Usa ka Basahon sa Kaalam nga Adunay Mensahe Alang Karong Panahona

“ANG bag nga puno sa kaalam labaw pag bili kay sa usa ka bag nga puno sa perlas,” nag-ingon ang karaang patriarkang si Job, nga walay duhaduha usa sa kinadatoang mga tawo sa iyang panahon. (Job 1:3; 28:18; 42:12) Sa pagkamatuod, ang kaalam labaw kaayog bili kay sa materyal nga mga kabtangan kon maylabot sa pagtabang sa usa ka tawo sa pagpalampos sa iyang kinabuhi. “Ang kaalam maoy usa ka panalipod maingon nga ang salapi usa ka panalipod,” nag-ingon ang maalamong Haring Solomon, “apan ang bentaha sa kahibalo mao nga ang kaalam mismo magtipig nga buhi sa mga tag-iya niini.”​—Ecclesiastes 7:12.

Apan diin makaplagan ang maong kaalam karong panahona? Ang mga tawo modangop sa mga mananambag nga kolumnista, mga sikologo, mga sikyatrista, bisag mga tiggalam sa buhok ug mga drayber sa taksi, alang sa ilang personal nga mga suliran. Ug daghan kaayong eksperto ang andam sa paghatag ug tambag sa halos bisan unsang ulohan​—sa nahiangayng bayad. Apan, sagad nga ang maong mga pulong sa “kaalam” mitultol lamang sa pagkahigawad, katalagman pa gani. Nan, sa unsang paagi kita makakaplag sa matuod nga kaalam?

Si Jesu-Kristo, nga adunay dakong pagsabot sa tawhanong mga kalihokan, kas-a miingon: “Ang kaalam mapamatud-ang matarong pinaagi sa mga buhat niini.” (Mateo 11:19) Atong tagdon ang pipila sa kasagarang suliran diha sa mga kinabuhi sa mga tawo ug tan-awon kon unsang mga pulong sa kaalam ang tinuod nga nakatabang kanila ug napamatud-ang labaw pa ka bililhon kanila kay sa “bag nga puno sa perlas.” Ikaw usab mahimong makakaplag sa maong “bag nga puno sa kaalam” ug makakuhag kaayohan gikan niana.

Ikaw ba Nag-antos sa Depresyon?

“Kon ang ika-20ng siglo nagpasulod sa Panahon sa Kabalaka, ang pagkatapos niini nakasaksi sa banagbanag sa Panahon sa Tumang Kasub-anan,” nag-ingon ang International Herald Tribune sa London. Kini midugang nga “ang unang internasyonal nga pagtuon sa grabeng depresyon nagpadayag nga permanente ang pag-uswag sa maong sakit sa tibuok kalibotan. Sa nagkadaiyang kanasoran sama sa Taiwan, Lebanon ug New Zealand ang matag sunodsunod nga kaliwatan nahimong mas daling maapektohan sa maong balatian.” Kadtong nangatawo human sa 1955 gikaingong tulo ka pilo nga may kalagmitang makaagom ug grabeng depresyon kay sa ilang mga apohan.

Ingon niana ang kaso ni Tomoe, nga nag-antos sa grabeng depresyon ug naggugol sa kadaghanan sa iyang adlaw diha sa higdaan. Sanglit dili siya makaatiman sa iyang dos-anyos nga anak nga lalaki, mibalik siyag puyo sa balay sa iyang mga ginikanan. Usa ka silingan kinsa may anak nga babaye nga samag edad sa anak nga lalaki ni Tomoe sa wala madugay nakighigala kaniya. Sa dihang gisultihan ni Tomoe ang silingan sa kawalay-pulos nga iyang gibati, gipakita kaniya sa silingan ang usa ka teksto gikan sa usa ka basahon. Kini mabasa: “Ang mata dili makaingon ngadto sa kamot: ‘Wala akoy panginahanglan kanimo’; o, usab, ang ulo dili makaingon ngadto sa mga tiil: ‘Wala akoy panginahanglan kaninyo.’ Apan mao gayod hinuon ang kahimtang nga ang mga sangkap sa lawas nga daw mas mahuyang maoy kinahanglanon.”a Nanglugmaw ang mga luha sa mga mata ni Tomoe sanglit siya nakaamgo nga ang tanan adunay nahiangayng luna sa kalibotan ug gikinahanglan.

Girekomendar sa silingan nga iyang susihon ang basahon nga naundan sa maong mga pulong. Si Tomoe mitando, bisan pag hangtod nianang higayona wala siyay nahimong bisan unsa, bisan na lang sa paghimog usa ka simpleng saad. Ang silingan nagtabang usab kaniya sa pagpamalit, ug nag-andam siyag mga pagkaon adlaw-adlaw kauban si Tomoe. Usa ka bulan sa ulahi si Tomoe mobangon na kada buntag, manglaba, manglimpiyo sa balay, mamalit, ug mag-andam sa pagkaon, sama gayod sa ginahimo ni bisan kinsang asawa sa panimalay. Kinahanglan niyang buntogon ang daghang kalisdanan, apan siya miingon, “Ako may pagsalig nga kon ako lang sundon ang mga pulong sa kaalam nga akong nakaplagan, ako makalihok sa normal.”

Pinaagi sa pagpadapat sa kaalam nga iyang nakaplagan, nabuntog ni Tomoe ang mangiob nga mga adlaw sa iyang depresyon. Karon si Tomoe bug-os-panahong nagtabang sa uban nga ipadapat ang samang mga pulong nga nakapaarang kaniya sa pagsagubang sa iyang mga suliran. Ang maong mga pulong sa kaalam anaa sa usa ka karaang basahon nga adunay mensahe alang sa tanang tawo karong panahona.

Ikaw ba Nagaatubang ug mga Problema sa Panimalay?

Sa tibuok kalibotan ang gidaghanon sa diborsiyo nagauswag. Ang mga problema sa panimalay nagauswag bisan sa Oriental nga mga nasod, diin ang mga tawo kanhi nagpasigarbo sa ilang suod nga mga pamilya. Diin kita makakaplag ug maalamong giya sa kaminyoon nga mosaler?

Tagda ang kaso ni Shugo ug Mihoko, usa ka magtiayon nga daghan kaayog problema sa kaminyoon. Mag-away sila mahitungod sa matag gamayng butang. Si Shugo mubog pailob, ug si Mihoko mobalos ug tubag sa matag higayon nga makakita siyag sayop kaniya. Naghunahuna pa gani si Mihoko, ‘Imposible nga magkauyon kami sa bisan unsang butang.’

Usa ka adlaw niana giduaw sa usa ka babaye si Mihoko ug gibasa kaniya kining mga pulonga gikan sa usa ka basahon: “Busa, ang tanang butang nga buot ninyo nga buhaton sa mga tawo nganha kaninyo, kamo usab kinahanglang magbuhat sa ingon ngadto kanila.”b Bisan pag dili interesado sa relihiyon, misugot si Mihoko nga magtuon sa basahon nga giundan nianang mga pulonga. Interesado siya sa pagpauswag sa iyang pamilyahanong kinabuhi. Busa sa dihang gidapit siya sa pagtambong sa tigom diin gihisgotan ang publikasyon nga may ulohang Paghimo sa Imong Pamilyahanong Kinabuhi nga Malipayon, si Mihoko​—ug ang iyang bana—​dihadihang midawat.c

Didto sa tigom, nakamatikod si Shugo nga kadtong nanambong aktuwal nga nagpadapat sa ilang nakat-onan ug nga sila morag malipayon. Nakahukom siya sa pagsusi sa basahong ginatun-an sa iyang asawa. Wala madugay usa ka pahayag ang nakakuha sa iyang pagtagad: “Siya nga mahinay sa kasuko maoy dagaya sa salabotan, apan ang usa nga walay pailob nagbayaw sa kabuangan.”d Bisan tuod taudtaod pa una niya mapadapat kining prinsipyoha sa iyang kinabuhi, ang iyang anam-anam nga kausaban nakita niadtong diha sa palibot niya, lakip sa iyang asawa.

Tungod kay nakita ang mga kausaban sa iyang bana, si Mi­hoko misugod usab sa pagpadapat sa iyang nakat-onan. Usa ka prinsipyo nga napamatud-ang ilabinang nakatabang mao kini: “Hunong na sa pagpanghukom aron dili kamo pagahukman; kay sa unsa mang hukom nga inyong ginahukom, kamo pagahukman.”e Busa si Mihoko ug ang iyang bana nakahukom nga sila maghisgot sa ilang maayong mga hiyas ug kon sa unsang paagi sila mahimong mouswag imbes nga mangitag sayop sa usag usa. Unsa ang resulta? Si Mihoko nahinumdom: “Nakapalipay gayod kini kanako. Kanunay namo kining ginahimo panahon sa panihapon kada gabii. Bisan ang among tres-anyos nga anak nga lalaki moapil sa kokabildo. Tinuod nga makapalagsik kini alang kanamo!”

Sa dihang gipadapat niining pamilyaha ang makahuloganong tambag nga ilang nadawat, ilang nabuntog ang mga suliran nga nakapabug-at sa ilang relasyon ngadto sa punto nga dili na maantos. Dili ba labaw pa kana ka bililhon kanila kay sa usa ka bag nga puno sa perlas?

Buot ba Nimong Magmalamposon ang Imong Kinabuhi?

Alang sa daghan karon, ang pagtigom ug bahandi mao ang tumong sa kinabuhi. Apan, usa ka adunahan nga negosyante sa Tinipong Bansa nga naghatag ug ginatos ka milyong dolyares ngadto sa buhat sa kaluoy kas-a miingon: “Ang salapi makapadani alang sa pipila ka tawo, apan walay makasul-ob ug duha ka parisan sa sapatos sa usa ka panahon.” Pipila lamang kadtong modawat niini nga kamatuoran ug labaw pang gamay ang gidaghanon niadtong mohunong sa pagpangagpas ug bahandi.

Si Hitoshi midako nga kabos, busa may hugot siyang tinguha nga madato. Human makita kon sa unsang paagi gimaniobra sa mga tigpautang ang mga utangan kanila, siya nakahukom: “Ang usa nga makakuha sa kinadaghanang salapi mao ang mananaog.” Dako kaayo ang pagtuo ni Hitoshi sa gahom sa salapi nga siya nagtuo nga bisan ang mga kinabuhi sa tawo mahimong paliton niini. Aron makatigom ug bahandi, nagkugi siya sa iyang negosyo sa pagpanaod ug tubo ug nagtrabaho tibuok tuig, nga wala gayod maggahin ug usa ka adlaw nga dili motrabaho. Bisan pag siya naningkamot pag-ayo, wala madugay nakaamgo si Hitoshi nga siya, ingong usa ka ikaduhang-kontraktor, dili gayod ingon ka gamhanan sa mga kontraktor nga naghatag kaniyag trabaho. Giatubang niya adlaw-adlaw ang kahigawad ug kahadlok nga mabangkarota.

Dayon usa ka lalaki ang mianha sa pultahan ni Hitoshi ug misukna kaniya kon nasayod ba siya nga si Jesu-Kristo namatay alang kaniya. Sanglit gibati ni Hitoshi nga walay usa nga buot mamatay alang sa tawong sama niya, siya nahimong maukiton ug misugot sa dugang nga panaghisgot. Pagkasunod semana, mitambong siya sa usa ka pakigpulong ug nahingangha sa pagkadungog sa pahimangno nga ‘huptang yano ang mata.’ Ang mamumulong nagpatin-aw nga ang “yano” nga mata maoy usa nga halayog-panan-aw ug napunting diha sa espirituwal nga mga butang; sa laing bahin, ang “tuman-kadaotan,” o “masinahon,” nga mata napunting lamang sa dihadihang unodnon nga tinguha ug kini mubog panglantaw. Ang tambag nga, “Kon asa ang imong bahandi, maatua usab ang imong kasingkasing,” nakahimog dakong impresyon kaniya.f Adunay usa ka butang nga mas hinungdanon kay sa pagbaton ug bahandi! Wala gayod siya makadungog ug bisan unsa nga ingon niana sukad.

Tungod kay nakadayeg, gisugdan niya pagpadapat ang iyang nakat-onan. Imbes maghago alang sa salapi, siya misugod sa pag-una sa espirituwal nga mga sukdanan diha sa iyang kinabuhi. Siya naggugol usab ug panahon alang sa espirituwal nga kaayohan sa iyang panimalay. Dayag lang, kana nagkahulogag mas gamayng panahon sa pagtrabaho, bisan pa niana nahimong paborable ang kahimtang sa iyang negosyo. Ngano?

Ang iyang agresibong kinaiya nahimong malumo ug mahigalaon tungod kay siya misanong sa tambag nga gihatag kaniya. Siya ilabinang nakadayeg sa pahimangno nga: “Isalikway gayod kining tanan gikan kaninyo, kapungot, kasuko, pagkadaotan, maabusohong sinultihan, ug law-ayng sulti gikan sa inyong baba. Ayaw pagbinakakay sa usag usa. Hukasa ang daang pagkatawo uban ang mga buhat niini, ug isul-ob ang bag-o nga pagkatawo, nga pinaagi sa tukmang kahibalo ginahimong bag-o sumala sa larawan sa Usa kinsa milalang niini.”g Ang pagsunod niining tambaga wala magpadato kaniya, apan ang iyang “bag-o nga pagkatawo” nakahimog maayong impresyon sa iyang mga kliyente ug nakuha ang ilang pagsalig ug kompiyansa. Oo, ang mga pulong sa kaalam nga iyang nakaplagan nakatabang kaniya nga mapalampos ang iyang kinabuhi. Alang kaniya, kini labaw pa kaayo ka bililhon sa literal nga paagi kay sa usa ka bag nga puno sa perlas o salapi.

Buksan ba Nimo ang Bag?

Imo bang nailhan ang bag nga puno sa kaalam nga napamatud-ang bililhon kaayo para sa mga indibiduwal diha sa mga pananglitan sa ibabaw? Kini mao ang kaalam nga makaplagan sa Bibliya, ang labing kaylap nga pagkaapod-apod ug labing daling mabatonan nga basahon sa yuta. Posible nga aduna kay kopya o sayon rang makakuha ug usa. Apan, ingon nga ang pagbaton ug usa ka bag nga puno sa mahalong perlas ug dili paggamit niini gamay rag kaayohan nga mahatag sa tag-iya, ang pagpanag-iya lamang ug Bibliya gamay ra usab ug bili. Nganong dili buksan ang bag, sa mahulagwayong pagkasulti, ug ipadapat ang maalamong tambag ug tukma-sa-panahong pahimangno sa Bibliya ug tan-awon kon sa unsang paagi kini makatabang kanimo nga malamposong atubangon ang mga suliran sa kinabuhi.

Kon pananglit ikaw gihatagag usa ka bag nga puno sa perlas, dili ka ba magmapasalamaton ug maningkamot sa pagsusi kon kinsay naghatag niini aron imo siyang mapasalamatan? Nasayod ka ba kon kinsa ang Maghahatag sa Bibliya?

Gipadayag sa Bibliya ang Tinubdan sa kaalam nga makaplagan diha niana sa dihang kini miingon: “Ang tibuok Kasulatan inspirado sa Diyos ug mapuslanon.” (2 Timoteo 3:16) Gisultihan usab kita niini nga “ang pulong sa Diyos buhi ug gamhanang nagalihok.” (Hebreohanon 4:12) Mao kana ang rason kon nganong ang maalamong mga pulong nga makaplagan sa Bibliya tukma-sa-panahon ug epektibo alang kanato karon. Ang mga Saksi ni Jehova malipay sa pagtabang kanimo sa pagtuon mahitungod niining maong Manggihatagon, si Jehova nga Diyos, aron makabaton ka sa paglaom nga mahimong modawat sa “bag nga puno sa kaalam” nga anaa sa Bibliya—ang basahon sa kaalam nga adunay mensahe alang sa mga tawo karong panahona.

[Mga footnote]

[Kahon/​Hulagway sa panid 4]

Mga Pulong sa Kaalam Aron Padayong Mahuptan ang Emosyonal nga Pagkatimbang

“Kon ang mga kasaypanan maoy imong bantayan, Oh Jah, Oh Jehova, kinsay makabarog? Kay adunay tinuod nga kapasayloan diha kanimo, aron nga ikaw mahimong kahadlokan.”​—Salmo 130:3, 4.

“Ang malipayong kasingkasing may maayong epekto sa panagway, apan tungod sa kasubo sa kasingkasing ang espiritu mamaluya.”​—Proverbio 15:13.

“Ayaw pagpalabi sa pagkamatarong, ni magpakita nga ikaw labihan ka maalamon. Nganong ipahinabo nimo ang kadaotan sa imong kaugalingon?”​—Ecclesiastes 7:16.

“Adunay labaw nga kalipay sa paghatag kay sa pagdawat.”​—Buhat 20:35.

“Pagkapungot, apan ayaw pagpakasala; ayaw pasalopa ang adlaw nga kamo anaa sa suko nga kahimtang.”​—Efeso 4:26.

[Kahon/​Hulagway sa panid 5]

Mga Pulong sa Kaalam Alang sa Usa ka Malipayong Kinabuhi sa Pamilya

“Mapakyas ang mga plano diin walay pribadong panagsulti, apan diha sa daghang magtatambag adunay kalamposan.”​—Proverbio 15:22.

“Ang kasingkasing sa usang masinaboton makabaton ug kahibalo, ug ang dalunggan sa mga maalamon maningkamot sa pagkaplag ug kahibalo.”​—Proverbio 18:15.

“Sama sa mga mansanas nga bulawan diha sa mga kinulit nga plata mao man ang pulong nga gisulti sa hustong panahon alang niana.”​—Proverbio 25:11.

“Padayon nga mag-inantosay sa usag usa ug bukas nga magpinasayloay sa usag usa kon ang usa may hinungdan sa pagreklamo batok sa lain. Maingon gayod nga si Jehova bukas nga nagpasaylo kaninyo, buhata usab ninyo ang ingon. Apan, gawas pa niining tanang butanga, isul-ob sa inyong kaugalingon ang gugma, kay kini usa ka hingpit nga bugkos sa panaghiusa.”​—Colosas 3:13, 14.

“Hibaloi kini, hinigugmang mga igsoon. Ang matag usa kinahanglan nga magmaabtik sa pagpaminaw, magmahinay sa pagsulti, magmahinay sa kapungot.”​—Santiago 1:19.

[Kahon/​Hulagway sa panid 6]

Mga Pulong sa Kaalam Alang sa Pagpalampos sa Kinabuhi

“Ang limbongan nga parisan sa timbangan maoy dulumtanan kang Jehova, apan ang walay-kulang nga bato sa timbangan maoy iyang kalipay.”​—Proverbio 11:1.

“Ang pagkagarboso magauna sa pagkalaglag, ug ang mapahitas-ong espiritu magauna sa pagkapandol.”​—Proverbio 16:18.

“Sama sa usa ka siyudad nga nalumpag, nga walay kuta, mao man ang tawo nga walay pagpugong sa iyang espiritu.”​—Proverbio 25:28.

“Dili nimo pagdalidalion ang imong espiritu sa pagkasuko, kay ang pagkasuko nagpuyo diha sa sabakan sa mga buangbuang.”​—Ecclesiastes 7:9.

“Isalibay ang imong mga tinapay ngadto sa katubigan, kay kini hikaplagan ra nimo pag-usab sa tapos ang daghang mga adlaw.”​—Ecclesiastes 11:1.

“Ayaw pagulaa ang usa ka dunot nga sulti gikan sa inyong baba, kundili ang unsa mang sulti nga maayo alang sa pagpalig-on sumala sa gikinahanglan, aron makahatag kini ug unsay paborable sa mga tigpaminaw.”​—Efeso 4:29.

[Hulagway sa panid 7]

Ang pagtuon sa Bibliya mao ang unang lakang sa pagkahimong tigdawat sa “bag nga puno sa kaalam”