Pagtanyag sa Maayong Balita—Pinaagi sa Epektibong Paggamit sa mga Magasin
1 Ang Bantayanang Torre ug Pagmata! maoy makaayong mga tabang sa pagpahibalo kanato sa importante nga mga butang. Tungod niining maong katarongan, maayo nga basahon dayon nato ang atong personal nga mga kopya. Pinaagi sa pagbuhat niana, atong masinati ang atong kaugalingon sa mga materyal sa mga ulohan ug makabantay sa mga punto nga makapainteres sa mga tawo sa atong teritoryo.
2 Kasagaran sa magtanyag sa mga magasin, labing maayo nga ipasiugda sa hamubo ang usa lang ka punto sa usa ka isyu. Kon may sunodsunod nga mga artikulo ang nalangkit, ang pagtagad madapit ngadto sa ulohan nianang maong serye. O ang usa ka praktikal nga punto mahimong ihaylayt panagsa pinaagi sa aktuwal nga pagbasa ug usa ka bahin sa artikulo nga gipasiugda.
3 Sanglit kay ang Oktubre maoy bulan alang sa suskrisyon diin gipasiugda nato ang Pagmata!, ang Sosyedad nagtagana ug mga artikulo nga makaikag sa katawhan sa atong teritoryo. Bisan tuod nga ang Pagmata! maoy gipasiugda, apan may espesyal nga mga artikulo sa Bantayanang Torre nga magamit sa kanataran. Sa daghang mga bahin tingali buot nimo nga motanyag ug mga suskrisyon sa duha ka magasin alang sa ₱120.00 sa bulan sa Oktubre.
4 Sa magtanyag sa Oktubre 8 nga Pagmata!, walay duhaduha nga imong makaplagan nga halos ang tanan interesado sa panguna nga mga artikulo nga naghisgot bahin sa AIDS. Ang tema mao “Ang AIDS—Globonhong Kadaot? Unsaon Nimo Pagpanalipod sa Imong Kaugalingon?” Ang pila ka mga artikulo ning maong gula mao “Ngano nga Mikaylap Kaayo ang AIDS?” ug “Unsaon Paglikay ang AIDS.” Sa imong pagtanyag ning maong isyu, imong ikaingon: “Maayong buntag. Diay akong labing ulahing Pagmata! nga naghisgot sa ulohan nga may tibuok kalibotan nga importansiya, ang AIDS. Sanglit kay kalit kaayo kini nga mikaylap sa tibuok kalibotan, kitang tanan mahimong maapektohan niini. Busa nagtuo ako nga makainteres ka nga mobasa niining ulahing gula.”
5 Ang Oktubre 22 nga Pagmata! nga naghisgot sa diborsiyo ug legal nga paghupot sa bata ug mahimong makapainteres sa mga magtatambag sa pamilya ug mga abogado, maingon man niadtong nabalaka sa pagkapusgay sa mga pamilya karon.
6 Ang duha ka mga isyu sa Bantayanang Torre sa Oktubre, nagahisgot sa ilhanan nga gihatag ni Jesus sa kataposang mga adlaw. Ang Oktubre 1 nga isyu may tema nga, “Ang Ilhanan—Imo bang Nakita Kini?” ug ang Oktubre 15 nga gula nga may artikulo nga “‘Ang Ilhanan’—Pamatuod Nga ang Bag-ong Kalibotan Haduol Na?” Sa paghisgot niining maong isyu sa kanataran, imong ikaingon: “Kasagaran sa mga tawo mouyon nga kita nabuhi sa kritikal nga mga panahon, ug daghang nagpalandong kon mao ba kini ang katumanan sa ilhanan sa kataposang mga adlaw nga gihatag ni Jesus sa dinhi pa siya sa yuta. Nakamatikod ka ba niini nga ilhanan? Ang ulahing isyu sa Bantayanang Torre nagahisgot ning maong butang sa maidlot ug makatabang kanato nga makita kon unsay kahulogan ning maong ilhanan ug sa unsang paagi nga malikayan nato ang kalaglagan pinaagi sa pagpatalinghog niini.”
7 Pinaagi sa maayong pagpahibalo nga makaplagan sa mga magasin, amo kini nga ikatanyag nga epektibo. Magmapositibo kita sa pagtanyag sa mga suskrisyon niadtong tanan nga atong mahibalag sa Oktubre aron ang uban makahigayon nga makabenipisyo gikan ning maong mga artikulo. Tingali kining mga tawhana makabaton ug pagpabili sa Bantayanang Torre ug Pagmata! ug makaugmad ug “pagpangandoy sa dili sinambugang gatas nga iyaha sa pulong.”—1 Ped. 2:2.