Kon Unsaon Pagtudlo sa mga Anak Bahin sa Diyos—Unsay Labing Epektibong mga Paagi?

“Kining mga pulonga nga akong gisugo kanimo niining adlawa kinahanglan nga maanaa sa imong kasingkasing; ug isilsil mo kini sa imong anak ug magsulti ka mahitungod niini sa maglingkod ikaw sa imong balay ug sa maglakaw ikaw sa dalan ug sa imong paghigda ug sa imong pagbangon.”—DEUTERONOMIO 6:6, 7.

USAHAY mabug-atan ang mga ginikanan sa responsibilidad sa pagmatuto sa mga anak. Sa kadaghan sa tambag nga mabatonan, sila malibog na hinuon kon unsay sundon. Ang mga paryente ug mga higala sagad dali rang mohatag ug sugyot. Ang mga libro, magasin, ug Internet naghatag sa mga ginikanan ug daghang nagkasumpaking tambag.

Sa laing bahin, ang Bibliya naghatag ug praktikal nga giya sa mga ginikanan kon unsay itudlo sa mga anak ug naghatag usab kinig kasaligang tambag kon unsaon pagtudlo kanila. Sumala sa gikutlong mga bersikulo, ang mga ginikanan kinahanglang mangitag paagi matag adlaw sa pagpakigsulti sa mga anak bahin sa Diyos. Ang mosunod maoy upat lamang sa Biblikanhong mga sugyot nga nakatabang sa linibo ka ginikanan sa pagtudlo sa mga anak bahin sa Diyos.

1. Pagkat-on gikan sa kalalangan. Si apostol Pablo misulat: ‘Ang dili-makita nga mga hiyas sa Diyos, nga mao ang iyang walay kataposang gahom ug pagka-Diyos, tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo.’ (Roma 1:20) Ang mga ginikanan dakog mahimo sa pagtabang sa mga anak nga masabtan nga ang Diyos tinuod nga Persona pinaagi sa pagtudlo kanila bahin sa kalalangan ug sa pagpakita kanila sa mga hiyas sa Diyos nga nadayag diha niana.

Gigamit ni Jesus kining paagiha sa dihang nagtudlo sa iyang mga tinun-an. Pananglitan, siya miingon: “Panid-i pag-ayo ang mga langgam sa langit, tungod kay sila wala magapugas ug binhi o magaani o magatigom sa mga balay-tipiganan; sa gihapon ginapakaon sila sa [inyong] langitnong Amahan. Dili ba kamo labaw pa ug bili kay kanila?” (Mateo 6:26) Gipasiugda ni Jesus dinhi ang gugma ug kaluoy ni Jehova. Apan labaw pa niana, gitabangan niya ang iyang mga tinun-an nga makita kon giunsa kini pagpasundayag sa Diyos ngadto sa iyang mga anak.

Gikuhaag leksiyon sa maalamong si Haring Solomon ang kinaiyanhong kaalam nga gihatag sa Diyos ngadto sa mga hulmigas. Siya misulat: “Adtoa ang hulmigas, ikaw nga tapolan, tan-awa ang iyang mga dalan ug magmaalamon. Bisan kon kini walay komandante, opisyal o magmamando, kini nagaandam sa iyang pagkaon sa ting-init; kini nagtigom sa iyang taganang kalan-on sa ting-ani.” (Proverbio 6:6-8) Nagtudlo gayod kini kanato sa pagtakdag hinungdanong mga tumong ug paggamit sa atong kusog nga hinatag sa Diyos sa pagkab-ot niini!

Masundog sa mga ginikanan ang epektibong pagpanudlo ni Jesus ug Solomon pinaagi sa pagbuhat niini: (1) Pangutan-on ang mga anak kon unsang tanom ug hayop ang nakapaikag kanila. (2) Magtuon ug dugang bahin niini nga mga tanom ug hayop. (3) Paghisgot kon unsang mga leksiyon ang gitudlo niini bahin sa Diyos.

2. Sundoga ang tinamdan ni Jesus sa iyang mga gitudloan. Sa tanang tawo nga nabuhi sukad, si Jesus ang may labing importanteng butang nga ikasulti. Apan kasagaran, siya mosuknag mga pangutana. Siya interesado kaayo sa hunahuna ug pagbati sa iyang mga gitudloan. (Mateo 17:24, 25; Marcos 8:27-29) Ang mga ginikanan daghan usab ug importanteng leksiyon nga ikatudlo sa mga anak. Apan aron mahimong epektibo, kinahanglan nilang sundogon si Jesus ug dasigon ang mga anak nga dili magpanuko sa pagpahayag sa ilang gibati.

Komosta kon ang mga anak badlonganon o dili dayon makakat-on? Tagda ang paagi ni Jesus sa iyang pagpakiglabot sa iyang mga apostoles. May mga panahon nga sila naglalisay ug wala dayon makakita sa kaayohan sa pagkamapainubsanon. Apan, si Jesus nagmapailobon ug sublisubling nagtudlo kanila nga kinahanglang magmapainubsanon. (Marcos 9:33, 34; Lucas 9:46-48; 22:24, 25) Kon sundogon sa mga ginikanan si Jesus, sila mapailobong magtul-id sa ilang mga anak, ug kon gikinahanglan, sublion ang samang leksiyon hangtod nga bug-os nilang masabtan ang kahinungdanon niini.a

3. Pagpakitag maayong panig-ingnan. Ang mga ginikanan kinahanglang mamati sa tambag ni apostol Pablo ngadto sa mga Kristohanon sa Roma. Siya misulat: “Hinunoa, ikaw ba nga nagatudlo sa uban, dili magtudlo sa imong kaugalingon? Ikaw nga nagawali nga ‘Ayaw pangawat,’ nagapangawat ka ba?”—Roma 2:21.

Hinungdanon kini nga tambag kay mas daling makita sa mga anak ang gibuhat sa mga ginikanan kay sa ilang gisulti. Ngani, kon magpakitag maayong panig-ingnan ang mga ginikanan, ang mga anak mas daling mamati sa ilang gitudlo.

4. Sugdi samtang ang anak bata pa. Ang kauban ni Pablo sa pagmisyonaryo nga si Timoteo may maayong dungog sa iyang komunidad. (Buhat 16:1, 2) Ang usa ka rason mao nga “sukad pa sa pagkamasuso” siya natudloan na “sa balaang mga sinulat.” Ang inahan ug lola ni Timoteo wala lamang magbasa kaniya sa Kasulatan apan nagtabang usab kaniya nga mangatarongan sa kamatuoran nga anaa niini.—2 Timoteo 1:5; 3:14, 15.

Asa Ka Makakaplag ug Tabang?

Ang mga Saksi ni Jehova nagpatik ug daghang publikasyon nga espesipikong gidisenyo sa pagtabang sa mga ginikanan sa pagtudlo sa ilang mga anak sa kamatuoran bahin sa Diyos. Ang pipila niini maoy alang sa gagmay pang mga anak. Ang uban niini makatabang aron ang mga ginikanan ug ang ilang tin-edyer nga mga anak kanunayng may maayong komunikasyon.b

Siyempre, sa dili pa makatudlo ang mga ginikanan sa mga anak bahin sa Diyos, kinahanglan silang mahibalo sa tubag sa lisod nga mga pangutana nga lagmit isukna sa mga anak. Pananglitan, unsaon nimo pagtubag ang mosunod: Nganong gitugotan sa Diyos ang pag-antos? Unsay katuyoan sa Diyos alang sa yuta? Hain ang mga patay? Ang mga Saksi ni Jehova malipay sa pagtabang kanimo sa pagtubag niini ug sa uban pang pangutana aron ikaw ug ang imong pamilya masuod sa Diyos.—Santiago 4:8.

[Mga footnote]