‘Diyos Ko, Nganong Imong Gitugotan Kini?’
NAHINUMDOMAN pa ni Ricardo nga naglingkod siya tupad sa iyang asawa, si Maria, diha sa lawak-hulatanan sa doktor.a Wala silay kaisog sa pagbasa sa mga resulta sa kinaulahiang paghiling kang Maria. Dayon, gibuksan ni Ricardo ang sobre, ug gidalidali nila pagtan-aw ang medikal nga mga termino sa maong taho. Ilang namatikdan ang pulong “kanser,” ug mihilak silang duha sa dihang ilang naamgohan ang bug-os nga ipasabot nianang pulonga.
“Maluloton kaayo ang doktor,” nahinumdom si Ricardo, “apan klaro nga nahibalo siya sa kagrabe sa situwasyon tungod kay siya nagsigeg sulti namo nga kinahanglan kaming mosalig sa Diyos.”
Sa wala pa magsugod ang pagtambal pinaagig radyasyon, namatikdan sa doktor ni Maria nga dili niya makontrolar ang paglihok sa iyang tuong tiil. Ang dugang nga pagsusi nagpakita nga ang kanser nakaabot na sa iyang utok. Human sa usa lamang ka semanang pagtambal, gihunong ang radyasyon. Si Maria nakoma ug namatay duha ka bulan sa ulahi. “Nagpasalamat ko nga natapos na ang iyang pag-antos,” matod ni Ricardo, “apan gimingaw kaayo ko niya nga nangandoy kong matapos na sab unta ang akong kinabuhi. Kanunay akong motuaw sa Diyos: ‘Nganong imong gitugotan kini nga mahitabo?’”
Sa Dihang Mahitabo ang Trahedya, Motungha ang Daghang Pangutana
Sama kang Ricardo, daghan kaayong tawo sa tibuok kalibotan ang mapugos sa pag-atubang sa katinuoran sa pag-antos. Kasagaran, ang mga inosente maoy mag-antos. Hunahunaa ang makahilap-sa-kasingkasing nga kasubo tungod sa way-hunong nga mga gubat nga naghampak sa mga tawo. O tagda ang kasakit nga gibati sa daghang biktima sa paglugos, pag-abuso sa bata, kapintasan diha sa panimalay, ug uban pang pagkadaotan nga gibuhat sa tawo. Latas sa kasaysayan daw walay kinutoban ang inhustisya ug kasakit nga andam nga buhaton sa mga lalaki ug mga babaye sa usag usa. (Ecclesiastes 4:1-3) Unya anaa ang tumang kaguol sa mga biktima sa kinaiyanhong mga katalagman o sa mga sakit sa emosyon, utok, ug lawas. Dili ikatingala nga daghan ang mangutana, “Nganong gitugotan man sa Diyos ang maong pag-antos?”
Ang pag-antos dili gayod sayon nga atubangon bisan niadtong dunay relihiyosong mga tinuohan. Tingali ikaw usab mahibulong kon nganong gitugotan sa usa ka mahigugmaon, gamhanan-sa-ngatanan nga Diyos nga mag-antos ang tawo. Hinungdanon alang sa atong kalinaw sa hunahuna ug sa atong relasyon sa Diyos nga atong makaplagan ang makapatagbaw ug matinud-anong tubag niining makapalibog nga pangutana. Ang Bibliya naghatag sa tubag. Palihog tagda kon unsay ikasulti niini ingon sa ipakita diha sa sunod artikulo.
[Footnote]
a Giusab ang mga ngalan.
[Mga hulagway sa panid 3]
Ang doktor nagsigeg sulti namo nga kinahanglan kaming mosalig sa Diyos