“Unsay Kinahanglang Buhaton Ko?”
1 Ingong usa ka batan-on nga nagakahamtong, ikaw tingali mangutana, ‘Unsay kinahanglang buhaton ko sa akong kinabuhi?’ Ang Kristohanong mga batan-on buot magpauswag sa ilang pag-alagad kang Jehova diha sa ministeryo. Apan sa unsang paagi ikaw makabuhat niini samtang nagatuman sa mga responsabilidad sa pagkahamtong, nga naglakip sa pagtagana alang sa imong kaugalingong materyal nga mga panginahanglan? Ang pagpangita sa tubag hayan dili sayon.
2 Ang pipila ka batan-on mahimong mabalak-on sa dihang ilang lantawon ang kahimtang sa ekonomiya sa kalibotan ug ang mga panagna sa umaabot. Sila mangutana: ‘Kinahanglan bang mokuha ako ug dugang sekular nga edukasyon? Kinahanglan bang mosulod ako sa bug-os-panahong pag-alagad dihadiha?’ Aron makahimo sa hustong desisyon, ang usa ka tawo kinahanglang motubag niining pangutanaha nga matinud-anon, ‘Unsay akong pangunang interes sa kinabuhi?’ Kinahanglan niyang susihon ang iyang mga motibo.
3 Unsay imong giugmad ingong imong pangunang kabalaka sa panahon sa imong pagkabatan-on? Ikaw ba pangunang interesado sa pagpangitag pinansiyal nga bentaha, o buot ba gayod nimong gamiton ang imong kinabuhi sa pagpauswag sa intereses sa Gingharian? Ang usa ka titulo sa unibersidad dili makagarantiya ug kalamposan sa natad sa panarbaho. Ingong kapilian, daghan ang nakabaton ug mga kahanas sa trabaho pinaagi sa pipila ka bokasyonal o teknikal nga edukasyon sa eskuylahan, o mugbong mga kurso sa kolehiyo nga diyutayng panahon ug kalangkitan ang gikinahanglan.
4 Salig Kang Jehova sa Iyang Saad: Ang hinungdanong kamatuoran nga tagdon mao ang pasalig gikan kang Jehova nga Diyos nga siya motagana alang kanilang nagauna sa kinabuhi sa intereses sa Gingharian. (Mat. 6:33) Dili kini kay kawang nga saad. Daghang igsoong lalaki nga nagtambong sa Ministerial Training School ang nakabaton ug mga titulo sa kolehiyo sa wala pa makakat-on sa kamatuoran. Apan unsa may ilang gibuhat sa sekular nga trabaho? Pipila ra kanila ang nangagpas sa karera nga niana sila naedukar. Daghan ang nagtrabaho diha sa gipunting-pag-alagad nga nataran, nga nagaatiman pag-ayo sa ilang pinansiyal nga mga panginahanglan samtang nagapayunir. Pinaagi sa pagpauswag sa ilang kalihokan sa ministeryo, sila nagadawat ug mga panalangin nga labaw kaayo kay sa bisan unsang salapi.
5 Sa pagdesisyon kon unsay angay nimong buhaton human mograduwar sa hayskul, timbanga ang tanang butang ug susihag maayo ang imong mga motibo. Alang sa balanseng panglantaw sa imong mga pagpili, tagda ang maong impormasyon nga makita sa Pagmata! sa Marso 8, 1998, mga panid 19-21. Pagpakigsulti sa imong mga ginikanan, sa mga ansiyano, sa imong magtatan-aw sa sirkito, ug sa malamposong mga payunir sa inyong dapit. Motabang kana kanimo sa paghimog usa ka maalamong desisyon bahin sa kon unsay angay nimong buhaton sa imong kinabuhi.—Eccl. 12:1, 13.