Asa Nimo Makaplagan ang Tinuod nga Espirituwal nga mga Prinsipyo?

“KON mosunod ka sa usa ka relihiyon tungod sa tradisyon sa pamilya, nganong dili na lang pilion ang relihiyon sa mga Celt nga gituman sa atong mga katigulangan 2,000 ka tuig kanhi?” makantalitahong nangutana si Rodolphe. Ang maong ideya nagtukmod sa iyang batan-ong mamiminaw sa pagpahiyom.

“Ang akong relasyon uban sa Diyos hinungdanon kaayo kanako,” miingon si Rodolphe. “Supak gayod ako sa ideya nga ang relihiyosong mga pagtuo kinahanglang ipugos kanako tungod sa tradisyon, tungod lamang kay ang mga membro sa akong pamilya nga nagkinabuhi tinagpulo o gatosan pa gani ka tuig kanhi nagtuman sa usa ka matang sa relihiyon.” Gitimbangtimbang pag-ayo ni Rodolphe ang mga butang; wala niya isipa kining hinungdanong butang ingong usa ka butang lamang nga iyang napanunod.

Bisan tuod ang pagpasa sa relihiyon gikan sa usa ka kaliwatan ngadto sa lain dili na kaayo kaylap karon, ang kinabag-an sa katawhan nagpabilin gihapon sa relihiyon sa ilang pamilya. Apan husto ba gayod nga magpabilin sa relihiyosong mga prinsipyo sa ginikanan sa usa? Unsay giingon sa Bibliya?

Human sa 40 ka tuig sa desyerto, si Josue, ang manununod ni Moises, naghatag sa mga Israelinhon ug kapilian: “Karon kon daotan sa inyong mga mata nga moalagad kang Jehova, pagpili alang sa inyong kaugalingon karong adlawa kon kinsay inyong alagaran, kon sa mga diyos ba nga gialagaran sa inyong mga katigulangan didto sa pikas nga bahin sa Suba o sa mga diyos sa mga Amorihanon kang kansang yuta inyong gipuy-an. Apan kon bahin kanako ug sa akong panimalay, kami mag-alagad kang Jehova.”—Josue 24:15.

Usa sa mga katigulangan nga gitumong ni Josue mao si Tera, ang amahan ni Abraham, kinsa nagpuyo sa siyudad sa Ur, nga nianang panahona nahimutang sa sidlakan sa Suba sa Euprates. Diyutay ray gihisgotan sa Bibliya bahin kang Tera, gawas sa impormasyon nga siya nagsimba ug laing mga diyos. (Josue 24:2) Ang iyang anak nga si Abraham, bisan tuod walay bug-os nga kahibalo sa katuyoan sa Diyos, andam nga mobiya sa iyang gipuy-ang siyudad sa dihang gisugo siya ni Jehova sa pagbalhin. Oo, si Abraham mipili ug relihiyon nga lahi nianang sa iyang amahan. Sa pagbuhat niana, si Abraham nakadawat sa mga panalangin nga gisaad sa Diyos kaniya, ug siya nahimong tawo nga giila sa daghang relihiyon ingong “amahan sa tanan nga nagtuo sa Diyos.”—Roma 4:11, Today’s English Version.

Giasoy usab sa Bibliya sa positibong paagi ang sugilanon ni Ruth, usa ka kaliwat ni Jesu-Kristo. Si Ruth, nga usa ka Moabihanong naminyo sa usa ka Israelinhon, nabiyuda ug nag-atubang ug pagpili: magpabilin sa iyang nasod o mobalik uban sa iyang ugangang babaye ngadto sa Israel. Kay giila ang labaw nga bili sa pagsimba kang Jehova kon itandi sa idolatrosong pagsimba nga gihimo sa iyang mga ginikanan, miingon si Ruth sa iyang ugangang babaye: “Ang imong katawhan mahimong akong katawhan, ug ang imong Diyos akong Diyos.”—Ruth 1:16, 17.

Nagkomento sa kahinungdanon niining maong rekord diha sa kanon sa Bibliya, ang Dictionnaire de la Bible nagsaysay nga kining maong asoy nagpakita “kon sa unsang paagi nga ang usa ka babaye nga nahimugso sa langyawng nasod, natawo taliwala sa paganong mga tawo nga mabatokon ug nagdumot sa Israel, . . . tungod sa iyang gugma alang sa nasod ni Jehova ug sa pagsimba kaniya, sumala sa pagbuot sa Diyos nahimong katigulangan sa balaan nga Haring David.” Si Ruth wala magpanuko sa pagpili ug relihiyon nga lahi nianang sa iyang mga ginikanan, ug tungod sa maong desisyon, gipanalanginan siya sa Diyos.

Ang asoy bahin sa sinugdanan sa Kristiyanidad mas klarong naghatag sa mga rason kon nganong ang mga tinun-an ni Jesus mibiya sa relihiyon sa ilang mga katigulangan. Sa usa ka makapadani kaayong pakigpulong, si apostol Pedro nag-awhag sa iyang mga mamiminaw nga ‘luwason ang ilang kaugalingon gikan niining baliko nga kaliwatan’ pinaagi sa paghinulsol sa ilang mga sala ug pagpabawtismo sa ngalan ni Jesu-Kristo. (Buhat 2:37-41) Usa sa labing talagsaong mga pananglitan mao kanang kang Saulo, usa ka Hudiyong maglulutos sa mga Kristohanon. Samtang nagpadulong sa Damasco, nakita niya si Kristo diha sa usa ka panan-awon, diin human niana si Saulo nahimong Kristohanon ug nailhan ingong si apostol Pablo.—Buhat 9:1-9.

Ang kadaghanan sa unang mga Kristohanon wala makaagi nianang talagsaong kasinatian. Bisan pa niana, ang tanan kinahanglang mobiya sa Judaismo o sa pagsimba ug lainlaing paganong mga diyos. Kadtong midawat sa Kristiyanidad nagbuhat niana nga bug-os nga nahibalo sa mga kamatuoran, nga kasagaran human sa dugayng mga panaghisgot bahin sa papel ni Jesus ingong Mesiyas. (Buhat 8:26-40; 13:16-43; 17:22-34) Kadtong unang mga Kristohanon klarong gipahibalo sa panginahanglan nga magbag-o sa ilang kinabuhi. Ang tanan gidapit, mga Hudiyo ug dili-Hudiyo, apan ang mensahe mao ra gihapon. Aron mapahimut-an ang Diyos, kinahanglang sundon ang bag-ong matang sa pagsimba, kanang sa Kristiyanidad.

Usa ka Pagpili nga Naglangkit Kanato

Nagkinahanglan gayod ug kaisog sa unang siglo sa pagsalikway sa relihiyosong mga tradisyon sa pamilya—Judaismo, pagsimba sa emperador o pagsimba sa paganong mga diyosdiyos—ug pag-anib sa relihiyon nga gitamay sa mga Hudiyo ug Romano. Kining maong pagpili sa wala madugay misangko sa mabangis nga paglutos. Karon, nagkinahanglan gihapon ug susamang kaisog sa pagdumili nga “maimpluwensiyahan sa kasagarang tinamdan nga mopahiuyon sa kadaghanan,” sumala sa pagkasulti niana ni Hippolyte Simon, Katolikong obispo sa Clermont-Ferrand, diha sa iyang librong Vers une France païenne? (Ang Pagkahimong Pagano sa Pransiya?) Nagkinahanglag kaisog ang pag-anib sa usa ka minoriya nga relihiyon nga usahay gisaway, ang mga Saksi ni Jehova.

Si Paul, usa ka batan-on nga taga-Bastia, Corsica, kinsa namatuto sa relihiyong Katoliko, nakigbahin usahay sa mga kalihokan sa simbahan, sama sa pagpamaligyag keyk aron makatigom ug kuwarta alang sa mga organisasyon sa Katoliko nga nagtabang sa mga kabos. Kay gustong masabtan pa ang Bibliya, miuyon siya sa regular nga pagpakighisgot uban sa mga Saksi ni Jehova. Ngadtongadto, iyang naamgohan nga ang iyang nakat-onan maghatag kaniya ug dumalayong mga benepisyo. Busa, bug-os nga gidawat ni Paul ang mga prinsipyo sa Bibliya ug nahimong usa sa mga Saksi ni Jehova. Gitahod sa iyang mga ginikanan ang iyang pagpili, nga wala mag-apektar sa ilang suod nga relasyon sa pamilya.

Si Amélie nagpuyo sa habagatang Pransiya. Ang mga membro sa iyang pamilya maoy mga Saksi ni Jehova sulod sa upat ka kaliwatan. Nganong mipili man siya sa pagdawat sa relihiyosong mga prinsipyo sa iyang mga ginikanan? “Dili ka mahimong usa sa mga Saksi ni Jehova tungod kay ang imong mga ginikanan o mga apohan maoy mga Saksi ni Jehova,” matod niya. “Apan sa ngadtongadto, moingon ka sa imong kaugalingon, ‘Ako kining relihiyon tungod kay mao kiniy akong gituohan.’” Sama sa daghang ubang batan-on nga mga Saksi ni Jehova, si Amélie nahibalo nga ang iyang lig-ong relihiyosong mga pagtuo naghatag kaniyag katuyoan sa kinabuhi ug maoy tuboran sa dumalayong kalipay.

Kon Nganong Dawaton ang mga Prinsipyo sa Diyos

Ang Proverbio, kapitulo 6, bersikulo 20, nagdasig niadtong gustong magpahimuot sa Diyos: “Bantayi, Oh anak ko, ang sugo sa imong amahan, ug ayaw talikdi ang balaod sa imong inahan.” Imbes isugyot ang binuta nga pagsugot, ang maong tambag nag-awhag sa mga batan-on sa pagdawat sa mga sukdanan sa Diyos pinaagi sa pagpalalom sa ilang pagtuo ug pinaagi sa pagbarog mismo atubangan sa Diyos. Giawhag ni apostol Pablo ang iyang mga kauban sa ‘pagtino sa tanang butang,’ sa pagsusi kon natudloan ba sila sumala sa Pulong sa Diyos ug sa Iyang kabubut-on, ug sa paglihok pinasukad niana.—1 Tesalonica 5:21.

Gimatuto man diha sa Kristohanong panimalay o wala, ang kapin sa unom ka milyong Saksi ni Jehova, bata ug tigulang, nakahimo sa maong desisyon. Pinaagi sa maampingong pagtuon sa Bibliya, ilang nakaplagan ang kasaligang mga tubag sa ilang mga pangutana bahin sa katuyoan sa kinabuhi ug klarong nasabtan ang kabubut-on sa Diyos alang sa katawhan. Sa dihang nakakuha na niining maong kahibalo, ilang gidawat ang mga prinsipyo sa Diyos ug gibuhat ang ilang kinamaayohan sa pagtuman sa kabubut-on sa Diyos.

Regular ka man nga tigbasa niining magasina o dili, nganong dili dawaton ang tanyag sa mga Saksi ni Jehova nga tabangan ka sa pagsusi sa espirituwal nga mga prinsipyo sa Bibliya. Niining paagiha, makahimo ka sa ‘pagtilaw ug pagtan-aw nga si Jehova maayo’ ug makabaton ug kahibalo nga, kon ipadapat, motultol sa kinabuhing dayon.—Salmo 34:8; Juan 17:3.

[Hulagway sa panid 5]

Upat ka kaliwatan sa usa ka pamilya sa mga Saksi ni Jehova sa Pransiya

[Hulagway sa panid 7]

Si Ruth mipili sa pag-alagad kang Jehova inay sa mga diyos sa iyang mga katigulangan