Pasko—Sekular nga Selebrasyon o Relihiyosong Sagradong Adlaw?
SA Tsina siya gitawag nga Karaang Tawo sa Pasko. Sa United Kingdom, siya nailhang Papa Pasko. Gigamit sa mga tawo sa Rusya ang ngalang Lolo Niyebe, ug sa Tinipong Bansa, siya gibansagang Santa Klaus.
Gilantaw sa kadaghanan kining mangayaong tawong tigulang nga magarbohon sa pagkadakog tiyan ug puti kaayong bungot ingong larawan gayod sa Pasko. Apan nahibalo ang kadaghanan nga si Santa Klaus maoy minugnang sugilanon lamang, usa ka uloestorya nga gipasukad sa mga tradisyon nga nalangkit sa ikaupat ka siglong obispo sa Myra (sa modernong-adlawng Turkey).
Ang mga kostumbre ug mga tradisyon adunay dako kaayong impluwensiya sa mga selebrasyon, ug ang Pasko walay kalainan. Ang minugnang sugilanon bahin kang Santa maoy usa lamang ka pananglitan sa uloestorya nga gilangkit sa usa ka popular nga selebrasyon. Samtang ang ubang mga tawo nangangkon nga ang mga kostumbre sa Pasko gipasukad sa mga hitabo nga natala sa Bibliya, sa pagkamatuod ang kadaghanan niining mga kostumbreha adunay paganong mga tinubdan.
Ang dugang nga pananglitan mao ang Christmas tree. Ang The New Encyclopædia Britannica nag-ingon: “Ang pagsimba sa kahoy, nga komon sa paganong mga taga-Uropa, nagpadayon human sila nakabig sa Kristiyanidad sa mga kostumbre sa Scandinavia sa pag-adorno sa balay ug kamalig ug mga kahoyng pino sa Bag-ong Tuig aron sa pag-abog sa demonyo ug sa pagbutang ug kahoy alang sa mga langgam panahon sa Pasko.”
Ang paghimog mga korona nga hinimo sa tanom nga holly o ubang mga kahoyng pino maoy laing popular nga tradisyon sa Pasko. Kini usab dulot nga nakagamot sa paganong pagsimba. Gigamit sa karaang mga Romano ang mga sanga sa holly sa pag-adorno sa mga templo panahon sa Saturnalia, usa ka pito-ka-adlawng selebrasyon sa tungatunga sa tingtugnaw nga gipahinungod kang Saturn, ang diyos sa agrikultura. Kining paganong selebrasyon ilado sa walay kutokuto nga hudyaka-bahakhak ug pagpatuyang.
Ang kostumbre sa Pasko sa paghalok ilalom sa sanga sa mistletoe (gilarawan dinhi) daw romantiko alang sa uban, apan salin pa kini sa Edad Medya. Ang mga Druid sa karaang Britanya nagtuo nga ang mistletoe adunay madyikanhong mga gahom; busa, kini gigamit ingong panagang batok sa mga demonyo, mga paglamat, ug ubang matang sa daotan. Sa ulahi, ang patuotuo mitungha nga ang paghalok ilalom sa mistletoe moresultag kaminyoon. Kining praktisa popular gihapon sa ubang mga tawo panahon sa Pasko.
Kini maoy pipila lamang sa modernong mga tradisyon sa Pasko nga naimpluwensiyahan o nagagikan mismo sa paganong mga doktrina. Apan, tingali, nahibulong ka kon sa unsang paagi kining tanan nanungha. Sa unsang paagi ang usa ka selebrasyon nga nag-angkong nagpasidungog sa pagkatawo ni Kristo nalangkit pag-ayo sa dili-Kristohanong mga kostumbre? Labawng hinungdanon, unsay paglantaw sa Diyos sa maong butang?