Pagtuo sa Usa ka Diyos nga Basin Wala Nato Mailhi
DUHA sa tulo ka tawo sa Alemanya nagtuo ug Diyos. Apan, sa dihang kapin sa usa ka libo ka tawo ang gipahubit bahin sa Diyos nga ilang gituohan, halos kada usa kanila mihatag ug lahi nga tubag. “Ang mga Aleman may tinagsa ka malangkobong panglantaw bahin sa Diyos nga magkalahi sama sa panagkalahi sa mga tawo mismo,” nagtaho ang magasing FOCUS. Bisan tuod dalayegon ang pagtuo sa Diyos, dili ba makapasubo kon ang usa ka tawo nga nagtuo kaniya wala mahibalo kon unsang matanga siya sa pagkadiyos?
Kining pagkawalay-kahibalo bahin sa kinaiyahan o persona sa Diyos makaplagan dili lamang sa Alemanya; naglungtad usab kini sa ubang mga bahin sa Uropa. Usa ka surbi nga gipahigayon sa Austria, Britanya, ug Netherlands nagbutyag nga kasagaran kaayong gituohan nga ang Diyos maoy “usa ka mas hataas nga gahom o dili mahubit nga tinago.” Ilabina taliwala sa mga batan-on, bisan kadtong nagtuo kaniya, ang Diyos usa ka misteryo.
Nakaila Ka ba sa Diyos sa Personal?
Dako kaayo ang kalainan tali sa pagkasayod bahin sa usa ka tawo ug sa pagkaila kaniya sa personal. Ang pagkaila sa usa ka tawo—sa usa ka hari nga dili maduol, sa usa ka hawod nga atleta, o usa ka artista sa pelikula—maoy pag-ila lamang nga siya naglungtad. Apan, ang pagkaila sa usa ka tawo sa personal nagpasabot ug dugang pa niana. Naglakip kini sa pagkasinati sa kinaiya, panggawi, mga pagbati, gusto ug mga dili-gusto, ug sa mga plano sa umaabot sa maong tawo. Ang pagkaila sa usa ka tawo sa personal magbukas sa dalan sa pagpakigsuod kaniya.
Ginatos ka linibong tawo ang nakahinapos nga ang yanong pagbaton ug hanap nga ideya bahin sa Diyos—o yanong pagkasayod nga siya naglungtad—dili igo. Sila nakahimog dugang lakang pinaagi sa pagkaila sa Diyos sa personal. Nagmapuslanon ba kini kanila? Usa ka tawo nga ginganlag Paul, nga nagpuyo sa amihanang Alemanya ug kinsa may hanap lamang nga pagtuo sa Diyos kaniadto, nakahukom sa pag-ila Kaniya sa personal. Si Paul misaysay: “Ang pag-ila sa Diyos sa personal nagkinahanglag panahon ug paningkamot, apan ang sangpotanan mapuslanon kaayo. Ang pagpakigsuod sa Maglalalang makapahayahay sa adlaw-adlaw nga kinabuhi.”
Takos ba ang panahon ug paningkamot nga gikinahanglan aron mailhan ang Diyos sa personal? Palihog basaha ang sunod nga artikulo.
[Blurb sa panid 3]
Dako kaayo ang kalainan tali sa pagkasayod bahin sa usa ka tawo ug sa pagkaila kaniya sa personal