikan kami ngadto sa Dominican Republic sa Hunyo 1 ingon sa giplano.
Diha sa kagubot ang nasod sa among pag-abot, ug dihay daghang militaryong kalihokan. Gikahadlokan ang usa ka rebolusyon, ug ang mga sundalo nagrekisa sa matag usa diha sa dalan. Gipahunong kami sa daghang checkpoint, ug sa matag checkpoint ang among kargamento gisusi. Ang tanan gihaw-as sa among mga maleta, bisan ang kinagamyang mga butang. Mao kadto ang among unang kasinatian sa Dominican Republic.
Mipuyo kami sa kabisera, ang Santo Domingo, sa daghang semana una pa mopadulong sa among unang asaynment sa La Romana. Panahon sa pagkadiktador ni Trujillo, ang publiko gisuginlan nga ang mga Saksi ni Jehova maoy mga Komunista ug maoy labing makuyaw nga mga tawo. Ingong resulta, grabeng gilutos ang mga Saksi. Sa inanay, hinunoa, among napuypoy ang pagkamapihigon.
Human ang mubong pag-ugmad sa La Romana, misugod na usab kami sa pag-alagad sa buluhaton sa sirkito. Dayon, sa 1964, giasayn kami ingong mga misyonaryo sa siyudad sa Santiago. Pagkasunod tuig ang Dominican Republic nakasinatig rebolusyon, ug sa makausa pa ang nasod diha sa kaguliyang. Niana nga kagubot kami gibalhin ngadto sa San Francisco de Macorís, usa ka lungsod nga nailado sa pagkaaktibo niini sa politika. Bisan pa niana, misangyaw kaming luwas nga walay pagbalda. Luyo sa kagubot sa politika, nakaporma pa ngani kamig usa ka bag-ong kongregasyon. Latas sa misunod nga katuigan, nakasinati pa kamig dugang mga kausaban sa asaynment una pa giasayn pagbalik sa among pinuy-anan karon sa Santiago.
Amo gayong nakita ang panalangin ni Jehova sa buluhaton dinhi sa Dominican Republic. Sa among pag-abot niadtong 1961, dihay duolag 600 ka Saksi ug 20 ka kongregasyon. Karon anaay halos 20,000 ka magmamantala nga nagasangyaw sa maayong balita sa Gingharian sa Diyos sa kapin sa 300 ka kongregasyon. Dako ang purohan sa dugang pag-uswag, ingon sa makita sa mitambong nga 69,908 sa Memoryal sa kamatayon ni Kristo sa 1996. Kana maoy halos tulo ka pilo ug tunga sa gidaghanon sa mga magmamantala!
Karon Usa ka Kusganong Nasod
Bisan tuod ang talan-awon sa kalibotan padayong nagabag-o, ang mensahe sa Bibliya nga ginasangyaw sa mga Saksi ni Jehova nagpabiling mao gihapon. (1 Corinto 7:31) Si Jehova gihapon ang Diyos, si Kristo gihapon ang Hari, ug ang Gingharian mas tin-aw sukad masukad nga maoy bugtong paglaom sa kalibotan.
Sa samang panahon, ang kahibulongang kausaban nahitabo taliwala sa katawhan ni Jehova sukad sa akong pagtambong niadtong tigoma sa Salem, Oregon, mga 60 anyos kanhi. Ang dakong pundok, o dakong panon, sa pagkatinuod nahimong dako, nga mikabat na ug kapin sa lima ka milyon. Sama gayod kini sa gitagna ni Jehova bahin sa iyang katawhan: “Ang diyutay mismo mahimong usa ka libo, ug ang usa nga gamay mahimo nga usa ka kusganong nasod. Ako mismo, si Jehova, magapadali niini sa iyang kaugalingong panahon.”—Isaias 60:22.
Human sa kapin sa 60 anyos diha sa bug-os panahong ministeryo, ako nalipay sa pagpakabaton sa kangaya sa pagpadayon sa pagsangyaw ug pagtudlo sa akong misyonaryong asaynment. Pagkadakong pribilehiyo nga makaambit sa maong buluhaton ug makakita sa “usa nga gamay” nga nahimong “usa ka kusganong nasod”!
[Hulagway sa panid 21]
Uban sa akong asawa, sa Dominican Republic