Maayong Balita Alang sa mga Maaghop
1 Kita nagakinabuhi sa usa ka panahon sa di-mapugngang paghukom. (Ezeq. 9:5, 6) Maoy dinalian nga ang mga maaghop nga katawhan sa bisan diin mahibalo aron sila makapangandam kon unsay nagasingabot. Sa iyang mahigugmaong-kalulot, si Jehova nagsugo sa iyang katawhan sa “pagpahayag sa maayong balita ngadto sa mga maaghop.” (Isa. 61:1, 2) Ang atong mga magasin makatabang nato sa pagmantala, niining maayong balita sa tanang dapit.
2 Ang Bantayanang Torre nagahupay sa mga maaghop uban sa maayong balita nga sa di-madugay ang Gingharian sa Diyos maghimo niining yutaa nga usa ka paraiso. Ang Pagmata! nagalig-on sa pagsalig diha sa saad sa Maglalalang sa malinawong bag-ong kalibotan. Ang makaylapong pagpanagtag niining mga mantalaana mao ang labing tulin nga paagi sa pagdala sa maayong balita sa mga maaghop. Unsa man ang mga puntong igsusulti nga atong ikapatugbaw diha sa kinabag-ohang mga gula?
3 Imong ikapresentar ang Mayo 1 nga “Bantayanang Torre” pinaagig pagpunting sa artikulong “Pagbatog Kaayohan Gikan sa Pagbasa sa Bibliya sa Adlaw-Adlaw” ug mosukna sa pangutana:
◼ “Unsa man ang imong gihunahunang benepisyo nga atong makuha gikan sa pagbasa sa Bibliya? [Tugoting motubag.] Ang Bibliya mismo, sa Roma 15:4, nagatubag nianang pangutanaha. [Basahang Roma 15:4.] Ang kadaghanang tawo sa atong komunidad may Bibliya, apan diyutay ra ang nagabasa nianang makanunayon. Kami nagatuo nga ang segurado lamang nga paglaom alang sa umaabot makaplagan diha sa Bibliya, ug kita mabenepisyohan kon atong basahon kana.” Himoang dugang mga komento, ug unya itanyag ang suskrisyon.
4 Ang Mayo 15 nga “Bantayanang Torre” nagapaila sa usa ka artikulo nga nagaulohag “Usa ka Bag-ong Kinabuhi Alang sa Atong mga Katigulangan.” Hayan mapukaw nimo ang interes pinaagi niining maong pasiuna:
◼ “Daghan ang sagad nahibulong kon sama sa unsa ang ilang mga katigulangan. Tungod kay sila mga patay na, ang kadaghanang tawo nagahinapos nga dili gayod kita makaila. Gihunahuna ba nimo nga adunay posibilidad nga atong mailhan ang atong mga katigulangan?” Tugoting motubag. Basaha ang Juan 5:28, 29, ug isaysay kon sa unsang paagi ang Diyos nagsaad nga hatagan sila ug usa ka bag-ong kinabuhi diha sa paraisong yuta.
5 Imong ikatanyag ang Mayo 8 nga “Pagmata!” pinaagig pagsukna ug usa ka pangutana:
◼ “Unsay imong gihunahuna nga gikinahanglan aron mahimo ang kinabuhi nga takos gayod nga pagakinabuhian?” Tugoting motubag. Ipunting ngadto sa artikulong “Unsa ang Kahulogan sa Kinabuhi?”, panid 26, ug basaha kon unsa ang giingon ni Solomon sa Ecclesiastes 2:11. Unya, ipunting ang iyang tambag sa kapitulo 12, bersikulo 13. Dapitang tagbalay sa pagsuskriber.
6 Kon nagapanagtag ka ug magasin una pa ang Mayo 14, seguroang magdala ug mga kopya sa Kingdom News No. 34 ug itanyag kana sa bisan kinsa nga wala pa makadawat ug usa ka kopya. Kita kinahanglang andam kanunay sa pagbilin ug pipila ka basahon sa matag panimalay kon posible, nga nagaamgo nga mahimong mabasa kana sa uban sa pamilya ingon man sa mga higala nga magaduaw kanila. (1 Tim. 6:18) Ang maayong balita nga atong gidala ngadto sa mga maaghop mahimong makaluwas sa ilang mga kinabuhi.—1 Tim. 4:16.