Si Jesu-Kristo—Kon Unsay Epekto sa Iyang Mensahe Kanimo

“Ako mianhi aron sila makabaton ug kinabuhi ug makabaton niini nga dagaya.”—JUAN 10:10.

ANG pangunang hinungdan sa pag-anhi ni Jesu-Kristo sa yuta mao ang paghatag, dili ang pagdawat. Pinaagi sa iyang ministeryo, siya naghatag ug bililhong gasa sa mga tawo—usa ka mensahe nga nagpadayag sa kamatuoran bahin sa Diyos ug sa Iyang kabubut-on. Kadtong mosanong sa maong mensahe makatagamtam ug mas maayong kinabuhi karon, ingon sa nasinati sa minilyong tinuod nga Kristohanon.a Apan ang kinauyokan sa mensahe nga gisangyaw ni Jesus mao ang labing bililhong gasa—ang hingpit nga kinabuhi nga iyang gihatag alang kanato. Ang atong dumalayong kaayohan nagdepende sa atong pagsanong niining labing hinungdanong bahin sa iyang mensahe.

Kon unsay gihatag sa Diyos ug ni Kristo Si Jesus nahibalo nga siya makasinatig masakit nga kamatayon sa kamot sa iyang mga kaaway. (Mateo 20:17-19) Apan, diha sa iyang iladong mga pulong sa Juan 3:16, siya miingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” Si Jesus miingon usab nga siya mianhi aron “sa paghatag sa iyang kalag [o, kinabuhi] nga usa ka lukat baylo sa daghan.” (Mateo 20:28) Nganong miingon siya nga ang iyang kinabuhi ihatag inay nga kuhaon?

Tungod sa dako kaayong gugma, ang Diyos mihimog paagi aron maluwas ang mga tawo gikan sa napanunod nga sala ug sa daotang epekto niini—ang pagkadili-hingpit ug kamatayon. Gihimo kini sa Diyos pinaagi sa pagpadala sa iyang bugtong nga Anak dinhi sa yuta aron mamatay ingong halad. Si Jesus kinabubut-ong mituman, ug iyang gihatag ang iyang hingpit nga tawhanong kinabuhi alang kanato. Kini nga tagana, nga gitawag ug lukat, mao ang kinalabwang gasa sa Diyos alang sa mga tawo.b Usa kini ka gasa nga motultol sa kinabuhing walay kataposan.

Kon unsay angay nimong buhaton Ang lukat ba usa ka gasa alang kanimo? Kana nagdepende kanimo. Sa pag-ilustrar: Handurawa nga dunay nagtunol kanimog gasa. Maimo lamang ang maong gasa kon imo kanang dawaton. Sa samang paagi, si Jehova nagtanyag sa lukat alang kanimo, apan kini nga gasa dili maimo gawas kon imong dawaton kini. Sa unsang paagi?

Si Jesus nag-ingon nga kadtong “magpasundayag ug pagtuo” kaniya mao ang makadawat ug kinabuhing walay kataposan. Ang pagtuo nalangkit sa imong paagi sa pagkinabuhi. (Santiago 2:26) Ang pagpasundayag ug pagtuo kang Jesus nagpasabot nga imong ipahiuyon ang imong kinabuhi sa mga butang nga iyang gisulti ug gibuhat. Aron mahimo kana, kinahanglan nga imong mailhan pag-ayo si Jesus ug ang iyang Amahan. Si Jesus miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.”—Juan 17:3.

Mga 2,000 ka tuig kanhi, si Jesu-Kristo nagsangyaw ug usa ka mensahe nga nakapabag-o sa kinabuhi sa milyon-milyong tawo sa tibuok kalibotan. Gusto ka bang mahibalo ug dugang sa maong mensahe ug kon sa unsang paagi ikaw ug ang imong mga minahal makabenepisyo niini, dili lamang karon kondili sa walay kataposan? Ang mga Saksi ni Jehova malipay sa pagtabang kanimo.

Ang mosunod nga mga artikulo motabang kanimo nga mas mailhan pa si Jesu-Kristo, ang tawo nga nagsangyaw ug usa ka mensahe nga makapabag-o sa imong kinabuhi sa walay kataposan.

[Mga footnote]