Ikaw Mabuhi sa Yuta sa Walay Kataposan

PAGKANINDOT NGA SAAD! Ang atong Maglalalang nagsaad kanatog walay kataposang kinabuhi, dinhi mismo sa yuta. Pero, daghan ang dili motuo niana. ‘Mamatay man gyod tang tanan,’ sila miingon. ‘Parte na gyod na sa kinabuhi.’ Para sa uban, posible ang kinabuhing walay kataposan, pero dili dinhi sa yuta. Sila miingon nga inigkamatay sa tawo, siya moadto sa langit ug mabuhi didto hangtod sa hangtod. Unsay imong hunahuna?

Maayong pamalandongon una nimo ang mga tubag sa Bibliya niining tulo ka pangutana: Unsay nagpakita nga ang tawo gidisenyo nga mabuhi sa walay kataposan? Unsa ang orihinal nga katuyoan sa Diyos alang sa yuta ug sa tawo? Nganong mamatay ang tawo?

ANG TALAGSAONG PAGKADISENYO SA TAWO

Sa tanang gilalang o gibuhat sa Diyos dinhi sa yuta, espesyal kaayo ang tawo. Ngano? Ang Bibliya nag-ingon nga gilalang sa Diyos ang mga tawo sumala sa iyang “larawan,” nga “kaamgid” niya. (Genesis 1:26, 27) Unsay ipasabot niana? Nagpasabot na nga ang mga tawo dunay mga kinaiya nga parehas sa Diyos, sama sa gugma ug hustisya.

Gihatagan sab ang tawo ug katakos sa paghunahuna ug pagpangatarongan, lakip ang katakos sa pag-ila kon unsay maayo ug daotan ug ang tinguha nga makaila ug masuod sa Diyos. Tungod niana, atong maapresyar ang pagkanindot sa uniberso ug sa kinaiyahan, lakip ang art, musika, ug mga balak. Labaw sa tanan, ang tawo dunay talagsaong katakos sa pagsimba sa Diyos. Tungod sa maong mga katakos, lahi kaayo ang tawo kay sa ubang mga linalang sa yuta.

Pero hunahunaa ni: Hatagan kaha sa Diyos ang mga tawo sa maong nindot nga mga kinaiya, lakip ang katakos sa pag-ugmad niana, kon gusto niya nga mabuhi lang ta sa mubo nga panahon? Ang tinuod, ang Diyos naghatag natog talagsaong mga kinaiya ug katakos aron atong ma-enjoy ang kinabuhi dinhi mismo sa yuta sa walay kataposan.

ANG ORIHINAL NGA KATUYOAN SA DIYOS

Ang uban nag-ingon nga dili katuyoan sa Diyos nga ang tawo mabuhi sa yuta sa walay kataposan. Sila nagtuo nga ang yuta gidisenyo ingong temporaryong puy-anan, usa ka dapit diin sulayan ang mga tawo kon angayan ba silang moadto sa langit ug magkinabuhi didto sa walay kataposan uban sa Diyos. Kon ugaling tinuod na, magpasabot na nga ang Diyos maoy hinungdan sa tanang pagkadaotan dinhi sa yuta. Pero lahi kaayo na sa tinuod nga kinaiya sa Diyos. Ang Bibliya nag-ingon: “Kay ang tanan niyang ginahimo hustisya. Diyos siya nga kasaligan ug walay inhustisya kaniya; matarong ug matul-id siya.”​—Deuteronomio 32:4.

Klarong gihisgotan sa Bibliya ang orihinal nga katuyoan sa Diyos alang sa yuta. Kini nag-ingon: “Ang kalangitan iya ni Jehova, apan ang yuta iyang gihatag sa mga anak sa mga tawo.” (Salmo 115:16) Oo, nindot kaayo ang pagkabuhat sa Diyos sa yuta, usa ka permanenteng puy-anan alang sa mga tawo, ug iya kining gidisenyo nga makatagana sa tanan natong panginahanglan aron malipayon tang mabuhi sa walay kataposan.​—Genesis 2:8, 9.

“Ang kalangitan iya ni Jehova, apan ang yuta iyang gihatag sa mga anak sa mga tawo.”​—Salmo 115:16

Gihisgotan sab sa Bibliya ang katuyoan sa Diyos alang sa tawo. Iyang gisugo ang unang magtiayon: “Pun-a ang yuta ug gamhi kini. Gamhi sab . . . ang matag buhing linalang sa yuta.” (Genesis 1:28) Pagkadakong pribilehiyo para nila nga atimanon ug himoong Paraiso ang tibuok kalibotan! Busa, ang paglaom ni Adan ug Eva ug sa ilang mga anak mao ang kinabuhing walay kataposan sa yuta, dili sa langit.

NGANONG MAMATAY TA?

Ngano kahang mamatay ta? Gihisgotan sa Bibliya nga usa sa mga anghel, nga sa ulahi nailhang si Satanas nga Yawa, mikuwestiyon sa mga kahikayan sa Diyos sa Eden. Sa unsang paagi?

Gikombinsir ni Satanas ang atong unang ginikanan, si Adan ug Eva, sa pagrebelde sa Diyos. Sa pag-ingon ni Satanas nga ang Diyos naghikaw ug maayong butang kanila​—ang ilang katungod sa pagkahibalo kon unsay maayo ug daotan—​si Adan ug Eva miduyog kang Satanas ug misupak sa Diyos. Unsay resulta? Sa ulahi, sila namatay, sumala sa gipasidaan sa Diyos kanila. Giwala nila ang ilang paglaom nga mabuhi sa walay kataposan sa Paraiso dinhi sa yuta.​—Genesis 2:17; 3:1-6; 5:5.

Ang pagrebelde ni Adan ug Eva nakaapektar sa tanang tawo hangtod karon. Ang Pulong sa Diyos nag-ingon: “Sama nga ang sala misulod sa kalibotan pinaagi sa usa ka tawo [si Adan] ug ang kamatayon pinaagi sa sala, ang kamatayon mikaylap sa tanang tawo.” (Roma 5:12) Mamatay ta kay atong napanunod ang sala ug kamatayon gikan sa atong unang ginikanan, dili tungod kay kini maoy ‘plano’ sa Diyos.

IKAW MABUHI SA YUTA SA WALAY KATAPOSAN

Ang rebelyon sa Eden wala makababag sa orihinal nga katuyoan sa Diyos alang sa tawo ug sa yuta. Tungod sa hingpit nga gugma ug hustisya sa Diyos, mihimo siyag paagi aron mahigawas ta sa pagkaulipon sa napanunod nga sala ug kamatayon. Si apostol Pablo miingon: “Ang bayad sa sala maoy kamatayon, apan ang gasa nga ginahatag sa Diyos maoy kinabuhing walay kataposan pinaagi ni Kristo Jesus nga atong Ginoo.” (Roma 6:23) Tungod sa gugma sa Diyos, “gihatag niya ang iyang bugtong nga Anak [si Jesu-Kristo] aron ang tanan nga magpakitag pagtuo kaniya dili malaglag kondili makabaton ug kinabuhing walay kataposan.” (Juan 3:16) Kay kinabubut-ong gihalad ni Jesus ang iyang kinabuhi ingong lukat, iyang gitubos ang tanang giwala ni Adan.a

Sa dili madugay, matuman na ang gisaad sa Diyos nga paraisong yuta. Mabatonan nimo kining nindot nga kaugmaon kon imong sundon ang gisugo ni Jesus: “Sulod mo agi sa sigpit nga ganghaan, kay lapad ang ganghaan ug luag ang dalan padulong sa kalaglagan, ug daghan ang nagasulod agi niini; samtang sigpit ang ganghaan ug gamay ang dalan padulong sa kinabuhi, ug diyutay ra ang nakakaplag niini.” (Mateo 7:13, 14) Oo, ang imong kaugmaon nagdepende nimo. Unsay imong himoon?