Mga Magmamantala sa Gingharian Nagtaho

Nakakaplag sa Kamatuoran Diha sa Wala-Damhang Lugar

KABUBUT-ON sa Diyos nga ang “tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Timoteo 2:3, 4) Tungod niana, ang mga Saksi ni Jehova nagpatik ug nag-apod-apod ug minilyong kopya sa Bibliya ug mga tabang sa pagtuon sa Bibliya. Usahay, kining mga basahona nakatabang sa matinud-anog kasingkasing nga mga tawo nga makakat-on sa kamatuoran diha sa mga paagi nga wala gayod damha. Maylabot niini, ang mga magmamantala sa Gingharian sa Freetown, Sierra Leone, nagtaho sa mosunod nga kasinatian.

Si Osman mao ang ikaduhang anak lalaki sa pamilya nga may siyam ka anak. Kay namatuto diha sa relihiyosong panimalay, regular siyang mosimba uban sa iyang amahan. Apan, nabalaka pag-ayo si Osman sa gitudlo sa iyang relihiyon bahin sa impiyerno. Dili niya masabtan kon nganong ang usa ka maluluy-ong Diyos magsakit sa daotang mga tawo pinaagi sa pagsunog kanila diha sa kalayo. Ang tanang pagpatin-aw nga gihimo aron matabangan si Osman nga masabtan ang doktrina sa impiyernong kalayo wala makahatag kaniyag kalinaw sa hunahuna.

Usa ka adlaw niana, sa dihang 20 anyos na si Osman, iyang namatikdan ang usa ka asul nga basahon nga nalubong ug diyutay diha sa basurahan. Kay gusto lagig mga basahon, iya kining gipunit, gipaphaan, ug nakita ang ulohan nga Ang Kamatuoran nga Motultol sa Kinabuhing Dayon.a

‘Unsa kaha ning kamatuorana?’ nahibulong si Osman. Kay napukaw ang iyang kamaukiton, gidala ni Osman ang libro sa ilang balay ug gihuman dayon kini ug basa. Nalipay siya pag-ayo sa pagkahibalo nga ang Diyos duna diay personal nga ngalan—Jehova! (Salmo 83:18) Nakat-onan usab ni Osman nga ang labaw nga hiyas sa Diyos mao ang gugma ug bisan ang ideya sa pagsakit sa mga tawo diha sa nagdilaab nga dapit dulumtanan alang Kaniya. (Jeremias 32:35; 1 Juan 4:8) Sa kataposan, nabasa ni Osman nga sa dili madugay si Jehova magpatunghag yutan-ong paraiso diin ang mga tawo mabuhi sa walay kataposan. (Salmo 37:29; Pinadayag 21:3, 4) Pagkakahibulongang kamatuoran gikan sa usa ka maluluy-on, mahigugmaong Diyos! Kinasingkasing nga gipasalamatan ni Osman si Jehova sa pagtugot nga makaplagan niya ang kamatuoran diha sa wala gayod damhang lugar.

Pipila ka adlaw sa ulahi, sa tabang sa ubang mga higala, nakaplagan ni Osman ang Kingdom Hall sa mga Saksi ni Jehova ug mitambong sa tigom sa unang higayon. Didto sa tigomanan, gihangyo niya ang usa ka Saksi nga tun-an siya sa Bibliya. Bisan pa sa grabeng pagsupak sa pamilya, si Osman nagpadayon sa pag-uswag sa espirituwal ug nabawtismohan. (Mateo 10:36) Karon, siya nag-alagad isip ansiyano sa kongregasyon. Pagkatalagsaon nga kining tanan maoy resulta sa pagkakaplag ug usa ka basahon sa Bibliya diha sa basurahan!

[Footnote]