Relihiyon—Makaayo ba o Makadaot?

“AKO utangan sa Kristiyanidad tungod sa nahimo niini kanako, ug busa, ako nagtuo nga ang kalibotan diin kita nagkinabuhi sulod na sa milabayng 2000 ka tuig utangan usab sa Kristiyanidad.”—Pasiuna, Two Thousand Years—The First Millennium: The Birth of Christianity to the Crusades.

Ang maong ekspresyon sa pag-uyon alang sa “Kristiyanidad” gisulti sa Ingles nga magsusulat ug magsisibya nga si Melvyn Bragg. Ang iyang mga pulong nagbanaag sa mga sentimento sa milyonmilyong molupyo sa yuta nga may susamang pagbati sa dakong pagkautangan ug pagkamaunongon ngadto sa usa ka relihiyon o sa bisan unsang relihiyon. Kombinsido sila nga ang relihiyon nakahatag ug kaayohan sa ilang kinabuhi. Pananglitan, usa ka magsusulat nag-ingon nga ang Islam “nakadasig ug usa ka dakong sibilisasyon . . . [nga] nakahatag ug kaayohan sa tibuok kalibotan.”

Ang Papel sa Relihiyon—Makaayo o Makadaot?

Hinunoa, ang sunod nga gipamulong ni Bragg nagpatunghag seryosong pangutana kon ang relihiyon sa kinatibuk-an nakahatag ba gayod ug kaayohan. Siya midugang: “Kinahanglang hatagan usab akog katin-awan sa Kristiyanidad.” Alang sa unsa nga siya gustong hatagag katin-awan? “Tungod sa pagkapanatiko, pagkadaotan, pagpamintas ug sa tinuyong pagkawalay-alamag nga nahitabo usab sa dakong bahin sa ‘kasaysayan’ niini,” matod pa niya.

Daghan ang moingon nga ang pagkapanatiko, pagkadaotan, pagpamintas, ug tinuyong pagkawalay-alamag nakadaot sa dungog sa kadaghanan sa mga relihiyon sa kalibotan sa tibuok kasaysayan. Sa ilang hunahuna ang relihiyon nagpakaaron-ingnon lamang nga tig-agak sa katawhan—nga luyo sa malinglahong dagway sa pagkaligdong ug pagkabalaan niini, sa pagkatinuod kini maoy puno sa pagkasalingkapaw ug kabakakan. (Mateo 23:27, 28) “Ang labing komon nga mensahe diha sa atong mga basahon mao nga ang relihiyon bililhon kaayo diha sa atong sibilisasyon,” nag-ingon ang A Rationalist Encyclopædia. “Ug kini gipamatud-an gayod sa kasaysayan nga sayop,” kini mipadayon.

Pagbasag bisan unsang mantalaan karong adlawa, ug makakaplag kag daghan kaayong mga pananglitan sa relihiyosong mga lider nga nagwali bahin sa gugma, pakigdait, ug kamabination apan nagsulsol sa pagdumot ug naggamit sa ngalan sa Diyos aron pakamatarongon ang ilang mapintas nga mga panag-away. Dili ikatingala nga daghang tawo nagtuo nga ang relihiyon kanunay gayong makahatag ug kadaot sa kinabuhi!

Mas Maayo pag Walay Relihiyon?

Nakahinapos pa gani ang uban, sama sa Ingles nga pilosopo nga si Bertrand Russell, nga maayo unta kon sa ngadtongadto “ang tanang matang sa relihiyosong pagtuo mahanaw.” Sa ilang panglantaw, ang pagwala sa relihiyon mao ang bugtong dumalayon nga solusyon sa tanang suliran sa katawhan. Apan, ilang nataligam-an ang kamatuoran nga kadtong nagsalikway sa relihiyon makapalambo gihapon sa pagdumot ug pagkapanatiko sama ra niadtong maunongong nagpaluyo niana. Ang magsusulat bahin sa relihiyon nga si Karen Armstrong nagpahinumdom kanato: “Labing menos, gipakita sa Holocaust nga ang kalibotanong panghunahuna mahimong sama ra ka malaglagon sa bisan unsang relihiyosong krusada.”—The Battle for God—Fundamentalism in Judaism, Christianity and Islam.

Busa makahatag ba gayod ug kaayohan ang relihiyon, o kini, sa pagkatinuod, mao gayod ang pangunang hinungdan sa mga suliran sa katawhan? Ang sulbad ba niining mga sulirana mao ang paghanaw sa tanang relihiyon? Susiha kon unsay giingon sa Bibliya bahin niini sa sunod nga artikulo. Ang tubag mahimong makapatingala kanimo.