Magmahunahunaon sa Magasin sa Oktubre
1 Ang Bantayanang Torre ug Pagmata! nagaunod sa makapadasig nga mensahe sa walay kataposang maayong balita. Ang pagkamahunahunaon sa magasin nagapasabot sa maampingong pagbasa niana aron pagtino kon sa unsang paagi ang mga artikulo makapadani sa katawhan sa atong teritoryo.
2 Una, sinatia ang mga artikulo nga gipatugbaw diha sa hapin. Ang mga ilustrasyon sa hapin mismo sagad magpalihok sa tagbalay sa pagdawat sa mga magasin. Pilia ang mga artikulo nga makapadani sa katawhan sa inyong teritoryo. Ang mga tawo ba sakop sa usa ra ka relihiyosong pagtuo? Unsa man ang panguna nilang gikabalak-an? Uban niining mga puntoha sa hunahuna, makapangandam ka ug epektibong presentasyon. Matikdi ang gihatag sa ubos.
3 Kon imong ginatanyag ang Oktubre 1 nga “Bantayanang Torre,” mahimong ikapaila mo ang artikulong “Ang Bibliya—Unsa ang Tinuod nga Bili Niini?” Makaingon ka:
◼ “Makakaplag ka ug usa ka Bibliya sa daghang panimalay sa atong dapit. Daghan kanila mibating kana nagaunod ug usa ka butang nga may espesyal nga bili.” Unya ikaw makasukna: “Unsay imong gihunahuna nga nakapahimo sa Bibliya nga talagsaon?” Human sa tubag sa tagbalay, makaingon ka: “Adunay daghang ebidensiya sa pagpamatuod nga ang Bibliya maoy dinasig sa Diyos ug masaligang giya alang kanato. Kini nagaunod sa kahibalo nga motultol kanato sa walay kataposang kinabuhi. [Basahang Juan 17:3.] Daghang tawo nagatahod niana apan wala mahibalo kon unsaon kana paggamit. Kining artikuloha sa Ang Bantayanang Torre nagasaysay kon sa unsang paagi magamit nimo sa personal ang Bibliya sa pagkaplag sa mga tubag sa imong mga pangutana bahin sa umaabot.” Ipatin-aw ang kahikayan sa suskrisyon ug itanyag kana sa tagbalay.
4 Sa paggamit sa Oktubre 15 nga “Bantayanang Torre,” hayan palabihon nimo ang yanong paagi nga sama niini:
◼ “Halos ang tanan nawad-an ug usa ka minahal diha sa kamatayon. Kining artikuloha nagabangon sa pangutanang: ‘Unsay Kahimtang sa mga Patay? Unsay imong gihunahunang mahitabo kon mamatay ang usa ka tawo? [Tugoting motubag.] Kon buot nimong masayod kon sa unsang paagi ang Bibliya nagatubag nianang pangutanaha, ikalipay nako ang pagbilin niining kopyaha sa magasin kanimo. Makadawat ka usab niining magasina nga makanunayon pinaagig usa ka suskrisyon.”
5 Ang Oktubre 22 nga “Pagmata!” nagasusi sa usa sa daghang ebidensiya nga nagapakita sa kapakyasan sa bakak nga relihiyon. Nga magagamit sa mga artikulo sa “Kon ang Relihiyon May Dapigan sa Gubat,” ikaw makasukna:
◼ “Kon si Jesus ania karon, unsay imong hunahuna nga iyang bation bahin sa tanang kapintasan sa atong palibot? [Tugoting motubag.] Si Jesus nagtudlo kanato nga higugmaon ang tanan, bisan ang atong mga kaaway. Bisan pa niana, daghang relihiyon nga nagaangkong Kristohanon nagadapig sa politikanhong mga panagbangi. Unsay imong hunahuna nga makaapektar sa mga tawo nga buot magkinabuhi kon unsa ang gitudlo ni Jesus? [Tugoting motubag.] Kining gulaa sa Pagmata! nagahisgot nianang makapatugaw nga pangutana ug nagapatin-aw kon sa unsang paagi ang Gingharian sa Diyos magatagana sa tubag.”
6 Paningkamoting itanyag ang mga magasin sa matag pultahan, bisan pag dili ka makapakighisgot sa Bibliya. Oo, magmahunahunaon sa magasin sa Oktubre!