“Ipahinabo ang Tanang Butang Alang sa Pagpalig-on”
1 Sa pagpakiglabot sa atong mga igsoon, buhaton gayod nato kon unsay maayo alang sa ilang pagpalig-on. Kini nagpasabot sa pagkahimong mabalak-on bahin sa pagpanalipod sa ilang espirituwal nga mga interes. Kon kita nag-atiman sa pipila ka matang sa sekular nga trabaho nga naglangkit sa pagpailaila sa usa ka produkto o serbisyo, kita kinahanglang mag-amping nga dili nato buhaton ang makapandol sa atong mga igsoon.—2 Cor. 6:3; Filip. 1:9, 10.
2 Ang uban nalangkit sa lainlaing pamasin nga mga negosyo, nga naghunahuna sa kaubang mga Kristohanon ingong malaomang mga pumapalit. Ang pipila ka organisasyon sa pamaligya nagdasig sa ilang mga representante nga hunahunaon ang tanan ingong malaomang pumapalit—lakip niadtong pareho nilag relihiyon. Ang pipila sa mga igsoon nag-organisar ug dagkong mga panagkatigom sa mga Saksi sa tuyo nga dasigon sila nga malangkit sa usa ka palakaw sa negosyo. Ang uban nagpailaila sa ilang negosyo pinaagi sa pagpadala ug wala-pangayoang mga artikulo, mga brosyur, impormasyon sa Internet, o video ug cassette nga mga teyp ngadto sa mga isigkamagtutuo. Husto ba alang sa usa ka Kristohanon nga gamiton ang iyang teokratikanhong mga kontak aron pahimuslan ang iyang espirituwal nga mga igsoon? Dili!—1 Cor. 10:23, 24, 31-33.
3 Ang mga Igsoon Angayng Magbantay: Wala kini magpasabot nga ang usa ka Kristohanon dili makanegosyo uban sa usa ka igsoon. Kana maoy personal nga butang. Apan, ang pipila nagpasiugda ug mga laraw sa negosyo nga nagdasig ug kahakog, ug gidasig nila ang ilang mga isigkamagtutuo nga mahimong ilang mga kauban o mga tigpamuhonan. Daghan niini nga mga negosyo mahapay, nga magpordoy sa mga sumasalmot ug dakong kantidad sa salapi. Bisan pa kon kadtong moapil sa negosyo tingali natukmod tungod sa tinguha sa pagbaton ug dihadihang ganansiya, ang tig-organisar dili angayng mobati nga siya dili mabasol kon ang palakaw mapakyas. Kinahanglang mainampingon niyang konsiderahon nga abante kon sa unsang paagi ang espirituwal ug pisikal nga kahimsog sa iyang mga igsoon maapektohan kon mahitabo nga ang negosyo dili molampos. Kadtong naghupot ug mga posisyon sa teokratikanhong responsabilidad ilabinang angayng magmabinantayon bahin sa ilang sekular nga mga panlimbasog tungod kay ang uban mahimong molantaw kanila nga may pagtahod ug mosalig gayod kanila. Maoy sayop nga abusohan ang maong pagsalig. Ang mga pribilehiyo sa sagradong pag-alagad hayan mawala kon ang uban mawad-an na ug pagtahod sa usa ka igsoon.
4 Ang atong tumong mao gayod nga “ipahinabo ang tanang butang alang sa pagpalig-on.” (1 Cor. 14:26) Kinahanglan natong likayan ang pagbuhat sa bisan unsang butang nga nagpailailag komersiyal nga mga kalihokan ngadto sa kongregasyon o nagpasiugda niana. Ang maong mga butang walay labot sa atong Kasulatanhong mga hinungdan sa panagkatigom.—Heb. 10:24, 25.