Ang Ika-108 nga Klase sa Gilead Giawhag nga Mohatag ug Sagradong Pag-alagad

SA Bibliya, ang pagsimba sa Diyos kasagarang gilangkit sa ekspresyong “sagradong pag-alagad.” Gikuha kini sa Gregong termino nga nagpasabot ug paghatag ug pag-alagad sa Diyos. (Roma 9:4) Ang 5,562 nga naminaw sa programa sa graduwasyon sa ika-108 nga klase sa Watchtower Bible School of Gilead nakadungog sa mga mamumulong nga naghatag ug praktikal nga tambag nga motabang sa mga graduwado sa paghatag ug sagradong pag-alagad nga dalawaton kang Jehova nga Diyos.a

Si Theodore Jaracz, usa ka membro sa Nagamandong Lawas sa mga Saksi ni Jehova, mao ang tsirman. Ang programa gibuksan pinaagig alawiton numero 52, “Ngalan sa Amahan Namo.” Ang ikaduhang estansa sa maong awit nag-ingon: “Nangita mi ug paagi ngalan mo mabalaan.” Kana tinuod nga nagpahayag sa kinasingkasing nga tinguha sa mga estudyante sa migraduwar nga klase (kinsa naggikan sa 10 ka nasod) sa paggamit sa ilang pagbansay diha sa ilang misyonaryong mga asaynment, sa 17 ka lainlaing mga nasod.

Sa iyang pangbukas nga mga komento, gihisgotan ni Brader Jaracz ang lima ka bulan nga matukiong pagtuon sa Bibliya sa mga estudyante nga nag-andam kanila alang sa pag-alagad sa langyawng mga natad. Kini nakatabang kanila sa ‘pagtino sa tanang butang,’ sa ato pa, pag-usisa sumala sa kahayag sa Pulong sa Diyos kon unsay ilang natun-an sa una, ug sa ‘pagpangupot pag-ayo sa kon unsay maayo.’ (1 Tesalonica 5:21) Gidasig niya sila nga magmatinumanon kang Jehova, sa iyang Pulong, ug sa mga asaynment nga alang niana sila gibansay. Unsay motabang kanila samtang buhaton nila kining tanan?

Praktikal nga Tambag Alang sa Paghatag ug Sagradong Pag-alagad

Si Lon Schilling, usa ka membro sa Bethel Operations Committee, misulti bahin sa ulohang “Makapasar Ka ba sa Pagsulay sa Pagkamakataronganon?” Iyang gipasiugda ang kabililhon sa pagkamakataronganon, nga nagsumbalik-silaw ug diyosnong kaalam. (Santiago 3:17) Ang pagkamakataronganon naglakip sa pagkahimong mauyonon, dili-mapihigon, makasaranganon, mahunahunaon, ug mapailobon. “Ang makataronganong mga tawo maoy timbang sa pagpakiglabot sa uban. Dili sila maghinobra,” matod pa ni Brader Schilling. Unsay makatabang sa usa ka misyonaryo nga mahimong makataronganon? Ang pagbaton ug makasaranganong panglantaw sa kaugalingon, pagpahimulos sa mga kahigayonan sa pagpamati ug pagkat-on gikan sa uban, ug pagkaandam nga mokonsiderar sa mga panglantaw sa uban samtang dili ikompromiso ang diyosnong mga prinsipyo.—1 Corinto 9:19-23.

“Ayawg Kalimot Pagkaon!” mao ang makaiikag nga ulohan sa sunod nga bahin sa programa, nga gipresentar ni Samuel Herd, laing membro sa Nagamandong Lawas. Iyang gipasiugda ang kabililhon sa paghupot ug maayong espirituwal nga diyeta sa pagpabiling himsog aron makahatag ug sagradong pag-alagad. “Ang inyong espirituwal nga kalihokan,” matod ni Brader Herd, “sa dili madugay madugangan samtang mosugod kamo sa inyong asaynment sa pagsangyaw ug pagpanudlo. Busa, duna unyay panginahanglan nga dugangan ninyo ang inyong pagkaon ug espirituwal nga pagkaon aron dili kamo maluya.” Ang makanunayong diyeta sa espirituwal nga pagkaon makatabang sa usa ka misyonaryo sa paglikay sa espirituwal nga depresyon ug kamingaw sa pamilya. Kini makaamot sa pagkakontento ug sa determinasyon nga magpabilin sa iyang asaynment sa sagradong pag-alagad.—Filipos 4:13.

Usa ka instruktor sa Gilead, si Lawrence Bowen, nagdasig sa migraduwar nga mga estudyante sa “Pagbalik sa Sinugdanan.” Unsay buot niyang ipasabot? Gipabuksan niya sa tanang mamiminaw ang Proverbio 1:7, nga nag-ingon: “Ang pagkahadlok kang Jehova mao ang sinugdanan sa kahibalo.” Ang mamumulong misaysay: “Ang bisan unsa nga nagsalikway sa sukaranang kamatuoran bahin sa paglungtad ni Jehova dili gayod mokuwalipikar nga tinuod nga kahibalo ni mosangpot sa hustong pagsabot.” Gitandi ni Brader Bowen ang mga detalye sa Pulong sa Diyos, ang Bibliya, sa mga piraso sa jigsaw puzzle. Sa dihang ang mga piraso isumpay-sumpay, maporma ang usa ka hulagway. Kon mas daghang piraso, mas dako ug mas tin-aw ang hulagway ug mas maapresyar kini sa tawo. Motabang kini sa tanan sa paghatag ug sagradong pag-alagad sa Diyos.

Si Wallace Liverance, tigrehistro sa Tunghaang Gilead, nagtapos sa serye sa mga pakigpulong. Ang iyang tema mao ang “Pagtanyag ug Pasalamat Ingong Inyong Halad sa Diyos.” Gihisgotan niya ang asoy bahin sa pag-ayo ni Jesus sa napulo ka sanlahon. (Lucas 17:11-19) Usa lang ang mibalik sa pagdayeg sa Diyos ug pagpasalamat kang Jesus. “Sa walay duhaduha, ang uban nalipay nga nahinloan. Maayo ang gibati nila sa ilang kaugalingon, apan morag ang gusto lang nila mao nga ipahayag silang hinlo sa saserdote,” mikomento si Brader Liverance. Ang espirituwal nga paghinlo nga mosangpot gumikan sa pagkakat-on sa kamatuoran, dinuyogan sa pagkamapasalamaton, angayng magpalihok sa usa sa pagpasalamat sa Diyos tungod sa iyang kaayo. Ang mga estudyante sa ika-108 nga klase sa Gilead gidasig sa pagpalandong sa tanang kalihokan ug kaayo sa Diyos aron himoon ang ilang pag-alagad ug mga halad nga usa ka sumbalik-silaw sa pagkamapasalamaton ngadto sa Diyos.—Salmo 50:14, 23; 116:12, 17.

Mga Eksperyensiya ug mga Interbiyo Kon Unsaon Paghimo Niana

Si Mark Noumair, laing instruktor sa Gilead, maoy nagdumala sa sunod nga bahin sa programa. Naghisgot kini sa mga eksperyensiya sa klase sa pag-alagad sa kanataran panahon sa ilang pagbansay. Ang mga estudyante nakagugol, sa aberids, ug mga 12 ka tuig diha sa bug-os-panahong ministeryo una pa motungha sa Gilead. Samtang didto sa tunghaan, nakasugod sila ug daghang panagtuon sa Bibliya uban sa mga tawo nga lainlain ug mga kagikan, nga nagpakita nga ang mga estudyante nahibalo kon sa unsang paagi ‘mahimong tanang butang ngadto sa tanang matang sa katawhan.’—1 Corinto 9:22.

Human sa mga eksperyensiya sa mga estudyante, si Charles Molohan ug William Samuelson nag-interbiyo ug pipila ka membro sa pamilyang Bethel ug nagapanawng mga magtatan-aw nga nakaeskuyla sa Gilead. Usa sa mga igsoon nga giinterbiyo, si Robert Pevy, nag-alagad sa Pilipinas human mograduwar sa ika-51 nga klase sa Gilead. Gipahinumdoman niya ang klase: “Kon dunay suliran, ang tanan mohatag sa iyang mga sugyot kon unsaon pagsulbad sa suliran. Duna gayoy usa nga mas makinaadmanon kay kanimo, usa nga mosugyot ug mas maayong hunahuna. Apan kon susihon nimo ang Bibliya ug paningkamotan nga matino ang panglantaw sa Diyos sa mga butang, walay makalabaw niana. Mao gayod kana ang hustong tubag.”

Sa pagtapos sa maayong espirituwal nga programa, si John Barr, usa ka membro sa Nagamandong Lawas, misulti bahin sa temang, “Paghatag ug Dalawatong Pag-alagad Kang Jehova.” Gipakita niya kon sa unsang paagi ang sagradong pag-alagad ikapabanaag diha sa ministeryo sa kanataran sa pagtabang sa maayog-kasingkasing nga mga tawo sa pagsimba sa Diyos sa dalawatong paagi. Human basaha ang mga pulong ni Jesus sa Mateo 4:10, si Brader Barr miingon, “Kon si Jehova lamang ang atong simbahon, kinahanglang isalikway nato ang tanang dili-dayag nga matang sa idolatriya, sama sa kadalo, pagtinguhag mga bahandi, ug pagbayaw sa kaugalingon. Pagkamakapalipay kanato ang paghunahuna nga ang atong mga misyonaryo latas sa katuigan sukad sa unang bahin sa katuigang 1940 nakaestablisar ug maayo kaayong rekord niining bahina! Ug segurado kami nga kamong mga graduwado sa ika-108 nga klase sa Gilead mosunod sa ilang maayong panig-ingnan. Kamo magahatag ug sagradong pag-alagad kang Jehova, kinsa mao lamay takos nga modawat niana.”

Kadto maoy positibong panapos sa makapalig-on nga programa. Dihay panahon alang sa pagpaminaw sa mga pangomosta gikan sa mga nanghinaot-ug-kaayohan gikan sa lainlaing dapit sa kalibotan, sa paghatag sa mga diploma, ug sa pagbasa sa sulat gikan sa klase, nga nagpahayag ug apresasyon sa pagbansay nga ilang nadawat. Ang migraduwar nga klase gitambagan sa pagpasundayag sa hiyas sa pagkamatinumanon diha sa ilang mga asaynment ug sa pag-alagad kang Jehova. Ang tanang nanambong, lakip ang mga bisita gikan sa 25 ka nasod, miduyog sa pagtapos sa programa pinaagig awit ug pag-ampo.

[Footnote]

[Kahon sa panid 23]

ESTADISTIKA SA KLASE

Gidaghanon sa mga nasod nga gihawasan: 10

Gidaghanon sa mga nasod nga gipadalhan: 17

Gidaghanon sa mga estudyante: 46

Aberids nga edad: 34

Aberids nga katuigan sa kamatuoran: 16

Aberids nga katuigan sa bug-os-panahong ministeryo: 12

[Hulagway sa panid 24]

Ika-108 nga Migraduwar nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubang ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.