Ikaw ba Makatabang?
1 Ang apostol nga si Pablo nagtambag sa mga membro sa kongregasyon nga “magbatog samang pag-atiman alang sa usag usa.” (1 Cor. 12:25) Busa, kita angayng magpakitag personal nga interes sa usag usa ug magmaandam sa pagtanyag ug mahigugmaong tabang sa dihang kini gikinahanglan. Ingong usa ka panig-ingnan, ang pipila sa espirituwal nga mga igsoong babaye sa atong taliwala nagpadako sa ilang mga anak diha sa kamatuoran nga nag-inusara. Kini nga mga igsoong babaye nagapas-an sa bug-os nga luwan sa kaakohan alang sa espirituwal nga pagbansay sa ilang mga anak. Tino nga sila takos sa atong mabinationg pagdasig ug praktikal nga tabang “sumala sa ilang mga panginahanglan.” (Roma 12:13a) Ikaw ba makatabang kanila?
2 Mga Paagi nga Ikaw Makatabang: Ang pagtanyag nga mosakay paingon sa mga tigom ug mga asembliya ngadto kanilang kinahanglang magsalig sa publikong transportasyon mahimong moresulta ug dakong mga pang-iyawat sa pinansiyal alang nianang pamilyaha. Ang pagtabang sa usa ka inahan sa pag-atiman sa iyang gagmayng mga anak diha sa mga tigom tingali magpabenepisyo kaniya nga mas bug-os gikan sa programa. Sa susama, ang pagtanyag ug tabang kaniya sa dihang iyang dad-on ang mga anak sa pag-alagad sa kanataran hayan makahatag kaniyag kahayahay. Ang pagpasundayag ug tinuod nga interes diha sa mga bata—nga makighigala kanila—makaimpluwensiyag dako sa atong mga batan-on sa positibong paagi. Usahay ang pagdapit sa pamilya sa nag-inusarang ginikanan nga moduyog sa inyong pagtuon sa pamilya motaganag makalunhaw sa espirituwal nga pagsapnay.
3 Magmaalamon: Kita angayng mag-amping nga dili ipugos ang atong pagtabang sa usa nga wala mobating nanginahanglan niana. Ni buot natong manginlabot sa personal nga mga butang sa pamilya sa usa ka tawo samtang nagahatag sa gikinahanglang tabang. Siyempre, ang mga igsoong babaye ug mga magtiayon mao ang anaa sa labing maayong posisyon sa pagtabang sa usa ka sister nga tabanganan.
4 Ang tanang Kristohanon gidasig sa ‘pagsunod sa dalan sa pagkamaabiabihon’ ngadto sa usag usa. (Roma 12:13b) Ang pagtabang sa atong espirituwal nga mga igsoong lalaki ug mga babaye maoy usa sa daghang paagi nga atong ikapakita ang samag-Kristo nga gugma nga anaa sa atong taliwala.—Juan 13:35.