Mga Ginikanan nga Nagamangayaon!
1 Kon ikaw usa ka batan-on nga nagapuyo sa usa ka Kristohanong panimalay, adunay usa ka espesyal nga paagi nga imong malipay ang imong mga ginikanan. Kon ikaw nagapangagpas sa matarong nga kurso, “ang imong amahan ug ang imong inahan magamangayaon.” (Prov. 23:22-25) Walay labaw nga makalipay sa imong mga ginikanan kay sa makita ikaw nga nagahimo sa kamatuoran nga imong kaugalingon ug nagapahinungod sa imong kinabuhi kang Jehova.
2 Ikaw makapasalamat nga adunay mga ginikanan nga anaa sa kamatuoran. Gikan sa imong pagkatawo, sila nagpakaon, nagbiste, ug nagpapuyo kanimo ingon man nagaatiman kanimo sa mga panahon sa balatian. Sila usab naningkamot sa pagtudlo kanimo bahin kang Jehova ug sa iyang matarong nga mga dalan; kini maoy pagbansay nga magseguro sa imong walay kataposang kinabuhi. (Efe. 6:1-4) Sa unsang paagi ikapakita nimo ang imong apresasyon?
3 Himoa ang Kamatuoran nga Imong Kaugalingon: Ikaw makapakitag apresasyon pinaagig pagbaton ug kaikag sa pagtuon sa pamilya nga dili na kinahanglang pugson. Ipakita ang tinguha sa pagtambong sa mga tigom, pagpangandam sa imong kaugalingon aron nga ang pamilya makaabot sa tukmang panahon. Lingkod tapad sa imong mga ginikanan sa panahon sa mga tigom ug ihatag ang suod nga pagtagad pinaagig pagsunod uban sa mga basahon nga ginatun-an. Sulaying mokomento sa mga tigom. Dawata sa kinabubut-on ang mga asaynment sa Tunghaan sa Teokratikanhong Ministeryo ug buhata ang imong maarangan sa pagtuman niana. Pagboluntaryo sa pagtabang sa pag-atiman sa mga gimbuhaton palibot sa Kingdom Hall.
4 Ipahiluna ang Mauswagong mga Tumong:
Panlimbasoging makabaton ug bug-os nga pakig-ambit sa pag-alagad sa kanataran, nga nagapakitag tinguha nga mahimong takos ingong usa ka magmamantala. Nunot sa senemanang pagbasa sa Bibliya o, mas maayo pa, basaha ang tibuok Bibliya sa imong kaugalingon. Magmadeterminado sa pagkab-ot sa mga kinahanglanon alang sa dedikasyon ug bawtismo. Maampingong planoha ang imong tun-anan sa tunghaan, uban ang panglantaw nga makabaton ug pagbansay nga magasangkap kanimo alang sa bug-os nga pakig-ambit sa pag-alagad kang Jehova. Ugmara ang kadungganan nga makapalihok sa uban sa pagrekomendar kanimo alang sa espesyal nga mga pribilehiyo sama sa pagpayunir o pag-alagad sa Bethel. (Buh. 16:1, 2) Ang pagbaton sa mga tumong makatabang kanimo nga “matino ang mas hinungdanong mga butang, aron nga kamo ... mapuno sa matarong nga bunga.”—Filip. 1:10, 11.
5 Ang pagkabatan-on maoy usa ka panahon sa pagkat-on ug pagbaton ug mga kahanas sa pagpakiglabot sa uban. Kini maoy usa ka panahon sa dihang ikaw magatagamtam sa kinabuhi nga wala ang tanang kaakohan nga anaa sa pagkahamtong. Si Solomon miingon: “Pagmaya, batan-ong tawo, sa imong pagkabatan-on, ug tugoting magabuhat ug maayo ang imong kasingkasing sa mga adlaw sa imong pagkabatan-on.” (Eccl. 11:9) Kon imong gamiton ang imong pagkabatan-on sa pag-alagad kang Jehova, imong maani ang mga panalangin nga molungtad sa walay kataposan.—1 Cron. 28:9.
6 Kon imong “tinguhaon ang pagkamatarong” inay kay “sa mga tinguha nga iya sa pagkabatan-on,” imong mahupay ang dakong kabalaka ug sakit sa kasingkasing sa imong mga ginikanan. (2 Tim. 2:22) Ikaw makahatag sa imong kaugalingong kasingkasing ug hinungdan sa pagmaya. (Prov. 12:25) Labaw sa tanan, ikaw makalipay sa imong Maglalalang, si Jehova nga Diyos.—Prov. 27:11.