Pangutana

◼ Kinsa ang responsable sa paghinlo sa Kingdom Hall?

Ang Kingdom Hall nga hinlo ug madanihon nagbanaag nga mauyonon sa mensahe nga atong ginasangyaw. (Itandi ang 1 Pedro 2:12.) Ang paghupot sa tigomanan nga hapsay ug hinlo hinungdanon, ug ang tanan makaambit sa pagmentinar niini diha sa maayong kahimtang. Kita dili angay magdahom nga pipila lang ka tawo ang magpas-an sa tibuok nga kaakohan. Kasagaran, ang paghinlo hikayon pinaagi sa mga grupo sa Pagtuon sa Libro sa Kongregasyon, nga ang tagdumala sa pagtuon o ang iyang luyoluyo ang manguna. Sa mga tigomanan diin kapin sa usa ka kongregasyon ang magtigom, ang mga ansiyano mag-organisar sa mga butang aron ang tanang kongregasyon makaambit sa maayong pag-atiman niana.

Sa unsang paagi atong matagad kining responsabilidara sa labing maayong paagi? Ang Kingdom Hall kinahanglang hinloan sumala sa regular nga eskedyul. Ang mga suplay ug kahimanan kinahanglang mabatonan aron magamit sa paghinlo. Usa ka listahan sa mga butang nga kinahanglang buhaton angayng ipaskin aron ang mga trabahante makakonsulta niana alang sa pagtultol. Mahimong adunay duha ka lainlaing listahan, usa alang sa katibuk-ang di-bug-os nga paghinlo human sa matag tigom ug lain alang sa mas bug-os senemanang paghinlo. Ang tagdumala sa pagtuon sa libro kinahanglang mag-eskedyul sa bug-os nga paghinlo sa adlaw ug panahon nga kombenyente alang sa tanang natudlo. Hatagan usab ug regular nga pagtagad ang lagwerta, mga bulak, ug gagmayng kahoy. Ang mga agianan ug paradahan kinahanglang hinlo. Matag tuig kinahanglang himoon ang katibuk-ang paghinlo, tingali sa di pa ang Memoryal. Kini tingali maglakip sa paghugas sa mga bentana, mga bungbong, ug mga kortina.

Siyempre, ang tanan kanato makapagaan sa trabaho pinaagi sa dili paghulog ug chewing gum o paghugawhugaw sa sulod o sa gawas sa tigomanan. Mahimo natong hinloan ang kasilyas human sa matag paggamit, nga magbiya niana nga hinlo alang sa sunod nga tawo. Mag-amping aron malikayan ang pagkaguba sa kahimanan o pagkadaot sa mga kasangkapan. Magmatikod sa mga mansa sa salog, daot nga mga lingkoranan, mga problema sa tubo, napundir nga mga bombilya, ug uban pa, ug itaho dayon kining mga butanga ngadto sa igsoong lalaki nga gitugyanan sa pag-atiman sa Kingdom Hall.

Hinaot nga kitang tanan mahinangop sa pagbuhat sa atong bahin. Kini maghimo sa balay sa pagsimba nga kahimut-anan ug magpalahi kanato ingong hinlong katawhan nga nagapasidungog kang Jehova nga Diyos.​—1 Ped. 1:16.