Sayop ba ang Tanang Pagreklamo?

Unsang mga pagsamoksamok ang labing makapasakit kay niadtong dili nato ikareklamo?​—Markes De Custine, 1790-1857.

SULOD sa duha ka tuig iyang giantos ang seksuwal nga panghasi sa usa ka isigkaempleyado. Ang iyang mga pagprotesta misangpot sa binaba nga pag-abuso ug tinuyong dili pagtagad. Ang giluom nga daotang pagbati nag-apektar sa iyang panglawas, apan unsa may iyang arang mahimo? Sa kaamgid, usa ka estudyante nga hawod sa iyang klase gipalagpot tungod kay ang iyang tanlag dili motugot nga siya makigbahin sa pagbansaybansay sa karate nga gikinahanglan sa eskuylahan. Managsama silang mibati nga gihimoag daotan, apan angay kaha silang moreklamo? Kon himoon nila kini, makadahom kaha silag kahupayan o makapagrabe lamang kini sa mga kahimtang?

Ang mga reklamo nga sama niini ug uban pa maoy sagad karon, tungod kay nagkinabuhi kita taliwala sa dili hingpit nga mga tawo diha sa usa ka dili-hingpit nga kalibotan. Ang pagreklamo naglakip sa tanang matang gikan sa pagpahayag ug pasibo nga kasuko, kaguol, kasakit, o kayugot bahin sa usa ka kahimtang ngadto sa usa ka pormal nga sumbong batok sa usa ka indibiduwal. Ang kadaghanang tawo mopili sa paglikay sa pagreklamo ug komprontasyon; apan, kinahanglan bang ang usa kanunay na lang nga maghilom? Unsa ang tinamdan sa Bibliya?

Daotang mga Epekto Diha sa Kaugalingon ug sa Uban

Walay duhaduha nga makadaot ang usa ka reklamador nga espiritu, ug gisaway kini sa Bibliya. Ang usa ka reklamador magpahinabog pisikal ug espirituwal nga kadaot sa iyang kaugalingon ug kalagot niadtong hingtungdan sa iyang mga pagreklamo. Sa paghisgot sa usa ka reklamador nga asawa, ang panultihon sa Bibliya nagkanayon: “Ang nagatulo nga atop nga mag-abog sa usa sa adlaw sa ting-ulan ug ang usa ka makig-awayon nga asawa managsama.” (Proverbio 27:15) Ang pagreklamo nga gipunting batok kang Jehova o sa usa sa iyang mga tagana maoy ilabinang salawayon. Sa dihang ang nasod sa Israel mireklamo maylabot sa milagrosong mana nga gitagana sulod sa ilang 40-ka-tuig nga pagbaklay sa kamingawan, nga nagtawag niini nga “makaluod nga tinapay,” si Jehova nagpadalag malalang mga bitin aron silotan ang di-matinahurong mga reklamador, ug daghan ang namatay.​—Numeros 21:​5, 6.

Dugang pa, si Jesus nagtambag sa iyang mga sumusunod, nga dili magreklamo maylabot “sa uhot” sa kasaypanan nga makita diha sa atong mga isigkatawo, kondili magmaalinggat pag-ayo sa mas dako nga “salagunting” sa mga kakulangan nga duna nato mismo. (Mateo 7:​1-5) Sa susama nga diwa, si Pablo nagsaway sa pagpanghukom (usa ka matang sa pagreklamo) sa uban ingong “walay-ikapangatarongan . . . sanglit ikaw nga nagahukom nagabuhat man sa samang mga butang.” Kini nga mga pasidaan batok sa pagreklamo angayng magtukmod kanato nga likayan ang wala-kinahanglanang pagkahinawayon ug pag-ugmad sa reklamador nga espiritu.​—Roma 2:1.

Gisaway ba ang Tanang Pagreklamo?

Nan, angay ba kitang mohinapos nga ang tanang matang sa pagreklamo ilhong sayop? Dili, kita dili angayng mohinapos. Ang Bibliya nagpakita nga dunay daghang inhustisya sa depektosong kalibotan nga atong gipuy-an nga kinahanglang tul-iron. Diha sa usa ka ilustrasyon, si Jesus naghisgot sa usa ka di-matarong nga maghuhukom nga nagbagulbol nga mihatag ug hustisya ngadto sa usa ka dinaogdaog nga balo aron dili na siya “magsige ug anhi ug magamakmak [kaniya] ngadto sa pagkatibawas.” (Lucas 18:​1-8) Sa pila ka bahin kita usab mahimong nagkinahanglang mopadayon sa atong mga pagreklamo hangtod matul-id ang mga sayop.

Pinaagi sa pagdasig kanato nga iampo ang Gingharian sa Diyos nga moabot, dili ba giawhag kita ni Jesus nga ilhon ang mga kakulangan niining presenteng kalibotan ug ‘magtuaw’ ngadto sa Diyos alang sa usa ka solusyon? (Mateo 6:10) Sa dihang “ang pagtuaw” maylabot sa pagkadaotan sa karaang Sodoma ug Gomora nakaabot sa iyang igdulungog, gipadala ni Jehova ang iyang mga mensahero aron “tan-awon kung nahuman ba gayod nila ang ilang buluhaton sumala sa pagtuaw bahin niini” ug sa pagpahinabo sa usa ka solusyon. (Genesis 18:​20, 21) Alang sa kahupayan niadtong nagreklamo kaniya, gitul-id dayon ni Jehova ang kahimtang pinaagi sa paglaglag sa duha ka siyudad ug sa ilang imoral nga mga pumoluyo.

Ang Kristohanong Kongregasyon

Angay bang malahi ang kahimtang taliwala sa mga igsoon sa sulod sa Kristohanong kongregasyon? Bisan pag dili hingpit nga mga lalaki ug mga babaye, ang mga Kristohanon seryosong naningkamot nga mag-alagad sa Diyos sa pakigdait ug paghiusa. Ugaling, motungha ang mga kahimtang taliwala nila nga maoy hinungdan sa pipila ka pagreklamo ug kana nanginahanglan ug solusyon. Sa unang siglo, ang usa ka kahimtang mitungha sa kongregasyon sa mga dinihogan wala madugay pagkahuman sa Pentekostes. Daghang bag-ong nakombertir nga mga Kristohanon ang nagpabilin sa Jerusalem alang sa dugang nga instruksiyon ug pagdasig. Dihay pag-ambitay sa nabatonang mga abiyo sa pagkaon. Hinunoa, “may nahitabong pagbagulbol sa kabahin sa mga Gregog-sinultihang mga Judiyo batok sa nagasultig-Hebreohanon nga mga Judiyo, tungod kay ang ilang mga babayeng balo nataligam-an man sa adlaw-adlaw nga pagpang-apod-apod.” Inay nga sawayon kining mga tigreklamo ingong mga samokan, ang mga apostoles milihok sa pagtul-id sa kahimtang. Oo, ang makataronganong mga reklamo nga gihimo nga may takos nga pagtahod ug sa nahiangayng espiritu pagapaminawon nga mapainubsanon ug pagahimoan ug aksiyon niadtong nagdumala sa kongregasyon.​—Buhat 6:​1-6; 1 Pedro 5:3.

Ngadto sa Nahiangayng Awtoridad

Imo bang namatikdan gikan sa mga pananglitan sa ibabaw nga ang mga pagreklamo angayng himoon diha sa nahiangayng espiritu ug ngadto sa nahiangayng awtoridad? Pananglitan, mahimong walay pulos nga moreklamo ngadto sa polis labot sa bug-at nga luwan sa buhis o ngadto sa usa ka huwes labot sa pisikal nga mga sakit sa usa. Busa, usab, dili nahiangay nga moreklamo labot sa pipila ka kahimtang sa sulod man o sa gawas sa kongregasyon ngadto sa usa ka tawo nga walay awtoridad o katakos sa pagtabang.

Sa kadaghanang nasod karon, dunay mga korte ug ubang nahiangayng mga awtoridad nga mahimong mapangayoan ug tabang sa paglaom nga makabaton ug usa ka sukod sa kahupayan. Sa dihang ang estudyante nga gihisgotan sa sinugdanan sa artikulo midala sa iyang reklamo ngadto sa korte, ang mga huwes mihusgar nga pabor niya, ug gipasig-uli siya nga nangayog pasaylo ang eskuylahan. Sa kaamgid, ang empleyada nga seksuwal nga gihasi nakabaton ug kahupayan pinaagi sa unyon sa mga babayeng obrero. Nangayog pasaylo ang hunta sa edukasyon kaniya. Ang iyang mga amo mihimog mga lakang aron masumpo ang seksuwal nga panghasi.

Dili angayng dahomon, hinunoa, nga ang tanang reklamo dunay susamang sangpotanan. Ang maalamong Haring Solomon realistikong mipahayag: “Kadtong baliko dili na matul-id.” (Ecclesiastes 1:15) Mas maayo kon atong ilhon nga ang pipila ka butang yanong maghulat na lamang nga tul-iron sa Diyos sa iyang kaugalingong tinudlong panahon.

[Hulagway sa panid 31]

Ang mga ansiyano maminaw ug molihok pinasikad sa makataronganong mga reklamo