“Gihigugma sa Diyos ang Usa ka Masayahong Maghahatag”

SI Jehova mao ang larawan sa pagkamahinatagon. Sa pagkamatuod, ang Bibliya nag-ingon nga siya mao ang Maghahatag sa “matag maayong gasa ug matag hingpit nga hatag.” (Santiago 1:17) Tagda, pananglitan, ang mga butang nga gilalang sa Diyos. Gihimo niya ang pagkaon nga lamian, dili tab-ang; ang mga bulak nga mabulokon, dili luspad; ang mga pagsalop sa adlaw nga nindot kaayong tan-awon, dili pughaw. Oo, ang matag dagway sa kalalangan ni Jehova nagahatag ug pamatuod sa iyang gugma ug pagkamahinatagon. (Salmo 19:​1, 2; 139:14) Dugang pa, si Jehova usa ka masayahong Maghahatag. Gikalipay niya ang paghimog maayo alang sa iyang mga alagad.​—Salmo 84:​11; 149:4.

Ang mga Israelinhon gimandoan sa pagpabanaag sa pagkamahinatagon sa Diyos diha sa ilang mga pagpakiglabot sa usag usa. “Kinahanglang dili nimo pagpagahion ang imong kasingkasing o kumkomon ang imong mga kamot ngadto sa imong kabos nga igsoon,” gisultihan sila ni Moises. “Sa walay pagpanuko magahatag ikaw kaniya, ug ang imong kasingkasing kinahanglang dili magtinihik.” (Deuteronomio 15:​7, 10) Sanglit ang paghatag magsumikad sa kasingkasing, ang mga Israelinhon kinahanglang magkalipay sa mga buhat sa pagkamanggihatagon.

Ang mga Kristohanon gihatagan sa susamang pahimangno. Sa pagkatinuod, si Jesus nag-ingon nga dunay “kalipay sa paghatag.” (Buhat 20:35) Ang mga tinun-an ni Jesus maoy sulondan sa paghatag nga masayahon. Pananglitan, ang Bibliya nagtaho nga sa Jerusalem kadtong nahimong mga magtutuo “namaligya sa ilang mga kabtangan ug mga katigayonan ug nag-apod-apod sa halin ngadto sa tanan, sumala sa panginahanglan ni bisan kinsa.”​—Buhat 2:​44, 45.

Apan kining mahinatagong mga taga-Judea nahidangat sa ulahi sa kakabos. Wala maghisgot ang Bibliya kon unsa ba gayod ang nagpahinabo sa ilang kahimtang. Ang pipila ka eskolar nag-ingon nga ang gutom nga gitumong sa Buhat 11:​28, 29 tingalig mao ang hinungdan. Sa bisan unsa mang paagi, ang mga Kristohanon sa Judea anaa sa malisod nga kahimtang, ug buot ni Pablo nga paneguroon nga maatiman ang ilang mga panginahanglan. Sa unsang paagi niya himoon kini?

Pagpangolekta Alang sa mga Nanginahanglan

Si Pablo nangayog tabang sa mga kongregasyon nga ingon kalayo sa Macedonia, ug mihikay siya ug pagpangolekta nga himoon alang sa mga Kristohanon sa Judea nga nag-antos sa kakabos. Ngadto sa mga taga-Corinto, si Pablo misulat: “Sama nga ako mihatag ug mga sugo ngadto sa mga kongregasyon sa Galacia, nianang paagiha buhata usab ninyo. Matag unang adlaw sa semana ang matag usa kaninyo diha sa iyang kaugalingong balay pagahina ingong pagtigom sumala sa iyang pag-uswag.”a​—1 Corinto 16:​1, 2.

Tuyo ni Pablo nga kining mga pondoha mapadala gilayon ngadto sa mga igsoon sa Jerusalem, apan ang mga taga-Corinto hinayng misanong sa mga instruksiyon ni Pablo. Ngano? Wala ba silay pagbati sa kahimtang sa ilang mga igsoon sa Judea? Dili, tungod kay nasayod si Pablo nga ang mga taga-Corinto “nagadagaya sa tanang butang, sa pagtuo ug pulong ug kahibalo ug sa tanang pagkamatinuoron.” (2 Corinto 8:7) Tingali, puliki sila kaayo sa pag-atiman sa ubang hinungdanong mga butang nga gipamulong ni Pablo sa iyang unang sulat ngadto kanila. Apan karon dinalian ang kahimtang sa Jerusalem. Busa gitagad ni Pablo ang isyu diha sa iyang ikaduhang sulat ngadto sa mga taga-Corinto.

Mga Paghangyo sa Pagkamahinatagon

Una, gisultihan ni Pablo ang mga taga-Corinto labot sa mga taga-Macedonia, kansang pagsanong sa mga paningkamot sa paghatag ug hinabang maoy talagsaon. “Sa panahon sa usa ka dakong pagsulay ilalom sa kasakitan,” si Pablo misulat, “ang ilang kadagaya sa kangaya ug ang ilang hilabihang kakabos mipadagaya sa bahandi sa ilang kamahinatagon.” Ang mga taga-Macedonia dili kinahanglang itukmod. Sa kasukwahi, si Pablo nag-ingon nga “sila sa ilang kaugalingon padayong nagahangyo kanamo uban ang tumang pagpangaliyupo alang sa pribilehiyo sa malulotong pagpanghatag.” Ang masayahong pagkamahinatagon sa mga taga-Macedonia ilabinang talagsaon kon atong isipon nga sila mismo anaa sa “hilabihang kakabos.”​—2 Corinto 8:​2-4.

Sa pagdayeg sa mga taga-Macedonia, buot ba ni Pablo nga pukawon ang makig-indigong espiritu taliwala sa mga taga-Corinto? Dili gayod, tungod kay nasayod siya nga dili kini mao ang hustong paagi sa pagtukmod. (Galacia 6:4) Dugang pa, nasayod siya nga dili kinahanglang pakaulawan ang mga taga-Corinto aron mohimog hustong butang. Hinunoa, siya may pagsalig nga ang mga taga-Corinto nahigugma gayod sa ilang mga igsoon sa Judea ug nagtinguha nga makaamot sa mga paningkamot sa pagtabang. “Usa na ka tuig kanhi,” iyang gisultihan sila, “kamo misugod dili lamang sa pagbuhat kondili usab sa pagkabuot mobuhat.” (2 Corinto 8:10) Sa pagkamatuod, sa pipila ka dagway sa mga paningkamot sa pagtabang, ang mga taga-Corinto mismo maoy sulondan. “Ako nahibalo sa inyong pagkaandam sa hunahuna nga akong gipanghambog sa mga Macedonianhon bahin kaninyo,” sulti ni Pablo kanila, nga midugang: “Ang inyong kasibot nakasugnib sa kadaghanan kanila.” (2 Corinto 9:2) Apan, karon kinahanglan sa mga taga-Corinto nga buhaton ang ilang kasibot ug ang ilang pagkaandam sa hunahuna.

Busa, gisultihan sila ni Pablo: “Ipabuhat sa matag usa ang sumala sa iyang gikahukom diha sa iyang kasingkasing, dili nga kontragusto o pinugos, kay gihigugma sa Diyos ang usa ka masayahong maghahatag.” (2 Corinto 9:7) Busa, dili tumong ni Pablo ang pagpabug-at sa mga taga-Corinto, kay ang tawo dili mahimong masayahong maghahatag kon siya gipugos. Sa walay duhaduha, naghunahuna si Pablo nga anaa nang daan ang hustong motibo, nga ang matag usa nakahukom na sa paghatag. Dugang pa, si Pablo nagsulti kanila: “Kon ang pagkaandam anaa nang daan, kini ilabinang dalawaton sumala sa kon unsay ginabatonan sa usa, dili sumala sa kon unsay wala kaniya.” (2 Corinto 8:12) Oo, kon ang pagkaandam anaa​—kon ang tawo matukmod sa gugma​—ang iyang itanyag dalawaton sa Diyos, bisan morag unsa pa ka gamay sa bili.​—Itandi ang Lucas 21:​1-4.

Masayahong mga Maghahatag Karong Adlawa

Ang paningkamot sa pagtabang sa mga Kristohanon sa Judea nagtaganag labing maayong panig-ingnan sa atong panahon. Ang mga Saksi ni Jehova nagahimog tibuok-kalibotang kampanya sa pagsangyaw, nga nagdalag pagkaon sa milyonmilyon nga gigutom sa espirituwal. (Isaias 65:​13, 14) Ginabuhat nila kini ingong pagtuman sa sugo ni Jesus: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila . . . nga magatudlo kanila sa pagsunod sa tanang butang nga akong gisugo kaninyo.”​—Mateo 28:​19, 20.

Ang pagtuman niini nga sugo dili sayon nga buluhaton. Naglambigit kini sa pagmentinar sa mga puloy-anan sa mga misyonaryo ug kapin sa usa ka gatos ka mga pasilidad sa sangang buhatan palibot sa kalibotan. Naglangkit usab kinig pagtukod ug mga Kingdom Hall ug mga Assembly Hall aron ang mga magsisimba ni Jehova adunay nahiangayng mga dapit sa pagtigom ug pagdasigay sa usag usa. (Hebreohanon 10:​24, 25) Usahay, ang mga Saksi ni Jehova nagtagana usab ug hinabang sa mga dapit nga gipayhag sa kinaiyanhong katalagman.

Hunahunaa usab ang dako kaayong gasto sa pag-imprenta. Kada semana, sa aberids, kapin sa 22,000,000 ka kopya sa Ang Bantayanang Torre o mga 20,000,000 ka kopya sa Pagmata! ang ginaimprenta. Dugang pa niining regular nga suplay sa espirituwal nga pagkaon mao ang minilyon ka libro, brosyur, audiocassette, ug mga videocassette nga ginahimo kada tuig.

Sa unsang paagi kining tanang buluhaton ginasuportahan? Pinaagi sa kinabubut-ong mga donasyon. Ginahimo kini, dili alang sa publisidad o tungod sa mahakogong motibo, apan alang sa pagpalambo sa matuod nga pagsimba. Busa, ang maong paghatag nagapahalipay sa maghahatag, uban sa panalangin sa Diyos. (Malaquias 3:​10; Mateo 6:​1-4) Bisan ang mga bata taliwala sa mga Saksi ni Jehova nagpakita nga sila mahinatagon, masayahong mga maghahatag. Pananglitan, human nakadungog sa pagkapayhag nga gipahinabo sa urakan sa usa ka bahin sa Tinipong Bansa, ang kuwatro-anyos nga si Allison miamot ug $2. “Mao lamang kini ang kuwarta nga sulod sa akong alkansiya,” misulat siya. “Nasayod ko nga nawad-an ang mga bata sa tanan nilang mga dulaan ug mga libro ug mga monyeka. Tingalig magamit ninyo kining kuwartaha sa pagpalit ug usa ka libro para sa usa ka gamayng bata nga sama nakog edad.” Si Maclean, nga nag-edad ug walo, misulat nga nalipay siyang walay igsoong namatay sa bagyo. Siya midugang: “Mikita kog $17 sa pagbaligyag mga taklob sa tumoy sa ehe uban sa akong papa. Duna unta koy paliton sa akong kuwarta, apan nakahunahuna ko sa mga igsoon.”​—Tan-awa usab ang kahon sa ibabaw.

Sa pagkatinuod, nagmaya ang kasingkasing ni Jehova sa paglantaw sa batan-on ug tigulang nga nagbutang sa mga intereses sa iyang Gingharian nga una pinaagi sa ‘pagpasidungog kaniya sa ilang bililhong mga butang.’ (Proverbio 3:​9, 10) Siyempre, wala gayoy makapadato kang Jehova, tungod kay siya ang nanag-iya sa tanang butang. (1 Cronicas 29:​14-17) Apan ang pagsuportar sa buluhaton maoy usa ka pribilehiyo nga makahatag sa magsisimba ug higayon sa pagpasundayag sa iyang gugma kang Jehova. Mapasalamaton kami sa tanan kansang kasingkasing nagtukmod kaniya sa maong paagi.

[Mga footnote]

[Kahon sa panid 26, 27]

Mga Paagi sa Paghatag nga Gipili sa Pipila

Mga amot Ngadto sa Tibuok-kalibotang Buluhaton

Daghan ang mogahin, o magbadyet, ug salapi nga ilang ibutang sa mga kahon sa amot nga ginganlang: “Mga Amot Alang sa Tibuok-Kalibotang Buluhaton sa Sosyedad​—Mateo 24:14.” Kada bulan ang mga kongregasyon magpadala niining salapia ngadto kaha sa tibuok-kalibotang hedkuwarter sa Brooklyn, New York, o sa lokal nga sangang buhatan.

Ang kinabubut-ong mga donasyong salapi mahimong ipadala usab nga direkta ngadto sa Treasurer’s Office, Watch Tower Bible and Tract Society of the Philippines, P.O. Box 2044, 1060 Manila, o sa opisina sa Sosyedad nga nag-alagad sa inyong nasod. Ang alahas o ubang mahalong mga butang mahimong ikadonar usab. Ang mubong sulat nga nagpahayag nga kana maoy dihadihang gasa angayng ipataban sa maong mga amot.

Kondisyonal-donasyon nga Kahikayan

Ang salapi ikahatag ngadto sa Watch Tower Society ilalom sa linaing kahikayan diin, engkaso ang tigdonar dunay personal nga panginahanglan, ang donasyon ibalik kaniya. Alang sa dugang impormasyon, palihog pagkontak sa Treasurer’s Office sa adres nga gitala sa itaas.

Giplanong Paghatag

Dugang pa sa dihadihang mga gasang salapi ug kondisyonal nga mga donasyong salapi, adunay ubang mga paagi sa paghatag aron makabenepisyo ang buluhaton sa Gingharian sa tibuok kalibotan. Kini sila nag-apil sa:

Insyurans: Ang Watch Tower Society manganlan nga benepisyaryo sa usa ka polisa sa life insurance o sa pagretiro/pensiyon nga programa.

Mga Kuwenta sa Bangko: Mga kuwenta sa bangko, mga sertipiko sa mga deposito, o indibiduwal nga mga kuwenta sa pagretiro mahimong ikabutang nga in trust for o himoong payable on death to sa Watch Tower Society, nga nahiuyon sa mga kinahanglanon sa lokal nga bangko.

Stocks and Bonds: Ang mga stock o aksiyones ug mga bond ikadonar ngadto sa Watch Tower Society ingong dihadihang gasa o ilalom sa kahikayan diin ang kinitaan magpadayong ibayad ngadto sa tigdonar.

Balay ug Yuta: Ang ikabaligyang balay ug yuta ikadonar ngadto sa Watch Tower Society pinaagi kaha sa paghatag dihadiha o pagreserba sa tibuok kinabuhi sa balay o yuta alang sa tigdonar, kinsa mahimong magpadayon pagpuyo niana samtang buhi pa siya. Ang usa angayng magkontak sa Sosyedad sa dili pa buhatag papeles ang bisan unsang balay o yuta nga idonar sa Sosyedad.

Wills and Trusts: Ang propiedad o salapi mahimong ikabilin ngadto sa Watch Tower Society pinaagi sa usa ka legal-pagkabuhat nga testamento, o ang Sosyedad kanganlang usa ka benepisyaryo sa usa ka trust agreement. Ang trust nga mapanunod sa usa ka relihiyosong organisasyon mahimong adunay pipila ka bentaha sa buluhisan.

Ingon sa gipasabot sa terminong “giplanong paghatag,” kining mga matanga sa donasyon kasagarang nanginahanglan ug mga pagplano sa bahin sa tigdonar. Sa pag-abag sa mga indibiduwal nga nagtinguha nga makabenepisyo ang Sosyedad pinaagi sa pipila ka porma sa giplanong paghatag, ang Sosyedad nag-andam ug Iningles nga brosyur nga nag-ulohang Planned Giving to Benefit Kingdom Service Worldwide. Gisulat ang brosyur ingong pagsanong sa daghang pangutana nga nadawat sa Sosyedad bahin sa mga gasa, wills, ug trusts. Naundan usab kini ug dugang mapuslanong impormasyon sa mga pagplano bahin sa balay ug yuta, sa pinansiyal, ug sa buhis. Ug gidisenyo kini sa pagtabang sa mga indibiduwal sa Tinipong Bansa nga nagaplano sa paghimog espesyal nga gasa ngadto sa Sosyedad karon o magbilin ug sulondon sa pagkamatay sa pagpilig labing mapuslanon ug episyenteng pamaagi uban ang angayng pagtagad sa ilang pamilya ug personal nga mga kahimtang.

Human mabasa ang brosyur ug makonsulta ang Planned Giving Desk, daghan ang nakaabag sa Sosyedad ug sa samang higayon, nakapadako sa mga benepisyo sa buhis sa pagbuhat sa ingon. Ang Planned Giving Desk angayng pahibaloon ug makadawat ug kopya sa bisan unsang dokumento maylabot sa bisan asa niining mga kahikayana. Kadtong interesado sa brosyur o sa bisan asa niining mga kahikayan sa giplanong paghatag angayng makigkontak sa Planned Giving Desk, pinaagi sa sulat o sa telepono, diha sa adres nga gilista sa ubos o sa opisina sa Sosyedad nga nag-alagad sa inyong nasod.

Planned Giving Desk

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telephone: (914) 878-7000

[Kahon sa panid 28]

Ang Kabataan Masayahon Usab nga mga Maghahatag!

Gusto nakong ihatag kini kaninyo aron sa paghimog mas daghan pang basahon alang kanamo. Akong gitigom kini nga salapi gikan sa pagtabang sa akong papa. Daghan kaayong salamat sa tanan ninyong paghago.​—Pamela, siyete anyos.

Nagapadala ako kaninyog $6.85 aron makatabang sa pagtukod ug dugang nga mga Kingdom Hall. Ako kining kinitaan niining ting-init sa dihang namaligya ko sa aseras ug lemonada.​—Selena, sayis anyos.

Nagbuhi kog himungaan nga gikan niini nakabaton kog usa ka sunoy ug lain pang himungaan. Akong gipahinungod ang ulahi kang Jehova. Sa kataposan nanganak kinig tulo ka himungaan, nga akong gibaligya. Akong gipasukip ang kantidad alang sa buluhaton ni Jehova.​—Thierry, otso anyos.

Mao ra kini ang akong kuwarta! Palihog gamita kini sa maalamong paagi. Lisod kining tigomon. Aniay $21.​—Sarah, diyes anyos.

Midaog kog unang ganti sa usa ka asaynment sa eskuylahan, busa kinahanglan kong moapil sa lungsodnong kompetisyon. Midaog gihapon akog unang ganti didto ug ikaduhang ganti sa panghinapos nga kompetisyon sa distrito. Niining tanan, kuwarta ang akong premyo. Gusto nakong ipaambit sa Sosyedad ang uban nianang kuwartaha. Akong gibati nga nakadaog ako niining mga gantiha tungod sa pagbansay nga akong nadawat sa Tunghaan sa Teokratikanhong Ministeryo. Masaligon ako nga mihatag sa akong taho atubangan sa mga hurado.​—Amber, siksto grado.

Gusto nakong hatagan kamo niini para kang Jehova. Pangutan-a siya kon unsay himoon niini. Tanan nahibaloan niya.​—Karen, sayis anyos.

[Mga hulagway sa panid 25]

Ang buluhaton sa mga Saksi ni Jehova gisuportahan sa kinabubut-ong mga donasyon