Pagkamasinugtanon—Usa ka Hinungdanong Leksiyon sa Pagkabata?
“ANG mga Ginikanan Gustog mga Tawo, Dili mga Bata nga Masinugtanon.” Kanay mabasa sa pangunang-ulohan sa usa ka mantalaan. Kining tipik sa taho maoy pinasukad sa mga resulta sa usa ka surbi nga gihimo sa New Zealand, nga nagpakita nga “22 porsiyento lamang sa mga misanong ang naghunahuna nga ang mga bata kinahanglang tudloan sa pagkamasinugtanon diha sa panimalay.” Nakaplagan usab sa surbi nga ang mga ginikanan karong adlawa nagtuo nga mas hinungdanon pa ang pagtudlo sa mga anak sa mga butang sama sa maayong mga pamatasan, pagkinaugalingon, ug responsibilidad.
Niining panahon sa indibiduwalismo ug interes-sa-kaugalingon, dili ikahibulong nga ang kadaghanang mga tawo may negatibong panghunahuna sa pagkamasinugtanon ug sa pagtudlo niini sa mga bata. Apan ang pagkamasinugtanon sa pagkabata isalindot na lamang ba ingong wala na sa panahon o kinaraan na? O dili ba kini mao ang usa sa hinungdanong mga leksiyon nga makakat-on ug makabenepisyo ang mga bata? Labi pang hinungdanon, giunsa paglantaw ni Jehova nga Diyos, ang Tigmugna sa kahikayan sa pamilya, ang pagkamasinugtanon ngadto sa mga ginikanan, ug unsa ang pipila ka benepisyo nga mosangpot gikan sa maong pagkamasinugtanon?—Buhat 17:28; Efeso 3:14, 15.
“Kini Maoy Matarong”
Ngadto sa unang-siglong Kristohanong kongregasyon sa Efeso, si apostol Pablo misulat: “Mga anak, magmasinugtanon sa inyong mga ginikanan nga nahiusa sa Ginoo, kay kini maoy matarong.” (Efeso 6:1) Busa, ang pangunang katarongan sa maong pagkamasinugtanon mao nga kini kaharmonya sa sukdanan sa Diyos kon unsay matarong. Sumala sa giingon ni Pablo, “kini maoy matarong.”
Uyon niini, atong mamatikdan nga ang Pulong sa Diyos naghulagway sa mahigugmaong disiplina sa ginikanan ingong matahom nga dayandayan, usa ka “matahom nga purongpurong sa imong ulo ug maanindot nga kulentas sa imong liog,” ug ingong butang nga “makapahimuot pag-ayo sa Ginoo.” (Proverbio 1:8, 9; Colosas 3:20) Sa kasukwahi gayod, ang pagkadili-masinugtanon ngadto sa mga ginikanan mohatod sa pagkadili-inuyonan sa Diyos.—Roma 1:30, 32.
“Aron Magmauswagon Ka”
Gipunting ni Pablo ang laing kaayohan sa pagkamasinugtanon sa dihang siya misulat: “‘Pasidunggi ang imong amahan ug ang imong inahan’; nga maoy unang sugo nga may saad: ‘Aron magmauswagon ka ug molungtad ka sa hataas nga panahon sa yuta.’” (Efeso 6:2, 3; Exodo 20:12) Sa unsang mga paagi nga ang pagkamasinugtanon ngadto sa mga ginikanan maghatag ug kaayohan sa usa?
Una, dili ba tinuod nga ang mga ginikanan mas labaw ug panuigon ug kasinatian? Bisan tuod nga sila daw wala kaayoy nahibaloan bahin sa mga kompiyuter o sa uban pang mga butang nga gitudlo sa eskuylahan, sila may dakong nahibaloan bahin sa pagkinabuhi ug sa pagsagubang sa mga suliran sa kinabuhi. Ang mga batan-on, sa laing bahin, kulang sa timbang nga panghunahuna nga nagsumikad sa pagkahamtong. Busa, sila mahimong madalidalion sa paghimog mga desisyon, nga sagad mopasignunot sa negatibong pagpit-os sa isigkaingon, nga mosangpot sa ilang kaugalingong kadaot. Sa pagkatinuod, ang Bibliya nagaingon: “Ang mga binuang nabugkos sa kasingkasing sa usa ka bata.” Unsa ang solusyon? “Ang bunal sa disiplina mao ang magpahilayo niana gikan kaniya.”—Proverbio 22:15.
Ang mga benepisyo sa pagkamasinugtanon labaw pa kay sa relasyon tali sa ginikanan ug anak. Aron ang tawhanong katilingban makalihok nga hapsay ug mabungahon, kinahanglang dunay kooperasyon, nga sa baylo nagkinahanglan ug pagkamasinugtanon. Pananglitan, diha sa kaminyoon, ang pagkamapauyonon, inay kay mapugsanon ug dili matinagdanon sa mga katungod ug mga pagbati sa uban, ang makahatag ug pakigdait, panaghiusa, ug kalipay. Sa trabahoan, ang pagpasakop sa usa ka empleyado kinahanglanon aron molampos ang bisan unsang alatimanon o paningkamot. Maylabot sa mga balaod ug mga regulasyon sa gobyerno, ang pagkamasinugtanon dili lamang magpahigawas sa usa gikan sa silot kondili maghatag usab ug igong kahilwasan ug proteksiyon.—Roma 13:1-7; Efeso 5:21-25; 6:5-8.
Ang mga batan-on nga mosukol sa awtoridad sagad mahimong mga bugoy sa katilingban. Sa kasukwahi, ang leksiyon sa pagkamasinugtanon nga nakat-onan sa pagkabata mahimong molugway nga magantihon sa tibuok kinabuhi sa usa ka tawo. Pagkamaayo gayod nga makat-onan kini sa pagkabata!
Ang Dakong Ganti sa Pagkamasinugtanon
Ang pagkamasinugtanon dili lamang makahatag ug malipayong mga relasyon sa pamilya ug uban pang mga benepisyo sa tibuok kinabuhi kondili magtagana usab sa pundasyon nga diha niana matukod ang labing hinungdanong relasyon sa tanan—ang relasyon tali sa usa ka tawo ug sa iyang Maglalalang. Ingong “Dakong Maglalalang” nga maoy “tuboran sa kinabuhi,” si Jehova nga Diyos takos sa atong bug-os nga pagkamasinugtanon.—Ecclesiastes 12:1; Salmo 36:9.
Ang pulong “pagsugot” sa nagkadaiyang mga porma niini makaplagan kapin sa 160 ka beses diha sa Bibliya. Dugang pa, adunay ginatos ka mga paghisgot nga nagtumong sa mga balaod, mga sugo, mga mando, hudisyal nga mga hukom, ug mga regulasyon sa Diyos, ang tanan niini nagkinahanglan ug pagpasakop. Tataw gayod nga gilantaw sa Diyos ang pagkamasinugtanon ingong usa ka kinahanglanon aron mabatonan ang iyang pag-uyon. Oo, ang pagkamasinugtanon hinungdanon gayod aron sa pagpalig-on sa atong relasyon kang Jehova. (1 Samuel 15:22) Ikasubo, ang kinaiyanhong kiling sa tawo dili mao ang pagkamasinugtanon kondili ang pagkadili-masinugtanon. “Ang kiling sa kasingkasing sa tawo daotan sukad pa sa iyang pagkabatan-on,” nagaingon ang Bibliya. (Genesis 8:21) Busa, ang leksiyon sa pagkamasinugtanon kinahanglang tun-an dili lamang sa pagkabata kondili sa tibuok kinabuhi. Ang pagbuhat sa ingon mohatag ug dakong ganti.
Hinumdomi nga, sumala sa giingon ni apostol Pablo, ang sugo nga magmasinugtanon ngadto sa mga ginikanan adunay duha ka saad, nga mao, “aron magmauswagon ka ug molungtad ka sa hataas nga panahon sa yuta.” Ang pamatuod niini nga saad makaplagan sa Proverbio 3:1, 2: “Anak ko, ayaw kalimti ang akong balaod, ug bantayan unta sa imong kasingkasing ang akong kasugoan, tungod kay ang daghan nga mga adlaw ug mga tuig sa kinabuhi ug pakigdait igadugang kanimo.” Ang dakong ganti alang sa mga masinugtanon maoy usa ka personal nga relasyon kang Jehova karon ug kinabuhing walay kataposan sa usa ka malinawong bag-ong kalibotan.—Pinadayag 21:3, 4.
[Mga hulagway sa panid 30, 31]
Ang pagkamasinugtanon mohatag ug malipayong relasyon sa pamilya, sa trabahoan, ug kang Jehova