‘Padayon nga Bukas nga Magpinasayloay sa Usag Usa’
“Padayon nga mag-inantosay sa usag usa ug bukas nga magpinasayloay sa usag usa.”—COLOSAS 3:13.
1. (a) Sa dihang si Pedro nagsugyot nga atong pasayloon ang uban “kutob sa pito ka higayon,” nganong siya nagtuo nga tingali siya nagmanggiluy-on kaayo? (b) Unsay buot ipasabot ni Jesus sa dihang siya miingon nga kita angay mopasaylo “kutob sa kapitoag-pito ka higayon”?
“GINOO, pila ka higayon nga ang akong igsoon makasala batok kanako ug ako magpasaylo kaniya? Kutob ba sa pito ka higayon?” (Mateo 18:21) Si Pedro tingali nagtuo nga siya manggiluy-on kaayo sa iyang sugyot. Sa maong panahon, ang tradisyon sa mga rabbi nag-ingon nga dili angay mopasaylo ang usa ug labaw sa tulo ka higayon sa mao ra gihapong sala.a Nan, handurawa ang kakurat ni Pedro sa dihang si Jesus mitubag: “Ako magaingon kanimo, dili, Kutob sa pito ka higayon, apan, Kutob sa kapitoag-pito ka higayon”! (Mateo 18:22) Ang pagsubli sa pito ka higayon sama rag nag-ingong “sa panahong walay katinoan.” Sa panglantaw ni Jesus, halos walay limite kon pila ka higayon nga angay pasayloon sa usa ka Kristohanon ang uban.
2, 3. (a) Unsa ang pipila ka kahimtang diin daw lisod ang pagpasaylo sa uban? (b) Nganong kita makasalig nga alang sa atong kaayohan ang pagpasaylo sa uban?
2 Hinunoa, ang pagpadapat nianang tambaga dili kanunayng sayon. Kinsa kanato ang wala makabati sa kahapdos sa dili-makataronganong kadaot? Tingali gibutyag sa usa ka tawo nga imong gisaligan ang usa ka tinagoan. (Proverbio 11:13) Ang wala-hunahunaang mga pulong sa usa ka suod nga higala tingali ‘miduslak kanimo sama sa espada.’ (Proverbio 12:18) Ang maabusohong pagtagad sa usa nga imong gihigugma o gisaligan tingali nakahatag ug lalom nga mga samad. Sa dihang mahitabo kining mga butanga, ang atong natural nga reaksiyon tingali mao ang pagkasuko. Tingali kita dili na ganahang makigsulti pa sa nakasala, likayan na gayod siya kon mahimo. Ang pagpasaylo kaniya daw magtugot kaniya nga makalingkawas sa silot sa pagdaot kanato. Apan, ang paghambin sa kasuko mosangpot nga kita ray madaot.
3 Busa si Jesus nagtudlo kanato sa pagpasaylo—“kutob sa kapitoag-pito ka higayon.” Sa pagkatinuod ang iyang mga pagtulon-an dili gayod makadaot kanato. Ang tanan nga iyang gitudlo nagagikan kang Jehova, ‘ang Usa nga nagtudlo kanato aron makabaton kitag kaayohan.’ (Isaias 48:17; Juan 7:16, 17) Makataronganon, alang gayod sa atong dakong kaayohan ang pagpasaylo sa uban. Sa dili pa nato hisgotan kon nganong kita angay nga magpasaylo ug kon sa unsang paagi nato kana himoon, tingali makatabang nga tinoon una kon unsa ang pagpasaylo ug kon unsa ang dili. Ang atong ideya sa pagpasaylo tingali adunay kalabotan sa atong katakos sa pagpasaylo kon kita masilo sa uban.
4. Unsay wala ipasabot sa pagpasaylo sa uban, apan sa unsang paagi ang pagpasaylo gibatbat?
4 Ang pagpasaylo sa uban sa personal nga mga kasaypanan wala magpasabot nga atong gikonsenti o gibalewala ang ilang gihimo; ni nagpasabot kini sa pagtugot sa uban sa pagpahimulos kanato nga dili-makataronganon. Gawas pa, sa dihang pasayloon kita ni Jehova, dayag nga wala niya pakasayona ang atong mga sala, ug dili gayod niya itugot nga tamakan sa makasasalang mga tawo ang iyang kaluoy. (Hebreohanon 10:29) Sumala sa Insight on the Scriptures, ang pagpasaylo gibatbat ingong “ang lihok sa pagpasaylo sa usa ka nakasala; paghunong sa pagkasuko kaniya tungod sa iyang sala ug dili manimalos.” (Tomo 1, panid 861)b Ang Bibliya naghatag kanato ug maayong mga katarongan sa pagpasaylo sa uban.
Nganong Magpasaylo sa Uban?
5. Unsang hinungdanong katarongan sa pagpasaylo sa uban ang gipakita sa Efeso 5:1?
5 Ang usa ka hinungdanong katarongan sa pagpasaylo sa uban gipakita diha sa Efeso 5:1: “Busa, pagkahimong mga tigsundog sa Diyos, ingon nga hinigugmang mga anak.” Sa unsang bahin nga kita ‘mahimong mga tigsundog sa Diyos’? Ang pulong “busa” nagsumpay sa ekspresyon sa nag-una pang bersikulo, nga nag-ingon: “Magmaluloton ngadto sa usag usa, magmabination uban ang kalumo, bukas nga magapasaylo sa usag usa maingon nga ang Diyos usab pinaagi kang Kristo bukas nga mipasaylo kaninyo.” (Efeso 4:32) Oo, kon bahin sa pagpasaylo, kita angay nga mahimong mga tigsundog sa Diyos. Sama sa usa ka batang lalaki nga naningkamot nga mahisama sa iyang amahan, kita, ingong mga anak nga gihigugma pag-ayo ni Jehova, buot nga mahimong sama sa atong mapinasayloong langitnong Amahan. Pagkadako seguro sa kahimuot sa kasingkasing ni Jehova nga magtan-aw gikan sa langit ug makakita sa iyang yutan-ong mga anak nga naningkamot nga mahisama kaniya pinaagi sa pagpasaylo sa usag usa!—Lucas 6:35, 36; itandi ang Mateo 5:44-48.
6. Sa unsang paagi adunay dakong kalainan tali sa pagpasaylo ni Jehova ug sa atong pagpasaylo?
6 Tinuod, kita dili gayod makapasaylo sa hingpit nga diwa sama sa pagpasaylo ni Jehova. Apan labi na kaayong dakong katarongan kana kon nganong angay nga kita magpinasayloay sa usag usa. Palandonga: Adunay dakong kalainan tali sa pagpasaylo ni Jehova ug sa atong pagpasaylo. (Isaias 55:7-9) Sa dihang atong pasayloon kadtong nakasala kanato, kini sagad uban sa kaamgohan nga sa madugay o sa madali basin atong gikinahanglan nga mobalos sila pinaagi sa pagpasaylo kanato. Kon bahin sa mga tawo, kini may kalabotan kanunay sa mga makasasala nga nagapasaylo sa mga makasasala. Apan, bahin kang Jehova, siya wala magkinahanglan ug pasaylo. Kita iyang pasayloon, apan kita dili kinahanglang mopasaylo kaniya. Kon si Jehova, kinsa dili makasala, sa mahigugmaon ug sa bug-os makapasaylo kanato, dili ba kita nga makasasalang mga tawo angay maningkamot sa pagpasaylo sa usag usa?—Mateo 6:12.
7. Kon kita dili mopasaylo sa uban bisag adunay katarongan sa pagpakitag kaluoy, sa unsang paagi makadaot kini sa atong relasyon kang Jehova?
7 Labawng hinungdanon, kon dili nato pasayloon ang uban bisag adunay katarongan sa pagpakitag kaluoy, kini makadaot sa atong kaugalingong relasyon sa Diyos. Si Jehova wala lamang maghangyo kanato sa pagpasaylo sa usag usa; siya nagdahom kanato nga magapasaylo. Sumala sa Kasulatan, bahin sa panukmod alang kanato nga magmapinasayloon aron nga kita pasayloon unta ni Jehova o tungod kay siya nakapasaylo kanato. (Mateo 6:14; Marcos 11:25; Efeso 4:32; 1 Juan 4:11) Nan, kon kita dili andam mopasaylo sa uban bisag adunay maayong katarongan sa pagpasaylo, makadahom ba gayod kita sa maong kapasayloan gikan kang Jehova?—Mateo 18:21-35.
8. Nganong ang pagpasaylo maoy alang sa atong kaayohan?
8 Gitudloan ni Jehova ang iyang katawhan “sa maayong dalan nga ilang angay pagalaktan.” (1 Hari 8:36) Sa dihang kita iyang gisugo sa pagpasaylo sa usag usa, kita makasalig nga ang atong kaayohan ang anaa sa iyang kasingkasing. Adunay maayong katarongan nga gisultihan kita sa Bibliya sa ‘paghatag ug dapit sa kapungot.’ (Roma 12:19) Ang kasuko maoy usa ka mabug-at nga palas-anong pagapas-anon sa kinabuhi. Kon kita maghambin niana, kini maoy maglabi sa atong hunahuna, nga makakuha sa atong kalinaw, ug makawala sa atong kalipay. Ang dugay nga kasuko, sama sa kasina, adunay makadaot nga epekto sa atong pisikal nga panglawas. (Proverbio 14:30) Ug latas niining tanan, ang nakasala tingali wala mahibalo sa atong pagkabalisa! Ang atong mahigugmaong Maglalalang nahibalo nga kita kinahanglang dayag nga magpasaylo sa uban dili lamang alang sa ilang kaayohan kondili usab sa atong kaugalingong kaayohan. Ang tambag sa Bibliya bahin sa pagpasaylo, sa pagkamatuod, mao ‘ang maayong dalan nga pagalaktan.’
“Padayon nga Mag-inantosay sa Usag Usa”
9, 10. (a) Unsang matang sa mga kahimtang nga dili na kinahanglan ang pormal nga pagpangayog pasaylo? (b) Unsay gisugyot sa ekspresyong “padayon nga mag-inantosay sa usag usa”?
9 Ang mga samad sa lawas tingali nagkalainlain gikan sa gagmayng mga samad ngadto sa laglom nga mga samad, ug wala magkinahanglag samang sukod sa pagtambal. Sama usab niini ang nasamdang mga pagbati—ang ubang mga samad mas lalom kay sa uban. Kinahanglan ba gayod natong himoong isyu ang matag gagmayng mga pangos nga atong antoson sa atong mga relasyon sa uban? Ang gagmayng mga kalagot, pagkasilo, ug mga pagkapikal maoy bahin sa kinabuhi ug wala magkinahanglag pormal nga pagpangayog pasaylo. Kon kita nailhan ingong tiglikay sa uban sa matag walay hinungdang kahiubos sa buut ug dayon moinsistir nga mangayo sila ug pasaylo ayha pa nato sila tagdon pag-usab sa tarong nga paagi, basin atong maaghat sila nga magkinto uban kanato—o kaha magpalayo!
10 Hinunoa, mas maayo pang “makabaton ug dungog nga makataronganon.” (Filipos 4:5, Phillips) Ingong dili-hingpit nga mga linalang nga nagkaubang nag-alagad, makataronganon kitang makadahom nga sa matag karon ug unya kita mapikal sa atong mga igsoon, ug tingali sila mapikal usab kanato. Ang Colosas 3:13 nagtambag kanato: “Padayon nga mag-inantosay sa usag usa.” Kanang ekspresyona nagsugyot sa pagkahimong pasensiyoso sa uban, ipalabay na lang ang butang nga wala nato maangayi kanila o ang mga kinaiya nga makalagot kanato. Ang pagpasensiya ug pagpailob makatabang kanato sa pagsagubang sa gagmayng mga kasaypanan nga atong maagoman sa atong mga pagpakiglabot sa uban—nga dili madaot ang kalinaw sa kongregasyon.—1 Corinto 16:14.
Kon Laglom ang mga Samad
11. Kon ang uban makasala kanato, unsay makatabang kanato sa pagpasaylo kanila?
11 Apan, komosta kon ang uban makasala kanato, nga nakapahinabog dayag nga samad? Kon ang sala dili kaayo mabug-at, tingali dili kaayo kita malisdan sa pagpadapat sa tambag sa Bibliya nga ‘bukas nga magpinasayloay sa usag usa.’ (Efeso 4:32) Ang pagkaandam sa pagpasaylo nahiuyon sa dinasig nga mga pulong ni Pedro: “Labaw sa tanang butang, paghupot ug mainit nga gugma alang sa usag usa, kay ang gugma nagatabon ug daghang kasal-anan.” (1 Pedro 4:8) Ang pagsilsil diha sa hunahuna kanunay nga kita usab mga makasasala magpaarang kanato sa pagkonsiderar sa mga kalapasan sa uban. Mao nga kon kita magpasaylo, kalimtan na nato ang kasuko imbes hambinon kini. Tungod niini, ang atong relasyon sa nakasala dili moagi ug bisan unsang dayon nga kadaot, ug kita usab nakatabang sa pagpatunhay sa bililhong kalinaw sa kongregasyon. (Roma 14:19) Sa kadugayan, ang panumdoman sa iyang gihimo tingali mawala.
12. (a) Unsang lakang nga kinahanglang kita ang unang mohimo aron makapasaylo sa usa ka tawo nga nakasakit kaayo kanato? (b) Sa unsang paagi ang mga pulong sa Efeso 4:26 nagpakita nga angay natong husayon ang maong mga butang dihadiha?
12 Apan, komosta kon adunay nakasala kanato sa mas mabug-at nga paagi, nga naghatag kanato ug dulot nga samad? Pananglitan, usa ka gisaligang higala tingali nakatug-an ug personal kaayo nga butang nga imong gisulti kaniya. Ikaw nasakit gayod pag-ayo, naulaw, ug gibudhian. Misulay ka na sa pagkalimot niana, apan ang maong butang dili gayod mawala. Sa ingon niana nga kahimtang, mahimong ikaw ang kinahanglang unang mohimog lakang sa paghusay sa problema, tingali pinaagi sa pagpakigsulti sa nakasala. Maalamong himoon kini una pa modako kining butanga. Si Pablo nagtambag kanato: “Pagkapungot, apan ayaw pagpakasala [sa ato pa, sa paghambin o pagpadapat sa atong kasuko]; ayaw pasalopa ang adlaw nga kamo anaa sa suko nga kahimtang.” (Efeso 4:26) Nakahatag ug dugang kahulogan sa mga pulong ni Pablo mao ang kamatuoran nga taliwala sa mga Hudiyo, ang pagsalop sa adlaw nagtimaan sa kataposan sa usa ka adlaw ug pagsugod sa usa ka bag-ong adlaw. Busa, ang tambag mao: Husaya dihadiha ang maong butang!—Mateo 5:23, 24.
13. Kon moduol kita sa usa ka tawo nga nakasilo kanato, unsay angay natong tumong, ug unsang mga sugyot ang makatabang kanato nga makab-ot kana?
13 Unsaon nimo pagduol sa nakasala? ‘Pangitaa ang pakigdait ug pangagpasa kini,’ nag-ingon ang 1 Pedro 3:11. Nan, ang imong tuyo dili mao ang pagpadayag sa kasuko kondili ang pagpakigdait sa imong igsoon. Alang niana, labing maayong likayan ang masakit nga mga pulong ug mga pangompas sa kamot; basin makapukaw kini ug samang reaksiyon gikan sa lain nga tawo. (Proverbio 15:18; 29:11) Dugang pa, likayi ang pinasobrahang mga pulong sama sa, “Ikaw kanunay . . . !” o, “Ikaw dili gayod . . . !” Ang pinasobrahang mga sulti makapaaghat lamang kaniya sa pagdepensa sa kaugalingon. Hinunoa, ipadayag sa tono sa imong tingog ug panagway nga gusto nimong masulbad ang butang nga nakapasakit kaayo kanimo. Magmaespesipiko sa pagpatin-aw kon unsay imong gibati bahin sa nahitabo. Hatagig higayon ang laing tawo sa pagpatin-aw sa iyang mga aksiyon. Pamati sa iyang isulti. (Santiago 1:19) Unsay kaayohang mahimo niana? Ang Proverbio 19:11 nagbatbat: “Ang maayong salabotan sa usa ka tawo makapahinay sa iyang kasuko, ug maoy iyang katahom ang pagpalabay sa kalapasan.” Ang pagsabot sa mga pagbati sa laing tawo ug ang mga katarongan sa iyang mga lihok mahimong makawala sa negatibong mga hunahuna ug mga pagbati nganha kaniya. Kon atong atubangon ang kahimtang uban sa tumong nga makiglinaw ug huptan kanang maong tinamdan, dakog kalagmitan nga ang mga dili-pagsinabtanay mahusay, ang angay nga pagpangayog mga pasaylo mahimo, ug mahatag ang pagpasaylo.
14. Sa dihang pasayloon nato ang uban, sa unsang diwa nga kita angay malimot?
14 Ang pagpasaylo ba sa uban nagpasabot nga kinahanglan gayod natong kalimtan ang nahitabo? Hinumdomi ang kaugalingong panig-ingnan ni Jehova niining bahina, sumala sa gihisgotan sa nag-unang artikulo. Sa dihang ang Bibliya moingon nga malimot si Jehova sa atong mga sala, kini wala magpasabot nga siya dili na makahinumdom niini. (Isaias 43:25) Hinunoa, siya malimot sa diwa nga sa dihang makapasaylo na siya, dili niya gamiton kadtong mga salaa batok kanato sa umaabot nga panahon. (Ezequiel 33:14-16) Sa susama, ang pagpasaylo sa isigkatawo wala magpasabot nga kita dili makahinumdom sa ilang nahimo. Apan, kita malimot sa diwa nga dili nato kini gamiton batok sa nakasala o ugkaton pag-usab kini sa umaabot. Sa mahusay na ang maong butang, angay nga dili itabi kini; ni mahigugmaon nga likayan sa bug-os ang nakasala, nga pagatagdon siya nga daw siya pinalagpot. (Proverbio 17:9) Tinuod, nagkinahanglag taas nga panahon nga maulian ang atong relasyon kaniya; tingali dili na kaayo kita sama ka suod kaniya sama sa miagi. Apan gihigugma gihapon nato siya ingong atong Kristohanong igsoon ug maningkamot pag-ayo sa pagmentinar ug malinawong relasyon.—Itandi ang Lucas 17:3.
Kon Daw Imposible ang Pagpasaylo
15, 16. (a) Ang mga Kristohanon obligado bang mangayog pasaylo sa usa ka mamumuhat ug daotan nga wala maghinulsol? (b) Sa unsang paagi atong ikapadapat ang tambag sa Bibliya nga makita diha sa Salmo 37:8?
15 Apan, komosta kon ang uban nakasala kanato sa paagi nga nakahatag ug laglom kaayong mga samad, ug bisan pa niana walay giadmitir nga sala, walay paghinulsol, ug walay pagpangayog pasaylo sa bahin sa nakasala? (Proverbio 28:13) Ang Kasulatan tin-awng nagpakita nga dili mopasaylo si Jehova sa dili-mahinulsolon, anad na nga mga makasasala. (Hebreohanon 6:4-6; 10:26, 27) Kita komosta? Ang Insight on the Scriptures nag-ingon: “Ang mga Kristohanon dili obligado sa pagpasaylo sa mga tawong nagabatasan sa makidaoton, tinuyo nga sala nga walay paghinulsol. Sila nangahimong mga kaaway sa Diyos.” (Tomo 1, panid 862) Walay Kristohanon nga nahimong biktima sa grabeng dili-makataronganon, dulumtanan, o mapintas nga pagtratar ang angay mobati nga napugos sa pagpasaylo sa usa ka mamumuhat ug daotan nga dili maghinulsol.—Salmo 139:21, 22.
16 Hisabtan, kadtong nangahimong mga biktima sa mabangis nga pagtagad tingali mobatig kasakit ug kasuko. Apan, hinumdomi nga ang paghambin sa kasuko ug kapikal makadaot kaayo kanato. Ang pagpaabot nga angkonon ang sala o ang pagpangayog pasaylo nga dili gayod moabot, makapasamot lang sa atong kasuko. Ang paghunahuna kanunay sa inhustisya magpabilin sa kasuko nga magbukal sa sulod kanato, nga may makadaot nga mga epekto sa atong espirituwal, emosyonal, ug pisikal nga panglawas. Sa ingon, atong gitugotan ang usa nga nakapasakit kanato sa pagpadayon sa pagsakit kanato. Sa maalamon, ang Bibliya nagtambag: “Pasagdi ang kasuko ug biyai ang kaligutgot.” (Salmo 37:8) Busa, ang ubang mga Kristohanon nakakaplag nga sa kadugayan sila nakahimog desisyon sa pagpasaylo sa diwa sa paghunong sa paghambin sa kasuko—wala ipakasayon ang nahitabo kanila, apan wala magpadala nga mahupngan sa kasuko. Gitugyan sa bug-os ang maong butang diha sa mga kamot sa Diyos sa hustisya, ilang nabati ang dakong kahupayan ug nakahimo sa pagpadayon sa ilang mga kinabuhi.—Salmo 37:28.
17. Unsang makapahupay nga pasalig ang gisaad ni Jehova diha sa Pinadayag 21:4?
17 Kon lalom kaayo ang samad, kita tingali dili molampos sa bug-os sa pagpanas niini gikan sa atong hunahuna, labing menos dili niining sistemaha sa mga butang. Apan si Jehova nagsaad ug usa ka bag-ong kalibotan diin “iyang pahiran ang matag luha sa ilang mga mata, ug wala na unyay kamatayon, ni pagbangotan ni pagtiyabaw ni may kasakit pa. Ang kanhing mga butang mitaliwan na.” (Pinadayag 21:4) Kon unsa may atong mahinumdoman unya nianang panahona dili na makahatag kanatog kasakit nga tingali karon nagpabug-at sa atong mga kasingkasing.—Isaias 65:17, 18.
18. (a) Nganong gikinahanglan gayod nga magmapinasayloon sa atong mga pagpakiglabot sa atong mga igsoong lalaki ug babaye? (b) Kon ang uban makasala kanato, sa unsang diwa nga kita mopasaylo ug malimot? (c) Sa unsang paagi makabenepisyo kini kanato?
18 Kasamtangan, kita kinahanglang magkausa nga magkinabuhi ug magtrabaho ingong mga igsoong lalaki ug babayeng dili-hingpit, makasasalang mga tawo. Kitang tanan makahimog mga sayop. Matag karon ug unya, kita makasilo sa usag usa ug bisan makapasakit sa usag usa. Nahibalo pag-ayo si Jesus nga gikinahanglan gayod natong pasayloon ang uban, “dili, Kutob sa pito ka higayon, apan, Kutob sa kapitoag-pito ka higayon”! (Mateo 18:22) Tinuod, kita dili gayod makapasaylo nga sama ka bug-os kang Jehova. Apan, sa kadaghanang kahimtang kon ang atong mga igsoon makasala kanato, kita makapasaylo sa diwa sa pagbuntog sa kasuko ug kita malimot sa diwa sa dili paggamit sa maong butang batok kanila sa walay kataposan sa umaabot. Mao nga sa dihang kita mopasaylo ug malimot, kita nagtabang sa pagpatunhay dili lamang sa kalinaw sa kongregasyon kondili usab sa atong kaugalingong kalinaw sa hunahuna ug kasingkasing. Labaw sa tanan, matagamtam nato ang kalinaw nga ikatagana lamang sa atong mahigugmaong Diyos, si Jehova.—Filipos 4:7.
[Mga footnote]
a Sumala sa Babilonyanhong Talmud, ang usa ka tradisyon sa mga rabbi nag-ingon: “Kon ang usa ka tawo makasala, sa una, ikaduha ug ikatulong higayon siya pasayloon, sa ikaupat nga higayon siya dili pasayloon.” (Yoma 86b) Sa usa ka bahin kini gibase sa sayop nga pagsabot sa mga teksto sama sa Amos 1:3; 2:6; ug Job 33:29.
b Gipatik sa Watchtower Bible and Tract Society of New York, Inc.
Mga Pangutana Agig Pagsubli
◻ Nganong kita angayng andam sa pagpasaylo sa uban?
◻ Unsang matang sa mga kahimtang nga kita kinahanglang “mag-inantosay sa usag usa”?
◻ Kon kita nasakit pag-ayo sa mga sala sa uban, unsay atong mahimo aron mahusay ang maong butang nga malinawon?
◻ Sa dihang pasayloon nato ang uban, sa unsang diwa nga kita angayng malimot?
[Hulagway sa panid 16]
Kon kita maghambin ug kasuko, ang nakasala tingali wala mahibalo sa atong gibating pagkabalisa
[Hulagway sa panid 17]
Kon moduol ka sa uban aron makiglinaw, ang dili-pagsinabtanay tingali mahusay ra dayon