Usa ka Malipayong Okasyon ang Graduwasyon sa Ika-104 nga Klase sa Gilead

“MALIPAYON kining adlawa, ug kitang tanan nanagmaya.” Niadtong mga pulonga nga si Carey Barber, membro sa Nagamandong Lawas sa mga Saksi ni Jehova, nagbukas sa malipayong programa sa graduwasyon sa ika-104 nga klase sa Watchtower Bible School of Gilead sa Marso 14, 1998. Ang mitambong nga 4,945 gidapit nga sugdan ang okasyon pinaagi sa pag-awit sa awit sa Gingharian numero 208, nga nag-ulohang “Awit sa Kasadya.”

Praktikal nga Tambag Aron Magpabiling Malipayon

Ang pang-abling bahin sa programa, usa ka serye sa lima ka mugbo pinasukad sa Bibliyang mga diskurso, nagtaganag pipila ka praktikal nga tambag kon sa unsang paagi mamentinar ang malipayong espiritu nga maoy naghari sa adlaw sa graduwasyon.

Ang unang pakigpulong gihatag ni Joseph Eames sa Departamento sa Pagsulat. Iyang gisaysay ang temang “Sundoga ang Espiritu sa mga Maunongon,” pinasukad sa asoy sa Bibliya sa 2 Samuel mga kapitulo 15 ug 17, diin si Absalom, anak nga lalaki ni David, nakigkunsabo sa pagsakmit sa hatag-Diyos nga gingharian sa iyang amahan pinaagi sa pagdasig ug pag-alsa. Apan, dihay nagpabiling maunongon sa dinihogan ni Jehova, si Haring David. Unsay leksiyon nga makat-onan sa bag-ong mga misyonaryo gikan niini? “Bisan asa kamo moadto sa inyong misyonaryong asaynment, maunongong ipasiugda ang espiritu sa pagkamatinabangon ug pagtahod sa teokratikanhong awtoridad. Tabangi ang uban sa pagbuhat sa ingon,” mihinapos si Igsoong Eames.

Misunod sa programa mao si David Sinclair, nga nagtagik ug napulo ka kinahanglanon, nga gihisgotan sa Salmo 15, ingong mga dinapit sa ‘tolda ni Jehova.’ Ang iyang pakigpulong, nga nag-ulohang “Padayon Ingong mga Dinapit sa Inyong Misyonaryong Tolda,” nagdasig sa mograduwar nga mga estudyante sa pagpadapat niining salmoha didto sa ilang misyonaryong mga asaynment, diin sila mahimong mga dinapit. Gipasiugda ni Igsoong Sinclair ang kabililhon sa pagkinabuhi sumala sa diyosnong mga sukdanan sa tanang panahon. Ang resulta? Ang Salmo 15:​5 nag-ingon: “Siya nga nagabuhat niining mga butanga dili gayod matarog.”

Si John Barr, membro sa Nagamandong Lawas, misunod ug nagbutad sa pagtagad sa makapalagsik nga epekto nga anaa sa pag-awit diha sa Kristohanong mga tigom. Apan unsa ang labing malipayong awit nga ginaawit sa tibuok yuta karong adlawa? Kini mao ang maayong balita sa Mesiyanikong Gingharian sa Diyos. Unsay resulta niining tanang pag-awit, o pagsangyaw bahin sa Gingharian? Ang ikaduhang estansa sa awit numero 208 lakbit nga nag-ingon: “Atong walihan sa Gingharian, dapiton ang daghang katawhan. Awitan nila Diyos nga Jehova. Sa tanang dapit magmantala!” Oo, matag adlaw mga 1,000 ka bag-ong mga tinun-an ang nabawtismohan. Si Igsoong Barr mihinapos: “Dili ba kahibulongang hunahunaon, mga igsoon, nga kamo ipadala ngadto sa mga teritoryo aron himamaton ang matang sa mga tawo nga naghulat lamang aron maminaw sa inyong awit sa pagdayeg?”

“Paminaw sa mga Tingog sa Kasinatian” mao ang ulohan sa diskurso nga sunod nga gihatag ni James Mantz sa Departamento sa Pagsulat. Iyang gipasiugda nga ang ubang mga butang makat-onan lamang pinaagi sa personal nga kasinatian. (Hebreohanon 5:8) Bisan pa niana, ang Proverbio 22:​17 nagdasig kanato sa ‘pagkiling sa atong igdulungog ug pagpaminaw sa mga pulong sa mga manggialamon,’ o kanila nga may kasinatian. Ang mograduwar nga mga estudyante makakat-on ug dako gikan niadtong nauna kanila. “Nasayod sila kon unsaon paghangyo sa lokal nga mga mamaligyaay. Nasayod sila kon haing dapita sa siyudad ang likayan tungod sa pisikal o moral nga mga kapeligrohan. Nasayod sila kon unsay daling makapahiubos sa lokal nga mga tawo. Ang dugay nang mga misyonaryo nasayod kon unsay inyong gikinahanglan aron magmalipayon ug magmalamposon sa inyong asaynment,” miingon si Igsoong Mantz.

Naghisgot sa temang “Pabilhi ang Inyong Teokratikanhong Asaynment,” si Wallace Liverance, tigrehistro sa Tunghaang Gilead, misaysay nga samtang ang ubang misyonaryo, sama kang apostol Pablo, Timoteo, ug Bernabe, nakadawat sa ilang mga asaynment gikan sa Diyos pinaagi sa balaang espiritu o usa ka milagrosong pagpadayag, ang nabansay sa Gilead nga mga misyonaryo gihatagag dapit diha sa tibuok-kalibotang natad pinaagi sa “kasaligan ug mabuot nga ulipon.” (Mateo 24:​45-​47) Iyang gitandi ang mga asaynment sa mga misyonaryo sa mga dapit nga gitudlo ni Gideon sa iyang mga sundalo nga makiggubat sa mga Midianhon. (Maghuhukom 7:​16-21) “Pabilhi ang inyong teokratikanhon misyonaryong asaynment. Sama nga ang mga sundalo ni Gideon ‘padayong nagtindog ang matag usa diha sa iyang dapit,’ isipa ang inyong asaynment nga inyong dapit. Tuohi nga si Jehova makagamit kaninyo sama nga iyang gigamit ang tulo ka gatos ni Gideon,” miawhag si Igsoong Liverance.

Ang Pagbaton ug Interes sa mga Tawo Motultol sa Kalipay

Ang Bantayanang Torre makausa mikomento: “Inay nga patuboon ang atong intereses ug mga kinabuhi palibot sa mga butang ug kasangkapan ning presenteng kahikayan, mga butang nga walay katinoan nga magpadayon, pagkalabi pang maayo ug maalamon ang paghimo sa katawhan nga atong tinuod nga interes ug magtuon sa pagkaplag ug tiunayng kalipay sa pagbuhat sa mga butang para sa uban.” Uyon niana, si Igsoong Mark Noumair, usa sa mga instruktor sa Tunghaang Gilead, naghisgot kauban sa usa ka grupo sa mga estudyante sa ilang mga kasinatian sa pag-alagad sa kanataran ug mikomento: “Ang pagpakitag personal nga interes sa uban maoy maghimo kaninyo nga maayong mga misyonaryo.”

Mga Yawi sa Kalipay Diha sa Langyawng Kanataran

Unsa ang pipila ka yawi sa kalamposan ug kalipay sa misyonaryong buluhaton? Ang mga igsoong Charles Woody sa Departamento sa Pag-alagad ug Harold Jackson, kanhi misyonaryo sa Latin Amerika ug katabang sa Komite sa Pagtudlo, miinterbiyo sa mga membro sa lainlaing mga Komite sa Sanga nga mieskuyla sa ikasiyam nga klase sa tunghaan alang sa kawani sa sanga. Aniay pananglitan sa tambag nga ilang gihatag:

Si Albert Musonda gikan sa Zambia miingon: “Kon ang mga misyonaryo mouna pagduol ug pagtimbaya sa mga igsoon, kini magpatungha ug makapalig-ong espiritu tungod kay ang mga igsoon masuod sa misyonaryo, ug ang misyonaryo masuod kanila.”

Si Rolando Morales sa Guatemala misugyot nga kon ang bag-ong mga misyonaryo dalitan ug mainom sa mahigalaong mga tawo, sila sa kamaluloton ug kamataktikanhon makatubag: “Bag-o pa lang ako sa nasod. Gusto unta nakong imnon kana, apan ang akong lawas wala pay natural nga imyunidad nga nabatonan sa inyong lawas. Ako nanghinaot nga sa umaabot nga mga adlaw madawat ko na kana, ug malipay ako sa pagbuhat niana.” Unsay mga kaayohan sa maong malulotong tubag? “Dili masilo ang mga tawo, ug ang mga misyonaryo nagmaluloton sa uban.”

Unsay makatabang sa mga misyonaryo sa paglahutay sa ilang mga asaynment? Si Igsoong Paul Crudass, graduwado sa ika-79ng klase sa Gilead, nga nag-alagad sa Liberia sulod na sa 12 ka tuig, miobserbar: “Nasayod akong mingawon gayod ang mga ginikanan sa ilang mga anak. Apan may panahon sa dihang ang misyonaryo maningkamot nga maanad sa maong nasod, sa palibot, sa kultura, sa mga tawo. Tingali mobati siyang kaulion. Kon makadawat siyag sulat gikan sa balay nga nag-ingon, ‘Gimingaw na mi pag-ayo nimo; wala kami masayod kon unsay among buhaton nga wala ka,’ tingali mao lamang kana ang magtukmod kaniya sa pag-empake sa iyang mga bag ug mopauli. Hinungdanon kaayo alang sa mga paryente nga ania karong adlawa sa paghinumdom niana.”

Human sa mga interbiyo, ang kataposang pakigpulong sa programa gipresentar ni Theodore Jaracz, membro sa Nagamandong Lawas. Ang iyang tema: “Hupti ang Gingharian nga Panguna sa Imong Kinabuhi.” Sa unsang paagi ang mga misyonaryo magpabiling nakasentro ang pagtagad ug dili malinga gikan sa ilang buluhaton? Iyang gidasig sila sa pagbaton ug eskedyul sa personal nga pagtuon sa Bibliya, nga magtabang kanila sa paghupot sa intereses sa Gingharian nga panguna sa kinabuhi. Ug ania kining tukma-sa-panahong pahinumdom: “Ang ubang mga misyonaryo nagsalikway sa personal nga pagtuon tungod kay sila nagumon sa elektronikong kahimanan, E-mail, ug sa kompiyuter. Kinahanglang batonan nato ang maayong panabot aron magmatimbang sa paggamit sa bisan unsang himan ug dili mogahin ug hilabihan ka daghang panahon sa butang nga makabalda sa atong personal nga pagtuon sa Pulong sa Diyos.”

Sunod sa pakigpulong ni Igsoong Jaracz mao ang pagpanghatag sa mga diploma ug ang pagbasa sa sulat sa apresasyon gikan sa klase. Ang hawas sa klase mipahayag sa mga pagbati sa tanan niining paagiha: “Among nakita ang tin-awng pamatuod sa gugma nga giingon ni Jesus nga maoy magpaila sa iyang mga tinun-an, ug kini nagpasalig pag-usab kanamo nga walay sapayan kon asa kami, adunay mainiton, mahigugmaon, samag-inahang organisasyon nga nagpaluyo kanamo. Uban ang maong pagpaluyo, kami andam sa pag-adto ngadto sa mga kinatumyan sa yuta.” Usa kadto ka makapadasig nga paniklop sa usa ka malipayong adlaw sa graduwasyon alang sa ika-104 nga klase sa Gilead.

[Kahon sa panid 24]

Estadistika sa Klase

Gidaghanon sa mga nasod nga gihawasan: 9

Gidaghanon sa mga nasod nga gipadalhan: 16

Gidaghanon sa mga estudyante: 48

Gidaghanon sa mga magtiayon: 24

Aberids nga edad: 33

Aberids nga katuigan sa kamatuoran: 16

Aberids nga katuigan sa bug-os panahong ministeryo: 12

[Hulagway sa panid 25]

Ika-104 nga Migraduwar nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubangan ngadto sa likod, ug ang mga ngalan gilista gikan sa wala ngadto sa tuo sa matag laray

(1) Romero, M.; Howarth, J.; Blackburne-Kane, D.; Hohengasser, E.; West, S.; Thom, S. (2) Colon, W.; Glancy, J.; Kono, Y.; Drews, P.; Tam, S.; Kono, T. (3) Tam, D.; Zechmeister, S.; Gerdel, S.; Elwell, J.; Dunec, P.; Tibaudo, H. (4) Taylor, E.; Hildred, L.; Sanches, M.; Anderson, C.; Bucknor, T.; Hohengasser, E. (5) Howarth, D.; Ward, C.; Hinch, P.; McDonald, Y.; Sanches, T.; Thom, O. (6) Drews, T.; Tibaudo, E.; Elwell, D.; Dunec, W.; Blackburne-Kane, D.; Ward, W. (7) Anderson, M.; Zechmeister, R.; McDonald, R.; Bucknor, R.; Glancy, S.; Gerdel, G. (8) Romero, D.; Hinch, R.; Hildred, S.; Taylor, J.; Colon, A.; West, W.

[Hulagway sa panid 26]

Mga igsoong lalaki nga nakig-ambit sa pagtudlo sa ika-104 nga klase: (gikan sa wala) W. Liverance, U. Glass, K. Adams, M. Noumair