Paggamit sa Internet—Magbantay sa mga Kapeligrohan!
1 Ang katawhan ni Jehova nagamaya sa maayong panag-ubanay sa usag usa. Sila nagamaya sa pag-ambitay ug mga kasinatian gikan sa ministeryo sa kanataran ug nagapabili sa pagpaminaw bahin sa mga hitabo maylabot sa mga Saksi ni Jehova ug sa buluhaton sa Gingharian sa tibuok kalibotan. Gusto silang masayod bahin sa bisan unsang butang talagsaon nga hayan maagoman sa atong mga igsoon, sama sa usa ka kalisdanan o kinaiyanhong katalagman, ug buot nilang masayran kon aduna ba silay mahimo aron sa pagtabang. Ang maong interes nagpakita sa panaghiusa sa panag-igsoonay, nga nagpamatuod nga kita gayod naghigugmaay sa usag usa.—Juan 13:34, 35.
2 Karong adlawa, kita daling makadungog bahin sa mga hitabo sa kalibotan. Ang mga sibya sa radyo ug telebisyon naghatag ug deretsong pagkobre sa mga panghitabo diha sa bug-os nga detalye ngadto sa mga mamiminaw sa tibuok globo. Ang telepono nagpaposible usab sa pakighinabi dihadiha sa mga tawo sa tibuok kalibotan. Diha sa mga komunikasyon ang di pa dugayng katingad-anan nga nahimong popular kaayo sa kalibotan mao ang Internet.—Tan-awa ang Pagmata!, Hulyo 22, 1997.
3 Ang imbento sa telepono nagbukas sa dalan ngadto sa daling personal nga komunikasyon sa tibuok kalibotan. Bisan pag ang telepono mapuslanon kaayo, ang pagbantay gikinahanglan sa paagi sa paggamit niini, kay kini mahimong usa ka himan alang sa dili angay nga panag-ubanay o mga kalihokan, ug ang sobrang paggamit sa telepono mahimong gastoso. Ang telebisyon ug radyo kahimudsan man diha sa natad sa edukasyon. Ikasubo, bisan pa niana, nga kadaghanan sa mga programa maoy makadaot sa moral, ug ang pagpatalinghog niana maoy pag-usik ug panahon. Ang kaalam magtukmod kanato sa pagkahimong mapilion kaayo sa paggamit sa telebisyon ug radyo.
4 Ang Internet magpaarang sa usa sa pakigkomunikar nga dili mahal kaayo sa ubang milyonmilyon sa tibuok kalibotan, ug magbukas kini sa pultahan ngadto sa hilabihan ka daghang impormasyon. (Pagmata!, Enero 8, 1998) Ang pasagad nga paggamit sa Internet, bisan pa niana, makaladlad sa usa ka tawo ngadto sa dakong espirituwal ug moral nga mga kapeligrohan. Sa unsang paagi mahimong ingon niini?
5 Daghan ang nabalaka bahin sa daling mabatonan nga impormasyon nga nagpakita kon unsaon sa paggamag mga armas, apil ang mga bomba. Ang industriya nagmulo bahin sa gidaghanon sa panahon nga giusikan sa mga trabahante sa paggamit sa Internet. Daghan na ang nahisgotan sa atong mga publikasyon bahin sa dayag nga mga kapeligrohan sa espirituwal nga nasagubang diha sa Internet. Daghang Web site nagpresentar ug mabangis ug pornograpikong mga materyal nga sa katibuk-an dili haom alang sa mga Kristohanon. (Sal. 119:37) Dugang pa niining mga kapeligrohana, adunay mas malalangong kapeligrohan nga ang mga Saksi ni Jehova ilabinang nagkinahanglang magbantay. Unsa kining kapeligrohana?
6 Dapiton ba nimo ang usa ka langyaw ngadto sa imong balay nga dili una susihon kon kinsa siya? Unsa na man kon walay paagi sa pagsusi? Tugotan ba nimo ang maong di-kaila nga mag-inusarang kauban sa imong mga anak? Kini maoy usa ka posibilidad nga di-malalis diha sa Internet.
7 Ang electronic mail mahimong ipadala ngadto ug madawat gikan sa mga tawong dili nimo kaila. Susama ang kahimtang sa dihang ikaw makigsultihanay sa elektronikong paagi diha sa katigoman o chat room. Ang mga sumasalmot usahay mag-angkon nga mga Saksi ni Jehova, apan kasagaran sila dili mga Saksi. Ang usa tingali mag-angkon nga usa ka batan-on apan dili diay. O ang usa ka tawo mahimong mamakak pa gani bahin sa tinong sekso.
8 Ang impormasyon nga ipasa kanimo tingali modangat diha sa pormang mga kasinatian o mga komento bahin sa atong mga pagtulon-an. Kining impormasyona ipasa ngadto sa uban kinsa, sa baylo, mopasa niini gihapon ngadto sa uban pa. Ang impormasyon sa katibuk-an di-kapamatud-an ug mahimong dili tinuod. Ang mga komento mahimong usa ka tabon sa pagpakaylap sa apostatang pangatarongan.—2 Tes. 2:1-3.
9 Nga anaa sa hunahuna kini nga kapeligrohan, kon ikaw mogamit sa Internet, suknaa ang imong kaugalingon: ‘Alang sa unsa nako kini gamiton? Aduna bay posibilidad nga ako madaot sa espirituwal tungod sa paagi sa akong paggamit niini? Ako ba makaamot sa pagkadaot sa espirituwal sa uban?’
10 Mga Web Site sa “mga Saksi ni Jehova”: Tagda, pananglitan, ang pipila ka Internet site nga gipahiluna sa mga indibiduwal nga nag-angkon nga mga Saksi ni Jehova. Sila modapit kanimo sa pagduaw sa ilang mga site aron basahon ang mga kasinatian nga gipaskin sa uban nga nag-angkon nga mga Saksi. Ikaw dasigon sa pagpaambit sa imong mga hunahuna ug mga panglantaw bahin sa literatura sa Sosyedad. Ang uban mohatag ug mga sugyot bahin sa mga presentasyon nga magamit sa ministeryo sa kanataran. Kini nga mga site motanyag ug mga chat room alang sa mga indibiduwal nga mokonektar, nga magtugot sa deretsong komunikasyon sa uban, susama sa pagpakigsulti diha sa telepono. Sagad sila motudlo kanimo sa ubang mga site diin ikaw makabaton ug on-line nga panag-ubanay sa mga Saksi ni Jehova sa tibuok kalibotan. Apan makaseguro ka ba nga kini nga mga kontak wala ibutang nga tinuyo sa mga apostata?
11 Ang panag-ubanay pinaagi sa Internet mahimong dili uyon sa rekomendasyon nga makaplagan sa Efeso 5:15-17. Si apostol Pablo misulat: “Padayong magbantay pag-ayo nga ang inyong paglakaw dili ingon sa dili-maalamon kundili ingon sa maalamon nga mga tawo, nga magapalit sa nahiangayng panahon alang sa inyong kaugalingon, tungod kay ang mga adlaw tuman-kadaotan. Tungod niini hunong na sa pagkadili-makatarunganon, apan padayong sabta kon unsa ang kabubut-on ni Jehova.”
12 Ang Kristohanong kongregasyon mao ang teokratikanhong paagi nga niana kita gipakaon sa espirituwal pinaagi sa “kasaligan ug mabuot nga ulipon.” (Mat. 24:45-47) Sulod sa organisasyon sa Diyos, atong nakita ang pagtultol ug proteksiyon sa pagpabilin kanatong bulag gikan sa kalibotan maingon man usab sa panukmod sa pagpadayong puliki diha sa buluhaton sa Ginoo. (1 Cor. 15:58) Ang salmista nagpaila nga iyang natagamtam ang kalipay ug pagbati sa kasegurohan taliwala sa natigom nga katawhan sa Diyos. (Sal. 27:4, 5; 55:14; 122:1) Ang kongregasyon nagtagana usab ug espirituwal nga pagpaluyo ug tabang alang kanilang nakig-uban niana. Diha niana, ikaw makakaplag ug usa ka grupo sa mahigugmaon, mahunahunaon, ug mabinationg mga higala—mga tawo nga imong nasayran sa personal kinsa andam ug kinabubut-ong motabang ug mohupay sa uban sa mga panahon sa kalisdanan. (2 Cor. 7:5-7) Ang mga membro sa kongregasyon ginapanalipdan sa Kasulatanhong tagana sa pagpalagpot kanilang kinsa dili mahinulsolong sad-an o nagpasiugdag apostatang panghunahuna. (1 Cor. 5:9-13; Tito 3:10, 11) Makadahom ba kita nga makakaplag niining samang mahigugmaong mga kahikayan sa dihang makig-uban sa lain pinaagi sa Internet?
13 Dayag kaayo nga ang kaatbang maoy tinuod. Ang pipila ka Web site maoy tin-awng mga instrumento alang sa apostatang propaganda. Ang maong mga Web site tingali moangkon nga lahi, ug ang mga apostata nga nagpaluyo sa site tingali mohatag ug detalyadong katin-awan sa pagpamatuod nga sila sa tinuoray maoy mga Saksi ni Jehova. Sila tingali mangayo pa gani kanimo ug impormasyon aron sa pagpamatuod nga ikaw maoy usa sa mga Saksi ni Jehova.
14 Buot ni Jehova nga imong gamiton ang salabotan. Ngano? Tungod kay siya nahibalo nga kini magapanalipod kanimo batok sa nagkalainlaing mga kapeligrohan. Ang Proverbio 2:10-19 nagbukas pinaagi sa pag-ingon: “Sa dihang mosulod ang kaalam diha sa imong kasingkasing ug ang kahibalo makapahimuot sa imo mismong kalag, ang katakos sa paghunahuna magabantay kanimo, ang salabotan magapanalipod kanimo.” Magapanalipod kanimo batok sa unsa? Gikan sa maong mga butang sama sa “daotang dalan,” niadtong mingbiya sa matul-id nga mga dalan, ug sa mga tawong imoral ug malalangon sa ilang katibuk-ang dalan.
15 Sa dihang kita moadto sa Kingdom Hall, walay pagduhaduha nga kita kauban sa atong mga igsoon. Kita nakaila kanila. Walay usa ang nagkinahanglan sa pamatuod niini tungod kay ang gipakitang inigsoong gugma maoy dayag. Wala kinahanglana kanato sa personal ang pagtagana sa mga kredensiyal sa pagpamatuod nga kita sa pagkamatuod usa sa mga Saksi ni Jehova. Ania dinhi nga atong makaplagan ang tinuod nga pagdinasigay nga gihisgotan ni Pablo sa Hebreohanon 10:24, 25. Ang mga Web site nga nagdasig ug on-line nga panag-ubanay dili masaligan sa pagtagana niini. Ang pagbaton sa hunahuna sa mga pulong sa Salmo 26:4, 5 makapaigmat kanato sa mga kapeligrohan nga daling masugamak sa dihang nagagamit ug mga Web site diha sa Internet.
16 Walay mga paglimite o mga pagdili bahin sa matang sa impormasyon nga gitagana ug mabatonan sa mga tiggamit ug Internet. Kasagaran, ang mga bata ug mga tin-edyer mao ang sayon nga mga tumong sa krimen ug pagpahimulos niini nga kahimtang. Ang mga bata masaligon, mausisaon, ug maikagon sa pagsuhid sa bag-ong kalibotan sa cyberspace. Busa kinahanglang dumalahon sa mga ginikanan ang ilang mga anak ug hatagan sila ug Kasulatanhong giya bahin sa paggamit sa Internet, sama nga ilang giyahan sila sa ilang pagpili sa musika o mga sine.—1 Cor. 15:33.
17 Ikasubo, ang pipila nga kaniadto atong mga igsoong lalaki ug babaye kinahanglang palagpoton tungod sa panag-ubanay nga nagsugod pinaagi sa pagkailhanay sa kalibotanong mga tawo diha sa mga chat room sa Internet ug sa ngadtongadto mitultol sa imoralidad. Sa kakurat nga di-makatuo, ang mga ansiyano misulat nga ang pipila mibiya gayod sa ilang mga bana o mga asawa sa pagpadayon sa usa ka relasyon nga nagsugod diha sa Internet. (2 Tim. 3:6) Ang ubang mga indibiduwal misalikway sa kamatuoran tungod sa pagtuo sa impormasyon nga gitagana sa mga apostata. (1 Tim. 4:1, 2) Kay natagad na kining tumang mga kapeligrohan, dili ba makataronganon nga magmabinantayon sa pagkalangkit sa chat nga mga sesyon diha sa Internet? Dayag, ang paggamit ug kaalam, kahibalo, katakos sa panghunahuna, ug panabot nga gihisgotan sa Proverbio 2:10-19 kinahanglang magpanalipod kanato niini.
18 Namatikdan, adunay ubay-ubayng mga indibiduwal nga nagmugnag mga Web site nga sa dayag alang sa pagsangyaw sa maayong balita. Daghan niini nga mga site gipaluyohan sa di-maalamong mga igsoon. Ang ubang mga site tingali gipaluyohan sa mga apostata nga buot nga haylohon ang di-mabinantayon nga mga tawo. (2 Juan 9-11) Sa pagkomento kon kaha adunay panginahanglan alang sa atong mga igsoon sa pagmugna sa maong mga Web site, ang Atong Ministeryo sa Gingharian, Nobyembre 1997, panid 7, nag-ingon: “Walay panginahanglan alang ni bisan kinsang indibiduwal nga mag-andam ug mga panid sa Internet bahin sa mga Saksi ni Jehova, sa atong mga kalihokan, o sa atong mga pagtulon-an. Ang atong opisyal nga site [www.watchtower.org] magtanyag ug tukmang impormasyon alang ni bisan kinsa nga buot niana.”
19 Mga Tabang sa Pagtuon Pinaagi sa Internet? Gibati sa pipila nga sila nagaalagad sa ilang mga igsoon pinaagi sa pagpaskin sa gidukiduking impormasyon may kalabotan sa lainlaing teokratikanhong mga kalihokan. Pananglitan, ang usa ka tawo tingali mohimog panukiduki pinasukad sa laraw sa pakigpulong publiko ug dayon ipaskin kini, nga naghunahuna nga ang maong impormasyon magamit kanilang nagkinahanglan sa pag-andam sa samang laraw. Ang uban mopaskin sa tanang kasulatan alang sa umaabot nga Pagtuon sa Bantayanang Torre o motaganag tinubdang materyal alang sa Tunghaan sa Teokratikanhong Ministeryo o Pagtuon sa Libro sa Kongregasyon. Ang pipila tingali motanyag ug mga sugyot alang sa mga presentasyon sa ministeryo sa kanataran. Kana ba gayod makatabang?
20 Ang mga publikasyon nga gitagana sa organisasyon ni Jehova magdasig sa atong kaisipan uban sa makapalig-ong mga puntos ug magbansay kanato “sa pag-ila nga mailhan ang husto ug ang sayop.” (Heb. 5:14) Makaingon ba kita nga kini nakab-ot kon lain ang mohimo sa panukiduki alang kanato?
21 Ang mga Kristohanon sa Berea gihisgotan ingong “mas hamilig-hunahuna kay sa niadtong sa Tesalonica.” Ngano? Tungod kay “ila mang gidawat ang pulong uban ang tumang kaikag sa hunahuna, nga sa adlaw-adlaw maampingong nagausisa sa mga Kasulatan kon tinuod ba kining mga butanga.” (Buh. 17:11) Bisan tuod sila si Pablo ug Silas nagsangyaw kanila, dili nila maangkon ang kamatuoran sa ilang kaugalingon nga dili magpalangkit sa personal.
22 Ang paggamit sa panukiduki sa laing tawo alang sa usa ka pakigpulong o alang sa ubang pagpangandam sa tigom magpakyas gayod sa katuyoan sa personal nga pagtuon. Dili ba maoy imong tinguha nga palig-onon ang imong personal nga pagtuo sa Pulong sa Diyos? Pinasukad sa personal nga kombiksiyon, ikaw makahimog publikong kapahayagan sa imong pagtuo—sa imong mga pakigpulong, sa mga komento sa mga tigom, ug sa ministeryo sa kanataran. (Roma 10:10) Ang paggamit sa panukiduki sa laing tawo dili mohaom sa paghubit nga gihatag sa Proverbio 2:4, 5 nga sa personal nga paagi ‘magpadayon sa pagpangita ug magpanukiduki sa mismong kahibalo sa Diyos ingon sa tinagong mga bahandi.’
23 Pananglitan, sa dihang mangita sa mga kasulatan sa imong kaugalingong kopya sa Bibliya, ikaw makasubli sa mubo sa konteksto sa matag kasulatan. Mahimo nimong ‘masubay ang tanang butang uban sa katukma,’ sama sa gibuhat ni Lucas sa dihang iyang gisulat ang iyang Ebanghelyo. (Luc. 1:3) Ang dugang paningkamot motabang usab kanimo nga mahimong hanas sa pagpangita sa mga kasulatan diha sa ministeryo ug sa dihang mohatag ug mga pakigpulong. Daghan ang miingon nga sila nakadayeg sa mga Saksi ni Jehova tungod kay sila nahibalo kon unsaon paggamit sa ilang mga Bibliya. Ang bugtong paagi nga kini mapadapat nganhi kanato mao kon atong himoon nga batasan sa personal sa pagpangita sa mga kasulatan diha sa atong kaugalingong mga Bibliya.
24 Paggamit sa Atong Panahon nga Maalamon: Ang laing pagtagad niining bahina adunay kalabotan sa gidak-on sa panahon nga gugolon sa pagmugna, pagbasa, ug pagsanong sa impormasyon nga gipaskin diha sa Internet. Ang Salmo 90:12 nagdasig kanato sa pag-ampo: “Ipakita kanamo kon unsaon gayod pag-ihap ang among mga adlaw sa paagi nga kami makabaton ug kasingkasing nga manggialamon.” Si Pablo miingon: “Ang panahong nabilin mubo na.” (1 Cor. 7:29) Ug midugang: “Nan, sa pagkatinuod, samtang kita may panahong paborable alang niini, buhaton nato ang maayo ngadto sa tanan, apan ilabina kanilang iglabot nato sa pagtuo.”—Gal. 6:10.
25 Ang maong tambag nagpasiugda sa panginahanglan kanato nga magmaalamon sa paggamit sa atong panahon. Pagkalabaw ug kaayohan ang paggugol ug panahon sa pagbasa sa Pulong sa Diyos! (Sal. 1:1, 2) Kana mao ang labing maayo nga panag-ubanay nga atong mabatonan. (2 Tim. 3:16, 17) Mga ginikanan, nagatudlo ba kamo sa inyong mga anak sa kahinungdanon sa paggamit nga maalamon sa ilang panahon sa Gingharianong mga pangagpas? (Eccl. 12:1) Ang panahon nga gigugol sa personal ug pagtuon sa Bibliya sa pamilya, pagtambong sa tigom, ug ministeryo sa kanataran molabaw gayod sa panahong gigugol sa pagpangitag impormasyon sa Internet, nga nagadahom nga makabaton ug mga kaayohan.
26 Niining bahina, maoy dalan sa kaalam ang pagsentro sa atong pagtagad diha sa espirituwal nga mga butang ug diha sa mga butang nga tukma ug hinungdanon sa atong kinabuhi ingong mga Kristohanon. Kini nagkinahanglan sa paghimog gihunahuna pag-ayong mga pagpili maylabot sa impormasyon nga takos sa atong panahon ug hunahuna. Ingong mga Kristohanon, nga maoy tukma sa atong mga kinabuhi gisuma ni Kristo, nga miingon: “Nan, padayong pangitaa nga una ang gingharian ug ang iyang pagkamatarong, ug kining tanang ubang mga butang idugang kaninyo.” (Mat. 6:33) Dili ka ba labing malipayon sa dihang ang imong kinabuhi puno sa mga pangagpas sa Gingharian inay kay sa bisan unsang ubang kalihokan?
27 Internet E-Mail: Bisan tuod ang pagpaambit ug personal nga mga kasinatian o mga hunahuna taliwala sa pamilya o mga higala nga nagpuyong magkalayo maoy haom, mahigugmaon ba gayod ang pagpasa niini ngadto sa uban nga tingali wala makaila sa imong pamilya o mga higala? O kinahanglan ba kining ipaskin diha sa Web page aron lamang mabasa ni bisan kinsa? Kini bang personal nga mga mensahe pagakopyahon ug ipadala nga way-pili ngadto sa mga tawo kinsa imong nailhan o wala? Sa susama, kon makadawat kag mga mensahe gikan sa uban nga tatawng dili alang kanimo, mahigugmaon ba ang pagpasa pa gihapon niini ngadto sa uban?
28 Komosta man kon ang kasinatian nga imong gipasa dili tukma? Dili ba kini pagpakig-ambit sa pagpatunhay sa bakak? (Prov. 12:19; 21:28; 30:8; Col. 3:9) Maoy dayag, ang padayong ‘pagbantay pag-ayo nga ang [atong] paglakaw dili ingon sa dili-maalamon kundili ingon sa maalamon nga mga tawo,’ mopalihok kanato sa pagtagad niini. (Efe. 5:15) Pagkamalipayon nato nga ang Yearbook, Ang Bantayanang Torre, ug Pagmata! napuno sa kapamatud-ang mga kasinatian nga nagdasig kanato ug nagpalihok kanato sa padayong paglakaw diha “sa dalan”!—Isa. 30:20, 21.
29 Adunay lain usab nga kapeligrohan. Si apostol Pablo miingon maylabot sa pipila: “Sila usab nakakat-on sa pagpakawalay-buhat, nagalaaglaag sa kabalayan; oo, dili lamang walay-buhat, kundili mga tabian usab ug mga tigpanginlabot sa mga kalihokan sa ubang mga tawo, nga nanagsulti sa mga butang nga dili nila angay isulti.” (1 Tim. 5:13) Kini nangatarongan batok sa paggugol ug panahon ug paningkamot sa pagpasa sa dili hinungdanong impormasyon ngadto sa atong mga igsoon.
30 Hunahunaa, usab, ang gidak-on sa panahon nga gugolon niana aron makanunot sa daghan kaayong E-mail. Nga makaikag, ang librong Data Smog miingon: “Samtang ang usa mogugol ug dugang ug dugang panahon sa linya, ang e-mail daling mausab gikan sa pagkamakapadasig nga bag-ong butang ngadto sa nagahurot-sa-panahon nga kabug-at, uban sa daghang mensahe nga basahon ug tubagon matag adlaw gikan sa mga kaubanan, mga higala, pamilya, . . . ug wala pangayoang mga panganunsiyo sa mga baligya.” Dugang pa, kini nag-ingon: “Daghang tawong tigpaukyab ang nakabaton sa daotan kaayong batasan sa pagpasa sa matag makalingaw nga impormasyon nga ilang nadawat—mga komedya, mga sugilambong sa siyudad, elektronikong mga chain letter, ug daghan pa—ngadto sa tanan diha sa ilang elektronikong address book.”
31 Dayag kini diha sa E-mail nga gipakatap taliwala sa daghang igsoon—ang maong mga butang sama sa mga komedya o kataw-anang mga estorya bahin sa ministeryo; mga balak nga lagmit gipasukad sa atong mga tinuohan; mga ilustrasyon gikan sa lainlaing mga pakigpulong nga nadungog sa mga asembliya, mga kombensiyon, o sa Kingdom Hall; mga kasinatian gikan sa ministeryo sa kanataran; ug uban pa—mga butang nga daw dili man makadaot. Kadaghanan naandan nang mopasa sa maong E-mail nga walay pagsusi sa tinubdan, nga nagpalisod mahibaloan kon kinsa gayod ang tagmugna, nga angay magpaduda sa usa kon ang impormasyon tinuod ba gayod.—Prov. 22:20, 21.
32 Ang maong sagad-di-hinungdanong mga mensahe dili mao ang matang sa makapahimsog nga mga pulong nga anaa sa hunahuna ni Pablo sa dihang siya misulat kang Timoteo, nga nag-ingon: “Padayong hupti ang sumbanan sa makapahimsog nga mga pulong nga imong nadungog kanako uban ang pagtuo ug gugma nga may kalabotan kang Kristo Jesus.” (2 Tim. 1:13) Ang “putling pinulongan” sa Kasulatanhong kamatuoran adunay “sumbanan sa makapahimsog nga mga pulong” nga pangunang gipasukad sa tema sa Bibliya bahin sa pagbayaw sa pagkamagmamando ni Jehova pinaagi sa Gingharian. (Sof. 3:9) Kita kinahanglang mohimo sa tanang paningkamot sa paggugol sa tanan natong mabatonang panahon ug kusog sa pagpaluyo niini nga pagbayaw sa pagkamagmamando ni Jehova.
33 Sanglit kita anaa na gayod sa hinapos nga panahon sa kataposan niining sistema sa mga butang, kinahanglan kitang magmabinantayon. Ang Bibliya nagpasidaan kanato: “Padayong hupti ang inyong panimuot, magmabinantayon. Ang inyong kontra, ang Yawa, nagasuroysuroy sama sa usa ka leon nga nagangulob, nga nagapangita ug usa nga matukob.” (1 Ped. 5:8) Kini dugang nag-ingon: “Isul-ob ang kompletong armadora gikan sa Diyos aron kamo makabarog nga malig-on batok sa mga malipatlipatong kaugdahan sa Yawa.”—Efe. 6:11.
34 Kon dili husto ang paggamit, ang Internet mahimong usa ka paagi nga niana si Satanas modaog niadtong nahaylo sa gahom niini. Bisan pag kini tingali adunay limitadong kapuslanan, aduna ing kapeligrohan kon dili kini tamdon uban ang pagbantay. Ang mga ginikanan ilabinang kinahanglang magmabalak-on bahin sa paggamit sa Internet sa ilang mga anak.
35 Ang paghupot ug timbang mga panglantaw sa Internet maoy usa ka panalipod. Atong gipabilhan ang tukma-sa-panahong pahinumdom ni Pablo: “Kadtong nagagamit sa kalibotan [himoang] ingon kanilang wala magagamit niini sa bug-os; kay ang talan-awon niining kalibotana nagakausab.” (1 Cor. 7:29-31) Ang paghupot niining mga butanga diha sa hunahuna padayong motabang kanato ug sa atong mga pamilya gikan sa pagkalinga sa tanang itanyag sa kalibotan, lakip na kon unsay mabatonan diha sa Internet.
36 Kinahanglan nga kita magpabiling suod sa atong mga igsoon diha sa kongregasyon ug maalamong gamiton ang nahibiling panahon, busa naghimo sa atong kaugalingon nga mabatonan alang sa pagpauswag sa intereses sa Gingharian. Samtang kining sistemaha duol nang matapos, kita “dili na magpadayon sa paglakaw sama usab sa paglakaw sa kanasoran diha sa pagkawalay-pulos sa ilang mga kaisipan,” kondili kita ‘padayon sa pagsabot kon unsa ang kabubut-on ni Jehova.’—Efe. 4:17; 5:17.