Mga Magmamantala sa Gingharian Nagtaho

Mga Saksi Migawas sa Publiko sa Pransiya

GIKAN sa sayong kabuntagon sa Biyernes, Enero 29, 1999, ug nagpadayon hangtod sa hinapos sa semana, ang mga Saksi ni Jehova sa Pransiya madasigong nag-apod-apod diha sa kadalanan ug sa ulahi sa balay ug balay, sa 12 ka milyong kopya sa tract nga nag-ulohang Katawhan sa Pransiya, Kamo Ginalimbongan! Nganong gihimo ang maong kampanya?

Sa komperensiya sa prensa sa Paris nianang buntag sa Biyernes, ang hinungdan sa kampanya gihatag. Ang Saksing tigpamaba misaysay: “Ang buot namong buhaton niining panahona maoy aron ipahibalo ang among kaugalingon kon unsa kami ug pahilomon ang mikaylap nga mapanamastamasong mga pulong bahin kanamo. Andam kaming modawat ug pagsaway, apan dili na kami makahatag ug konsiderasyon sa mga bakak ug mga komento nga magdaot sa among reputasyon.”

Bisan kon ang mga Saksi ni Jehova mao ang ikatulong kinadak-ang Kristohanong relihiyon sa Pransiya, daghang Saksing kabataan giinsulto ug gihasi sa eskuylahan. Ang mga hingkod na nawad-an sa ilang mga trabaho ug gihulga tungod sa ilang relihiyon. Dili katuohan, bisan ang relihiyosong mga kontribusyon nga ilang nadawat gitasalan ug 60-porsiyentong buhis. Giunsa man pagdumala sa kampanya kini nga pagpihig?

Ang tract nagpahayag: “Ang 250,000 ka Saksi ni Jehova ug ang ilang kaubanan nga nagpuyo sa Pransiya NAGPROTESTA batok sa dili-matinud-anong paagi diin ang ilang Kristohanong relihiyon, nga naglungtad sa Pransiya sukad sa 1900, gilakip duyog sa makuyawng mga sekta sukad sa 1995. . . . NAGPROTESTA batok sa padayong pagpanghasi nga ilang naagoman.” Ang mabutangbutangong mga sumbong nga gitumong sa mga Saksi sa Pransiya ug ang malipotong mga paagi nga niana ang mga tigpasipala nagtinguha sa pagmugnag negatibong publisidad giyagyag. Ang tract naghinapos sa pag-ingong: “Karong adlawa, kapin sa duha ka milyong Saksi ni Jehova ug ilang kaubanan ang nagpuyo sa Uropa. Ilang gitahod ang mga balaod sa mga Estado nga niana sila mga molupyo pinaagi sa pagtuboy sa mga prinsipyo sa Ebanghelyo. Katawhan sa Pransiya, kini mao ang mga kamatuoran. Among katungdanan nga ipresentar kini kon unsa ka tinuod kini!”

Dihadiha, Positibong Sanong

Minilyon ka tract ang giapod-apod sa unang adlaw. Sa Paris lamang, sa pagkaudto kapin sa 7,000 ka Saksi ang nakapahimutang ug kapin sa 1.3 milyong tract diha sa mga kamot sa mga tawo. Mao kini ang unang higayon nga ang mga tawo nakakita ug daghan kaayong Saksi nga nag-apod-apod ug mga tract diha sa kadalanan. Ang palaumagian sa balita, lakip ang nasyonal ug lokal nga mga mantalaan ug telebisyon, misanong nga mauyonon sa kampanya. Ang mantalaang Le Progrès de Lyon miingon: “Kini nga inisyatibo . . . nagyagyag sa sayop nga pagsabot bahin sa usa ka pulong. Sa miaging napulo ka tuig, ang pulong nga ‘sekta’ . . . gisabot sa tinuis, makuyaw, ug makadaot nga kahulogan. . . . Ang mga Saksi ni Jehova dili makuyaw nga matang nga lagmit maghatag ug kagubot sa katilingban.”

Kadtong nakaila sa mga Saksi ni Jehova nagdayeg sa ilang makigdaitong kinaiya ug sa ilang halalom nga pagtahod sa naestablisar nga kahapsay sa katilingban. Busa, daghan diha sa kadalanan nagpahayag sa ilang apresasyon ug pagpaluyo sa tinagpulo ka libong Saksi nga nakigbahin sa kampanya. Ang mga tawag sa telepono, fax, ug mga sulat gikan sa mga tawong nagpahayag sa ilang mga pasalamat alang sa tract nadawat halos dihadiha. Labaw sa tanan, ang sinserong mga tawo nahatagan ug higayon nga makapaminaw sa mga kamatuoran bahin sa mga Saksi nga kasukwahi sa tinumotumo ug binuang nga mga komento, ug kadtong kansang mga tinuohan gidaot nakahimo sa pagpasundayag sa ilang gibati alang sa ilang gipakamahal.