Pagtanyag sa Maayong Balita—Ngadto sa mga Bata
1 Ang usa ka paglantaw sa imong palibot diha sa kadaghanan teokratikanhong mga panagkatigom motaganag dagayang pamatuod nga adunay dakong panon sa kabataan nga nagadayeg kang Jehova. (Sal. 148:12) Kini gayod magpahinumdom kanato sa panginahanglang hatagan ang mga batan-on nga atong mahibalag sa pag-alagad sa kanataran ug higayon gayod nga makakat-on kang Jehova ug sa iyang mga saad. Ang atong pagkaalisto ug pagkaandam sa pagsangyaw ngadto sa mga bata mohatag kanila niini nga higayon. Aduna ing pipila ka butang nga kinahanglang pagatagdon.
2 Ang usa ka positibong tinamdan ngadto sa mga bata ug sa ilang katakos sa pag-ugmad ug gugma kang Jehova gikinahanglan. Ang mga ehemplo sa Bibliya, sama kang Samuel, David, ug Timoteo, nagataganag pasalig nga kadtong linghod pa sa katuigan mahimo mang debotado gayod ngadto sa Diyos. (1 Sam. 2:18; Sal. 71:17; 2 Tim. 3:14, 15) Aduna usab ing moderno-adlaw nga mga panig-ingnan.
SA DIHANG USA KA BATAN-ON ANG MOANHA SA GANGHAAN
3 Sa dihang usa ka batan-on ang moanha sa ganghaan, ibutang sa hunahuna nga, nga ang kinabuhi sa maong batan-ong tawo maoy bililhon usab. Ipahiangay ang imong presentasyon ug ipaambit ang maayong balita kaniya. Ang yanong presentasyon nga nagapatin-aw kon sama sa unsa ang Paraiso o ang mubong paghisgot kon unsa ang anaa sa umaabot magamit man sa pagpukaw sa interes. Daghang kabataan sinati sa Pag-ampo sa Ginoo ug makasabot man sa mga komento kon unsa ang tubag sa maong pag-ampo nga magakahulogan sa pagkabag-o sa mga kahimtang sa kalibotan.
4 Sa pagpamatuod ngadto sa mga bata, maoy importante sa pagtahod sa ginikananong awtoridad. Depende sa ilang edad, mahimong angay sa pagpangutana kon ang ilang mga ginikanan nagatugot ba kanila sa pagpili sa ilang kaugalingong mga basahonon. Kon sila wala tugoti sa pagdawat ug literatura, sangyawi sila sa binaba ug hikayang mobalik sa dihang ang ilang mga ginikanan anaa sa balay. Kini basin mahimong tikanganan ngadto sa pagtabang usab sa mga ginikanan.
5 Ang pagkamapaangayon ug pagkaigmat nagalakip sa pagkasayod nga atong nabatonan ang gikinahanglan sa mga batan-on. Aduna kita ing nunot-panahong mga publikasyon nga gidesinyo sa pag-abot sa mga batan-on sa tanang panuigon. Ang Dakong Magtutudlo, Estorya sa Bibliya, Pagkabatan-on ug Pamilyahanong Kinabuhi maoy mga libro nga makahupot sa espesyal nga interes alang kanilang mga batan-on. Ug pagkadakong bahandi ang makaplagan diha sa Bantayanang Torre ug Pagmata! nga mga magasin! Ang bahin sa Pagmata! nga “Mga Batan-on Nangutana . . . ” ug ang serye sa Bantayanang Torre nga “Kinabuhi ug Ministeryo ni Jesus” haom man nga itanyag ngadto sa kabataan. Dili sayloan mao ang buloknong ‘brochures,’ sama sa Tagamtama ang Kinabuhi sa Yuta sa Walay Kataposan! Busa sa dihang mangandam ka alang sa pag-alagad sa kanataran, hunahunaa kon unsay imong madala nga makapadani sa mga batan-on.
6 Ang pagpahamtang sa hukom ni Jehova magaapektar sa tanan, apil ang “batan-ong lalaki ug ulay ug gamayng bata.” (Ezek. 9:6) Atong ikapakita ang mahigugmaong pagtagad sama gayod sa gibuhat ni Jesus ug magadalag panalangin pinaagig pagpaambit kanila sa maayong balita. (Mat. 19:14, 15) Mahimong positibo ug ihatag ang tukmang pamatuod ngadto sa mga batan-on, uban sa paglaom nga sila usab hayan mahimong mga magdadayeg ni Jehova.