Ang Paglahutay sa Kalisdanan Nagpalig-on sa Among Pagsalig Kang Jehova

Sumala sa giasoy ni Ada Dello Stritto

Mao pay akong pagkahumag kopya sa inadlawng teksto diha sa akong notbok. Trayentay sayis anyos na ko, apan gidangtan kog duha ka oras sa pagsulat niana. Nganong dugay man kaayong nahuman? Ipatin-aw kana ni Mama.—Joel

NABAWTISMOHAN mi sa akong bana niadtong 1968. Human ko manganak ug duha ka himsog nga bata, si David ug Marc, gisundan kinig laing lalaki, si Joel. Natawo siya nga kulang sa bulan niadtong 1973 sa usa ka ospital sa lungsod sa Binche, Belgium, mga 60 kilometros habagatan sa Brussels. Mitimbang lamang siyag 1.7 kilos. Paggawas nako sa ospital, kinahanglang ibilin si Joel aron madugangan ang iyang timbang.

Paglabay sa pipila ka semana, wala gihapon moarang-arang ang kahimtang sa among anak. Busa, nakahukom mi sa akong banang si Luigi nga dad-on siya sa doktor sa mga bata. Human siya maeksamin, ang doktor miingon: “Gikasubo ko nga dili siya himsog sama sa iyang mga igsoon.” Wala mi makatingog. Nianang higayona, akong naamgohan nga dunay seryosong suliran sa panglawas ang among anak. Dayon giestorya sa doktor ang akong bana nga silasila ra: “Ang imong anak adunay trisomy 21,” nga nailhan usab ingong Down syndrome.a

Kay nasubo sa dayagnosis sa doktor, nakadesisyon mi nga mokonsultag laing espesyalista. Mga usa ka oras niyang gieksamin si Joel nga wala magtingog. Paminaw namo ni Luigi, dugay na kaayo ming naghulat. Sa kataposan, ang doktor mitan-aw kanamo ug miingon, “Ang inyong anak magsalig gayod kaninyo.” Dayon, maluloton siyang miingon, “Apan magmalipayon si Joel tungod kay gimahal siya sa iyang ginikanan!” Natandog kaayo mi sa iyang gisulti. Unya, akong gikugos sa Joel ug amo siyang gidala sa balay. Nianang tungora, walo pa lang siya ka semana.

Napalig-on sa mga Tigom ug sa Ministeryo

Nakita sa dugang pag-eksamin nga abnormal usab ang gidak-on sa kasingkasing ni Joel ug duna siyay grabeng sakit sa bukog. Kay dako man kaayo ang iyang kasingkasing, moduot kini sa iyang baga maong dali ra siyang maimpeksiyon. Pag-edad niyag upat ka bulan, nasakit siyag broncho-pneumonia. Busa, gidala na pod namo siya sa ospital, diin siya gikuwarentinas. Sakit kaayong magtan-aw niya nga nag-antos. Gusto namo siyang kugoson ug huwaphuwapon, apan wala mi paduola kang Joel sulod sa napulo ka semana. Wala mi laing mahimo ni Luigi gawas sa pagtan-aw kaniya, pagpalig-on sa usag usa, ug pag-ampo kang Jehova.

Samtang didto si Joel sa ospital, padayon ming nagtambong sa mga tigom uban ni David ug Marc, nga nag-edad ug 6 ug 3 anyos niadtong tungora. Kon tua mi sa Kingdom Hall sama ra nga si Jehova mahigugmaong naghawid sa among kamot. Sa mga oras nga tua mi didto kauban sa mga igsoon, among gibati nga natugyan namo ang among palas-anon kang Jehova, ug among nabatonan ang kalinaw sa hunahuna. (Sal. 55:22) Bisan ang mga nars nga nag-atiman kang Joel miingon nga ang among pagtambong sa mga tigom nakatabang kanamo nga magpabiling timbang.

Nianang panahona, nangayo sab kog kusog kang Jehova aron makagawas sa kanataran. Imbes magsige na lag hilak sa balay, gusto nakong isulti sa uban kon nganong napalig-on ako sa akong pagsalig sa mga saad sa Diyos bahin sa kalibotan nga wala nay sakit. Sa matag higayon nga makasangyaw ko, akong bation nga gitubag ni Jehova ang akong mga pag-ampo.

“Kahibulongan Kaayo Ni!”

Pagkamalipayon gayod nga adlaw kadto sa dihang, sa kataposan, amo nang madala si Joel sa balay! Apan, wala magdugay ang among kalipay kay pagkaugma migrabe na pod siya, ug kinahanglan na usab siyang idali sa ospital. Human siya maeksamin, giingnan mi sa mga doktor: “Unom na lang ka bulan nga mabuhi si Joel.” Paglabay sa duha ka bulan, sa dihang mga walo ka bulan na siya, morag matinuod ang giingon sa doktor kay migrabe pa ang iyang kahimtang. Usa ka doktor ang miingon: “Gikasubo ko, wala na mi mahimo.” Unya midugang siya: “Si Jehova na lay makatabang niya.”

Mibalik ko sa kuwarto ni Joel. Bisag naluya na ko, dili ko gustong mobiya sa iyang kiliran. Ubay-ubayng sister ang nagpulipulig bantay uban nako kay kinahanglang atimanon ni Luigi ang among duha pa ka anak. Milabay ang usa ka semana. Dayon, kalit lang giatake sa kasingkasing si Joel. Nagdalidalig sulod ang mga nars, apan wala silay mahimo. Human sa pipila ka minutos, usa kanila ang hinayng miingon, “Wala na siya . . . ” Nahugno kaayo ko. Midanguyngoy ko ug migawas. Misulay kog ampo kang Jehova, apan walay pulong nga mogula sa akong baba. Paglabay sa 15 minutos, giingnan ko sa usa ka nars, “Naulian si Joel!” Gigunitan niya ang akong bukton ug miingon, “Dali, tan-awa siya.” Pag-adto nako kang Joel, nagpitik na ang iyang kasingkasing! Dali rang mikaylap ang balita nga naulian siya. Giadto siya sa mga nars ug doktor, ug daghan ang miingon, “Kahibulongan kaayo ni!”

Makalakaw Na Pag-edad ug Kuwatro Anyos

Sa unang mga tuig sa kinabuhi ni Joel, kanunay ming ingnan sa doktor, “Kinahanglang panggaon ninyo pag-ayo si Joel.” Sanglit nasinati namo ni Luigi ang mahigugmaong pag-atiman ni Jehova ilabina human sa pagkatawo ni Joel, gusto usab namong mahalon pag-ayo ang among anak. Daghan mig kahigayonan sa pagbuhat niana kay kanunay siyang nagkinahanglan sa among tabang.

Kada tuig sulod sa unang pito ka tuig ni Joel, among giatubang ang mao rang mga problema. Tali sa Oktubre ug Marso, magsulod gawas mi sa ospital kay magsige siyag kasakit. Sa samang higayon, akong gipaningkamotan nga makagugol usab ug panahon kang David ug Marc kutob sa akong mahimo. Sa baylo, mitabang usab sila kang Joel nga mouswag—ug dihay wala damhang mga resulta. Pananglitan, ubay-ubayng doktor ang miingon nga dili na gyod makalakaw si Joel. Apan usa ka adlaw niana, sa dihang nag-edad siyag kuwatro anyos, si Marc miingon, “Sige na, Joel, ipakita kang Mama nga makalakaw ka!” Sa akong katingala, si Joel misugod paglakaw! Nalipay kaayo mi, ug kinasingkasing ming nagpasalamat kang Jehova. Sa ubang mga higayon, komendahan namo siya bisan sa gamay rang pag-uswag nga iyang nahimo.

Nagbunga ra ang Espirituwal nga Pagbansay Sukad sa Pagkamasuso

Kon posible, among dad-on si Joel sa mga tigom. Aron dili siya daling mataptag sakit, ibutang namo siya sa usa ka espesyal nga estroler nga gikoberag plastik. Bisag naa ra siya sa estroler, ganahan gihapon siyang motambong.

Napalig-on kaayo mi sa mga igsoon tungod sa ilang pagmahal ug paghatag kanamog praktikal nga tabang. Usa ka brader ang sagad mopahinumdom namo sa giingon sa Isaias 59:1: “Tan-awa! Ang kamot ni Jehova wala mahimong mubo kaayo nga kana dili makaluwas, ni ang iyang dalunggan bug-at kaayo nga kana dili makadungog.” Kining makapadasig nga mga pulong nakatabang namo nga mosalig kang Jehova.

Samtang nagdako si Joel, among gipaningkamotan nga mahimong panguna sa iyang kinabuhi ang pag-alagad kang Jehova. Kanunay ming makigsulti kaniya bahin kang Jehova sa paagi nga maugmad niya ang gugma alang sa iyang langitnong Amahan. Among gihangyo si Jehova nga panalanginan unta niya ang among paningkamot aron magbunga ang among pagbansay kaniya.

Sa dihang natin-edyer na si Joel, nalipay mi kay ganahan siyang magpaambit sa kamatuoran niadtong iyang mahimamat. Samtang nagpaayo gikan sa dakong operasyon sa nag-edad siyag 14 anyos, nalipay kaayo ko sa dihang miingon siya, “Ma, puwede ba nakong hatagan ang doktor ug librong Mabuhing Walay Kataposan?” Pipila ka tuig sa ulahi, kinahanglan na usab siyang operahan. Paminaw namo dili na siya makalabang niini. Sa wala pa ang operasyon, gitunol ni Joel sa iyang mga doktor ang usa ka sulat nga among giandam uban kaniya. Gipatin-aw niini ang iyang baroganan bahin sa dugo. Ang doktor nangutana kang Joel, “Uyon ka ba ini?” Lig-on siyang mitubag, “Oo, Doktor.” Nakadayeg kaayo mi sa pagsalig sa among anak sa iyang Maglalalang ug sa iyang determinasyon nga pahimut-an Siya. Matinabangon kaayo ang kawani sa ospital ug gipabilhan namo kini pag-ayo.

Espirituwal nga Pag-uswag

Sa edad nga 17, si Joel nagpabawtismo. Dili gayod namo makalimtan kadtong adlawa! Nalipay kaayo mi nga miuswag siya sa espirituwal. Sukad niadto, ang iyang gugma kang Jehova ug kasibot sa kamatuoran wala mawala. Gani, moingon siya sa tanan niyang makaila, “Ang kamatuoran maoy akong kinabuhi!”

Sa mag-20 anyos na siya, makamao na siyang mobasa ug mosulat, apan dili kadto sayon. Dako na kaayong kalamposan nga makasulat siyag usa ka pulong. Sukad niadto, iyang sugdan ang matag adlaw pinaagig pagbasa sa inadlawng teksto. Human niana, iyang kugihag kopya ang teksto diha sa iyang notbok, nga sa pagkakaron hilabihan nang daghana!

Panahon sa mga tigom, gusto ni Joel nga mosayo mig adto sa Kingdom Hall kay gusto niyang abiabihon ang mangabot. Ganahan siyang mokomento ug makigbahin sa mga demonstrasyon. Motabang usab siya sa pag-atiman sa mikropono ug sa uban pang buluhaton. Kada semana, kon itugot sa iyang lawas, mokuyog siya namo sa pagsangyaw. Niadtong 2007 gipahibalo sa kongregasyon nga si Joel gitudlo ingong ministeryal nga alagad. Nakahilak mi sa kalipay. Pagkadakong panalangin gikan kang Jehova!

Dili Mubo ang Kamot ni Jehova

Niadtong 1999 nag-atubang mig laing kalisdanan. Ang among sakyanan nabanggaan sa usa ka danghag nga drayber, ug grabeng naangol si Luigi. Kinahanglang putlon ang usa niya ka tiil, ug kadaghan operahi ang iyang dugokan. Pinaagi sa pagsalig kang Jehova, nabatonan na usab namo ang kusog nga ihatag niya sa iyang mga alagad nga nanginahanglan niana. (Filip. 4:13) Bisag baldado pa gihapon si Luigi, naningkamot mi nga magmapositibo. Kay dili man siya makatrabaho, mas daghan siyag panahon sa pag-atiman kang Joel. Tungod niana, makagugol kog dugang panahon alang sa espirituwal nga mga buluhaton. Mas maatiman usab ni Luigi ang espirituwal nga panginahanglan sa among pamilya ug sa kongregasyon, diin siya nag-alagad gihapon ingong koordinetor sa lawas sa mga ansiyano.

Tungod sa among kahimtang, kanunay ming magkauban ingong pamilya. Sa paglabay sa panahon, nakakat-on mi nga magmakataronganon ug dili magdahom ug labaw pa. Kon maluya kami, among isugid ang among gibati kang Jehova. Ikasubo nga sa dihang nagkinaugalingon na si David ug Marc, inanay silang mihunong sa pag-alagad. Nanghinaot mi nga mobalik sila kang Jehova.—Luc. 15:17-24.

Latas sa katuigan, among nasinati ang tabang ni Jehova ug nakakat-on mi sa pagsalig kaniya ilalom sa bisan unsang kalisdanan. Ang mga pulong sa Isaias 41:13 ilabinang makahuloganon kanamo: “Ako, si Jehova nga imong Diyos, nagahawid sa imong tuong kamot, ang Usa nga nag-ingon kanimo, ‘Ayaw kahadlok. Ako magatabang kanimo.’” Makapahupay kaayo ang pagkahibalo nga si Jehova nagahawid sa among kamot. Sa pagkatinuod, kami makaingon gayod nga ang paglahutay sa kalisdanan nagpalig-on sa among pagsalig sa among langitnong Amahan, si Jehova.

[Footnote]

[Mga hulagway sa panid 16, 17]

Si Joel ug iyang Mama, si Ada

[Hulagway sa panid 18]

Si Ada, Joel, ug Luigi

[Hulagway sa panid 19]

Si Joel malipayng moabiabi sa mga igsoon diha sa Kingdom Hall