Mga Magmamantala sa Gingharian Nagtaho
Natagbaw ang Iyang Espirituwal nga mga Panginahanglan
ANG Cipro maoy usa ka isla sa amihanan-sidlakang suok sa Dagat Mediteranyo. Sa kapanahonan sa Bibliya, ilado ang Cipro tungod sa tumbaga ug maayog kalidad nga troso. Gimantala ni Pablo ug Bernabe ang maayong balita sa Gingharian didto panahon sa ilang unang misyonaryong panaw. (Buhat 13:4-12) Karon, ang maayong balita aduna gihapoy positibong epekto sa kinabuhi sa daghang taga-Cipro. Dayag nga tinuod kini sa kahimtang ni Lucas, usa ka lalaki nga nagpanuigon ug mga 40. Siya miasoy:
“Natawo ako ingong usa sa pito ka anak sa pamilya sa usa ka pastohan sa baka. Gikan sa sayong pagkabata, duna na akoy kinaiyanhong tinguha sa pagbasa. Ang akong paboritong libro mao ang debulsang edisyon sa Kristohanon Gregong Kasulatan. Sa dihang ako diyes anyos, ang pipila ka higala ug ako nagporma ug usa ka gamayng grupo sa pagtuon sa Bibliya. Apan, wala kadto magdugay tungod kay ang pipila sa mga tigulang sa balangay nagtawag kanamo nga mga erehes.
“Sa ulahi, samtang nagtungha sa Tinipong Bansa, nahimamat ko ang mga tawo nga daghan ug relihiyosong mga kagikan. Kadto ang nakapukaw pag-usab sa akong tinguha alang sa espirituwal nga mga butang. Migugol ako ug daghang adlaw diha sa librarya sa unibersidad nga nagtuon sa lainlaing mga relihiyon. Mitambong usab ako sa ubay-ubayng mga simbahan, apan bisan pa sa akong mga paningkamot, sa gihapon wala ako matagbaw sa espirituwal.
“Human matapos ang akong pagtuon, mibalik ako sa Cipro ug midawat ug trabaho ingong direktor sa usa ka medikal nga laboratoryo. Usa ka tigulang nga lalaki nga ginganlag Antonis, usa sa mga Saksi ni Jehova, tigduawan kanako sa akong trabahoan. Apan, ang iyang mga pagduaw namatikdan sa Gregong Ortodoksong Iglesya.
“Wala magdugay, usa ka teologo miduaw kanako ug nagpaluya kanako nga dili makigsulti sa mga Saksi ni Jehova. Sanglit natudloan ako gikan sa pagkabata nga nabatonan sa Gregong Ortodoksong Iglesya ang kamatuoran, ako milunga ug mihunong sa paggugol ug panahon sa pagpakigsulti kang Antonis ug misugod sa pagpakighisgot sa Bibliya uban sa teologo. Miduaw usab ako sa daghang monasteryo sa Cipro. Mibiyahe pa gani ako sa amihanang Gresya ug miduaw sa Bukid sa Athos, nga giisip nga mao ang labing balaan nga bukid sa Ortodoksong Kristohanon nga kalibotan. Sa gihapon, ang akong mga pangutana sa Bibliya nagpabiling wala matubag.
“Dayon miampo ako sa Diyos aron tabangan niya ako sa pagkaplag sa kamatuoran. Wala magdugay human niana, miduaw pag-usab kanako si Antonis diha sa akong trabahoan, ug gibati nako nga kini mao ang tubag sa akong pag-ampo. Busa mihunong na ako sa pagpakigkita sa teologo ug misugod sa pagtuon sa Bibliya uban ni Antonis. Padayon akong miuswag, ug sa Oktubre 1997, akong gipasimbolohan ang akong pagpahinungod kang Jehova pinaagi sa bawtismo sa tubig.
“Ang akong asawa ug ang among duha ka kinamagulangang mga anak nga babaye, nga nag-edad ug 14 ug 10 niadtong panahona, sa sinugdan misupak. Apan tungod sa akong maayong panggawi, ang akong asawa mihukom sa pagtambong sa tigom sa Kingdom Hall. Siya dulot nga nakadayeg sa kamabination sa mga Saksi ug sa ilang gipakitang personal nga interes. Ilabinang nakadayeg siya sa paggamit nila sa Bibliya. Ingong resulta, ang akong asawa ug duha ka kinamagulangang mga anak nga babaye midawat ug pagtuon sa Bibliya uban sa mga Saksi ni Jehova. Handurawa ang akong kalipay sa dihang ang tulo kanila nabawtismohan diha sa “Matagnaong Pulong sa Diyos” nga Distritong Kombensiyon niadtong 1999!
“Oo, natagbaw ang akong pagpangita sa kamatuoran. Karon ang among tibuok pamilya, lakip ang akong asawa ug upat ka anak, nahiusa diha sa putli nga pagsimba kang Jehova.”