Dili Kawang ang Imong Paghago!
ANG pamilyahanong pagsimba ug pagtuon sa Bibliya hinungdanon sa pagmatuto sa mga anak “sa disiplina ug sa pagdumala-sa-kaisipan ni Jehova.” (Efe. 6:4) Kon ikaw usa ka ginikanan, nahibalo ka nga ang mga bata daling laayon. Unsay imong buhaton aron magpabilin ang ilang atensiyon? Tagda ang gihimo sa pipila ka ginikanan.
“Sa gagmay pa ang mga bata,” miingon si George, nga taga-California, U.S.A., “gipaningkamotan namo sa akong asawa nga kanunayng makapaikag ang pamilyahanong pagtuon sa Bibliya. Usahay magkostiyum mi ug dramahon ang usa ka asoy sa librong Akong Basahon sa mga Estorya sa Bibliya. Naghimo pa gani mig props—mga espada, setro, basket, ug uban pa. Nagdula sab mig Bible game nga ‘tagnaa kon kinsa ko’ ug naghimog Bible board game nga may sayon ug lisod nga mga pangutana. Duna sab mi mga proyekto, sama sa paghimog gamayng modelo sa arka ni Noe o timeline sa mga hitabo sa Bibliya. Usahay idrowing namo ang mga karakter sa Bibliya o mga esena niana. Karon, may proyekto mi nga idrowing ang espirituwal nga armadura nga gihubit sa Efeso 6:11-17, ug ang matag usa kanamo magsaysay sa gihulagwayan niini. Kining mga paagiha nakatabang nga mahimong makalingaw ang among pagtuon sa pamilya.”
Si Debi, usa ka inahan nga taga-Michigan, U.S.A., miasoy: “Nalisdan mi sa akong bana sa pagkuha sa interes sa among tres-anyos nga anak babaye. Usa ka adlaw niana, samtang gibasahan nako siya sa asoy ni Isaac ug Rebeca sa Akong Basahon sa mga Estorya sa Bibliya, akong gigunitan ang duha ko monyeka nga samag nag-estoryahay kini. Naminaw siya pag-ayo! Sa misunod nga mga bulan, ang duha ka monyeka nagdula sa lainlaing karakter sa Bibliya. Inigkahumag basa sa usa ka estorya, ang among anak mangitag dulaan o ubang butang nga pwedeng gamiton sa pagdrama sa estorya. Sama kinig pagpangitag bulawan! Ang karton sa sapatos ug pula nga ribon nahimong balay ni Rahab nga may pulang pisi. Ang 1.5 metros nga dulaang bitin nga gilikos sa silhig nagsilbing tumbagang bitin sa Numeros 21:4-9. Among gibutang ang mga props sa dakong bag nga canvas. Malingaw ming motan-aw sa among anak nga pirmeng molingkod sa sala ug mangukay diha sa iyang ‘Bible story bag.’ Makapalipay kaayong magtan-aw niya nga magdrama-drama sa mga estorya sa iyang kaugalingong paagi!”
Dili sayon ang pagmatuto sa mga anak. Labaw pa kay sa senemanang mga sesyon ang gikinahanglan aron masilsil kanila ang tinguha sa pag-alagad kang Jehova. Apan ang pamilyahanong pagsimba ug pagtuon sa Bibliya mahimong pundasyon alang sa laing espirituwal nga instruksiyon. Sa walay duhaduha, dili gayod kawang ang imong paghago!