Maikagong Isangyaw ang Maayong Balita
1 “Ako nangandoy sa pagpakigkita kaninyo . . . Adunay kaikag sa akong bahin nga ipahayag ang maayong balita usab kaninyo.” Kini ang pagkapahayag ni apostol Pablo sa iyang kaugalingon sa pagsugod sa iyang sulat ngadto sa mga igsoon sa Roma. Nganong maikagon si Pablo sa pagduaw kanila? Siya miingon: “Aron ako makabatog mga bunga taliwala usab kaninyo . . . Kay wala ko ikaulaw ang maayong balita; kini, sa tinuod, gahom sa Diyos alang sa kaluwasan.”—Roma 1:11-16.
2 Gipabanaag ni Pablo kining samang kaikag sa pagpakigsulti sa tigulang nga mga lalaki sa Efeso. Gipahinumdoman niya sila: “Sukad pa sa unang adlaw nga ako mitunob sa distrito sa Asia . . . , ako wala magpugong . . . sa pagtudlo kaninyo sa publiko ug sa balay ug balay. Apan ako bug-os nga nagpanaksi ngadto sa mga Judio ug ngadto sa mga Griego.” (Buh. 20:18-21) Sa tanan niyang natudlong teritoryo, si Pablo maikagon sa pagpakaylap sa maayong balita sa kaluwasan ug sa pagbaton ug mga bunga sa Gingharian. Pagkamaayong espiritu nga pagasundogon!
3 Hayan suknaon ta ang atong kaugalingon: ‘Nagapakita ba ako ug samang kaikag sa pagpahayag sa maayong balita sa akong komunidad? Inay kay isipon ang buluhatong pagsangyaw ingong usa lamang ka katungdanan, ako ba maikagon sa pagpaambit sa maayong balita sa daghang tawo kutob sa maarangan? Ako ba mainampoong nagtulotimbang sa akong personal nga mga kahimtang? Ako ba nagsuhid sa tanang posibilidad nga naglungtad diha sa among teritoryo, sama sa pagsangyaw sa balay ug balay, diha sa dalan, sa negosyohanang mga distrito, pinaagi sa telepono, ug sa impormal nga paagi?’
4 Pakig-ambit nga Maikagon Sulod sa Abril: Ang bulan sa Abril maoy maayong panahon sa pagpadako sa atong personal nga pakig-ambit sa buluhatong pagsangyaw. Ang gikunhorang kinahanglanong oras angayng magpaposible niini nga mas pa ang mag-oksilyare payunir. Tingali ang imong mga kahimtang motugot kanimo nga mag-alagad ingong oksilyare payunir sulod sa Abril ug Mayo. O ikaw hayan makaarang sa pagpalista ingong regular payunir, tungod sa kausaban sa kinahanglanong oras. Kon ikaw usa ka magmamantala sa kongregasyon, makahimo ka ba sa paggugol ug dugang panahon kay sa naandan diha sa pag-alagad niining bulana ug sa sunod, nga nagapaluyo niadtong makahimo sa pagpayunir? Makapalipay kana sa kasingkasing ni Jehova!
5 Sama ni Pablo, ang mga magmamantala sa Gingharian angayng magpadayon sa pagpakitag kaikag pinaagig pagkamatinguhaon sa buluhatong pagsangyaw. Ang pagbuhat kutob sa atong mahimo diha sa ministeryo mohatag kanatog tinuod nga kalipay. Si Pablo nakabaton niini nga kalipay sa iyang sagradong pag-alagad. Makaayo kanato ang pagsundog sa iyang ekselenteng panig-ingnan.—Roma 11:13; 1 Cor. 4:16.