Kon Unsaon Pagtandog ang Kasingkasing sa Dili Relihiyosong mga Tawo

1. Sa pipila ka nasod, unsang kausaban ang nahitabo sa milabayng katuigan?

SA LINIBO ka katuigan, ang kadaghanan sa mga tawo sa kalibotan dunay relihiyon. Pero dunay dakong kausaban niining milabayng katuigan. Nagkadaghan ang walay relihiyon. Gani, sa pipila ka nasod, ang kadaghanan sa populasyon nag-ingon nga dili sila relihiyoso.b​—Mat. 24:12.

2. Unsay pipila ka hinungdan kon nganong daghan kaayo ang dili relihiyoso?

² Nganong nagkadaghan ang dili na relihiyoso?c Ang pipila tingali nagpokus sa mga kalingawan o sa mga problema. (Luc. 8:14) Dunay nahimong mga ateyista. Ang uban nagtuog Diyos pero naghunahuna nga ang relihiyon kinaraan na, dili na praktikal, ug wala mahiuyon sa siyensiya ug lohikal nga panghunahuna. Tingali madungog nila sa ilang mga higala, magtutudlo, o sa inilang mga tawo sa media nga ang kinabuhi nagsugod pinaagig ebolusyon, pero panagsa ra silang makadungog ug maayong mga rason nga motuo sa Diyos. Ang uban naglagot sa mga lider sa relihiyon nga hakog sa kuwarta ug gahom. Sa pipila ka dapit, ang mga gobyerno naghimog mga balaod nga nagdili sa relihiyosong kalihokan.

3. Unsay katuyoan niining artikuloha?

³ Si Jesus nagsugo kanato nga ‘tudloan ang mga tawo sa tanang kanasoran aron mahimong mga tinun-an.’ (Mat. 28:19) Unsaon nato pagtabang ang mga dili relihiyoso nga makakat-on sa paghigugma sa Diyos ug mahimong mga tinun-an sa Kristo? Kinahanglan natong ilhon nga ang reaksiyon sa usa ka tawo sa atong mensahe lagmit magdepende kon asa siya nagdako. Pananglitan, ang mga tawo nga nagdako sa Europe lahi tingalig reaksiyon niadtong nagdako sa Asia. Ngano? Sa Europe, daghan ang may kahibalo sa Bibliya ug nakadungog sa ideya nga gilalang sa Diyos ang tanang butang. Pero sa Asia, ang kadaghanan gamay rag nahibaloan o wala gyoy nahibaloan sa Bibliya, ug tingali dili sila motuo nga dunay Maglalalang. Ang katuyoan niining artikuloha mao ang pagtabang nato nga matandog ang kasingkasing niadtong atong mahibalag sa ministeryo, bisan asa sila nagdako o bisan unsay ilang gituohan.

MAGBATON UG POSITIBONG PANGLANTAW

4. Nganong angay tang magmapositibo?

⁴ Magmapositibo. Kada tuig, dunay mga dili relihiyoso nga mahimong Saksi ni Jehova. Daghan sa mga dili relihiyoso ang taas nag moral nga sukdanan ug nakasaway pag-ayo sa pagpakaaron-ingnon sa relihiyon. Ang uban kanila ubos ug moral nga sukdanan ug daghan ang may mga bisyo nga angayng biyaan. Sa tabang ni Jehova, makaseguro ta nga atong makita kadtong “nakiling sa pagdawat sa kamatuoran nga motultol sa kinabuhing walay kataposan.”​—Buh. 13:48; 1 Tim. 2:3, 4.

5. Unsay sagad nga hinungdan nga dawaton sa mga tawo ang atong mensahe?

⁵ Magpakitag Pagkabuotan ug Pagtahod. Sagad, ang mga tawo modawat sa atong mensahe, dili tungod sa kon unsay atong isulti, kondili sa paagi sa atong pagsulti niana. Maapresyar nila kini kon kita buotan, matinahoron, ug tinuod nga interesado kanila. Dili nato sila pugson sa pagpaminaw sa atong isulti. Hinunoa, maningkamot ta nga masabtan ang mga rason sa ilang opinyon bahin sa relihiyon. Pananglitan, atong mahibaloan nga ang pipila dili gustong makig-estoryag relihiyon niadtong dili nila kaila. Ang pipila naghunahuna nga dili maayong pamatasan nga pangutan-on ang usa kon unsay iyang opinyon bahin sa Diyos. Ang uban maulawng makit-an nga magbasag Bibliya, ilabina kauban sa usa ka Saksi ni Jehova. Bisan unsa pay rason, maningkamot ta nga masabtan ang ilang gibati.​—2 Tim. 2:24, footnote.

6. Giunsa pagpakita ni Pablo nga andam siyang mopahiuyon sa iyang kaestorya, ug unsaon nato siya pagsundog?

⁶ Unsay atong mahimo kon mamatikdan nato nga dili gusto sa atong kaestorya nga mogamit tag mga pulong sama sa “Bibliya,” “paglalang,” “Diyos,” o “relihiyon”? Mahimo natong sundogon si apostol Pablo ug ipahaom ang atong paagi sa pagpakigsulti kanila. Dihang nakig-estorya siya sa mga Hudiyo, siya nangatarongan gamit ang Kasulatan. Pero, sa dihang nakig-estorya siya sa intelektuwal nga mga Grego sa Areopago, wala siya moingon nga gikan sa Bibliya ang iyang gisulti. (Buh. 17:2, 3, 22-31) Unsaon nato pagsundog si Pablo? Kon makahibalag kag tawo nga dili motuog Bibliya, mas maayo tingali nga dili nimo isulti nga gikan sa Bibliya ang imong giingon. Kon mamatikdan nimo nga dili niya gustong makit-an nga gipabasa siyag Bibliya, sulayi ang dili kaayo mamatikdang paagi, sama sa pagpabasa niya diha sa gadyet.

7. Unsa tingali atong buhaton aron masundog ang ehemplo ni Pablo diha sa 1 Corinto 9:20-23?

⁷ Magmasinabtanon ug Pamati. Kinahanglang maningkamot ta nga masabtan kon unsay nakaimpluwensiya sa panghunahuna sa mga tawo. (Prov. 20:5) Tagda pag-usab ang ehemplo ni Pablo. Nagdako siya kauban sa mga Hudiyo. Segurado nga kinahanglan niyang ipahaom ang iyang paagi sa pagsangyaw ngadto sa mga Hentil, kinsa gamay rag nahibaloan o wala gyoy nahibaloan bahin kang Jehova ug sa Kasulatan. Kinahanglan tingali tang mag-research o mangutana sa eksperyensiyadong mga igsoon aron mas masabtan nato ang mga tawo sa atong teritoryo.​—Basaha ang 1 Corinto 9:20-23.

8. Unsa ang usa ka paagi nga makasugod tag pagpakig-estorya bahin sa Bibliya?

⁸ Tumong nato ang pagpangita sa mga tawong “takos.” (Mat. 10:11) Aron molampos ta, pangayoon nato ang opinyon sa mga tawo ug dayon maminaw ta pag-ayo. Ang usa ka brader sa England mangayog opinyon sa mga tawo kon unsay buhaton aron magmalipayon ang kaminyoon, magmalamposon sa pagpadako sa mga anak, o masagubang ang inhustisya. Human mapaminawi ang ilang opinyon, mangutana siya, “Unsay imong hunahuna aning tambag nga nasulat mga 2,000 ka tuig kanhi?” Dayon, ipakita niya kanila ang haom nga mga teksto diha sa iyang gadyet, pero dili siya maghisgot sa pulong nga “Bibliya.”

TANDOGA ANG KASINGKASING SA MGA TAWO

9. Sa unsang paagi matabangan nato kadtong sagad dili makig-estorya bahin sa Diyos?

⁹ Matandog nato ang kasingkasing niadtong sagad dili makig-estorya bahin sa Diyos pinaagi sa paghisgot ug topiko nga ganahan sila. Pananglitan, daghan ang nahingangha sa kalalangan. Busa puwede tang moingon: “Lagmit nahibalo ka nga daghang imbensiyon sa mga siyentipiko ang gikopya gikan sa kalalangan. Pananglitan, ang mga tigdisenyog mikropono nagtuon sa dalunggan, ug ang tigdisenyog kamera nagtuon sa mata. Unsay imong ikaingon bahin sa kalalangan? Kini ba mitungha lag iya o may naglalang?” Human maminaw pag-ayo, puwede tang moingon: “Dihang ang mga engineer magtuon bahin sa disenyo sa dalunggan ug mata, makapangutana tingali ta kon kang kinsa gikan ang ilang nakat-onan. Nainteres ko niining giingon sa usa ka magsusulat kaniadto: ‘Ang Usa nga nagbuhat sa igdulungog, dili ba siya makadungog? Ang Usa nga naghimo sa mata, dili ba siya makakita? . . . Siya ang Usa nga naghatag ug kahibalo sa katawhan!’ Uyon niini ang pipila ka siyentipiko.” (Sal. 94:9, 10) Dayon, puwede natong ipatan-aw ang video gikan sa jw.org^® nga makita diha sa “Interbiyo ug Eksperyensiya” sa seryeng “Ang Giingon sa Uban Bahin sa Sinugdanan sa Kinabuhi.” (Tan-awa ang PUBLIKASYON > VIDEO.) O puwede nato silang hatagag brosyur nga Gilalang ba ang Kinabuhi? o brosyur nga The Origin of Life​—Five Questions Worth Asking.

10. Sa unsang paagi makasugod ta sa pagpakig-estorya niadtong dili ganahang makig-estorya bahin sa Diyos?

¹⁰ Kadaghanan sa mga tawo nangandoy ug mas maayong kaugmaon. Pero, daghan ang nahadlok nga ang yuta magun-ob o dili na mapuy-an. Usa ka nagapanawng tigdumala sa Norway nag-ingon nga ang mga tawo nga dili ganahang makig-estorya bahin sa Diyos sagad gustong makig-estorya bahin sa kahimtang sa kalibotan. Human timbayaon ang mga tawo, siya moingon: “Sa imong hunahuna, kinsa kahay makahatag nato ug mas maayong kaugmaon? Ang mga politiko ba, siyentipiko, o duna pay lain?” Human maminaw pag-ayo, siya mobasa o mokutlo ug teksto nga naghisgot bahin sa maayong kaugmaon. Ang uban mainteres sa saad sa Bibliya nga ang yuta magpabilin hangtod sa hangtod ug ang maayong mga tawo magpuyo niini sa walay kataposan.​—Sal. 37:29; Eccl. 1:4.

11. Nganong angay natong sulayan ang lainlaing paagi sa pagpakig-estorya? Unsaon nato pagsundog ang ehemplo ni Pablo diha sa Roma 1:14-16?

¹¹ Angay tang mogamit ug lainlaing paagi sa pagpakig-estorya. Ngano? Tungod kay dili parehas ang mga tawo. Ang makapainteres sa usa dili makapainteres sa uban. Ang pipila mosugot ra nga maghisgot dayon ta bahin sa Diyos o sa Bibliya, pero ang uban mas gusto nga maghisgot una tag laing butang. Bisag unsa pa man, pahimuslan nato ang kahigayonan nga maestorya ang tanang matang sa tawo. (Basaha ang Roma 1:14-16.) Siyempre, angay natong hinumdoman nga si Jehova ang magpatubo sa kamatuoran diha sa kasingkasing niadtong nahigugma niana.​—1 Cor. 3:6, 7.

PAGSANGYAW NGADTO SA MGA TAGA-ASIA

12. Sa unsang paagi matabangan nato ang mga tawo nga gikan sa Asia nga wala maghunahuna kon duna bay Maglalalang o wala?

¹² Sa tibuok kalibotan, daghang magmamantala ang makahibalag ug mga tawo gikan sa Asia, apil kadtong gikan sa mga dapit diin may restriksiyon ang gobyerno sa relihiyosong kalihokan. Sa ubay-ubayng nasod sa Asia, daghan ang wala maghunahuna kon duna bay Maglalalang o wala. Ang pipila interesadong mahibalo ug modawat dayon ug Bible study, pero ang uban sa sinugdan magduhaduha sa pagtuon ug laing pagtulon-an. Unsay atong buhaton aron matabangan sila? Ang pipila ka eksperyensiyadong magmamantala nagmalamposon pinaagi sa pagsugod ug mahigalaong pagpakig-estorya, pagpakitag personal nga interes, ug kon haom, paghisgot kon sa unsang paagi sila nakabenepisyo sa pagpadapat sa mga prinsipyo sa Bibliya.

13. Unsay makatabang aron mainteres ang mga tawo sa Bibliya? (Tan-awa ang hulagway sa atubangan sa magasin.)

¹³ Daghan ang unang mainteres sa praktikal nga kaalam sa Bibliya. (Eccl. 7:12) Sa New York, usa ka sister nga nagsangyaw sa mga tawong nagsultig Mandarin miingon: “Naningkamot ko nga magpakitag interes sa mga tawo ug maminaw nila. Kon mahibaloan nako nga bag-o lang silang mibalhin gikan sa laing nasod, mangutana ko: ‘Komosta ang imong pagbalhin dinhi? Nakakita ka na bag trabaho? Okey ra ba ang pagtratar sa mga tawo nimo?’” Usahay makatabang ni aron makasugod siyag sangyaw. Kon haom, ang sister moingon: “Unsa kahay angayng buhaton aron makasinabot nato ang mga tawo? Puwede ba nakong ipakita nimo ang usa ka panultihon sa Bibliya? Kini nag-ingon: ‘Ang pagsugod ug away samag pag-ablig ganghaan sa tubig; sa dili pa modako ang away, biya na.’ Sa imong hunahuna, makatabang kaha ni aron naa tay maayong relasyon sa uban?” (Prov. 17:14) Kini nga pagpakig-estorya makatabang nato sa pag-ila kon kinsay interesadong magpaduaw pag-usab.

14. Unsay ginahimo sa usa ka brader sa Far East aron tabangan ang mga tawong nag-ingon nga dili sila motuog Diyos?

¹⁴ Pero komosta kon dunay moingon nga dili siya motuog Diyos? Usa ka brader nga daghan nag eksperyensiya sa pagsangyaw ngadto sa mga dili relihiyoso sa Far East miingon: “Kasagaran, kon dunay moingon, ‘Di ko motuog Diyos,’ iyang gipasabot nga dili siya motuo sa mga diyos nga gisimba sa kadaghanan diha sa ilang lugar. Busa sagad mouyon ko nga kadaghanan sa mga diyos hinimo sa tawo ug dili tinuod. Kasagaran basahon nako ang Jeremias 16:20: ‘Makabuhat ba ang tawo ug mga diyos alang sa iyang kaugalingon? Ang iyang gibuhat dili tinuod nga mga diyos.’ Dayon mangutana ko: ‘Unsaon nato pag-ila ang kalainan sa tinuod ug dili tinuod nga diyos?’ Maminaw ko pag-ayo, ug dayon basahon nako ang Isaias 41:23: ‘Sultihi mi sa mga mahitabo sa umaabot, aron mahibalo mi nga kamo maoy mga diyos.’ Dayon mohatag kog pananglitan kon unsay gitagna ni Jehova bahin sa umaabot.”

15. Unsang leksiyon ang atong makat-onan sa usa ka brader sa East Asia?

¹⁵ Ingon sab niana ang ginahimo sa usa ka brader sa East Asia dihang magbalikduaw. Siya miingon: “Akong ipakita kanila ang pipila ka praktikal nga mga prinsipyo sa Bibliya, natuman nga mga tagna sa Bibliya, ug mga balaod nga nagkontrolar sa uniberso. Dayon akong ipakita kanila nga kining tanan nagpamatuod nga dunay buhi ug maalamong Maglalalang. Kon makamatikod ko nga medyo mouyon siya nga dunay Diyos, ipakita nako kaniya ang giingon sa Bibliya bahin kang Jehova.”

16. Sumala sa Hebreohanon 11:6, nganong ang mga Bible study kinahanglang makabaton ug pagtuo sa Diyos ug sa Bibliya, ug unsaon nato sila pagtabang bahin niana?

¹⁶ Dihang mag-Bible study ta sa mga tawo nga dili relihiyosog kagikan, kinahanglang padayon natong palig-onon ang ilang pagtuo nga dunay Diyos. (Basaha ang Hebreohanon 11:6.) Angay sab nato silang tabangan nga molig-on ang ilang pagtuo sa Bibliya. Mahimong magpasabot ni nga balikbalikon nato pagtudlo ang pipila ka kamatuoran. Sa matag higayon nga mag-Bible study ta kanila, lagmit kinahanglan natong hisgotan ang mga ebidensiya nga ang Bibliya Pulong sa Diyos. Mahimong mag-apil ni ug mubong paghisgot bahin sa natuman nga mga tagna, pagkatukma sa Bibliya maylabot sa siyensiya ug kasaysayan, o sa praktikal nga mga prinsipyo niini.

17. Unsay epekto sa atong gugma ngadto sa mga tawo?

¹⁷ Matabangan nato ang mga tawo nga mahimong tinun-an sa Kristo pinaagi sa pagpakitag gugma kanila, relihiyoso man sila o dili. (1 Cor. 13:1) Sa pagtudlo nato kanila, tumong nato nga ipakita nga ang Diyos nahigugma nato ug gusto niya nga ato siyang higugmaon. Kada tuig, libolibo niadtong kaniadto gamay ra o wala gyoy interes bahin sa relihiyon ang mabawtismohan kay nakakat-on sila sa paghigugma sa Diyos. Busa magmapositibo, ug pagpakitag gugma ug personal nga interes sa tanang matang sa tawo. Paminawa ug sabta sila. Pinaagi sa imong ehemplo, tudloi sila nga mahimong tinun-an sa Kristo.